ATİ-nin əməkdaşları Britaniya Şurasının təşkil etdiyi təlim kursunda iştirak etmişlər

Azərbaycan Turizm İnstitutunun xarici əlaqələr və layihələr şöbəsinin əməkdaşları Vüsalə Qəhrəmanlı və Nəzrin Əliyeva 2013-cü il yanvarın 22-dən 25- inədək ali təhsil müəssisələrindən seçilmiş nümayəndələrin iştirakı ilə “Azərbaycan Universitetlərinin Beynəlxalq Əlaqələr Departamentinin inkişafı” üzrə təlim kursunda iştirak etmişlər. Qeyd edək ki, Azərbaycan Respublikası Təhsil Nazirliyinin dəstəyi ilə Britaniya Şurasının ali təhsilin beynəlmiləlləşdirilməsi layihəsi çərçivəsində təşkil edilən təlim kursunun məqsədi beynəlxalq əlaqələr sahəsində çalışan mütəxəssislərin bilik və bacarıqlarının təkmilləşdirilməsidir.

Təlim kursunu aparan ekspertlər Britaniya Şurası tərəfindən İngiltərənin Varvik Universitetinin beynəlxalq əlaqələr departamentindən dəvət olunmuşlar. Bu təlimlərdə Azərbaycanın müxtəlif şəhərlərində— Gəncədə, Naxçıvanda, Sumqayıtda və Bakıda yerləşən 15 ali məktəbin beynəlxalq əlaqələr şöbələrinin əməkdaşları iştirak etmişlər. Təlimlər interaktiv şəkildə təşkil olunmuş, iştirakçılar təlim prosesində qarşılıqlı müzakirələrdə fəallıq göstərmiş, təcrübələrini bölüşmüş və maraqlı təklif və rəylərlə çıxış etmişlər. Kursu uğurla bitirən iştirakçılar üçün gələcəkdə İngiltərənin Varvik Universitetinə tanışlıq səfərinin təşkil olunması nəzərdə tutulmuşdur.

Sonda iştirakçılar təlimin yüksək səviyyədə təşkil olunmasından razılıqlarını bildirərək həm nəzəri və praktiki baxımdan biliklərə yiyələnmək, həmçinin ölkəmizin universitetləri arasında ilkin tanışlıqlar qurularaq əlaqələrin gələcəkdə daha da möhkəmlənməsi baxımından onun əvəzsiz rolu olduğunu qeyd etmişlər. Britaniya Şurasının proqramlar üzrə meneceri Əkbər Daşdəmirov keçirilmiş uğurlu təlimin nəticəsi olaraq ali məktəblərlə gələcəkdə bu tip təlimlərin davam etdirilməsi niyyətində olduqlarını qeyd etmişdir. Təlimin sonunda iştirakçılara xüsusi sertifikat verilmişdir.

Qeyd etmək yerinə düşər ki, sözügedən təlim kursunun birinci mərhələsi 2012-ci ilin 24-28 sentyabr tarixlərində keçirilmişdir.

Xalq qəzeti.- 2013.- 5 fevral.- S. 6.