“Kulturologiya və etik mədəniyyət”

Azərbaycan Mədəniyyət Assosiasiyası, Atatürk Mərkəzi, Azərbaycan Kulturoloqlar Cəmiyyəti ilə birlikdə “Kulturologiya və etik mədəniyyət” mövzusunda seminar keçirmişdir.

Tədbirdə dövlət qurumlarının, Milli Elmlər Akademiyası, ali məktəblərin professor -müəllimləri, Vətəndaş Cəmiyyəti Beynəlxalq Mədəniyyət Forumunun,Kulturoloqlar Cəmiyyətinin, Mədəniyyət Assosiasiyasının üzvləri, milli QHT-lərin, yaradıcı və həmkarlar ittifaqlarının,bələdiyyələrin, beynəlxalq təşkilatların, fondların, KİV-lərin nümayəndələri iştirak etmişlər.

Atatürk Mərkəzində keçirilən seminarı giriş sözü ilə Azərbaycan Respublikası Prezidenti yanında Dövlət İdarəçilik Akademiyasının professoru, “Simurq” Azərbaycan Mədəniyyət Assosiasiyasının (AMA) prezidenti Fuad Məmmədov açmışdır. Bakı Dövlət Universitetinin (BDU) professoru, fəlsəfə elmləri doktoru Fərman İsmayılov “Kulturologiya və ünsiyyət mədəniyyəti”, BDU-nun dosenti, tarix üzrə fəlsəfə doktoru, Azərbaycanın əməkdar müəllimi Tahir Behbudov “Kulturologiya və xidmət etiketi”, Respublika Yaradıcılıq Fondu sədrinin birinci müavini, Azərbaycanın əməkdar mədəniyyət işçisi Rafiq Kəşanlının “ Kulturologiya və işgüzar etika” mövzularında məruzələri dinlənilmişdir.

Qeyd edilmişdir ki, “Simurq” AMA-nın fəaliyyət istiqamətlərindən biri olan növbəti kulturoloji seminarın etik mədəniyyətə həsr olunması milli və dünya sivilizasiyasının , bəşər mədəniyyətinin aktual problemləri sırasında mühüm əhəmiyyət kəsb edur. İnsanın inkişafı, formalaşması, etik mədəniyyəti, bir-birilə ünsiyyəti, məhəbbəti, dostluğu, özünü dərk etməsi, ünsiyyət vasitəsi olan dilin inkişafı, birgə əmək fəaliyyəti xalqın mədəni səviyyəsinin, həyat şəraitinin yüksəldilməsində mühüm rol oynayır.

Çıxış edən alim və mütəxəssislər dünyada qloballaşma şəraitində yaşamağın zəruri amilləri, xalqlar arasında münasibətlərin genişlənməsi, ölkəmizdə kulturologiyanın və etik mədəniyyətin hərtərəfli inkişafı sahəsində mövcud olan problemlərdən söz açmış, milli mədəniyyətin inkişafı üçün bütün həyat, iş və xidmət sahələrində dünya mədəniyyətinin nailiyyətlərinə yiyələnməyi, insanın inkişaf qanunları və həyat fəaliyyəti texnologiyalarını dərindən dərk etməyi və məhsuldar əmək fəaliyyətinə sahib olmağı tövsiyə etmişlər.

Sonda “Kulturologiya və Azərbaycanın gələcəyi” mövzusunda dəyirmi masa keçirilmişdir. Professor F. Məmmədov və məruzəçilər dəyirma masa iştirkçılarını maraqlandıran sullara ətraflı cavablar vermiş, rəy, arzu və təkliflərini bildirmiş və diskussiya aparılmışdır.

A.SADIQOĞLU

Xalq qəzeti.- 2013.- 5 fevral.- S. 6.