Ulu öndərin xatirəsi anıldı

Nəsimi Rayon İcra Hakimiyyətinin təşkilatçılığı ilə Bakı şəhər 1 saylı orta məktəbdə ulu öndər Heydər Əliyevin 90 illik yubileyi ilə bağlı tədbir keçirilmişdir. Məktəbdə ulu öndərin ömür yolunu əks etdirən foto materiallardan ibarət stendlər düzəldilmişdir.

Akt zalında keçirilən tədbirə rayon icra hakimiyyətinin nümayəndələri, məktəb şagirdləri, müəllimlər toplaşmışdılar. Tədbiri giriş sözü ilə Nəsimi Rayon İcra Hakimiyyəti başçısının müavini Zahid Xəlilov açdı. Bildirdi ki, Azərbaycan xalqı bu günlər özünün ümummilli lideri Heydər Əliyevin 90 illik yubileyini qeyd edir. Nəsimi rayonunda da bu dahi siyasət nəhənginin yubileyi böyük təntənə ilə yad edilir.

Sonra Zahid Xəlilov Heydər Əliyevin Azərbaycan xalqı qarşısındkı əvəzsiz xidmətlərindən danışdı. Bildirdi ki, hakimiyyətdə olduğu illərdə Heydər Əliyev Azərbaycan xalqını bəlalardan qorumuş, müstəqilliyimizin möhkəmlənməsi üçün böyük siyasi uzaqgörənlik göstərərək onu inkişafın hamar yoluna çıxarmışdır. Bu gün Azərbaycan xalqı əldə etdiyi nailiyyətlərə görə ulu öndərə minnətdardır. Ulu öndərin milli təhsilimizin inkişafındakı xidmətləri də olduqca böyükdür. Azərbaycan təhsilində gedən davamlı islahatlar bu böyük siyasət xadiminin adı ilə bağlıdır. Müstəqil respublikamızın ilk təhsil islahat proqramı məhz ulu öndər tərəfindən xüsusi sərəncamla 1999-cu ildə qəbul olunmuşdur.

Möhtərəm Prezidentimiz İlham Əliyev ulu öndərin başladığı islahatları uğurla davam etdirmiş, ölkəmiz artıq Cənubi Qafqazda lider dövlətə çevrilmişdir. İndi Azərbaycanı beynəlxalq aləmdə yaxşı tanıyır və onunla hesablaşırlar. Elə təhsil sahəsində də uğurlarımız göz qabağındadır. Təhsillə bağlı 20-yə yaxın Dövlət Proqramı qəbul olunmuşdur. Neçə-neçə yeni məktəb inşa olunmuş, köhnə məktəblər əsaslı təmir edilmişdir. Ulu öndərin adını daşıyan fondun prezidenti, Azərbaycanın birinci xanımı Mehriban Əliyevanın da milli təhsilimizin inkişafında böyük xidmətləri olmuşdur.

Tədbirdə 1 saylı məktəbin şagirdlərinin hazırladığı bədii proqram da nümayiş olundu.

M.Mehtiyev

Xalq qəzeti.- 2013.- 30 aprel.- S. 5.