MASALLI: “Möcüzə kimidir,
nağıl misallı...”
Cənub bölgəsinin gözəl diyarı
Masallıya hər səfərimdə yeniliklərin şahidi
olmağa adət etmişəm. Bu dəfə öyrəndim
ki, artıq Masallıda Mədəniyyət və Turizm
Nazirliyinin xüsusi lisenziyası ilə fəaliyyət
göstərən istirahət mərkəzlərinin sayı
30 olub (bir qədər əvvələdək 28 idi). Bu mərkəzlərə axın ilbəil güclənir.
Cari ilin ilk altı ayında bu rayona istirahət və
müalicəyə 8662 nəfər gəlib. Turistlərin 364-ü xarici vətəndaşlar olub.
İndi Masallıda yay istirahətinin ən
qızğın vaxtıdır. Elə turizm obyekti
yoxdur ki, orada qələbəlik olmasın. “İstisu”
sanatoriyası, “Viləş”, “Nağıllar aləmi”,
“Gülüstan”, “Gölüstü” və digər mərkəzlərdə
boş yer tapmaq mümkün deyil. Qonaqların mənalı
istirahəti - təbiətin gözəlliklərindən
zövq alması, rayonun tarixi abidələrini ziyarət etməsi,
ekskursiyalara aparılması, axşamlar düşərgədə
şənlənməsi üçün proqram tədbirləri
gerçəkləşdirilir.
Bir axşam dostlarla Viləşçay su
anbarının - süni gölün yuxarı sahilindəki
istirahət məkanlarından birinə yollandıq. Açıq
havada, yaşıllıqlar qoynunda oturub dincəlmək
üçün təsadüfən boşalan bir masanın ətrafında
yerləşdik. Canlı musiqi,
atılıb-düşən uşaqlar, cənub mətbəxinə
aid ləziz təamların ətri adama xoş gəlir,
dağlardan əsən mehin gətirdiyi sərinlik ecazkar təsir
bağışlayırdı. Yerli
istedadların şən ifaları dalğa-dalğa ətrafa
yayılırdı. Saatların necə
ötməsindən xəbərimiz olmadı. Sanki,
möcüzəli, nağıllı bir aləmdə idik...
Düşündüm ki, çoxsaylı qonaqları,
xüsusən də ailəvi şəkildə gələnləri
bu diyara cəlb edən əsas amillər yaradılan münbit
şərait, servis mədəniyyətinin yüksəlməsi,
milli adətlərə ciddi riayət, rayonda zəruri
infrastrukturun formalaşması və səliqə-sahmandır.
Ümumiyyətlə, Masallıda səliqə-sahmanla
bağlı problemlər ardıcıl həllini tapır. İndi Rayon
İcra Hakimiyyəti Aparatının qarşısı və
arxa küçəsi, şəhərin digər əraziləri
xeyli dəyişib. Əsaslı şəkildə
yenidən qurulmuş Heydər Əliyev xatirə parkı hər
zaman, xüsusən də axşam düşəndən gecəyarıyadək
dincələnlərlə dolu olur. Heydər
Əliyev Mərkəzi, ulu öndərin möhtəşəm
abidəsinin ətrafı göz oxşayır. Buradakı “Ahıllar evi” yenicə istifadəyə
verilsə də, artıq yaşlı sakinlərin sevimli
istirahət məkanına çevrilib. Müxtəlif
dekorativ bitkilər, nadir ağaclar, mövsüm çiçəkləri
parkın gözəlliyinə dolğunluq gətirir.
Masallıda sosial-iqtisadi inkişaf göstəriciləri
də fərəh doğurur. Hər tərəfdə iş gedir.
Rayonun inkişaf proqramında nəzərdə tutulmuş bir sıra sosial-mədəni
obyektlərin tikintisi son tamamlama mərhələsinə
çatıb. Şəhərin Z.Əliyeva, Azərbaycan,
Füzuli, Dadva, Talışxanov və Qarabağ küçələrində
aparılan abadlıq-quruculuq işlərinin ilkin nəticələri
görünməkdədir. İcra Hakimiyyəti
Aparatının yaxınlığında inşa olunmuş
YAP rayon təşkilatının inzibati binasında işlər
artıq yekunlaşmışdır. “Qəhrəmanlar
” parkının, H.Əliyev meydanının, rayonun
giriş və çıxış qapılarının
tikintisi isə başa çatdırılmışdır. Biz rayonda olarkən bir sıra idarə, təşkilat
kollektivləri mərkəzi meydanda və ətrafında iməcilik
keçirirdilər. Hamı həvəslə
çalışır, ümumi işə töhfə vermək
istəyirdi. Şəhəri həvəslə
gəzib gördüklərimizi qeydə aldıq.
Gördük ki...
Qarabağ küçəsində məhəllələr
abadlaşdırılmış, ümumi yaşayış evlərinin
dam örtükləri müasir üslubda dəyişdirilmişdir. Həmçinin yenicə
tikilmiş Boks və Taekvando mərkəzləri,
Boradigah idman kompleksi, ümumtəhsil məktəbləri,
istilikxana və digər obyektlər istismara hazırdır.
Cənab Prezidentin tapşırığı ilə
bütün regionlarda olduğu kimi, Masallıda da kənd
yollarının tikintisinə böyük diqqət göstərilir. Belə ki, hazırda
Masallı rayon ərazisində ümumi uzunluğu 24 kilometrə
qədər olan Həsənli-Xırmandalı, Kürdəbaz-Qarğalıq,
Seybətin-Səmidxan, Musaküçə-Lürən,
Qodman-Qəriblər və Sərçuvar-Sirəbil
yollarının əsaslı təmirinə
başlanmışdır. Həsənli-Xırmandalı
və Sərçuvar-Sirəbil yolunun çəkilişi
artıq yekunlaşır.
Rayon
üzrə məhsul istehsalı və göstərilən
xidmətlərin həcmi ötən ilin müvafiq
dövrü ilə müqayisədə 1,6
faiz artmışdır. Adambaşına düşən pul gəlirləri
916 manat, bir işçiyə hesablanan orta aylıq əmək
haqqı 253,1
manat olmuşdur.
Əhalisi 210 min nəfər olan Masallı rayonunda
ümumi sayın 90 faizə qədəri kəndlərdə
yaşayır və əkinçiliklə məşğul
olur. Kənd təsərrüfatının
inkişafı və gəlirli sahəyə çevrilməsi
prioritet vəzifədir. Sevindirici haldır
ki, bu istiqamətdə görülən işlər artıq
müsbət nəticələrini verməkdədir. Bu
ilin məhsulu üçün 10034 hektar taxıl, o cümlədən
7604 hektar buğda, 2430 hektar arpa və 1820 hektar dənlik vələmir
əkini aparılmışdır. Ümumilikdə
23177 ton taxıl istehsal olunmuşdur ki, bunun da 17894 tonu
buğdadır. Bundan əlavə, 1477 hektarda kartof, 586,5 hektarda bostan məhsulları və 2806
hektarda tərəvəz əkilmişdir. Gəlirli
sayılan kartof, çiyələk və tərəvəz
istehsalı sahələri genişləndirilmiş, əhalinin
qazancı nəzərəçarpacaq dərəcədə
artmışdır. 2012-ci ildə kartofdan əldə
olunan gəlir 4 milyon manata qədər olduğu halda,
2013-cü ildə bu rəqəm 15 milyon 200 min manat təşkil
etmişdir. Həmçinin çiyələkdən ötən
il 84 min manat, bu il isə 104 min manat gəlir
əldə olunmuşdur. Belə uğurlu
müqayisələri digər sahələrdə də aparmaq
olar.
Rayonda iri buynuzlu mal-qaranın sayı 73378 başa,
xırda buynuzluların sayı 81311 başa
çatmışdır. Altı ay ərzində süd
istehsalı 26284,2 tona, ət istehsalı 2756,7 tona, yumurta
istehsalı 35 milyon ədədə çatmışdır
ki, bu da əvvəlki ilin müvafiq dövrü ilə
müqayisədə xeyli çoxdur.
Eyni
zamanda çayçılığın inkişaf etdirilməsi
məqsədi ilə bu il 100 hektar sahədə
ən yeni texnologiyaya əsaslanan plantasiya salınması
üçün hazırlıq işlərinə
başlanmışdır. Həmin ərazidə
yol, suvarma suyu, enerji infrastrukturunun yenidən qurulması nəzərdə
tutulur. Yaxın gələcəkdə bu gəlirli sahənin
rayonda ən azı 1400 hektara çatdırılmasına
imkanlar var. Bu qədər yaşıl çay sahəsinin
salınması idxaldan asılılığı azaltmaqla
yanaşı, ən azı 7 min iş yerinin
yaradılmasına imkan verə bilər.
Faraş
tərəvəz, giləmeyvə və sitrus bitkiləri əkinlərinin
genişləndirilməsi ilə yanaşı, rayonda ən
azı 5 min ton tərəvəz, 5 min ton sitrus meyvələrini
saxlama gücünə malik soyuducu anbarların, topdan və pərakəndə
satış-ekspozisiya bazarının, habelə bu məhsulların
ilkin emalı üçün müəssisənin tikilməsi
vacibdir. Bu vəzifələrin uğurlu icrasına nail olunsa,
Masallının kənd təsərrüfatı məhsullarının
təkcə yerli bazarlara deyil, böyük həcmdə
qonşu ölkələrin bazarlarına da çıxarılmasına
imkan yaranar. Dövlət
Proqramı əsasında rayon mərkəzi və 22
yaşayış məntəqəsinə birpilləli sistem
üzrə yeni qaz xəttinin çəkilməsi
reallaşdırılır. Artıq Eminli
kəndi də təbii qazla təmin edilmiş,
Qarğalıq, Kürdəbaz, Şəhriyar kəndlərinə
qaz xəttinin çəkilişi yekunlaşmış və
sayğaclar quraşdırılmışdır. Təklə
kəndində və Ərkivan qəsəbəsində
mövcud olan köhnə qaz xətlərinin yenidən
quraşdırılması və 1-ci Yeddioymaq kəndində daxili qaz xəttinin
çəkilişi davam etdirilir.
Məlum
olduğu kimi, Azərbaycan Respublikasının Prezidenti cənab
İlham Əliyev tərəfindən 2013-cü il “İnformasiya-Kommunikasiya Texnologiyaları ili”
elan edilmişdir. Bununla əlaqədar Masallıda 55 yeni EATS
binasının tikintisi nəzərdə tutulur ki, bu məqsədlə
ayrı-ayrı kəndlərdə müvafiq torpaq sahələri
ayrılmışdır. Qodman kəndində
yeni ETS binasının tikintisi artıq başa
çatdırılmışdır.
Dövlət
başçısının xeyir-duası ilə ötən il Masallı şəhərinin içməli
su təchizatının və kanalizasiya sisteminin yenidən
qurulması işlərinə başlanmışdır. Bununla da şəhər sakinlərini uzun illərdən
bəri narahat edən bu problem qısa vaxtdan sonra öz həllini
tapacaq.
Masallı rayonunun əksər kəndlərində
içməli su xəttinin və ya qaynaqlarının
olmaması əhalinin gündəlik həyatında ciddi
çətinliklər yaradır. Bu problemin həlli ilə
bağlı cənab Prezident İlham Əliyev tərəfindən
müvafiq qurumlara verilən tapşırıqlara əsasən
Muğan zonasında yerləşən 20 kəndin və Gəyəçöl-Qızılağac
istiqamətində olan 18 kəndin içməli su təchizatının
yaxşılaşdırılması məqsədilə layihələndirmə
işləri aparılmış və artıq “Viləşçay” su dəryaçasından
həmin istiqamətlərdə olan kəndlərə
içməli su xəttinin çəkilişinə
başlanmışdır. Son illərdə Masallıda 33 yeni məktəb
binası tikilmiş, 5 məktəb isə əsaslı təmir
olunmuşdur. Hazırda Kosakül, Kəlbəhüseynli,
Xıl, Öncəqala, Kubin və Allahyarlı kəndlərində yeni məktəb
binalarının tikintisi, Bədəlan kənd tam orta məktəbinin
əsaslı təmiri davam etdirilir. Yaxın günlərdə
isə Şatıroba, Çayqıraq, Dəlləkoba və
Köhnə Zuvand kəndlərində yeni məktəb
binalarının tikintisinə, Masallı şəhər 1
saylı və Kolatan kənd tam orta məktəblərinin isə
əsaslı təmirinə başlanacaq. Üç
uşaq bağçası da təmir olunub. Amma, hələ
7 uşaq bağçasının əsaslı təmirə,
6 uşaq bağçasının yeni binaya ehtiyacı var. Məktəbəqədər
yaşlı uşaqların uşaq bağçalarına cəlbi
cəmi 7 faiz təşkil edir ki, bu da çox
aşağı rəqəmdir. Bu problemlərin
həlli istiqamətində işlər davam etdirilir. Hazırda Qızılağac kənd uşaq
bağçasında əsaslı təmir yekunlaşır və
yaxın günlərdə Masallı şəhər 2
saylı uşaq bağçası üçün yeni
binanın tikintisinə başlanacaq.
Masallıdan
bəhs edərkən
iyunun 12-15-də uğurla keçmiş II Beynəlxalq
Folklor Festivalını qeyd etməmək olmaz. Bu
baxımdan rayonda artıq müvafiq təcrübə və ənənə
bərqərar olub. Çoxsaylı xarici
qrupların qəbulu, yerləşdirilməsi, çeşidli
tədbirlərin təşkili, təbii bir bayram
ovqatının və zəngin təəssüratın
yaradılması festival təşkilatçılarının
böyük uğuru sayılmalıdır. İnanırıq ki, növbəti festivallar daha da
gözəl olacaq və rayonda yeni-yeni istedadlar üzə
çıxarılacaq.
Bu payız Azərbaycanda Prezident seçkiləri
keçiriləcək. Masallıda rayon rəhbərliyi ilə
söhbətdə vurğulandı ki, seçkilərdə vətəndaşların
azad şəkildə səsvermə hüquqlarının təmin
edilməsi üçün bütün lazımi tədbirlər
həyata keçirilir. Artıq seçki
məntəqələrinin seçkilərə
hazırlanması və digər hazırlıq işləri
gedir. Müşahidə və təhlillər
göstərir ki, böyük əksəriyyət alternativi
olmayan hazırkı uğurlu siyasəti dəstəkləmək
əzmindədir.
Əli
NƏCƏFXANLI
Xalq qəzeti.- 2013.- 7 avqust.- S. 6.