Milli ideyanı gerçəkləşdirmiş

DAHİ AZƏRBAYCANLI

Xalqların və ölkələrin tərəqqisinin əsasında dahi şəxsiyyətlərin və onların ideyalarının dayanması hamılıqla qəbul olunan həqiqətlərdən sayılır. Ümummilli ideya və hamı tərəfindən qəbul olunan milli lider tarixin bütün dövrlərində inkişafın fundamental əsası rolunda çıxış etmişdir. Öz əməli, missiyası ilə tarixdə silinməz izlər qoymuş şəxsiyyətlər az olsa da, hər bir xalqın, millətin taleyinə belə insanlar düşmüşdür. Azərbaycan xalqı da fəxr edə bilər ki, onun XX əsrin son 30 ilinə və XXI əsrin əvvəlinə təsadüf edən tarixi taleyi dahi şəxsiyyət Heydər Əliyevin adı və ideyaları ilə birbaşa bağlıdır.

Vətənimiz üçün kifayət qədər mürəkkəb və ağır bir dönəmdə xalqına arxa olan ulu öndər Heydər Əliyev Azərbaycanın çağdaş tarixində silinməz izlər qoymuşdur. Onun möhtəşəm ideya və əməlləri nəticəsində Azərbaycan dünya meydanında öz sözünü deyə bilən qüdrətli dövlətə çevrilmişdir. Ulu öndərimiz Heydər Əliyev bəşər tarixində siyasət Olimpinə yüksələn nəhəng xadimlərdən biridir və onun həyat yolu doğma Vətənə sədaqət nümunəsidir. Dünyanın ən tanınmış siyasətçiləri belə bu böyük zəka sahibinin misilsiz fəaliyyətini, dəyərli irsini artıq çoxdan nəsillərə örnək kimi dəyərləndirmişlər. Ulu öndərimizin əbədiyyətə qovuşmasından 10 il ötür. Hər il olduğu kimi, yenə də respublikamızın bütün şəhər və rayonlarının nümayəndələri, paytaxt sakinləri, xarici ölkələrdən gəlmiş çoxsaylı qonaqlar Fəxri Xiyabana gələrək Azərbaycanın baş ziyarətgahında ümummilli liderin məzarını ziyarət edirlər. Milyonlarla insan onun xatirəsini əziz tutur, ruhu qarşısında baş əyir, rəhmət diləyirlər. Azərbaycanın özü qədər əbədi olan bu dahi şəxsiyyəti xalqımız böyük məhəbbətlə sevir, anır. Ulu öndərin ölməz ideyaları, düzgün siyasəti əsasını qoyduğu quruculuq işləri bu gün sürətlə davam etməkdədir.

İllər ötdükcə biz Heydər Əliyev dühasının müstəqil və müasir Azərbaycanın tarixindəki əvəzsiz rolunu daha dərindən dərk edir, bu dahi şəxsiyyətin siyasi əzəməti, beynəlxalq nüfuzu barədə təkrar-təkrar düşünməyə mənəvi ehtiyac duyuruq. Çünki bu gün Azərbaycanın qüdrətli dövlətə çevrilməsi, dinamik sosial-iqtisadi inkişafı, dünya birliyində öz layiqli yerini daha da möhkəmləndirməsi məhz Heydər Əliyevin ideyalarının yaşamasının, siyasi kursunun uğurla davam etdirilməsinin nəticəsidir. İstər ölkəmizin tarixində, istərsə də xalqın yaddaşında Heydər Əliyev müstəqil və suveren dövlətin simvolu, xarizmatik siyasət dahisi, cəsur insan və ən böyük vətəndaş kimi qalmışdır və qalacaqdır. O, Azərbaycanın ən yeni tarixində bütöv bir epoxanı özündə təcəssüm etdirən, müstəqil dövlətin siyasi, iqtisadi, hüquqi, sosial-mədəni, elmi əsaslarını yaradan, onların ardıcıl inkişafını təmin edən siyasi kursun və milli inkişaf strategiyasının müəllifidir.

Bu gün biz azərbaycanlıların ölkəmiz haqda danışanda fəxr edə biləcəyi, qürurla öyünəcəyi çox uğurları, nailiyyətləri vardır. Bu uğurların istisna olmadan hamısı ulu öndərimizin adı ilə bağlıdır. Müstəqil Azərbaycanda elə bir sahə yoxdur ki, onun inkişafında Heydər Əliyevin zəhməti olmasın. Bütövlükdə, Heydər Əliyev epoxası yüksəliş epoxasıdır-iqtisadiyyatdan başlamış mədəniyyətə qədər müxtəlif sahələrdə yüksəliş zəmanəsidir. Təkcə sovet hakimiyyəti illərində onun göstərdiyi genişmiqyaslı fəaliyyət böyük bir təcrübə xəzinəsi, dövlət idarəçiliyi akademiyasıdır.

Hazırda hamımızın obyektiv olaraq Azərbaycanda müasir intibah dövrü kimi qiymətləndirdiyi 1970—1980-ci illər o vaxta qədər xalqın qəlbində və ən ülvi niyyətlərində illərlə gizli qalan milli ideyanın, azadlıq və müstəqillik, suveren Azərbaycan dövləti ideyasının dirçəldilməsi, onun ideya-mənəvi özəyinin və gələcək milli azadlıq hərəkatının hərəkətverici qüvvəsi səviyyəsinə yüksəlməsi üçün əlverişli zəmin yaratdı. Məhz bu dövrdə Heydər Əliyev öz misilsiz fəaliyyəti ilə Azərbaycanın uzunmüddətli iqtisadi-sosial, mədəni-mənəvi yüksəlişinin əsasını qoydu.

Dövlət müstəqilliyi dövründə isə məhz Heydər Əliyev müasir müstəqil Azərbaycanın arxitekturasını yaratdı, milli dövlətçiliyimizin ideya təməlini formalaşdırdı. 1993-cü ildən sonra həyata keçirilən qlobal proqramlar, irimiqyaslı layihələr Azərbaycanın iqtisadi qüdrətinin artmasına xidmət etdi, ölkəyə investisiya axını gücləndi. Azərbaycan yeni əsrə və minilliyə təkcə müstəqil dövlət kimi daxil olmadı, həm də özünün böyük iqtisadi sıçrayış möcüzəsini və təcrübəsini gətirdi. Heydər Əliyev ideyaları əsasında Azərbaycan iqtisadiyyatı təkcə sürətli inkişafı ilə diqqəti cəlb etmədi, həm də yeni keyfiyyət parametrləri ilə maraq doğurdu.

Heydər Əliyevin müdrik siyasəti nəticəsində, dünya birliyi, Ermənistan – Azərbaycan, Dağlıq Qarabağ münaqişəsində haqqın və ədalətin kimin tərəfində olduğunu anladı, Azərbaycanın ərazi bütövlüyünü dəstəklədi.

Heydər Əliyev iki dəfə öz ölkəsinin dövlət gəmisini tarixi sınaqlardan çıxardı, onun milli dəyərlərini, insanların ozünə inamını qoruyub saxlaya bildi. Azərbaycan tarixində o, iki dəfə siyasətdə və dövlət idarəçiliyində səriştəsizliyə “yox” deməyi, ən yüksək məharət göstərməyi bacardı. Heydər Əliyev nəzəri səviyyədə norma və dəyərlər məcmusunu tərtib etdi, praktikada həyata keçirdi. Heydər Əliyev ölkənin müasir inkişafı üçün möhkəm təməl qoydu, Azərbaycanın sivil dəyərlər qərarlaşmış dövlət kimi qəbul olunmasını təmin etdi, müasir dünyaya inteqrasiyası üçün şərait yaratdı. Heydər Əliyevin missiyası yalnız Azərbaycan dövlətinin dayaqlarının möhkəmləndirilməsi, müstəqilliyin inkişafı və sürəkliliyinin təmin edilməsi kimi şərəfli bir vəzifəni yerinə yetirməklə məhdudlaşmadı. O, müstəqil Azərbaycan dövlətinin yaradılması konsepsiyasını həyata keçirdi, eyni zamanda, vətəndaşları birləşdirən, xalqımızı beynəlxalq aləmdə vahid amal, əqidə, məqsəd və məram uğrunda səfərbər edən milli təlimi -azərbaycançılıq ideologiyasını da yaratdı.

Ümummilli lider Heydər Əliyev milliliklə dövlətçiliyi bir-birinə qovuşdurdu, onların sarsılmaz vəhdətini təmin etdi. Dünyadakı hər bir xalqın arzusunda olduğu bu əlçatmaz ideal Azərbaycan adlı məkanda da reallaşdı. Beləliklə, azərbaycançılıq ideologiyası etnik yox, siyasi və vətəndaşlıq xarakteri daşıdı, yalnız müstəqil Azərbaycanın vətəndaşlarına deyil, dövlətçilik ideyasını əziz tutanlara münasibətdə də öz birləşdirici funksiyasını yerinə yetirdi. Ümummilli lider tarixi təcrübə və nəzəri müddəaların varisliyini təmin etməklə yanaşı, dövlət idealogiyamızı -azərbaycançılığı mərkəzi müddəa kimi önə keçirdi. Milli ideyanın tarixdə ilk dəfə suveren formatda gerçəkləşdirilməsi dövlətçilik ənənəsində müstəqil dövlətin siyasi təşkilatlanmadan güc alaraq daha qüdrətli zirvələrə yüksəlməsinin başlanğıcını qoydu. Ümummilli lider Heydər Əliyev milli ideyanı çox qısa və çətin zamanda milli varlıgın təcəssümünə çevirməyə nail oldu.

Xalqımızın tarixi, siyasi uğurlarının zəfər trayektoriyası artıq davamlı, kəsilməz xarakter aldı. XX əsrin ikinci yarısında qlobal transformasiya və sarsıntılarla paralel bəzi ölkələrin süqut etdiyi, bəzilərinin isə yenidən yarandığı bir ərəfədə dünya siyasi xəritəsində xalqımız Azərbaycan adlı müstəqil dövlətinin bayrağını yenidən dikəltdi. İlk dəfə milli ideya nəzəri sxem kimi qalmayıb milli dövlətimizi dünya tarixinə həkk etdi. Milli ideal missiyası - ümummilli lider nümunəsində bu dövr üçün qələbələrlə başa çatdırıldı. Ümummilli lider Heydər Əliyev bu cahanşümul məqsədləri müstəqil Azərbaycan adlı ünvanda reallığa çevirdi. Bütün bunlar zamanın mürəkkəb münasibətlərini milli dühası və fövqəlsəyləri ilə Azərbaycan naminə nizamlayan siyasi lideri Heydər Əliyevi ümummilli lider zirvəsinə ucaltdı.

Bunlar azərbaycanlıların neçə-neçə nəsilləri üçün örnək olacaq Heydər Əliyev şəxsiyyətinin tarixi xidmətləridir. Bu gün bu dahi insanın şəxsiyyətinin və fəaliyyətinin mahiyyətini anlamaq bir çox onilliklər ərzində Azərbaycan ətrafında baş verən hadisələrin məğzini, mürəkkəb ümummilli problemlərin həlli yollarını dərk etmək deməkdir. O, əməli işi ilə sübut etdi ki, dünyanı yalnız böyük dövlətlər idarə etmir, rəyləri ilə hesablaşılan kiçik dövlətlər də vardır. O öz şəxsi nümunəsində azərbaycanlıların mətin iradəyə və sarsılmaz ruha, intellektual potensiala malik olduğunu bütün dünyaya nümayiş etdirdi. Heydər Əliyev Azərbaycanı həm dirçəldir, yenidən qurur, həm də onun gələcəyi barədə düşünürdü. Bu dahi şəxsiyyət istənilən mürəkkəb siyasi prosesdən uğurla çıxmağı, ən çətin anlarda həlledici qərarlar qəbul etməyi, hadisələrə çevik reaksiya verməyi yüksək peşəkarlıqla, əsl siyasi liderə xas formada bacarırdı. Heydər Əliyev ədalətli, ardıcıl və prinsipial siyasət sahibi idi. “Bütün gücümü və iradəmi yalnız müdrik və qədirbilən xalqımdan almışam. Ən çətin anlarda, ən mürəkkəb vəziyyətlərdə yalnız və yalnız xalqıma arxalanmışam. Bu da mənə dözüm, iradə verib və bütün uğurlarımı təmin edib” - deyən ümummilli liderimizin ən başlıca keyfiyyəti xalqımıza xas olan milli-mənəvi dəyərlərə ürəkdən baglılığı, milli ideyanı yaşadıb inkişaf etdirməkdən ötrü həyatını sərf etməsi, bütün ömrünü millətin mədəni-mənəvi intibahına həsr etməsi idi. Yüksək humanizm, uzaqgörənlik, insanları yaxşı tanımaq, mürəkkəb şəraitdən məharətlə haqqı çıxarmaq kimi keyfiyyətləri olan Heydər Əliyev təsadüfi deyildir ki, XX əsrin görkəmli liderlərindən biri olmuşdur. Fenomenal şəxsiyyət, müdrik dövlət xadimi, gözəl natiq, qeyri-adi yaddaş, analitik düşüncə qabiliyyəti və tükənməz siyasi iradə – yalnız kamil siyasi liderə xas olan bütün bu keyfiyyətlər Heydər Əliyevdə cəmləşmişdi. İctimai statusundan və sosial mövqeyindən asılı olmayaraq hər kəs, hətta dünya miqyasında tanınmış siyasətçilər, politoloqlar da bu nadirliyi qəbul edirlər. Onun bənzərsiz dövlət xadimi kimi şöhrət qazanmasında, hər şeydən əvvəl digərlərindən fərqlənməsində yüksək mənəvi və yaradıcı keyfiyyətləri, təşəbbüskar və cəsarətli olması və bütün fəaliyyətini dövlətin durmadan inkişafına sərf etməsi başlıca amillərdir.

Vətəni, torpagı sevmək, onun ağrısını, dərdini çəkmək, milli mənafeyi şəxsi mənafedən üstün tutmaq ən böyük vətəndaşlıqdır. Zəmanəsinin ən böyük azərbaycanlısı, böyük şəxsiyyət, ümummilli lider Heydər Əliyev də öz əməlləri və siyasi fəaliyyəti ilə məhz belə şəxsiyyətlərdən olduğunu sübut etmişdir O, Azərbaycan vətəndaşı olduğunu hər yerdə, böyük qürurla, fəxrlə, cəsarətlə söyləmişdir: “Mən fəxr edirəm ki, azərbaycanlıyam”. Bu kəlmələri deyən Heydər Əliyev xalqının qəlbində milli-mənəvi dəyərləri yaşatmaq üçün əbədi bir məşəl - Heydər Əliyev ideyalarından güc alan sönməz məşəli alovlandırmışdır. Heydər Əliyev öz ölkəsini yeni yüzilliyə, həm də yeni minilliyə müstəqil dövlət kimi gətirmişdir. Çox illər keçəcək, lakin çiçəklənən Azərbaycanın vətəndaşları müdrikliyi və dönməzliyi sayəsində Azərbaycanın gələcəyini təmin etmiş bu dahi insanı unutmayacaqlar.

Əsası Heydər Əliyevin yorulmaz əməyi ilə qoyulmuş bu dayanıqlı inkişaf ölkə rəhbəri İlham Əliyevin dövlət xadimi kimi istedadı və ardıcıl fəaliyyəti ilə davam edir. Son 10 ildə Prezident İlham Əliyev milli ənənələri və geosiyasi özəllikləri nəzərə alaraq ölkəni iqtisadi təkamüldən demokratik yetkinlik məkanına bacarıqla transformasiya edir. Ulu öndərimizin şah əsəri adlandırdığımız müasir Azərbaycan firavanlıq, tərəqqi, istiqlal dövrünü yaşayır, onun arzuları, əməlləri, ideyaları uğurla, layiqincə davam etdirilir. XX əsrin 90-cı illərində Azərbaycanın qovuşduğu dəyərlər Heydər Əliyevin titanik fəaliyyəti sayəsində tarixi həqiqətə çevrildiyi kimi, XXI əsrin əvvəllərinin möhtəşəm uğurları da ulu öndərin layiqli davamçısı Prezident İlham Əliyevin yeritdiyi siyasətin parlaq təzahürləridir. İndi qarşımızda böyük hədəflər durur. Bu, ümummilli liderimiz Heydər Əliyevin müəyyən etdiyi böyük yolun davamıdır. Heydər Əliyevin ideyaları həmişə olduğu kimi yolumuza işıq saçır, bizi yeni-yeni qələbələrə səsləyir. Azərbaycanın dahi şəxsiyyəti ümummilli lider Heydər Əliyevin xatirə günü ilə bağlı onun ölməz ruhu qarşısında böyük ehtiramla baş əyərək deyirik: Siz özünüzə tayı-bərabəri olmayan heykəl, əsrlər boyu yaşayacaq abidə ucaltdınız. Bu abidənin adı Azərbaycandır – yeni, xoşbəxt, qüdrətli Azərbaycan!

Asif ƏSGƏROV,

Səbail Rayon İcra Hakimiyyətinin başçısı,

YAP Siyasi Şurasının üzvü

Xalq qəzeti.- 2013.- 11 dekabr.- S.3.