Bizim Şahbaz müəllim

Müharibə veteranı, Mozdokdan Berlinə qədər şərəfli döyüş yolu keçmiş sevimli müəllimim Şahbaz Hüseynovu Yardımlıda hamı tanıyır. Şahbaz müəllim doğulub boya-başa çatdığım Çay-Üzü kəndindəki orta məktəbdə hərbi hazırlıq müəllimimiz idi. Yaxşı yadımdadır, ömrünün az qala 70 ilini şagirdlərinin təlim-tərbiyəsinə həsr edən Şahbaz müəllim məktəbə həmişə hərbi mundirlə gələrdi. Elə bu gün də, yaşının 90-na çatmasına baxmayaraq, həmin hərbi geyimdə yolunu tez-tez məktəbdən salır, müəllim və şagirdlərə məsləhət və tövsiyələrini verməkdə davam edir...

Doğrudan da, müəllim sözü, müəllim məsləhəti, müəllim nümunəsi Şahbaz Hüseynovun timsalında bütün zamanlar üçün insanların həyat yollarında ümid işığına, inam nuruna çevrilib. Çünki hər bir kəs qazandığı nailiyyətlərə görə, ilk növbədə müəllimlərinə borcludur. Axı həyatını müəllimliyə həsr edən insanlar fədakar, vətənpərvər, sözün həqiqi anlamında doğma xalqına, doğma torpağına sədaqətlə xidmət göstərən insanlardır.

Şahbaz müəllimlə ömrün ötən illəri barədə xatirələri çözələyəndə ani olaraq xəyala dalır, nurlu çöhrəsində xəfif cizgilər gəzir. Sanki uzun illərin arxasından boylanıb uşaqlıq, yeniyetməlik, gənclik illəri yadına düşür. O zamanlar ürəyində dil açan və gerçəkləşməyən arzularını xatırlayır, eyni zamanda, qazandığı uğurlarını götür-qoy edir. Bir də keçdiyi bu uzun ömür yolunda zaman-zaman qoyduğu özünəməxsus izləri düşünür.

Şahbaz müəllimin ilk təhsil və yeniyetməlik illəri Böyük Vətən müharibəsinə təsadüf edib. Müharibənin törətdiyi fəsadların tüğyan etməsi, əhalinin çox ağır sınaqlar qarşısında qalması onun taleyinə də silinməz naxışlar yazıb. Və bir gün əsgər mundirində cəbhəyə yollanan Şahbaz müəllim doğma elinə, obasına zabit mundirində dönüb...

Şahbaz Hüseynov müəllim adını ən əziz, ən yüksək dövlət mükafatı sayır. Ömrünün yarıdan çoxunu gənc nəslin təlim-tərbiyəsinə həsr edən, hərbi biliklərə yiyələnməyi şagirdlərinə həvəslə öyrətməyə çalışan sadə bir pedaqoq üçün bundan şərəfli, bundan yüksək ad ola bilməz. Şahbaz müəllim yüksək daxili mədəniyyətə malik, mülayim təbiətli və təvazökar bir insandır. O, eyni zamanda, işgüzar və məsuliyyətli bir müəllim kimi tanınır. Özünə qarşı yüksək tələbkarlığı və prinsipiallığı sayəsində kollektivdə və bütün rayonda xüsusi nüfuza malikdir.

Şahbaz müəllim deyir ki, gənc nəsli düzgün həyat yoluna müəllimlər istiqamətləndirir. İnsanın həyata münasibətində, idrak prosesində, dünyagörüşünün formalaşmasında müəllimin zəhməti müqayisəolunmazdır. Yaxşı müəllimin yetirmələri həyat yollarında layiqli mövqe tutaraq doğma Vətəninə, xalqına, millətinə xeyir verirlər. Şahbaz müəllimə görə, bu gün dönüb geri baxanda həyatının ən mənalı illərini müəllim işlədiyi zamanda görür. Çünki onun üçün müəllimlik illəri daha əzizdir.

Geniş mütaliə dairəsinə malik olan Şahbaz müəllim həmişə güclü hafızəsi, geniş erudisiyası ilə seçilir. O, həqiqətən işıqlı insandır. Bu gün müdriklik yaşına – ömrünün 90-cı baharına qədəm qoyan, bütün yaradıcı fəaliyyətini milli-mənəvi dəyərlərimizin qorunmasına yönəldən ağsaqqal müəllimimiz öz bilik və təcrübəsini bu gün də gənclərdən əsirgəmir.

Şahbaz müəllim gənclərimizin hərbi-vətənpərvərlik ruhunda tərbiyə alması üçün daim ciddi şəkildə məşğul olub, xarakterinin bu tərəfi artıq birmənalı formada təsdiqini tapıb: gənc nəslin formalaşması üçün əlindən gələni etmək onun üçün bütün məşğuliyyətlərdən cəlbedicidir. Yaxşı xatırlayıram ki, məktəbdə oxuduğumuz illərdə Şahbaz müəllim bizə tez-tez tövsiyə edərdi ki, hərb sənətinin bütün incəliklərinə yiyələnək, SSRİ-də və respublikamızda fəaliyyət göstərən ali hərbi məktəblərdə təhsil alaq. Şahbaz müəllimin bu uzaqgörənliyi respublikamız müstəqilliyini əldə edəndən sonra özünü qabarıq şəkildə göstərdi.

Şahbaz müəllimin bir üstünlüyü də var ki, bu da onun səbirli, dözümlü olmasıdır. Şahbaz müəlllim özünün üstün insani keyfiyyətləri ilə məşğul olduğu sahədə də mümkün olanları əldə etməyi bacarıb. Onun fikrincə, ömürdən ötən günlərin ardınca boylanıb təəssüflənmək yox, sabahı düşünmək, qalan vaxtı məzmun və zaman baxımından zənginləşdirmək gərəkdir. Bax, onda ömrümüz–həyatımız qısa olduğuna görə yox, mənalı yaşadığımız üçün şirinlik anlamına gələcək.

Mustafa SADIXLI

Xalq qəzeti.- 2013.- 25 dekabr.- S.7.