Bakıda yeni ünvan: “Ağ Şəhər”

Qədim tarixə malik olan Bakı şəhəri, demək olar ki, günbəgün yeniləşir, gözəlləşir. Şəhərin hər tərəfindən boylanan göydələnlər, yeni park və xiyabanlar, yaraşıqlı prospekt və küçələr, milli memarlıq üslubunda salınmış yeraltı keçidlər paytaxtımıza xüsusi gözəllik bəxş edir. Bu hələ harasıdır? Dövlətimiz qüdrətləndikcə onun paytaxtının da siması dəyişir. Elə bu il inşasına başlanmış “Ağ Şəhər” layihəsi dəgözəl Bakımıza qənirsiz bir görünüş bəxş edəcək. O, vaxtilə “Qara Şəhər” adlanan geniş bir ərazinin yerində inşa olunur. Bu layihənin reallaşması həmin əraziyə yeni görkəm, yeni həyat bəxşedəcək.

Bu il mayın 25-də Azərbaycan Respublikasının Prezidenti İlham Əliyev “Bakı Ağ Şəhər” bulvarının təməlini qoydu. Təməlqoyma mərasimində cənab Prezident bildirdi: “Bu şəhər tikiləcək. Bu şəhər yaşayacaq. Şəhər içində “Ağ şəhər”də on minlərlə insan yaşayacaq. Gözəl ofislər, yaşayış binaları tikiləcək, ictimai yerlər, dənizkənarı yeni bulvar salınacaqdır. Planlarımız çoxdur. İndi Bakının gözəlləşməsi ilə bağlı çox böyük tədbirlər görülür. Bakı bulvarı bir neçə dəfə uzadılır. Hazırda 4 kilometrdir. Bir neçə aydan sonra biz yeni bulvarın açılışını qeyd edəcəyik. Yeni bulvar Dövlət Bayrağı Meydanı ilə birlikdə 10 kilometrdən daha da böyük məsafəni əhatə edəcəkdir. Həm şəhər sakinləri üçün, gəzinti üçün, istirahət etmək üçün yeni imkanlar yaradılır. Eyni zamanda, şəhərin bu tərəfini də abadlaşdıracağıq. Burada da yeni bulvarlar salınacaqdır. Beləliklə, sahil boyu, bəlkə də, 10 kilometrlərlə ölçülən yeni ictimai yerlər yaradılacaqdır”.

Artıq bu layihə əsasında işlər sürətlə davam etməkdədir. Layihənin reallaşması ilə Nobel prospekti öz simasını tamamilə dəyişəcək. Prospektdə yenidənqurma işləri “Bakı Ağ Şəhər” ofis binasının qarşısında olan və bütün layihənin təməl daşı yerləşən meydançadan başlayır. Nobel prospektində iki yeni yeraltı piyada keçidi inşa ediləcəkdir. Layihəyə əsasən, X.Rüstəmov küçəsinin Nobel prospekti ilə kəsişməsində 4 çıxışı olan yeraltı piyada keçidinin tikintisi aparılmaqdadır.

“Bakı Ağ Şəhər”in nəqliyyat infrastrukturunun inkişaf etdirilməsi istiqamətində işlər aparılacaqdır. “Xətai” metrostansiyasından sonra gələn yeni stansiyanın salınması və çıxışları üçün yer artıq razılaşdırılmışdır. Bu stansiyanın tikintisi ərazidə yaşayan və işləyən insanlar üçün rahatlıq yaradacaqdır.

Yeni metrostansiyasının müxtəlif istiqamətlərdə, o cümlədən yeni fontanlar meydanının və ticarət-əyləncə mərkəzinin lap yaxınlığında 5 çıxışı olacaqdır. Bu çıxışlar piyadaların Nobel prospektindən təhlükəsiz yeraltı keçidini təmin edəcəkdir.

“Yaşıl Ada” (“Green Hill”) rayonunda təmizləmə işləri başa çatdırılmışdır. Layihənin şimal və mərkəzi hissələrində isə təmizlənmə işləri yüksək sürətlə davam etdirilməkdədir.

“Yaşıl Ada” rayonunda “Atkins” memarlıq şirkətinin yerli mütəxəssislərlə birgə xüsusi olaraq “Bakı Ağ Şəhər” üçün işləyib-hazırladığı və öz yaşayış şəraitini yaxşılaşdırmaq istəyən şəhər sakinlərinin getdikcə daha çox bəyəndiyi fransız üslublu yaşayış kompleksləri inşa edilməkdədir. Evlər müxtəlif tip və planları olan mənzillərdən ibarətdir. Burada standart və daha geniş mənzillər vardır: iki otaqlı - 90, üç otaqlı - 125, dörd otaqlı - 145 kvadratmetrdir.

Nobel prospektində, “Bakı Ağ Şəhər”ə girişi bildirən və artıq beynəlxalq memarlıq aləmində geniş tanınmış və hələ layihələndirmə mərhələsində dəfələrlə müxtəlif beynəlxalq sərgilərdə mükafatlara layiq görülmüş “Bakı Ağ Şəhər” ofis binasının tikintisi davam edir. İcra edilmə mərhələsində isə “Bakı Ağ Şəhər” ofis binası nüfuzlu beynəlxalq “Asia Pacific Property Awards 2013” sərgisində, eyni zamanda, iki kateqoriyada - ofis binası və ofis arxitekrurası nominasiyalarında mükafatlar almışdır.

“Ağ Şəhər”in Park rayonunun ərazisi də fəal şəkildə işlənməkdədir. Ümumi sahəsi 24 hektar olan və “Bakı Ağ Şəhər”in şərqindən qərbinə keçən yüksəklikdə yerləşən park rayonu orta hündürlüyü 20 mərtəbəyə qədər olan binalar sırası kimi layihələndirilmişdir. Layihəyə əsasən, hər bir bina ticarət sahəsi kimi təqdim ediləcək kürsüdə yerləşəcəkdir.

Park rayonunun bütün inşa edilən yaşayış komplekslərində “Bakı Ağ Şəhər”in Baş Planının şərtlərinə əsasən, yeraltı avtodayanacağa enən 1 ədəd yük və 2 ədəd sərnişin lifti, havalandırma sistemləri, telekommunikasiya şəbəkəsi üçün şaxtalar, kondisionerlər üçün xüsusi yerlər, yeraltı və yerüstü avtodayanacaqların rahat yerləşməsi və 1 mənzilə 1-2 avtodayanacaq yeri və ticarət obyektlərinin hər 100 kvadratmetri üçün 3-5 avtodayanacaq yeri nəzərdə tutulmuşdur.

Tikinti zamanı həm gözəlliyi, həm də fasadın uzunömürlülüyünü saxlamağa imkan verən müasir mühəndis həlləri tətbiq edilir, keramik materiallardan istifadə olunur. Nizami Parkından yuxarıda - dəniz səviyyəsindən 25 metr yüksəkdə yerləşdiyinə görə rayonun sahilyanı bulvara və Bayraq Meydanına gözəl görüntüsü olacaqdır.

Fransız üslublu binalardan fərqli olaraq, bu evlər daha geniş planlaşdırılmışdır: məsələn, üç otaqlı mənzillər - 160 kvadratmetr, dörd otaqlılar - 190 kvadratmetr və s.

Bakının qədim istirahət guşəsi olan Nizami Parkı yenidən qurulacaq və o, şəhərin ən gözəl parklarından birinə çevriləcəkdir.

Yeni bulvar xəttinin və Nobel prospektinin abadlaşdırılmasının və yenidən qurulmasının məntiqi sonu - mərkəzi iş rayonunu və fontanlar rayonunu layihənin sahilyanı hissəsindəki ticarət-əyləncə mərkəzi və yeni bulvar ilə birləşdirən və onun əsas bəzəyi və strateji hissəsi olan piyada körpüsü olacaq.

Artıq müfəssəl layihələrin işlənməsi məqsədilə yerli şirkətlərlə yanaşı, “Atkins” və “UN Studio” kimi dünya şöhrətli şirkətlər də bu işə cəlb edilmişdir.

“UN Studio” şirkətinin mütəxəssisləri Nobel prospektində yerləşəcək ticarət - ofis binasının layihəsinin işlənməsini həyata keçirirlər. Adından da göründüyü kimi, layihənin konsepsiyasında binada pərakəndə satış obyektlərinin və müxtəlif şirkətlərin ofislərinin açılması planlaşdırılır.

Bundan başqa, 2015-ci il Avropa Olimpiya Oyunlarının başlanğıcı üçün 4 ulduzlu otelin təhvil verilməsi nəzərdə tutulmuşdur.

Diqqəti cəlb edən daha bir layihə fransız məktəbi kimi nəzərdə tutulan binadır. Hazırda tam sürətlə gələcək tədris müəssisəsinin inşasına başlamaq üçün hazırlıq gedir. Xatırladaq ki, məktəbin inşasının təşəbbüskarı Heydər Əliyev Fondudur. Binanın təməlinin qoyuluşu isə Azərbaycan və Fransa prezidentləri tərəfindən həyata keçirilmişdir.

Azərbaycan Respublikasının Prezidenti İlham Əliyevin “2006-2010-cu illərdə Azərbaycan Respublikasında ekoloji vəziyyətin yaxşılaşdırılmasına dair kompleks tədbirlər Planı”nın təsdiq edilməsinə dair sərəncamı çərçivəsində həyata keçirilən “Bakı Ağ Şəhər” şəhərsalma layihəsi ekoloji yönümlülüyü, davamlılığı və bütövlüyü ilə seçilməklə ən iri miqyaslı şəhərsalma layihələrindən biri kimi nüfuz qazanmışdır.

“Bakı Ağ Şəhər” layihəsi dəfələrlə böyük beynəlxalq sərgilərdə, o cümlədən “Cityscape Global 2011" (Dubay) və ”MIPIM Asia 2011" (Honq-Konq) sərgilərində müvafiq olaraq, “Ən yaxşı şəhərsalma layihəsi” və “Gələcəyin ən yaxşı layihəsi” nominasiyalarında birincilik əldə etmişdir.

“Bakı Ağ Şəhər” layihəsinin baş məsləhətçisi rolunda mühəndis layihələndirilməsi sahəsində dünyanın tanınmış beynəlxalq şirkəti “Atkins” (Böyük Britaniya) çıxış edir. Layihə üzərində işə azərbaycanlı mütəxəssislərlə yanaşı, əsası əfsanəvi Norman Foster tərəfindən qoyulmuş məşhur “Fosters and Partners” arxitektura şirkəti və Amerikanın kommersiya məkanlarının işlənilməsində böyük təcrübəyə malik “F+A Architects” arxitektura bürosu da cəlb olunmuşlar.

İllər ötəcək, biz tezliklə Bakının görkəminə xüsusi gözəllik bəxş edən “Ağ Şəhər”in necə əzəmətli bir məkana çevrildiyinin şahidi olacağıq.

M.MÜKƏRRƏMOĞLU,

“Xalq qəzeti”

Xalq qəzeti.- 2013.- 19 dekabr.- S.5.