Səbail rayonu: inkişaf yeni mərhələyə qədəm qoyur

Səbail Bakı şəhərinin Xəzərsahili boyu yerləşən mərkəzi rayonudur. Ərazisi 29 kvadratkilometr, əhalisi 100.074 nəfərdir, burada 9170 nəfər məcburi köçkün məskunlaşmışdır. Rayonda 4 ərazi nümayəndəliyi və 3 bələdiyyə fəaliyyət göstərir. Səbail Bakı şəhərinin ən qədim ərazisidir, rayon kimi ötən əsrin 20-ci illərindən formalaşmışdır. Əvvəlcə “Bayıl – Bibiheybət”, 1931-ci ildən “Stalin”, 1960-cı ildən isə “26 Bakı komissarları” adını daşımışdır. 29 aprel 1992-ci ildən Səbail rayonu adlandırılmışdır. Səbail rayonu tarix və memarlıq abidələrinin əsl xəzinəsidir. Rayonun ərazisində antik dövrə və orta əsrlərə aid abidələr mövcuddur. İçərişəhər Azərbaycanda olan və YUNESKO-nun dünya mədəniyyət irsinin inciləri sırasına daxil etdiyi tarixi abidələrdən ən möhtəşəmidir – min ildən çox yaşı var. Onun başlıca abidəsi “Şirvanşahlar sarayı” ansamblıdır. “Qız qalası” Səbail rayonunun rəmzidir.

Ümumi inkişaf

Son illərdə aparılan əsaslı quruculuq tədbirlərinin, sürətli və genişmiqyaslı inkişafın davamı olaraq 2012-ci ildə də Səbail rayonunda ürəkaçan dəyişikliklər baş vermişdir.

İlin yekunlarına görə sənaye müəssisələri üzrə 23.949,1 milyon manatlıq məhsul istehsal edilmiş, nəqliyyat sektorunda 633,4 milyon manatlıq, rabitə müəssisələrində 913,5 milyon manatlıq xidmətlər göstərilmişdir.

İl ərzində bütün maliyyə mənbələri hesabına əsas kapitala investisiya 4.303,9 milyon manat olmuşdur ki, bu da əvvəlki ilin müvafiq dövrü ilə müqayisədə 21,4 faiz çoxdur. Tikinti-quraşdırma işlərinə yönəldilmiş investisiyanın həcmi 1.229,3 milyon manat olmuş, əvvəlki illə müqayisədə 7 faiz artmışdır.

Pərakəndə ticarət şəbəkəsi əhaliyə ötən ildəkindən 74,2 faiz çox istehlak malları satmışdır. Pullu xidmətlər 2011-ci ilə nisbətən 20,6 faiz artıq olmuşdur.

Ötən il rayonda çalışan işçilərin sayı 100074 nəfər, orta aylıq əmək haqqının məbləği isə 950,5 manat olmuşdur (əvvəlki illə müqayisədə 5,6 faiz çox). 2012-ci ildə rayonda 2697 daimi yeni iş yeri açılmışdır. Ümumiyyətlə, 2003-cü ildən 39 mindən artıq daimi iş yeri yaradılmışdır.

Ölkə Prezidentinin diqqət və himayəsi

Ötən il rayonda yerləşən müxtəlif təyinatlı obyektlərin inşası, təmir-yenidənqurulma işləri müvəffəqiyyətlə davam etdirilmişdir. Həmin obyektlərin açılışında və tikinti işlərinin gedişatı ilə tanışlıq mərasimlərində ölkə başçısı şəxsən iştirak etmişdir.

Yanvar ayının 12-də Prezident İlham Əliyev və xanımı Mehriban Əliyeva Bakı – Ələt avtomobil yolunun Dövlət Bayrağı Meydanına qədər olan hissəsinin tikintisi, yeni bulvarın salınması ilə bağlı görülən işlər, Dövlət Bayrağı Meydanı və onun ətrafında həyata keçirilən tədbirlərlə tanış olmuşlar. Mart ayının 16-da dövlət başçısı“Bakıelektrikşəbəkə” ASC-nin “İçərişəhər” yarımstansiyasının açılış mərasimində iştirak etmişdir. Aprel ayının 1-də Prezident İlham Əliyev və xanımı Mehriban Əliyeva Bakıda beşulduzlu “CW Mariott Abşeron” otelinin açılışında iştirak etmiş, aprelin 3-də isə Dövlət Bayrağı Meydanı, onun ətrafında görülən abadlıq, quruculuq tədbirləri və İdman-Konsert Kompleksində həyata keçirilən inşaat işlərinin gedişi ilə tanış olmuşlar. Aprelin 25-də ölkə başçısı iki dəfə Sovet İttifaqı Qəhrəmanı, general Həzi Aslanovun abidəsinin, Bakı Funikulyorunun əsaslı şəkildə yenidən qurulması, Dağüstü Parkda İstiqlal Müzeyinin inşası və Dənizkənarı Milli Parkın genişləndirilməsi ilə bağlı həyata keçirilən işlərin gedişatı ilə, may ayının 6-da “Hilton-Baku” otelinin qarşısındakı parkın abadlıq və quruculuq işlərindən sonrakı vəziyyəti ilə tanış olmuşdur.

May ayının 23-də isə Prezident İlham Əliyev və xanımı Mehriban Əliyeva əsaslı təmir və yenidənqurmadan sonra Bakı Funikulyorunun istifadəyə verilməsi mərasimində, “Azneft” döngəsində inşa olunmuş yeraltı piyada keçidinin açılışında iştirak etmişlər. Sonra onlar Dənizkənarı Milli Parkda xüsusi memarlıq üslubunda inşa olunan Azərbaycan Xalçası və Xalq Tətbiqi Sənəti Dövlət Muzeyində və “Venesiya” adlanan ərazidə həyata keçirilən abadlıq və quruculuq işlərinin gedişi ilə maraqlanmış, bulvarın Dövlət Bayrağı Meydanına qədər olan hissəsinə baxmış, istifadəyə verilən yeni iaşə obyektləri ilə də tanış olmuşlar.

Mayın 28-də Prezident Respublika Günü münasibəti ilə İstiqlaliyyət küçəsində Azərbaycan Xalq Cümhuriyyətinin şərəfinə ucaldılmış abidəni ziyarət etmişdir. Həmin gün dənizkənarı Milli Parkda ölkə başçısı İlham Əliyevin iştrakı ilə “Kiçik Venesiya şəhərciyi” əsaslı yenidənqurmadan sonra istifadəyə verilmişdir.

İyunun 22-də Azərbaycan Respublikasının Prezidenti İlham Əliyev Səbail rayonunun Badamdar qəsəbəsində Heydər Əliyev parkının əsaslı təmir və yenidənqurma işlərindən sonrakı vəziyyəti ilə tanış olmuşdur. İyul ayının 5-də Səadət sarayı əsaslı təmir və yenidənqurma işlərindən sonra istifadəyə verilmişdir. Azərbaycan Respublikasının Prezidenti İlham Əliyev və xanımı Mehriban Əliyeva açılış mərasimində iştirak etmişlər.

Sentyabrın 3-də Bakıda daha bir beşulduzlu otelin - “Four Seasons Hotel Baku”nun açılışı olmuş, Prezident İlham Əliyev və xanımı Mehriban Əliyeva mərasimdə iştirak etmişlər. Sentyabrın 4-də Bakının Səbail rayonunun Badamdar qəsəbəsində yeni inşa olunan 329 nömrəli tam orta məktəbin və uşaq bağçasının binaları istifadəyə verilmişdir. Dövlət başçısı İlham Əliyev açılış mərasimlərində iştirak etmişdir. Sentyabr ayının 5-də isə Prezident İlham Əliyev Bakının Səbail rayonundakı 49 nömrəli “İntellekt” məktəb-lisey binasının əsaslı təmir və yenidənqurma işlərindən sonrakı vəziyyəti ilə tanış olmuşdur. Oktyabrın 11-də Prezident İlham Əliyev yenidən Dövlət Bayrağı Meydanında və onun ətrafında görülən abadlıq-quruculuq işlərinin gedişi ilə tanış olmuşdur. Oktyabrın 31-də ölkə rəhbəri Bülbül prospektində görkəmli opera müğənnisi, SSRİ xalq artisti Bülbülün xatirəsinə ucaldılmış abidənin açılışında iştirak etmişdir. Noyabrın 12-də Prezident İlham Əliyev Milli Təhlükəsizlik Nazirliyinin hərbi hospitalının açılışında iştirak etmişdir. Noyabrın 16-da isə İlham Əliyev və xanımı Mehriban Əliyeva bir daha Dövlət Bayrağı Meydanı ətrafında görülən abadlıq işlərinin gedişi ilə tanış olmuşlar, dövlət başçısı müvafiq tapşırıqlarını vermişdir. Dekabrın 29-da Prezident İlham Əliyev paytaxtın “Azadlıq” meydanında tikilən yeraltı avtomobil dayanacağında inşaat işlərinin gedişi ilə tanış olmuşdur.

“Avroviziya – 2012”

2012-ci il ölkəmizin mədəni həyatında, onun dünyadakı müsbət imicinin möhkəmlənməsi istiqamətində çox böyük və yaddaqalan bir hadisə kimi Bakı şəhərində 57-ci “Avroviziya” mahnı müsabiqəsi keçirilmişdir. Müsabiqəyə hazırlıqla bağlı qısa müddətdə rayon ərazisində genişmiqyaslı işlər görülmüşdür.

Mikayıl Müşviq küçəsində Botanika bağının hasarları yenidən tikilib üzlənmiş, Badamdar şossesi boyunca yeni istinad divarı çəkilmişdir. Dövlət Bayrağı Meydanı yaxınlığında Almaniya şirkətləri tərəfindən tikilmiş 23 min tamaşaçı yerlik “Baku Cristal Hall”ın ətrafında sürətlə abadlıq-quruculuq işləri aparılmış, yol kənarı abadlaşdırılmış, ərazidə yeni infrastruktur yaradılmışdır. Bakı Bulvarı genişləndirilmiş, şəhərimizin simvollarından olan Bakı Funikulyoru əsaslı təmir-yenidənqurmadan sonra istifadəyə verilmiş, Bayraq Meydanına kimi yeni yol çəkilmişdir.

On beş gün ərzində Avropanın qəlbi Bakıda döyünmüşdü. Müsabiqə ilə bağlı Bakı şəhərinə gələn 42 ölkənin təmsilçiləri, çoxsaylı qonaqlar hərtərəfli diqqət və qayğı ilə əhatə olunmuşdular. Şəhərin mərkəzi rayonu olaraq Səbail Rayon İcra Hakimiyyəti Başçısı Aparatının əməkdaşları, təsərrüfat və digər xidmətlərinin işçiləri müsabiqənin keçirilməsi dövründə xüsusi iş rejimində çalışmış, yaranan hər bir problem operativ şəkildə aradan qaldırılmışdır. Təşkilat komitəsinin gərgin fəaliyyəti, dövlət rəhbərliyinin göstərdiyi böyük dəstək nəticəsində müsabiqə müvəfəqiyyətlə başa çatmış, iştirakçı dövlətlərin nümayəndə heyətləri, çoxsaylı qonaqlar ölkəmizdən xoş təəssüratla ayrılmışlar.

Tikinti-quruculuq

Son bir il ərzində şəhərin mərkəzi hissəsində, xüsusilə də Dənizkənarı Milli Parkın ərazisində, Dövlət Bayrağı Meydanının ətrafında həyata keçirilən layihələr, Bakı – Ələt yolunun bu ərazidən keçən hissəsinin tikintisi paytaxtın sahilboyu simasını tamamilə dəyişmiş, şəhərin girişini gözəlləşdirilmişdir.

Bunlarla yanaşı, Səbail rayonunda digər irimiqyaslı işlər də həyata keçirilmiş və bir sıra mühüm layihələrin icrası davam etməkdədir. 2012-ci il ərzində İncəsənət Muzeyi üçün keçid korpusun, Bayraq Meydanına uzanan magistral yolda yeni yeraltı keçidlərin, Dövlət Yanğından Mühafizə Xidmətinin Səbail rayon şöbəsinin yeni inzibati binasının və deponun, Ü.Hacıbəyov küçəsində 6 mərtəbəli, 200 maşın yerlik yeni qarajın, “Bakıelektrikşəbəkə” ASC-nin “Yeni Bayıl” və “Bayraq Meydanı” yarımstansiyalarının inşası, mərkəzdə Səməd Vurğunun ev muzeyinin əsaslı və Dövlət Filarmoniyasının binasının cari təmiri başa çatdırılmışdır. Yay aylarında paytaxtın əsas magistrallarından olan Neftçilər prospektində təmir işləri aparılmış, prospekt ətrafındakı kommunikasiya xətləri yeniləşdirilmiş, yağış sularını yığan xətlər qurulmuş, yeni asfalt örtüyü salınmışdır.

Hazırda rayon ərazisində dövlət əhəmiyyətli iri obyektlərin tikintisi aparılır, bir sıra ünvanlarda təmir-bərpa işləri davam etdirilir. Bu gün Azərbaycan Xalçası və Xalq Tətbiqi Sənəti Dövlət Muzeyi üçün yeni binanın, “Alov qüllələri” kompleksinin, Badamdar qəsəbəsində Bakı-Oksford Məktəbi üçün yeni tədris korpusunun tikintisi davam edir. “Azadlıq” meydanında 2 mərtəbəli, 2000 avtomobil yerlik yeraltı və Fəvvarələr Meydanında 7 mərtəbəli, 500 avtomobil yerlik yerüstü qarajların, “Cənub” mehmanxanasının yerində 7 mərtəbəli yeni mehmanxananın tikintisi, Dövlət Musiqili Komediya Teatrının binasının əsaslı təmiri aparılır. “20-ci sahə”də “Bakıelektrikşəbəkə” ASC-nin 2 yeni yarımstansiyasında işlər başa çatmaq üzrədir.

Abidələrin bərpa və konservasiyası üzrə “Master plan”a uyğun olaraq Avstriyanın “Remmers” şirkəti “Qız qalası”nda mərhələlərlə bərpa və konservasiya işləri aparır. Bərpa işlərinin 2013-cü ilin sonuna kimi yekunlaşdırılması nəzərdə tutulmuşdur.

“20-ci yaşayış sahəsi”ndə “Neftçi” İdman-Sağlamlıq Mərkəzinin “Bibiheybət” stadionunun yerində 3200 yerlik yeni “Bayıl” stadionu və inzibati bina inşa edilmişdir. Əhəd Yaqubov küçəsində kütləvi informasiya vasitələri işçiləri üçün 16 mərtəbəli, 146 mənzilli yeni binanın tikintisi aparılır və 2013-cü ilin sentyabr ayında istifadəyə veriləcək. 2012-ci il aprel ayının 4-də həmin küçədə Müasir İstedadlar Məktəbinin təməli qoyulmuşdur. 1200 şagird üçün nəzərdə tutulmuş bu kompleksdə məktəbəqədər, natamam və orta təhsil şöbələri fəaliyyət göstərəcəkdir. Kompleksin ümumi sahəsi 7 hektar, tikinti sahəsi isə 13000 kvadratmetr olacaq və 2013-cü ilin sonunda istifadəyə veriləcək.

Bakı — Ələt magistral yolunun 4-6-cı kilometrinin istifadəyə verilməsindən sonra həmin yolun Bibiheybət qəsəbəsinə tərəf uzanan hissəsinin ətrafının abadlaşdırılması, Bakı Bulvarının Dövlət Bayrağı Meydanından Bibiheybət istiqamətində uzadılması işləri davam etdirilir.

Hazırda “Şəhidlər Xiyabanı” kompleksinin bir hissəsində əsaslı təmir-yenidənqurma işləri və “İstiqlal” muzeyinin tikintisi aparılır. Xiyabanın digər ərazisində ictimai təşkilatlar və xidmət sahələri işçiləri, həmçinin yeni yaradılmış Səbail Rayon İcra Hakimiyyəti Başçısının 1 nömrəli sahə inzibati ərazi dairəsi üzrə nümayəndəliyi üçün birmərtəbəli bina tikilmişdir. Xiyabanda çalışan xidmət işçiləri üçün Badamdar qəsəbəsində 2 mərtəbəli, 10 mənzilli yaşayış binasının tikintisi davam etdirilir.

Keçən il baş vermiş sürüşmənin nəticələrinin aradan qaldırılması üçün görülən işlər çərçivəsində Bayıl yamacının alt hissəsində - Neftçilər prospektində yeni beton istinad çəkilmiş, divarlar dekorativ üzlüklə üzlənmişdir. Qurban Abbasov küçəsinin başlanğıcında istinad divarı aqlay daşla üzlənmiş, üzbəüz tərəfdə isə yeni dekorativ məhəccərli hasar tikilmişdir.

Rayon ərazisində aparılan abadlıq işləri ilə bərabər, bu ilin yanvar ayında Səbail Rayon İcra Hakimiyyətinin həyətində də abadlıq aparılmış, 700 kvadratmetr sahədə dekorativ plitə döşənmiş, divarlar və darvaza rənglənmiş, binanın qarşısında yeni güllər əkilmişdir.

Bu ilin əvvəlində paytaxtımızın kanalizasiya şəbəkəsinin əsas hissələrindən sayılan “Sahil” kollektorunda əsaslı təmir və təmizləmə işlərinə başlanmışdır. Bayıl yaşayış sahəsindəki Gülbala Əliyev küçəsində yeni kanalizasiya kollektorunun çəkilməsi, Dövlət Proqramına uyğun olaraq bu ərazilərdə su və kanalizasiya sistemlərinin yenilənməsi işləri aparılır.

Əlavə proqramlar, layihələr

Bakı şəhərinin və onun qəsəbələrinin sosial-iqtisadi inkişafı məsələləri daim Prezident İlham Əliyevin diqqət mərkəzindədir.

2011-ci ilin mart ayında Bakı Şəhər İcra Hakimiyyətində keçirilən geniş toplantıdan sonra dövlət başçısının may ayının 5-də imzaladığı “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nda Səbail rayonuna geniş yer ayrılmış, 11 bənd üzrə 44 tədbirin həyata keçirilməsi planlaşdırılmışdır.

Artıq ölkəmizdə proqrama daxil edilmiş işlərin böyük hissəsi həyata keçirilmiş, digərlərinin icrası ilə bağlı işlər davam etdirilir. Dövlət proqramına əsasən, 900 nəfər şagirdin təhsil aldığı 7 saylı pilot məktəbi üçün yeni korpus tikilmişdir. 1937-ci ildə tikilmiş Bibiheybət qəsəbəsindəki 50 saylı orta məktəbin təmiri də müvafiq dövlət proqramına uyğun olaraq 2012-ci ildə başa çatdırılmışdır.

Bayıl yaşayış sahəsində yerləşən 203 saylı orta məktəbdə də dövlət proqramına uyğun olaraq əsaslı təmir işləri aparılmışdır. Cövdət Hacıyev adına 3 saylı uşaq musiqi məktəbinin binası isə yenidən tikilmişdir.

Badamdar qəsəbəsindəki “Könül” körpələr evi əsaslı təmirdən sonra iyul ayında istifadəyə verilmişdir. Mərkəzdəki 44 saylı uşaq bağçasının əsaslı təmiri də başa çatmışdır. 2012-ci ildə Badamdar qəsəbəsində özəl “Ahu” uşaq bağçası istifadəyə verilmişdir. Dövlət proqramının icrası ilə bağlı rayondakı 1 saylı şəhər poliklinikasında və 3 saylı vərəm əleyhinə dispanserdə də əsaslı təmir işləri aparmışdır. Bibiheybət qəsəbəsində isə mədəniyyət evi və kitabxanada əsaslı təmir-möhkəmləndirmə işləri davam edir, burada əlavə tikili inşa olunur.

Qədim rayonun yeni siması

Şəhərimizdə aparılan genişmiqyaslı abadlıq-quruculuq işləri çərçivəsində rayonun mərkəzi hissəsində bir sıra yaşayış binaları üzlənib təmir edilir. Bir çox tarixi və memarlıq binalarının fasadları, eyvanları, dam örtükləri təmir olunmuşdur.

Səbail Rayon İcra Hakimiyyətinin və Bakı Şəhər Prokurorluğunun binasının da müasir şəkildə üzlənərək yenidənqurulması, RİH-nin iclas zalının genişləndirilməsi ilə bağlı layihə hazırlanmış və onun da icrası davam etdirilir. Səbail RİH-in “Abad həyət” layihəsi əsasında Badamdar qəsəbəsində “Abad həyət” sakinlərin istifadəsinə verilmişdir. İl ərzində əsas kuçə və prospektlərlə yanaşı, qəsəbədaxili və məhəllədaxili küçə və yolların da təmiri aparılmış, ümumilikdə, 2012-ci il ərzində 275500 kvadratmetr sahəyə yeni asfalt örtüyü salınmışdır. Badamdar qəsəbəsinin su təchizatının və kanalizasiya sisteminin yaxşılaşdırılması istiqamətində görülən işlər çərçivəsində qəsəbədəki 3-cü yaşayış massivində 5 ədəd yeni su anbarları tikilmiş, digərlərinin də tikintisi davam edir və bu işlərin 2013-cü ilə kimi başa çatması nəzərdə tutulmuşdur.

2012-ci ildə Səbail Rayon İcra Hakimiyyəti bir sıra tədbirlər və görüşlər də təşkil etmiş, silsilə mədəni-kütləvi layihələr həyata keçirmişdir.

Hazırladı: Tahir AYDINOĞLU

Xalq qəzeti.- 2013.- 1 fevral.- S. 5.