Ordubad rayonunun Bist və

Nəsirvaz kəndlərində yeni

obyektlər istifadəyə verilmişdir

Başı qarlı dağların əhatəsində yerləşən Bist və Nəsirvaz Ordubad rayonunun ən ucqar dağ kəndləridir. Yaşı min illərlə ölçülən, qədim tarixə, gözəl təbiətə, turizm potensialına, zəhmətkeş və torpağa bağlı insanlara malik olan bu yaşayış məntəqələrində sakinlərin sosial problemləri ardıcıl həll olunur. “Regionların sosial-iqtisadi inkişafı Dövlət Proqramı”nın uğurlu icrası nəticəsində bu il kəndlərdə yeni sosial obyektlər tikilmiş, geniş abadlıq işləri aparılmışdır.

Bu il Bist kənd tam orta məktəbinin binası yenidən qurulmuş, müasir tədris sistemi yaradılmışdır. Dekabrın 21-də Naxçıvan Muxtar Respublikası Ali Məclisinin sədri Vasif Talıbov Bist kənd tam orta məktəbinə gəlmiş, yenidənqurma işlərindən sonra yaradılan şəraitlə tanış olmuşdur. Məlumat verilmişdir ki, ikimərtəbəli məktəb binası 154 şagird yerlikdir. Binada 11 sinif otağı, kimya-biologiya, fizika laboratoriyaları, hərbi kabinə, kompyuter və müəllimlər otaqları, kitabxana, idman zalı və açıq idman qurğuları vardır. Məktəbin kitabxana fondunda 2500 latın qrafikalı dərslik və 1300 bədii ədəbiyyat olmaqla 3800 kitab vardır.

Məktəbin müəllimləri yaradılan şəraitə və göstərilən qayğıya görə minnətdarlıq etmiş, təhsilin səviyyəsinin yüksəldilməsi istiqamətində səylə çalışacaqlarını bildirmişlər.

Həmin gün Bist kənd həkim ambulatoriyasının yeni binası da istifadəyə verilmişdir.

Tibb bacısı Xalidə Məmmədova ambulatoriyada yaradılan şəraitə görə kənd sakinləri və səhiyyə işçiləri adından minnətdarlığını bildirmişdir.

Ali Məclisin sədri Vasif Talıbov yaradılanlardan, qurulanlardan səmərəli istifadə olunacağına, əhaliyə nümunəvi xidmət göstəriləcəyinə əminliyini bildirmiş, bir daha sakinləri təbrik etmiş, açılışı bildirən lenti kəsmişdir.

Sonra Bist kəndində yeni xidmət mərkəzi istifadəyə verilmişdir.

Naxçıvan Muxtar Respublikası Ali Məclisinin sədri Vasif Talıbov mərkəzin açılışını etmiş kənd sakinləri ilə görüşmüş, kənddə əhalinin məşğuliyyəti və yaşayışı ilə maraqlanmışdır.

Sakinlər Bist kəndində aparılan abadlıq-quruculuq işlərinin hər bir sakinin rahatlığına xidmət etdiyini bildirmişlər.

***

Dekabrın 21-də Nəsirvaz kənd tam orta məktəbinin yeni binası istifadəyə verilmişdir.

Naxçıvan Muxtar Respublikası Ali Məclisinin sədri Vasif Talıbov açılışı bildirən lenti kəsmişdir.

Tədbirdə çıxış edən məktəbin direktoru Etibar Əhmədov bildirmişdir ki, kollektiv yaradılan şəraitdən səmərəli istifadə edəcək, gənc nəslin hərtərəfli təhsil alması yolunda səylə çalışacaqdır.

Naxçıvan Muxtar Respublikası Ali Məclisinin sədri Vasif Talıbov Nəsirvaz kənd tam orta məktəbinin yeni binasının istifadəyə verilməsi münasibətilə kollektivi təbrik etmiş, məktəbdə təhsilin müasir səviyyədə qurulacağına əminliyini bildirmiş, binada yaradılan şəraitlə tanış olmuşdur. Məlumat verilmişdir ki, məktəbdə geniş və işıqlı sinif otaqları, kimya-biologiya və fizika laboratoriyaları, hərbi kabinə, kompyuter otağı, müəllimlər otağı, kitabxana, idman zalı və bufet vardır.

Nəsirvaz kənd mərkəzinin də açılışı olmuşdur.

Nəsirvaz kənd inzibati ərazi dairəsi üzrə nümayəndə Nicat Rzayev yaradılan şəraitə görə sakinlər adından minnətdarlığını bildirmişdir.

Naxçıvan Muxtar Respublikası Ali Məclisinin sədri Vasif Talıbov sakinləri qarşıdan gələn Dünya Azərbaycanlılarının Həmrəyliyi Günü və Yeni İl bayramları münasibətilə təbrik etmiş, açılışı bildirən lenti kəsmişdir.

Məlumat verilmişdir ki, binada rabitə evi, polis sahə və baytarlıq məntəqələri, kitabxana, Yeni Azərbaycan Partiyası ərazi ilk təşkilatı, inzibati ərazi dairəsi üzrə nümayəndəlik, bələdiyyə, feldşer-mama məntəqəsi, kənd klubu və 45 yerlik iclas zalı yerləşir.

Həmin gün Nəsirvaz kəndində yeni xidmət mərkəzi də istifadəyə verilmişdir.

Naxçıvan Muxtar Respublikası Ali Məclisinin sədri Vasif Talıbov açılışı bildirən lenti kəsmişdir.

Məlumat verilmişdir ki, xidmət mərkəzində bərbərxana, qadın gözəllik salonu, ət satışı yeri, ərzaq və sənaye mallarının satıldığı mağaza vardır. Hazırda mərkəzdə 4 nəfər işlə təmin olunmuşdur.

Xidmət mərkəzi ilə tanışlıqdan sonra kənd sakinləri ilə görüşən Ali Məclisin sədri demişdir ki, bu gün ölkəmizdə həyata keçirilən sosial islahatların mərkəzində insanların rahat yaşayışı dayanır. Nəsirvaz kəndində tikilənlər, qurulanlar da bu məqsədə xidmət edir. İstifadəyə verilən yeni sosial obyektlər yalnız dövlət qurumları tərəfindən deyil, bütün kənd əhalisi tərəfindən qorunmalı, sakinlər bundan sonra da kəndin abadlaşmasında yaxından iştirak etməlidirlər.

Kənd ağsaqqalları muxtar respublikada ucqar dağ kəndlərinin inkişafına hərtərəfli qayğı göstərildiyini bildirərək demişlər ki, son 18 ildə bu kəndin həyatında əsaslı dəyişikliklər baş vermiş, avtomobil yolu çəkilmiş, fərdi evlər tikilmiş, insanların problemləri həll olunmuşdur. Sakinlər göstərilən qayğıya görə minnətdarlıq etmişlər.

* * *

Bist və Nəsirvaz kəndlərində həyata keçirilən tikinti işləri zamanı kəndlərin avtomobil yolu da yenidən qurulmuşdur. Belə ki, 30 kilometr məsafədə yol yatağı genişləndirilərək qum-çınqıl verilmiş, Bist kəndində qədim körpü təmir olunmuş, 1 yeni körpü, 180 metr istinad divarı, 15 selötürücü, 89 suötürücü tikilmişdir. Bununla yanaşı hər iki kənddə 550 metr yerüstü kabellər, 6000 metr fiberoptik rabitə xətti, 2810 metr elektrik, 410 metr qaz, 700 metr içməli və 380 metr suvarma su xəttləri çəkilmişdir.

Naxçıvan Muxtar Respublikası Ali Məclisinin sədri Vasif Talıbov həmin gün Nəsirvaz tağım dayaq məntəqəsinə gəlmiş, xidmətin təşkili və şəxsi heyətin sosial-məişət şəraiti ilə maraqlanmışdır.

Ali Məclisin sədri şəxsi heyəti qarşıdan gələn Dünya Azərbaycanlılarının Həmrəyliyi günü və Yeni İl bayramları münasibətilə təbrik etmişdir.

Əsgər Coşqun Cəfərov şəxsi heyət adından minnətdarlığını bildirərək demişdir ki, çətin dağlıq şəraitdə xidmət edən əsgərlərimiz üçün yaradılan şərait şəxsi heyətdə ruh yüksəkliyi və inam hissi yaradır. Əsgərlər bundan sonra da vətənin keşiyində ayıq-sayıq dayanacaqlar.

Sonra Ali Məclisin sədri əsgər yataqxanasına baxmışdır.

Bildirilmişdir ki, əsgərlər isti geyim və yataq dəstləri, kalorili qidalarla təmin edilmişlər. Tağım məntəqəsinin anbarında ərzaq və yanacaq ehtiyatı yaradılmışdır. Burada əsgərlərin asudə vaxtının səmərəli keçirilməsi üçün də lazımi şərait vardır.

Gətirilmiş bayram sovqatı tağım məntəqəsinin ərzaq anbarına təhvil verilmişdir.

Naxçıvan Muxtar Respublikası Ali Məclisinin sədri Vasif Talıbov “Gəmiqaya” Tarix-Bədii Qoruğuna gəlmiş, yeni binada yaradılmış şəraitlə tanış olmuşdur.

Bildirilmişdir ki, 2 yardımçı otaqdan və ekspozisiya zalından ibarət olan muzeyin fondunda 184 eksponat vardır. Hazırda onlardan 106-sı ekspozisiya zalında nümayiş etdirilir. Muzeyə üzərində rəsmlər olan qaya daşları, Gəmiqayada aparılan tədqiqat işlərinə aid müxtəlif kitablar, qəzetlər, fotoşəkillər, qayaüstü rəsmlərin fotoşəkilləri, eləcə də Naxçıvanın 5 min illik tarixinə aid elmi simpoziumların materialları toplanmışdır.

Xalq qəzeti.- 2013.- 24 dekabr.- S.6.