Mingəçevir: quruculuq və abadlıq işləri

“Nur şəhəri”nin hüsnünü gözəlləşdirir

Daha bir təqvim ili başa çatır. 2013-cü il Azərbaycan tarixinə çox mühüm hadisələrlə yazılmaqda davam edir. Ona görə “yazıldı” demirik ki, hələ ilin sonuna bütöv bir həftə qalır və biz son illərdə milli tariximizə nəinki hansısa rübdə və ya ayda, hətta hər həftədə belə nə isə əlamətdar bir hadisənin yazıldığının şahidi olmuş, bu ənənəyə vərdiş etmişik.

Xüsusən, yola saldığımız il gənc müstəqil dövlətimizin həyatı əksər qonşularımız üçün əlçatmaz olan hadisələrlə zəngin oldu. İlin əvvəlində ölkəmiz kosmosa özünün ilk rabitə peykini göndərdi, may ayında dövlətimiz BMT Təhlükəsizlik Şurası kimi mötəbər beynəlxalq təşkilata sədrlik etdi, müvafiq idman qurumları Avropa miqyaslı ilk Olimpiya Oyunlarının Azərbaycanda keçirilməsi barədə qərar qəbul etdilər və nəhayət, oktyabr ayında keçirilmiş prezident seçkilərində xalqımız növbəti dəfə öz siyasi iradəsini ortaya qoyaraq Prezident İlham Əliyevə yenidən etimad göstərdi. Cənab dövlət başçımız seçkidən sonrakı çıxışlarında böyük səmimiyyətlə dedi ki, Azərbaycan dövlətinin istənilən nailiyyətində ölkə əhalisinin hər bir fərdinin payı və xidməti vardır.

Ölkəmizin xəritəsinə “Nur şəhəri” kimi düşən Mingəçevirdən hazırlamaq istədiyimiz bu yazıya məhz belə bir girişlə başlamağımız təsadüfi deyil. Çünki Mingəçevirdəki dostlarımdan biri, tələbə yoldaşım Tahir Əzizlidən hələ dekabrın əvvəllərindəki söhbətlərimizdə təxminən bu məzmunlu ifadələr eşitmişdim. Tahir demişdi ki, Prezident İlham Əliyev də ümummilli liderimiz kimidir. O da ölkədəki heç bir qələbəni, nailiyyəti dövlət rəsmilərinin adına deyil, bütövlükdə xalqın adına yazır. Həmsöhbətim əlavə etmişdi ki, bu tendensiya bir çox cəhətlərdən hamı tərəfindən sevilir. Ən başlıcası isə, ölkənin nailiyyətlərində öz payının da olduğunu bilavasitə dövlət başçısından eşidən sadə insanda dövlətə və dövlətçiliyə bağlılıq hissləri möhkəmlənir.

Dostum qeyd etmişdi ki, mingəçevirliləri dövlətə və dövlətçiliyə ən çox bağlayan tellərdən biri də Prezident İlham Əliyevin dövri olaraq bu şəhərə gəlməsi, burada həyata keçirilən sosial-iqtisadi inkişaf layihələrini dəstəkləməsidir. Tahirin həmin qənaəti ilə mən də razıyam. Çünki bu il aprel ayının ortalarında Prezident İlham Əliyevin Mingəçevirə etdiyi səfərin unudulmaz təəssüratlarını yaşayanlardan biri də mənəm. Dövlət başçımız həmin səfəri zamanı tikintisinə hələ 2008-ci ildə başlanmış Heydər Əliyev Mərkəzinin açılış mərasimində iştirak etmişdi. Ümumi sahəsi 6 min kvadratmetr olan bu mərkəzin 570 nəfərlik akt zalı var. Sahəsi 6 hektar olan Müşfiq Mirzəyev adına “Dostluq” parkının, respublikamızda ən böyük analoji qurğulardan biri olan gənclər evinin, sahil parkının və digər obyektlərin açılışı da həmin səfər zamanı olmuşdu. Prezidentə məlumat verilmişdi ki, Kür çayı üzərində 212 metr uzunluğunda asma kanatlı lift inşa olunur. Bu lift gündə 1000 nəfərin bir sahildən o biri sahilə daşınmasını təmin edəcək. O zaman Prezident Mingəçevirdə tikiləcək bir sıra mühüm bina və qurğuların layihələri ilə də tanış olmuş, öz tövsiyə və tapşırıqlarını vermişdi. Həmin layihələrin reallaşdırılması istiqamətində həyata keçirilən tədbirlər belə deməyə əsas verir ki, yaxın zamanlarda “Nur şəhəri”ndə daha bir neçə yeni obyektin açılışı da olacaq.

Mən son aylar Mingəçevirdə, demək olar ki, hər həftə oluram. Ancaq bu şəhərdə keçirilən “Bilik Günü”ndən üzü bəri şahidi olduğum elə tədbirlər var idi ki, o barədə operativ şəkildə xəbər yazsam da, burada eşitdiyim fikirlərdən sonralar istənilən yazıda istifadə etmək zərurəti duyuram. Məsələn, şəhər icra hakimiyyətinin başçısı Niyazi Bayramovun oktyabrın əvvəlində “Mingəçevir kəndi” deyilən yaşayış massivində sakinlərlə görüşü zamanı eşitmişdim ki, bu şəhərin ən azı 5 min il yaşı var. Bu fakt “Nur şəhəri”nin dünəni barədə idi. Oktyabrın 22-də keçirilən 9 ayın yekunları barədə hesabat yığıncağında isə Mingəçevirin bu günü və sabahı barədə faktlar eşitmişdim: 2013-cü ildə mingəçevirli orta məktəb məzunlarından 18 nəfəri qızıl medala layiq görülüb, 29 abituriyent ali məktəblərə qəbul imtahanı zamanı 600-dən çox bal toplayıb, qəbul imtahanlarında respublika üzrə 700 bal toplayan abituriyentlərdən 2 nəfəri mingəçevirlidir və sairə. Əslində bu faktlar Mingəçevirin bu gününə aiddir. Ancaq həmin gənclərin şəhərin gələcək günlərində fəaliyyət göstərəcəyini düşünəndə adamın ürəyində bir rahatlıq, məmnuniyyət hissi yaranır: Prezident İlham Əliyevin biz neftdən əldə olunan kapitalı insan kapitalına çevirməliyik - çağırışı Mingəçevirdə, sözün həqiqi mənasında, günün reallığına çevrilir.

Yuxarıda son zamanlar Mingəçevirdə şahidi olduğum tədbirləri sadalayırdım. Onlardan biri də noyabrın ortalarında keçirilən “Şəhər günü” adlı möhtəşəm tədbir idi. Dövlət Dram Teatrı aktyorlarının açıq səma altında nümayiş etdirdiyi tamaşadan sonra Heydər Əliyev Mərkəzində davam etdirilən tədbirin əvvəlində biz “Nur şəhəri” adlı filmə baxmışdıq. Hələ orta məktəb şagirdi olduğum illərdən tanıdığım, son 30 ildə isə az qala hər ay qonağı olduğum bu şəhərin tarixi barədə ən müfəssəl məlumatı məhz həmin filmdən almışdım - desəm, inanın. Tədbirdə şəhər icra hakimiyyətinin başçısı Niyazi Bayramov, Mingəçevir Politexnik İnstitutunun rektoru, Şəhər Ağsaqqallar Şurasının sədri Akif Hacıyev, Təbiət və Riyaziyyat Təmayüllü Liseyin direktoru Aidə İsmayılova, Mingəçevir Turizm Kollecinin direktoru Əyyub Əyyubov və başqa natiqlər bu şəhərin ölkəmizin iqtisadi və ictimai-siyasi həyatında oynadığı roldan elə konkret faktlarla, arqumentlərlə danışdılar ki, mən həmin məqamları indiyədək bilmədiyimə görə təəssüfləndim.

Təbii ki, istənilən şəhər və rayon haqqında söz açarkən mütləq orada həyata keçirilən tikinti-quruculuq və abadlıq işlərinin miqyası barədə təsəvvür yaratmağa cəhd edirik. Mən də Mingəçevir barədə qələmə aldığım yazıda həmin tendensiyanı davam etdirmək istəyirdim. Şəhər icra hakimiyyəti başçısının müavini Ramiz Əliyevlə söhbət zamanı o mənə görülən işlər barədə elə həvəslə danışdı ki, onun dediklərini kağıza köçürməkdən başqa çarəm qalmadı. Ramiz müəllim bildirdi ki, son illər bütün bölgələr kimi, Mingəçevir də abadlaşır, inkişaf edir, şəhərdə əhalinin həyat səviyyəsi yaxşılaşır. Ölkə başçısının imzaladığı sərəncamlara əsasən şəhərin sənaye potensialının genişləndirilməsi, yeni müəssisələrdən ibarət iri texnoparkların təşkili, infrasturuktur layihələrinin həyata keçirilməsi, olimpiya idman kompleksinin tikilməsi, mərkəzi xəstəxananın əsaslı təmiri, 13 məktəb binasının inşası və ya yenidən qurulması, qazlaşdırma işlərinin başa çatdırılması, su-kanalizasiya sistemlərinin tikintisinin sürətləndirilməsi, çoxmərtəbəli yaşayış binalarında təmir-bərpa işlərinin aparılması, lift təsərrüfatının və istilik sisteminin əsaslı şəkildə yenidən qurulması hədəf seçilib. Artıq bu istiqamətlərdə mühüm işlər görülür. Belə ki, Mingəçevir Şəhər Mərkəzi Xəstəxanasının təmirinə başlanılıb. 4 və 10 saylı məktəblərin, eləcə də 10 və 12 saylı uşaq bağçalarının əsaslı təmir işlərinə başlanılıb. Qısa müddətdə bu təlim-tərbiyə ocaqlarının dam örtükləri, sanitar texniki qovşaqları, elektrik xətləri dəyişdirilib. Hazırda 6 çoxmərtəbəli binanın lifti yenisi ilə əvəz edilib, 17 binada isə işlər davam etdirilir. Şəhərin su və kanalizasiya sistemlərinin yenidən qurulması layihəsinin icrası da uğurla davam etdirilir. İndiyə kimi 105 min 517 poqonometr su xətti, 46 min 477 poqonometr kanalizasiya xətti çəkilib. Günəşli və Bağlar massivlərində evlərə su bağlantıları verilib. 2500 ədəd sayğac quraşdırılıb. Onu da qeyd edək ki, layihə çərçivəsində çirkab təmizləyici qurğu və ehtiyat su anbarının tikintisi də nəzərdə tutulub. Şəhər ərazisində dairəvi qaz sisteminin təşkili də davam etdirilir. Bu sistem bütün mənzillərin kefiyyətli və fasiləsiz “mavi yanacaq”la təminatına imkan verəcək.

Düz sözə nə deyəsən. Bütün bunlar mingəçevirlilərin gözü qarşısında baş verib. Biz məsələni xüsusi qeyd edək ki, şəhərdə quruculuq və abadlıq işlərinin davam etdirilməsi zamanı müasir şəhərsalmanın tələblərinə ciddi əməl edilir. Heydər Əliyev prospektində, Natəvan, Vaqif və Cəmil Əliyev küçələrinə yüksək keyfiyyətli asfalt döşənib. 13 ictimai yaşayış binasının dam örtüyü dəyişdirilib. Yeri gəlmişkən, onu da vurğulayaq ki, Mingəçevirdə 25 ədəd 9 mərtəbəli yaşayış binası var. Hazırda həmin binaların fasad hissələri də dəyişdirilir, zirzəmilərində kommunikasiya işləri görülür. Son zamanlar Əliağa Vahid küçəsindəki binaların istilik sistemləri bərpa edilərək əhalinin xidmətinə verilib. Ümumiyyətlə, şəhərdəki binaların hamısında istilik sistemləri quraşdırılacaq. Mingəçevirlilərin mədəni istirahəti həmişə diqqət mərkəzində olub. Ona görə də Müşfiq Mirzəyev adına parkda səhnə və 410 nəfərlik yay tamaşa salonu da quraşdırılıb. Onu da qeyd edək ki, küçə, park və xiyabanlarda, istirahət mərkəzlərində, inzibati binaların fasad hissələrində quraşdırılan işıqlandırma sistemləri, xüsusi effektlər yerli sakinlərlə yanaşı, qonaqları da valeh edir.

Bax belə. Mingəçevir haqqında qələmə aldığım bu yazıya nöqtə qoymaq mənə o qədər də çətin olmadı. Axı, bunu bilməyə nə var. “Nur şəhəri” hər gün yox, hər saat dəyişir...

İlqar HƏSƏNOV,

“Xalq qəzeti”nin bölgə müxbiri

Xalq qəzeti.- 2013.- 25 dekabr.- S.6.