Azərbaycan jurnalistləri Şimali Kiprdə

Kütləvi İnformasiya Vasitələrinin İnkişafına Dövlət Dəstəyi Fondu ardıcıl olaraq jurnalistlərin beynəlxalq təcrübəni öyrənməsi sahəsində layihə həyata keçirir. Layihə çərçivəsində növbəti səfər Şimali Kipr Türk Cümhuriyyətinə təşkil olunub.

Nümayəndə heyətinə KİVDF-nin icraçı direktoru Vüqar Səfərli, Milli Televiziya ve Radio Şurasının sədri Nuşirəvan Məhərrəmli, Mətbuat Şurasının sədri Əflatun Amaşov, Beynəlxalq Avrasiya Mətbuat Fondunun rəhbəri Umud Mirzəyev, millət vəkili, “Ədalət” qəzetinin təsisçisi Aqil Abbas, “Zerkalo” qəzetinin baş redaktoru Elçin Şıxlı, “525-ci qəzet”in baş redaktoru Rəşad Məcid, “Bakı Xəbər” qəzetinin baş redaktoru Aydın Quliyev, “Palitra” qəzetinin baş redaktoru Namiq Əliyev, “Olaylar” qəzetinin baş redaktoru Yunus Oğuz, “Azadlıq” qəzetinin məsul katibi Elşən Şirinov, “Dialoq Avrasiya” jurnalının Azərbaycan üzrə kordinatoru Mustafa Saatçı daxil idilər.

Nümayəndə heyətinin ilk görüşü Şimali Kipr Türk Cümhuriyyətinin Baş naziri cənab İrsen Küçüklə olub. Görüşdə KİVDF-nin icraçı direktoru Vüqar Səfərli bildirib ki, rəhbərlik etdiyi qurum Azərbaycanda mətbuatın inkişafına dövlətin dəstəyi məqsədilə yaradılıb. Azərbaycan media təmsilçilərinin beynəlxalq təcrübəni öyrənməsi də bu sahədə atılan addımlardan biridir. Baş nazir İrsen Küçük Azərbaycandan belə bir nümayəndə heyətinin gəlməsindən məmnunluğunu bildirib və bu cür görüşlərin, qarşılıqlı əlaqələrin daha da güclənməsinə xidmət etdiyini söyləyib. Növbəti görüş Şimali Kipr Türk Cümhuriyyətinin Prezidenti cənab Derviş Eroğlu ilə olub. Derviş Eroğlu bildirib ki, qardaş xalqlar arasında səfərlərin çoxalması onların bir-birini tanımasına, təcrübələrini bölüşməsinə imkan yaradır. KİVDF-nin icraçı direktoru Vüqar Səfərli Azərbaycanla ŞKTC arasında turizm və təhsil sahəsində əlaqələrin daha da gücləndiyini qeyd edib: “Ümidvarıq ki, bu cür görüşlər əlaqələrimizi daha da gücləndirəcək”. Səfər çərçivəsində ŞKTC-nin xarici işlər naziri cənab Hüseyn Özgürgün ilə də görüş keçirilib. Nümayəndə heyəti keçirdiyi bütün görüşlərdə qarşı tərəfə xatirə hədiyələri təqdim edib.

Nümayəndə heyətinin növbəti görüşü isə “Kıbrıs” Media Qrupunun İdarə Heyətinin sədri Rəşad Akarla keçirilib. Belə bir geniş nümayəndə heyətinin gəlişindən razılığını bildirən Rəşad Akar qeyd etdi ki, ŞKTC-nin ən böyük media qrupu olan “Kıbrıs” Media Qrupunun eyniadlı qəzeti, televiziyası və radiosu var. Bundan başqa qrupun “Cyprus Today” adı ilə həftədə iki dəfə olmaqla ingilis dilində qəzeti də nəşr olunur. “Kıbrıs”ın tirajı 13 minə çatır ki, bu da ŞKTC-nin ən böyük tirajlı qəzeti deməkdir. Qəzetin reklam gəliri ayda 1 milyon türk lirəsinə çatır. Görüşə görə təşəkkür edən Vüqar Səfərli bildirib ki, beynəlxalq təcrübənin öyrənilməsi Azərbaycan mətbuatı üçün mühüm əhəmiyyət kəsb edir: “Sizin reklam sahəsindəki təcrübəniz bizim üçün də maraqlı ola bilər. Biz artıq bu sahədə Türkiyə təcrübəsini öyrənmişik və bunu Azərbaycanda tətbiq etmək fikrimiz var”. Görüşdə gələcəkdə əlaqələrin daha da möhkəmləndirilməsi qərara alınıb.

Daha bir görüş Kıbrıs Türk Qəzetçilər Birliyinin üzvləri ilə baş tutdu. Birliyin rəhbəri Hüseyn Güvən qurumun yaranma tarixi və fəaliyyəti haqqında danışıb, Azərbaycanın müvafiq qurumları ilə əlaqələrinin kifayət qədər olmamasından təəssüfləndiyini vurğulayıb: “Bizim təşkilatın 300 nəfərə yaxın üzvü üçün sizin gəlişiniz çox xoş oldu. Ümid edirik ki, bundan sonra əməkdaşlığımız güclənəcək və bir-birimizdən çox şey öyrənəcəyik”.

Vüqar Səfərli fondun fəaliyyəti haqqında, xüsusilə də jurnalistlərə və qəzetlərə dövlət dəstəyi layihələri barədə geniş məlumat verib: “Fond Azərbaycanda söz və fikir azadlığına dəstək vermək üçün yaradılıb. Azərbaycan Prezidenti hər il bizim fonda kifayət qədər vəsait ayırır və bu, jurnalistlərin sosial vəziyyətinin daha da yaxşılaşmasında mühüm rol oynayır. Prezident jurnalistlər üçün mənzil tikintisinə də vəsait ayırıb, artıq binanın tikintisi başa çatıb və bir neçə aydan sonra 156 mənzil jurnalistlərin istifadəsinə veriləcək.

Görüşdə Mətbuat Şurasının sədri Əflatun Amaşov və dəgər nümayəndələr də çıxış edərək rəhbərlik etdikləri qurumlar haqqında kiprli həmkarlarına məlumat veriblər, fikir mübadilələri aparılıb, hər iki tərəfdən meydana çıxan suallara geniş izahlar verilib.

Kipr Türk Qəzetçilər Cəmiyyətinin üzvləri ilə keçirilən görüş də yaddaqalan olub. Çıxışına “Sevinciniz sevincimiz, kədəriniz kədərimizdir” ifadəsi ilə başlayan qurumun rəhbəri Akay Camal Azərbaycanı çox sevdiklərini, hər il Xocalı faciəsinin ildönümü ilə bağlı böyük tədbir keçirdiklərini deyib: “Azərbaycandan olan Kiprdəki universitet tələbələri də bu tədbirlərdə fəal iştirak edirlər. Sizin gəlişiniz göstərdi ki, bundan sonra əlaqələrimiz daha sıx olacaq”.

Azərbaycan nümayəndə heyətinin üzvləri isə ölkəmizdə mətbuatın hazırkı vəziyyəti, inkişaf tendensiyaları, dövlətin bu sahəyə göstərdiyi diqqət, qarşıda duran vəzifələr haqqında ətraflı məlumat veriblər.

Ən maraqlı görüşlərdən biri Birinci Media Qurumunun İdarə Heyətinin rəhbəri Ertan Birinci ilə oldu. Kiprdə ilk özəl televiziya yayımını həyata keçirən bu qurumun nəzdində üç telekanal və iki radio fəaliyyət göstərir. Telekanalların xarici əlaqələri çox güclüdür, hətta Londonda da studiyaları var və oradan verilişlər hazırlanıb yayımlanır. Müzakirələr zamanı telekörpülərin təşkil olunması, qarşılıqlı səfərlər, Azərbaycanın klassik filmlərinin Kipr televiziyalarında nümayiş etdirilməsi, hər iki tərəfdə nümayəndəliklərin yaranması kimi maraqlı təkliflər səslənib.

Səfər çərçivəsində min nəfərdən artıq azərbaycanlı tələbənin təhsil aldığı Yaxın Doğu Universiteti, Girnə Amerikan Universiteti və Doğu Akdeniz universitetlərinin rəhbərləri ilə də səmərəli görüşlər keçirildi.

Universitet rektorları ilə keçirilən geniş tərkibli görüşlərdə həmin universitetlərin nəzdindəki media quruluşları ilə Azərbaycan mediasının sıx təcrübə mübadiləsi və əməkdaşlığına nail olmaqdan tutmuş orada təhsil alan azərbaycanlı tələbələrin məqbul davranış və təhsil fəaliyyətinə qədər geniş məsələlər ətrafında fikir mübadiləsi aparılıb. Yaxın Doğu, Doğu Akdeniz universiteti rəhbərlərinin Azərbaycan mediasının inkişafı barədə xoş sözləri məmnunluqla qarşılanıb.

Azərbaycan Media Qrupunun rəsmi səfəri proqramında Kiprin tarixi, mədəniyyət abidələri ilə tanışlığa da yer ayrılmışdı. Ziyarətlər zamanı qrupu müşayiət edən ŞKTC-nin Azərbaycandakı sabiq nümayəndəsi Zəki Qazıoğlu və ŞKTC-nin Xarici İşlər Nazirliyinin nümayəndəsi İbrahim Taksamançı ölkəsinin tarixi, mədəniyyəti, mətbuatı, xalqın öz sərvətlərinə və dəyərlərinə möhkəm bağlılığı barədə geniş məlumatlar veriblər.

KİVDF-nin icraçı direktoru Kipr mətbuat orqanlarının böyük marağını nəzərə alaraq bütün görüşlərdə ölkənin media nümayəndələrini Azərbaycanın mətbuat sahəsində dövlət siyasətilə daha yaxından tanış olmaq üçün Azərbaycana səfərə dəvət edib. Azərbaycanın təcrübəsinə maraqlarını gizlətməyən Kipr media mənsubları dəvəti qəbul ediblər.

Bununla da Azərbaycan nümayəndə heyətinin Şimali Kipr Türk Cümhuriyyətinə səfəri başa çatıb.

Tahir AYDINOĞLU

Xalq qəzeti.- 2013.- 27 aprel.- S. 10.