Azərbaycan qadını mədəni və siyasi quruculuğun fəal iştirakçısıdır

Azərbaycan qadınlarının IV qurultayına hazırlıq çərçivəsində Binəqədi rayon qadınlarının konfransı keçirildi. Rayon ictimaiyyəti nümayəndələrinin də iştirak etdiyi konfransı təbrik sözü ilə rayon icra hakimiyyəti başçısının müavini Vüsal İsmayılov açaraq bildirdi ki, xalqımızın bütün tarixi boyu Azərbaycan qadını öz iradəsi və mərdliyi, saflığı və sədaqəti ilə cəmiyyətimizin həyatında, xalqımızın milli-mənəvi dəyərlər sisteminin formalaşmasında müstəsna rol oynamışdır. Dünən məhdud hüquqları olan Azərbaycan qadını bu gün ölkədə mədəni və siyasi quruculuğun fəal iştirakçısıdır.

Natiq daha sonra demişdir ki, bütün bunların və Heydər Əliyev siyasətinin Prezident İlham Əliyev tərəfindən uğurla davam etdirilməsi nəticəsində ölkəmizdə qadın hüquqlarının təmin olunması sahəsində ölçüyə gəlməyən işlər görülmüşdür. İndi müasir Azərbaycanda elə bir sahə yoxdur ki, orada qadınlar iştirak etməsin.

Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva, 83 saylı məktəb-liseyin direktoru Yaqut Sadıqova, 20 saylı şəhər poliklinikasının baş həkimi Xuraman Hüseynova, Binəqədi Mərkəzi Mədəniyyət Evinin direktoru Zivər Abbasova və rayon qeydiyyat şöbəsinin rəisi Tavat İsmayılova qeyd etdilər ki, Azərbaycan cəmiyyətində qadının ictimai-siyasi, sosial-iqtisadi və mədəni sahələrdə rolu ildən-ilə artır. Bütün bunlar ölkədə demokratik dövlət quruculuğunun, ulu öndər Heydər Əliyev tərəfindən əsası qoyulan və Prezident İlham Əliyev tərəfindən uğurla davam etdirilən siyasətin əməli nəticəsidir. İndi müstəqil Azərbaycanda gender bərabərliyinin təmin olunması üçün möhkəm hüquqi baza var. Bu gün qadının sosial vəziyyətinin yüksəlməsi daha parlaq surətdə cəmiyyətin bütün fəaliyyət sahələrində özünü büruzə verir.

Konfrans Binəqədi rayonundan respublika qadınlarının ali məclisinə nümayəndələrin seçkisi ilə işini başa vurdu.

Vaqif BAYRAMOV

Xalq qəzeti.- 2013.- 25 aprel.- S. 13.