“Heydər Əliyev Azərbaycanda meliorasiya və su təsərrüfatının inkişafının müəllifi və təşkilatçısıdır” mövzusunda elmi-praktik konfrans keçirilmişdir

Aprelin 26-da ümummilli lider Heydər Əliyevin 90 illik yubileyi münasibəti ilə Meliorasiya və Su Təsərrüfatı Açıq Səhmdar Cəmiyyətində (ASC) “Heydər Əliyev Azərbaycanda meliorasiya və su təsərrüfatının inkişafının müəllifi və təşkilatçısıdır” mövzusunda elmi-praktik konfrans keçirilmişdir.

Konfransı açan ASC-nin sədri Əhməd Əhmədzadə demişdir ki, müasir Azərbaycan dövlətinin banisi, ümummilli lider Heydər Əliyevin milli dövlətçiliyimizin inkişafındakı misilsiz fəaliyyəti hələ bundan sonra da öyrəniləcək və hər birimiz üçün parlaq örnək olaraq qalacaqdır. Xalqımız üçün bir təsəllidir ki, ulu öndərin siyasi kursunu Prezidentimiz İlham Əliyev layiqincə davam etdirir.

Ümummilli lider Heydər Əliyevin respublikamıza rəhbərlik etdiyi 1969-1982- ci illərdə çoxlu sayda qovşaqlar, nasos stansiyaları, texniki cəhətdən müasir meliorasiya və irriqasiya sistemləri tikilib istifadəyə verilmiş, suvarılan torpaqların sahəsi 1,5 dəfədən çox artmışdır. Görülmüş tədbirlərin nəticəsində 1980-cı ildə 1970-ci ilə nisbətən respublikada kənd təsərrüfatı məhsullarının ümumi dəyəri 2,2 dəfə, taxıl istehsalı 2,1 dəfə, pambıq istehsalı 2,6 dəfə, üzüm istehsalı 4,6 dəfə, tərəvəz və tütün istehsalı 2,3 dəfə, meyvə istehsalı 4,4 dəfə, çay yarpağı istehsalı 2,2 dəfədən çox artmışdır.

1993-cü ildə xalqın tələbi ilə Heydər Əliyevin müstəqil Azərbaycanın rəhbərliyinə qayıdışı zamanı ölkədə ictimai-siyasi və sosial-iqtisadi durum son dərəcə ağır idi. Ümummilli liderin hakimiyyətə qayıtdığı ilk günlərdən respublikada sabitliyin təmin edilməsi istiqamətində təxirəsalınmaz tədbirlərin görülməsinə başlanıldı. Meliorasiya və su təsərrüfatı öz inkişafının yeni mərhələsinə qədəm qoydu.

Hazırda möhtərəm Prezidentimiz İlham Əliyev təməli ulu öndərimiz Heydər Əliyev tərəfindən qoyulmuş bir çox layihələri uğurla davam etdirilir. Meliorasiya və su təsərrüfatı sahəsinə ayrılan investisiya vəsaitinin həcmi 2003-cü ildəki 13,2 milyon manatdan 2012- ci ildə 631,9 milyon manata qədər artmışdır. Bunun nəticəsi olaraq ümumilikdə, 2003-2012-ci illərdə respublikanın rayonlarında 1481 kilometr suvarma kanallarının, 1036 kilometr kollektor-drenaj şəbəkələrinin tikintisi aparılmış, 722 ədəd subartezian quyuları qazılmış, 126 min hektar sahədə torpaqların su təminatı və 153 min hektar sahədə meliorativ vəziyyəti yaxşılaşdırılmış, 16 min hektar yeni suvarılan sahələr kənd təsərrüfatı dövriyyəsinə verilmişdir.

Respublikanın şimal bölgəsi rayonlarının, Bakı, Sumqayıt şəhərlərinin və Abşeron yarımadasının içməli, texniki və suvarma suyu ilə təminatında mühüm əhəmiyyət kəsb edən Samur- Abşeron suvarma sisteminin yenidənqurulması layihəsi tərkibində 31,5 kilometr Vəlvələçay- Taxtakörpü kanalının tikintisi başa çatdırılmışdır. Cari ildə Taxtakörpü su anbarının və Taxtakörpü- Ceyranbatan kanalının tikintisinin başa çatdırılması nəzərdə tutulmuşdur.

Şəmkir, Göygöl, Samux, Goranboy rayonlarında 50 min 122 hektar əkin sahələrinin suvarma suyu ilə təminatının yaxşılaşdırılması və 20 min 134 hektar yeni suvarılan sahələrin istifadəyə verilməsini təmin etmək məqsədi ilə dövlət büdcəsindən ayrılmış vəsait hesabına su elektrik stansiyası ilə birlikdə Şəmkirçay su anbarının və ondan su götürən magistral kanalların tikintisi davam etdirilir.

Azərbaycan Respublikası Prezidentinin ölkə əhalisinin daxili istehsal hesabına çörək və çörək məhsulları ilə təmin edilməsi məqsədi ilə iri taxılçılıq təsərrüfatlarının yaradılması barədə verdiyi tapşırığın icrası ilə əlaqədar olaraq ötən il Yuxarı Mil kanalının 10,7 kilometrlik hissəsinin tikintisi tamamlanmışdır. Kanal Beyləqan və Ağcabədi rayonları ərazilərində 4 min 800 hektar sahədə yaradılmış taxılçılıq təsərrüfatlarını suvarma suyu ilə təmin edir.

Konfransda çıxış edən Milli Məclisin deputatı Eldar İbrahimov bildirmişdir ki, Heydər Əliyev hər zaman xalqının yanında olmaq arzusunda olmuşdur. Moskvada işlədiyi illərdə Azərbaycanda böyük iqtisadi layihələrin həyata keçirilməsinə nail olmuşdur ki, həmin işlər Azərbaycanın müstəqilliyinin möhkəm zəminini yaratmışdır.

Prezident Administrasiyasının aqrar siyasət məsələləri şöbəsinin müdiri Azər Əmiraslanov Heydər Əliyevin aqrar sahədə apardığı islahatların əhəmiyyətindən danışmışdır.

Qeyd olunmuşdur ki, əhalinin ərzaq məhsulları ilə təmin olunması üçün Heydər Əliyev Azərbaycanın kənd təsərrüfatı potensialından düzgün istifadə edərək əkin sahələrinin və məhsul istehsalının artırılmasına nail olmuşdur.

Sonra ASC sədrinin birinci müavini Məmmədsadiq Quliyev, sədr müavini Zakir Quliyev, şöbə müdiri Məmməd Əsədov, “Azdövsutəslayihə” institutunun direktoru Elbrus Paşayev, Azərbaycan Hidrotexnika və Meliorasiya Elm-İstehsalat Birliyinin direktoru Ağamir Həşimov və başqaları çıxış edərək ümummilli lider Heydər Əliyevin misilsiz fəaliyyəti nəticəsində Azərbaycanın öz müstəqilliyini qorunub saxlanılmasından, müasir dövlət quruculuğundakı rolundan, meliorasiya və su təsərrüfatı sahəsinə göstərdiyi diqqət və qayğısından danışmışlar.

Sonda tədbir iştirakçıları Heydər Əliyevin həyat və fəaliyyətini əks etdirən sənədli filmə baxmışlar.

Xalq qəzeti.- 2013.- 27 aprel.- S. 7.