Qazaxda 2013-cü ilin birinci rübünə yekun vurulmuşdur

Qazax rayonunda 2013-cü ilin birinci rübünün sosial-iqtisadi inkişafına həsr olunmuş yığıncaq keçirilmişdir. Tədbir ulu öndər Heydər Əliyevin xatirəsinin anılması və abidəsi önünə əklil qoyulması ilə başlamışdır. Yığıncaqda rayon icra hakimiyyətinin başçısı Ayaz Əsgərov hesabat məruzəsi ilə çıxış etmişdir.

Məruzədə Nazirlər Kabinetinin birinci rübün sosial-iqtisadi inkişafına və qarşıda duran vəzifələrə həsr olunmuş geniş iclasında dövlət başçısının nitqində öz ifadəsini tapan sosial-iqtisadi göstəricilər bir daha xatırladılmışdır. Bildirilmişdir ki, cari ilin üç ayı ərzində ölkədə ÜDM 3,1 faiz, qeyri -neft sektoru 11, 4 faiz artmışdır. İnflyasiya cəmi 1,2 faiz olmuş, əhalinin pul gəlirləri təxminən 6 faiz artmış, kənd təsərrüfatında 4 faizdən çox artım olmuş, 30 min yeni iş yeri yaradılmışdır.

Hesabat dövrü Qazax rayonu üçün də uğurlu olmuşdur. Yerli daxilolmalar 110,1 faiz yerinə yetirilərək büdcəyə 107,350 manat çox vəsait mədaxil olmuşdur. Sahibkarlığa Kömək Milli Fondu tərəfindən əhaliyə 37 min manat kredit verilmişdir. Dövlət Sosial Müdafiə Fondunun rayon şöbəsi tərəfindən ödəniş müəssisələrinə keçən ilin müvafiq dövrünə nisbətən 81,800 manat çox vəsait köürülmüşdür. Əmək və Əhalinin Sosial Müdafiəsi Mərkəzi tərəfindən 1330 ailəyə sosial yardım təyin edilmiş, 571,470 manat vəsait ödənilmişdir.

Əhali fasiləsiz və keyfiyyətli qaz, elektrik enerjisi ilə təmin edilmişdir. Satılan qazın, elektrik enerjisinin dəyəri tam yığılaraq müvafiq təşkilatların bank hesabına köçürülmüşdür. Əhaliyə göstərilən səhiyyə, mədəni xidmətin və təhsilin səviyyəsi daha da yaxşılaşmışdır. İdman sahəsində həyata keçirilən tədbirlərdə gənclərin bütün təbəqələri təmsil olunmuşdur. Gənclər beynəlxalq və respublika yarışlarında mükafata layiq yerlər tutmuşlar.

2013-cü ilin birinci rübündə əsas kapitala yönəldilən investisiyaların həcmi 4 milyon 952 min 800 manat, ümumi məhsul buraxılışının həcmi 24 milyon 250 min manat olmuşdur ki, bu da ötən ilin müvafiq dövrü ilə müqayisədə 1,1 faiz çoxdur. Sənaye məhsulunun ümumi həcmi 1 milyon 970 min manat, kənd təsərrüfatı məhsullarının həcmi 7 milyon 87 min 800 manat olmuşdur. Adambaşına düşən ümumi məhsulun həcmi 266 manat və orta aylıq əmək haqqı 226 manat təşkil etmişdir. Dövlət Proqramına uyğun olaraq təmir-tikinti, abadlıq, bərpa və quruculuq işləri 2013-cü ilin birinci rübündə də uğurla davam etmişdir.

İllik gücü 1 milyon ton, ərazisi 56 hektar olan Qazax sement zavodunun birinci hissəsində tikinti işləri davam etdirilmiş və yaxın vaxtlarda istifadəyə verilməsi nəzərdə tutulur. Azadlıq küçəsi, 108 ünvanda yerləşən, qəza vəziyyətində olan kommunal binanın sakinlərinin yerləşdirilməsi üçün 24 mənzilli yeni yaşayış binasının tikintisi yekunlaşdırılır. Uzunluğu 30 kilometr olan Yuxarı Salahlı-Kəmərli avtomobil yolunda əsaslı tikinti işləri başa çatmaq üzrədir. Qazax şəhərinin prospekt və küçələrində 186 ədəd yeni işıq dayaqları quraşdırılmışdır. Rayon polis şöbəsinin yeni inzibati binasının tikintisində isə son tamamlama işləri görülür.

Azərbaycan Respublikasının Prezidenti İlham Əliyevin 1 iyun 2012-ci il tarixli sərəncamı ilə Qazax şəhərində “Ədəbiyyat Muzeyi”nin tikintisi üçün Azərbaycan Respublikasının 2012-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Qazax Rayon İcra Hakimiyyətinə 5 milyon manat vəsait ayrılmışdır. Hazırda “Ədəbiyyat muzeyinin” tikintisində işlər davam etdirilir. Muzeyin ətrafında sahəsi 2 hektar olan parklarda yenidənqurma və abadlıq işlərinin aparılması nəzərdə tutulmuşdur.

Azərbaycan Respublikası Prezidentinin 18 fevral 2013-cü il tarixli sərəncamı ilə 26 min nəfər əhalinin yaşadığı 15 yaşayış məntəqəsini birləşdirən Qazax-Quşçu Ayrım avtomobil yolunun tikintisi məqsədilə Azərbaycan Respublikası Prezidentinin ehtiyat fondundan rayon icra hakimiyyətinə 6,9 milyon manat vəsait ayrılmışdır. Hazırda yolun layihə-smeta sənədləri yekunlaşmaq üzrədir. Yaxın günlərdə yolun tikintisinə başlanacaqdır.

Prezidentin məlum sərəncamına uyğun olaraq Məcburi Köçkünlərin Sosial-İnkişaf Fondunun xətti ilə Qazax rayonunun Qarapapaq kəndi ərazisində 300 məcburi köçkün ailəsi üçün 5 mərtəbəli yaşayış binalarının tikintisinə 5 hektar sahə ayrılmışdır. Hazırda layihə institutu tərəfindən yeni salınacaq qəsəbənin layihə-smeta sənədləri hazırlanır.

Məruzədə hesabat dövründə aqrar sahədə əldə edilən uğurlara toxunulmuş, RİH başçısı tərəfindən keçirilən səyyar görüş-qəbullarda əhalinin problem və təkliflərinə həssaslıqla yanaşılmasından ətraflı danışılmışdır.

Axırda Ayaz Əsgərov Dövlət Proqramında nəzərdə tutulmuş vəzifələrin, eləcə də cari tapşırıqların həllində rayonda bundan sonra da böyük uğurlar əldə ediləcəyinə əmin olduğunu bildirmişdir.

Sonda məruzə ətrafında çıxışlar olmuşdur. Tədbirdə Azərbaycan Respublikası Prezidenti Administrasiyasının məsul işçisi Habil Əzənmədov çıxış etmiş, görülmüş işlərə münasibətini bildirmiş və qarşıda duran vəzifələrdən danışmışdır.

Hamlet QASIMOV

Xalq qəzeti.- 2013.- 30 aprel.- S. 6.