Nəsillərə örnək olan ömür yolu

Görkəmli dövlət xadimi, uzun illər partiya, sovet və dövlət işlərində çalışmış, təəssübkeş və səmimi insan Lidiya Rəsulovanın vəfatından bir il ötür.

L.Rəsulova şərəfli bir ömür yolu keçmişdir. Əmək fəaliyyətinə ümumtəhsil müəssisələrində başlayan Lidiya xanım işlədiyi ilk vaxtlardan prinsipiallığı, tələbkarlığı, dərin intellekti ilə fərqlənmiş, qısa zamanda vəzifə pillələrində irəli çəkilərək 20 ilə yaxın müddətdə respublikamızın gənclər təşkilatlarında, partiya və sovet orqanlarında müxtəlif məsul vəzifələrdə işləmişdir.

1981-ci ildə L.Rəsulovaya daha böyük etimad göstərilmiş və o, Azərbaycan Respublikası Həmkarlar İttifaqları Şurasının sədri seçilmişdir. Həmin dövrdə bütövlükdə SSRİ məkanında həmkarlar təşkilatlarının fəaliyyətininin təşkilinə, ümumiyyətlə, həmkarlar ittifaqları hərəkatına, onların cəmiyyətdə rolunun öyrənilməsinə və gücləndirilməsinə münasibətdə yeni baxış formalaşmaqda idi. Lidiya xanım bu vəzifədə işlədiyi müddətdə İttifaq çərçivəsində həmkarlar hərəkatında respublikamızı ləyaqətlə təmsil etmiş, yüksək təşkilatçılıq keyfiyyətləri ilə diqqəti cəlb etmişdir. Bu illərdə ölkəmizdə həmkarlar ittifaqları təşkilatlarının işinin canlandırılması, onların maddi-texniki bazasının möhkəmləndirilməsi, istirahət və müalicə mərkəzlərinin işinin səmərəsininin artırılması, yeni istirahət və müalicə şəbəkələrinin yaradılması, insanların sosial-rifah halının yaxşılaşdırılması istiqamətlərində bir sıra müsbət işlər görülmüşdür.

Azərbaycan Respublikasının sosial təminat naziri, Azərbaycan Respublikası Dövlət Elm və Texnika Komitəsinin sədr müavini vəzivələrində işlədiyi dövrlərdə də Lidiya xanım fəaliyyət sahəsi ilə bağlı aktual problemlərə özünəməxsus yanaşma tərzi və idarəçilik qabiliyyəti nümayiş etdirmiş, ona tapşırılan məsul dövlət vəzifələrinin öhdəsindən bacarıqla gəlmişdir. Göstərilən sahələrdə dövlət siyasətinin və idarəçiliyinin həyata keçirilməsi ilə bağlı vəzifələrin yerinə yetirilməsində qazandığı uğurlar onu mahir təşkilatçı kimi tanıtmışdır.

Ümummilli lider Heydər Əliyevin Azərbaycanda siyasi hakimiyyətdə olduğu 70-ci illərdə və 80-ci illərin əvvəllərində, eləcə də Sovet dövlətinin rəhbərlərindən biri olduğu dövrdə onun qayğısı və bilavasitə dəstəyi ilə partiya, sovet və dövlət idarələrində çalışan bir sıra yüksək səviyyəli peşəkar kadrlar yetişdirilmişdi ki, onlar respublikamızın sonrakı mərhələlərdə, xüsusən müstəqillik illərindəki inkişafına çox böyük xidmətlər göstərmişlər. Lidiya xanım da Azərbaycan dövlətçiliyinin inkişaf tarixində çox əhəmiyyətli və şərəfli səhifə olan bu dövrdə formalaşmış bir kadr kimi Heydər Əliyev strateji kursunun həyata keçirilməsinin fəal iştirakçılarından biri olmuşdur. Xüsusən o, təhsil naziri vəzifəsində çalışdığı dövrdə ölkəmizdə sovet təhsil sistemindən milli təhsil sisteminə keçidin ən mürəkkəb anlarında ortaya çıxan çətin problemlərin həllində yüksək peşəkarlıq nümunəsi göstərmiş, gənc nəslin vətənpərvərlik ruhunda tərbiyəsinə və milli dövlətçiliyimizə sadiq övladlar kimi yetişməsinə öz layiqli töhfəsini vermişdir.

Lidiya xanımın təhsil naziri vəzifəsinə təyin olunduğu dövr ölkəmizin çox çətin və keşməkeşli dövrlərindən birinə təsadüf edirdi. O zaman respublikamızın inkişafına əngəllər törədən, onu parçalamağa çalışan bədniyyətli qüvvələr hələ də fəaliyyət göstərməkdə, planlar qurmaqda idilər. Belə mürəkkəb və məsul anlarda Vətən təəssübkeşlərinə, səriştəli və dövlətçilik ənənələrimizə sadiq olan yüksək peşəkar kadrlara böyük ehtiyac var idi və məhz belə çətin bir dövrdə ulu öndərimiz təhsil naziri kimi məsul vəzifəni Lidiya Rəsulovaya tapşırmaqla ona böyük etimad göstərmişdi.

Ulu öndərimizin respublikanın ali və orta ixtisas məktəblərinə qəbulla əlaqədar 1994-cü ilin 2 avqust tarixində Prezident Sarayında keçirilmiş müşavirədəki giriş nitqində dediyi bu sözlər də məhz bu etimadın nəticəsi idi: “Mən Lidiya Rəsulovanı təhsil naziri təyin etdim. Bu addımı atarkən belə fikirdə idim və öz fikrimdə qalıram ki, Lidiya Rəsulova təcrübəli kadrdır, respublikada tanınmış adamdır və ali təhsil sahəsində çox böyük təcrübəsi var, yüksək mənəviyyata malikdir. Əminəm ki, o, öz təcrübəsindən, biliyindən istifadə edərək, hazırladığımız tədbirləri həyata keçirəcəkdir”.

Təhsili millətin gələcəyi üçün ən vacib amillərdən biri hesab edən və təhsilin inkişafına xüsusi diqqət və qayğısını heç zaman əsirgəməyən Heydər Əliyevin bu sözləri Lidiya xanımın şəxsiyyətinə, mənəviyyatına verilən yüksək dəyərin bariz nümunəsidir.

L.Rəsulova belə yüksək etimadı doğrultmaya bilməzdi və o, əsl vətəndaşlıq, yüksək peşəkarlıq keyfiyyətləri nümayiş etdirərək ölkəmizdə təhsil sisteminin inkişafı və onun milli xüsusiyyətləri nəzərə alınmaqla yeni dövrün və ictimai-siyasi mühitin çağırışlarına uyğun təkmilləşdirilməsi, zamanın tələbləri ilə ayaqlaşmağı bacaran intellektual potensiala malik elmi-pedaqoji müəllim kadrlarının hazırlanması istiqamətlərində işin təşkili üçün bütün bilik və bacarığını səfərbər etmiş, qısa vaxtda bu sahədə bir çox nailiyyətlərin qazanılmasında böyük xidmətlər göstərmişdir. Lidiya xanımın bu xüsusiyyətləri onun pedaqoji fəaliyyətində də çox aydın nəzərə çarpmış və o, milli mənəvi və fəlsəfi-əxlaqi meyarlarımızın və ənənələrimizin qorunub saxlanması, inkişaf etdirilməsi və gənclərə aşılanması üçün əlindən gələni etmişdir.

Bununla yanaşı, o, bir müddət gender məsələləri ilə məşğul olmuş, onun rəhbərliyi altında Gender Araşdırmaları Mərkəzində aparılan araşdırmaların nəticələri qadınların cəmiyyətdəki mövcud problemlərinin həllində müstəsna rol oynamışdır. Ümumdünya Qadınlar Konfransında Azərbaycanın təmsilçisi kimi çıxış edərək mütəxəssislərin diqqətini cəmiyyətdəki gender problemlərinə yönəltmiş, onların həlli üçün təkliflər səsləndirmişdir.

Ümummilli lider Heydər Əliyevin müəyyən etdiyi siyasi kursa daim sadiq olan şəxs kimi uzun illər doğma Azərbaycanımızın mədəni və sosial-iqtisadi inkişafının sürətləndirilməsi strategiyasının həyata keçirilməsində və ölkəmizdə demokratik-hüquqi dövlət quruculuğunun möhkəmləndirilməsində səmərəli fəaliyyəti və yüksək şəxsi keyfiyyətləri Lidiya xanıma cəmiyyətdə dərin hörmət və nüfuz qazandırmışdır. Bunların nəticəsidir ki, o, müxtəlif illərdə SSRİ və Azərbaycan Ali Sovetinin deputatı seçilmiş, bir çox orden və medallara layiq görülmüş, 1997-ci ildə isə müstəqil Azərbaycanın dövlət quruculuğunda fəal iştirakına görə ölkəmizin ali mükafatı olan “Şöhrət” ordeni ilə təltif edilmişdir.

Lidiya Rəsulovanın həyat və fəaliyyəti, dövlətçilik ənənələrimizin inkişafına göstərdiyi xidmətlər barədə sonsuz xoş sözlər söyləmək, onun gördüyü işlər haqqında qalın kitablar yazmaq olar. Lakin bu gün onun xatirəsinə ən yaxşı hədiyyə möhtərəm Prezidentimiz cənab İlham Əliyevin rəhbərliyi ilə müstəqil Azərbaycanımızın gündən-günə qüdrətlənməsi, dövlətçiliyimizin daha da möhkəmlənməsi və dünya dövlətləri sırasında şərəfli yer tutmasıdır, xalqımızın firavan gələcəyinə böyük əminlikdir. Çünki bu nailiyyətlərin qazanılmasında xidmətləri olan insanların sırasında Lidiya xanımın da adı şərəflə çəkilir.

Onun zəngin, qürur duyulmalı fəaliyyəti və sonrakı nəsillərə örnək olan işıqlı ömür yolu bu böyük insanı bütün cizgiləri ilə canlandırmağa imkan verir. Lidiya xanım tariximizdə özünə Tomiris, Sara xatın, Natəvan xanım kimi əbədilik qazanmışdır və hər zaman hörmət və o, ehtiramla xatırlanacaqdır.

Natiq İSAYEV,

Azərbaycan Jurnalistlər Birliyinin üzvü

Xalq qəzeti.- 2013.- 5 fevral.- S. 6.