Suraxanı rayonunda akademik Zərifə Əliyevanın doğum günü qeyd olunur

Görkəmli oftalmoloq alim, bənzərsis ziyalı, qayğıkeş insan Zərifə Əliyevanın anadan olmasının 90-cı ildönümü tamam olur. Bu münasibətlə ölkəmizin hər yerində Azərbaycan səhiyyəsinə misilsiz töhfələr vermiş, respublikamızın ictimai-siyasi həyatında fəal rol oynamış Zərifə Əliyevanın doğum günü böyük təntənə ilə qeyd edilir, onun parlaq, nurlu xatirəsı ehtiramla anılır.

Dünən rayon icra hakimiyyətinin təşkilatçılığı ilə Suraxanıdakı 16 saylı uşaq poliklinikasında keçirilən tədbir də görkəmli elm və ictimai-siyasi xadim, müasir Azərbaycan qadınları üçün, sözün əsl mənasında, ideal sayılan Zərifə xanımın əziz, nurlu xatirəsinə olan ehtiramın, sonsuz məhəbbətin parlaq təcəssümü idi.

Poliklinikanın baş həkimi Sevda Vəzirova tədbiri giriş sözü ilə açaraq qeyd etdi ki, Zərifə xanım Əliyeva qədirbilən xalqımızın, onu yaxından tanıyanların, qohum və doğmalarının yaddaşında görkəmli ziyalı, elm xadimi, gözəl insan, vəfalı ömür-gün yoldaşı, qayğıkeş ana, bənzərsiz vətəndaş kimi qalmışdır. Ömrünü insanların sağlamlığının qorunmasına həsr etmiş bu nəcib xanım, həm də körpələri, balacaları sonsuz məhəbbətlə sevir, onları Tanrının ən müqəddəs payı hesab edirdi. Məhz bütün bu keyfiyyətlərinə görədir ki, Zərifə xanım hər zaman hamı tərəfindən sevilir, əziz xatirəsi ehtiramla yad olunur.

Sonra həmin tibb müəssisəsinin həkimləri Pəri Əzəmətova, Aynur Ələsgərova, Cəbrayıl Paşayev və 23 saylı şəhər poliklinikasının həkimi Mətanət Atayeva çıxış edərək Azərbaycan elminə, səhiyyəsinə misilsiz töhfələr vermiş tanınmış oftalmoloq alimin, cəmiyyətimiz üçün layiqli vətəndaş, görkəmli ictimai-siyasi xadim yetişdirən bir ananın doğum gününü təqvimin ən əlamətdar günlərindən biri kimi dəyərləndirmişlər. Natiqlər bugünkü tədbirin tibb müəssisəsində qeyd edilməsinin heç də təsadüfi olmadığını diqqətə çatdıraraq bildirdilər ki, bütün şüurlu ömrünü insanların sağlamlığının qorunmasına, neçə-neçə xəstəyə dünya işığı bəxş etmiş Zərifə xanım gələcəyimiz olan uşaqları bir ana kimi sevir, onlara xüsusi qayğı və nəvazişlə yanaşırdı.

Tədbirdə iştirak edən rayon icra hakimiyyəti başçısı aparatının şöbə müdiri Barxudar Barxudarov tanınmış oftalmoloq alim, bənzərsiz insan, sədaqətli ömür-gün yoldaşı, gözəl, mehriban ana Zərifə xanım Əliyevanın nəsillərə örnək olan ömür yolunun bəzi məqamlarından söhbət açdı. Natiq qeyd etdi ki, Zərifə xanım xalqımızın yetişdirdiyi elə şəxsiyyətlərdən olub ki, o, təkcə elmi fəaliyyəti ilə deyil, bütün mənəvi keyfiyyətləri, nəcib xüsusiyyətlərinə görə də hər zaman sevilir. Çünki yüksək əxlaqi və mənəvi dəyərlərə malik ailədə göz açmış Zərifə xanım işıqlı bir ömür yaşadığı kimi insanlara da nur bəxş etdi, onlara diqqət və qayğısını heç zaman əsirgəmədi.

Vaqif BAYRAMOV

Xalq qəzeti.- 2013.- 25 aprel.- S. 13.