Binəqədi rayonunda görkəmli oftalmoloq alim Zərifə xanım Əliyevanın 90 illik yubileyi qeyd edilmişdir

Binəqədi Rayon İcra Hakimiyyətinin təşkilatçılığı ilə görkəmli oftalmoloq alim, bənzərsis ziyalı, qayğıkeş insan Zərifə Əliyevanın anadan olmasının 90 illik yubileyinə həsr edilmiş konfrans keçirilmişdir.

Tədbir iştirakçıları əvvəlcə rayonda akademik Zərifə Əliyevanın adını daşıyan parkda onun abidəsi önünə tər güllər düzmüşlər.

Konfrans Azərbaycan səhiyyəsinə misilsiz töhfələr vermiş, respublikamızin ictimai- siyasi həyatında fəal rol oynamış Zərifə Əliyevanın həyat və fəaliyyətindən bəhs edən sənədli filmin nümayişi ilə başlamışdır.

Binəqədi Rayon İcra Hakimiyyətinin başçısı Xaləddin İsgəndərov çıxış edərək görkəmli oftalmoloq alim Zərifə xanım Əliyevanın mənalı ömür yolundan, ictimai-elmi fəaliyyətindən, tibb elminin inkişafındakı müstəsna xidmətlərindən, yüksək insani keyfiyyətlərindən ətraflı söz açmışdır. Bildirmişdir ki, görkəmli alimin tədqiqat işləri nəinki respublikamızda, həmçinin ümumittifaq və dünya oftalmoloqları arasında böyük nüfuz qazanmışdır. Oftalmologiyanın müxtəlif problemlərinə həsr olunan 140-dan çox elmi əsərin, o cümlədən 14 monoqrafiya, dərslik və dərs vəsaitinin, 1 ixtiranın, 12 səmərələşdirici təklifin müəllifi olan görkəmli alimin əsərləri bu gün də göz həkimləri üçün dəyərli mənbədir.

Başçı xatırlatmışdır ki, akademik Zərifə xanım Əliyeva gənc həkimlərin peşə fəaliyyəti ilə bağlı problemlərinin öyrənilməsinə və həllinə xeyli zəhmət sərf etmişdir. Onun çoxsaylı məqalələri və çıxışları, məhz bu məsələyə həsr olunmuş “Yüksək etimad” kitabı cəmiyyətdə həkimin şəxsiyyət kimi formalaşması prosesinə dəyərli töhfədir.

X.İsgəndərov vurğulamışdır ki, Zərifə xanım Əliyeva qədirbilən xalqımızın, onu yaxınlardan tanıyanların, qohum və doğmalarının yaddaşında görkəmli ziyalı, elm xadimi, gözəl insan, vəfalı ömür-gün yoldaşı, qayğıkeş ana, bənzərsiz vətəndaş, intellektual keyfiyyətləri özündə birləşdirən ziyalı, tibb elminə əvəzolunmaz töhfələr vermiş böyük alim kimi qalmışdır. Məhz bütün bu keyfiyyətlərinə görədir ki, Zərifə xanım hər zaman hamı tərəfindən sevilir, əziz xatirəsi ehtiramla yad olunur.

Sonra Milli Məclisin deputatı, “Zərifə Əliyeva” kitabının müəllifi Hüseynbala Mirələmov çıxış edərək Azərbaycan elminə, səhiyyəsinə misilsiz töhfələr vermiş tanınmış oftalmoloq alimin, cəmiyyətimiz üçün layiqli vətəndaş, görkəmli ictimai-siyasi xadim yetişdirən bir ananın 90 illik yubileyini təqvimin ən əlamətdar günlərindən biri kimi dəyərləndirmişdir. Natiq bildirmişdir ki, bütün şüurlu ömrünü insanların sağlamlığının qorunmasına, neçə-neçə xəstəyə dünya işığı bəxş etmiş Zərifə xanım həmişə insanlara xüsusi qayğı və nəvazişlə yanaşırdı.

Hüseynbala Mirələmov daha sonra qeyd etmişdir ki, görkəmli ictimai-siyasi xadim Əziz Əliyevin ailəsində doğulub boya-başa çatmış Zərifə xanım nəsillərə örnək olan bir ömür yaşamışdır. Bu gün ömür-gün yoldaşı, ulu öndər Heydər Əliyevin memarı və qurucusu olduğu müstəqil Azərbaycanın inkişaf edib çiçəkləndiyinə, cəmiyyətimizə layiqli vətəndaş kimi böyüdüb boya-başa çatdırdığı övladı, möhtərəm Prezidentimiz İlham Əliyevin ölkəmizə layiqincə rəhbərlik etdiyinə görə Zərifə xanımın ruhu şaddır.

Azərbaycan səhiyyəsinin inkişafına misilsiz töhfələr vermiş akdemik Zərifə Əliyevanın elmi və ictimai-siyasi fəaliyyətindən söhbət açan Hüseynbala Mirələmov bu bacarıqlı alimin, tanınmış oftalmoloqun insanların sağlamlıqlarının qorunması üçün yorulmaq bilmədən çalışdığını diqqətə çatdırmışdır. Bildirmişdir ki, ötən əsrin 70-ci illərində istifadəyə verilmiş Bakı Məişət Kondisionerləri Zavodunda çalışan əməkçilərin sağlamlıqlarının qorunmasına misilsiz töhfələr vermiş xüsusi laboratoriyanın yaradılmasında Zərifə Əliyeva müstəsna rol oynamışdır.

Tədbirdə iştirak edən ulu öndər Heydər Əliyevin yaxın qohumu Zərifə Quliyeva tanınmış oftalmoloq alim, bənzərsiz insan, sədaqətli ömür-gün yoldaşı, gözəl, mehriban ana Zərifə xanım Əliyevanın nəsillərə örnək olan ömür yolunun bəzi məqamlarından söhbət açmışdır. O qeyd etmişdir ki, Zərifə xanım xalqımızın yetişdirdiyi elə şəxsiyyətlərdən olmuşdur ki, təkcə elmi fəaliyyəti ilə deyil, bütün mənəvi keyfiyyətləri, nəcib xüsusiyyətlərinə görə də hər zaman sevilir. Çünki yüksək əxlaqi və mənəvi dəyərlərə malik bir ailədə göz açmış Zərifə xanım işıqlı bir ömür yaşadığı kimi insanlara da nur bəxş etmiş, onlara diqqət və qayğısını heç zaman əsirgəməmişdir. O, ümummilli liderimiz Heydər Əliyevin ömür-gün yoldaşı kimi şərəfli bir missiyanı yerinə yetirməklə yanaşı, hər zaman onun sadiq məsləkdaşı olmuş, gözəl, qayğıkeş bir ana kimi cəmiyyətimiz üçün layiqli övladlar yetişdirmişdir.

Natiq daha sonra gözəl, nəcib xüsusiyyətləri ilə yaddaşlarda əbədi qalacaq Zərifə xanım Əliyevanın humanist, nəcib əməllərinin hazırda bu ocağın, bu ailənin gəlini olan Mehriban xanım Əliyeva tərəfindən layiqincə davam etdirildiyini diqqətə çatdırmışdır.

Vaqif BAYRAMOV

Xalq qəzeti.- 2013.- 28 aprel.- S. 9.