LERİK: yüksəlişin etibarlı təməli

Dağlar diyarı Lerikin inkişafına dövlət qayğısı bu rayonun daha abad və gözəl bir məkana çevrilməsində əhəmiyyətli rol oynayır. İlbəil burada həyat şəraiti yaxşılaşır, adamların doğma yurda bağlılığı daha da güclənir.

Rayon icra hakimiyyəti başçısı yanında Şuranın 2013-cü ilin birinci rübündə Lerik rayonunda görülmüş işlərə və qarşıda duran vəzifələrə həsr olunmuş iclasında bu barədə ətraflı danışılmışdır.

Lerik Rayon İcra Hakimiyyətinin başçısı Rövşən Bağırov hesabat məruzəsində bildirmişdir ki, “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” rayonda uğurla icra edilir. Ötən vaxt ərzində rayonda 3451, o cümlədən cari ildə 270 yeni iş yeri, ümumilikdə isə 2004-2012-ci illər ərzində 8197 yeni iş yeri açılmışdır ki, bunun da 40 faizdən çoxu daimi xarakterlidir.

Lerik şəhəri və 14 yaşayış məntəqəsi mavi yanacaqla təmin edilmişdir. Hazırda rayonun 25 kəndinə qaz xətləri çəkilir.

Şəhərin küçə və yollarına asfalt örtüyü salınmış, yeni müasir işıqlandırma sistemləri qurulmuşdur. İ.Yaqubov, E.Qarayev küçələrində, Lənkəran-Lerik, Lerik-Kəlvəz yollarında yenidənqurma işləri aparılır, istinad divarları hörülür, səkilər quraşdırılır. Şəhərdə eyni vaxtda 300 qonağı qəbul edə biləcək xeyir-şər evinin inşasında son tamamlama işləri aparılır.

Rayon baytarlıq idarəsi üçün yeni inzibati bina, Rvarud kəndində sahə baytarlıq məntəqəsi, Lerik şəhərində 6 saylı vergilər idarəsi üçün kompyuter terminalı, statistika idarəsi üçün inzibati bina, Yaponiya dövlətinin maliyyə dəstəyi ilə Şingədulan kəndində həkim məntəqəsi inşa edilərək istifadəyə verilmiş, icra hakimiyyətinin daxili imkanları hesabına Lerik şəhər uşaq bağçasının əsaslı təmirində işlər tamamlama mərhələsinə çatmışdır.

Rayon üzrə bütün ATS-lər elektron tipli ATS-lərlə əvəzlənmişdir. Elektronlaşma rayon əhalisinin sürətli internet xidmətindən istifadəsini asanlaşdırmışdır.

Rayonda 18 ümumtəhsil məktəbi əsaslı təmir edilmiş, 7 məktəb inşa olunmuş, 8 məktəbin tikintisində işlər davam etdirilir. 2013-cü il üçün rayonda daha altı məktəbin tikintisi, iki məktəbin isə əsaslı təmiri üçün texniki işlər həyata keçirilir.

Lerik-Qosmalian-Kəlvəz avtomobil yolunun tikintisində işlər sürətlə aparılır. Prezident Administrasiyasının tapşırığına əsasən, əhalinin daha çox istifadə etdiyi və sıx yaşadığı ərazidən keçən Xanagah yolu barədə də ilkin məlumatlar toplanmış, smeta sənədləri hazırlanmışdır.

Rayon icra hakimiyyətinin təşəbbüsü və kənd sakinlərinin köməyi ilə Lərmərud-Masallı, Əliabad-Ağcay, Piran-Bürsülüm, Piran-Hamarat, Hamarat-Vıjaker, 27-ci kilometr Tikəband yolları təmir edilmişdir. Bürsülüm ərazisində əhalinin çoxsaylı müraciətləri nəzərə alınaraq çay üzərində iki istiqamətdə körpü inşa edilmişdir.

Lənkəran-Lerik yolu boyunca, Qosmalian, Kələxan və Bilnə kəndlərində yeni turizm-istirahət mərkəzləri, Lerik şəhərində, ərazilərdə, magistral yol boyunca ticarət mərkəzləri, iaşə obyektləri tikilmişdir.

Magistral yolun 37-ci kilometrində çörək sexi tikilib istifadəyə verilmiş, müəssisədə ilkin olaraq 6 nəfər daimi işlə təmin edilmiş, 4 adda keyfiyyətli çörək məhsulları istehsalına başlanmışdır. Ərazidə süfrə suyu və şirə sexi istehsal edən müəssisənin tikintisində iş davam etdirilir. Lerik şəhərində iş adamları tərəfindən yeni bazar inşa edilmişdir.

Qarabağ müharibəsi əlilləri və şəhid ailələrinin mənzil şəraitinin yaxşılaşdırılması, digər sosial problemlərinin həllini rayon rəhbərliyi nəzarətdə saxlayır. Molalan kəndində Qarabağ müharibəsi əlili üçün yaşayış evinin tikintisi sona çatır. Mənzil şəraitinin yaxşılaşdırılmasına ehtiyacı olan daha 6 Qarabağ müharibəsi əlili üçün fərdi yaşayış evlərinin tikintisinə tələb olunan sənədlər hazırlanaraq Əmək və Əhalinin Sosial Müdafiəsi Nazirliyinə təqdim olunmuşdur.

Lerik şəhərində inşası 2011-ci ildə başlanan 17 meqavatlıq elektrik stansiyasının tikintisində işlər sürətlə davam etdirilir. Lerik-Yardımlı yüksək gərginlikli elektrik hava xətti inşa edilmiş, Lerik-Lənkəran elektrik hava xəttinin tikintisi üçün texniki işlər həyata keçirilir.

Daxili imkanlar hesabına 8 kənddə, “Azərsu”ASC tərəfindən isə 2011-ci ildə Gürdəsər, Soru və Zenoni kəndlərində artezian quyuları qazılmışdır. Qosmalian-Lerik su xəttinin çəkilişində qızğın işlər aparılır, şəhərdaxili su xətləri çəkilir, kanalizasiya sistemi qurulur, su anbarları inşa edilir.

Lənkəran-Lerik magistral yolu boyunca və digər yol kənarlarında 10 mindən çox müxtəlif növ ağac və kollar, rayon meşə mühafizəsi və bərpası idarəsi tərəfindən isə minlərlə ağac əkilmiş, yeni meşə zolaqlarında əkin işləri aparılmışdır.

İclasda rayon mərkəzi xəstəxanasının baş həkimi Mübariz Ağayev, “Kapital Bank”ın rayon filialının müdiri İlham Dadiyev, rayon su-kanal sahəsinin rəisi Asif İmanov çıxış edərək təmsil etdikləri sahələrdə görülmüş işlər haqqında məlumat vermişlər.

Sonda Azərbaycan Respublikasının Prezidenti cənab İlham Əliyevə müraciət qəbul olunmuşdur.

Ə.ƏLİYEV

Xalq qəzeti.- 2013.- 28 aprel.- S. 11.