Bakı Ali Neft Məktəbi xarici əlaqələrini genişləndirir

Dünən Böyük Britaniya və Şimali İrlandiya Birləşmiş Krallığının Azərbaycan Respublikasındakı fövqəladə və səlahiyyətli səfiri Piter Beytmen Bakı Ali Neft Məktəbində olmuşdur.

Qonağı qəbul edən rektor Elmar Qasımov bildirmişdir ki, gündən-günə inkişaf edən ölkəmizdə beynəlxalq standartlara cavab verən ingilis dilli kadrların hazırlanması gündəmdə olan əsas məsələlərdən biridir. Bakı Ali Neft Məktəbinin yaradılmasının və qısa müddətdə yüksək uğurlar əldə etməsinin ölkə başçısı İlham Əliyevin “Neft kapitalını insan kapitalına çevirək” devizinin əyani sübutu olduğunu diqqətə çatdıran E. Qasımov hazırda ən müasir standartlara uyğun tədris prosesinin qurulduğu bu ali məktəblə Böyük Britaniyanın Heriot-Vatt Universiteti arasında sıx tərəfdaşlıq münasibətləri qurulduğunu qeyd etmişdir. Rektor Heriot-Vatt Universitetei ilə əldə olunmuş razılaşmaya əsasən, Bakı Ali Neft Məktəbində tədrisin təşkili, onun gedişinə nəzarət, biliklərin qiymətləndirilməsi və müxtəlif proseslərin Heriot-Vatt Universitetinin tələblərinə uyğun həyata keçiriləcəyini və bunun nəticəsi olaraq Bakı Ali Neft Məktəbinin məzunlarına hər iki ali təhsil müəssisəsinin diplomlarının veriləcəyini bildirmişdir.

Daha sonra E.Qasımov ali məktəbin beynəlxalq əlaqələrinin genişləndirilməsinin vacibliyini qeyd etmiş, qısa müddətdə bu istiqamətdə görülmüş işlər haqqında məlumat vermiş və dünyanın inkişaf etmiş dövlətlərinin sırasında öncül yerlərdən birini tutan Böyük Britaniyanın elm və təhsil mərkəzləri ilə də əməkdaşlıq əlaqələrinin qurulmasının xüsusi maraq kəsb etdiyini vurğulamışdır.

Böyük Britaniya və Şimali İrlandiya Birləşmiş Krallığının Azərbaycan Respublikasındakı fövqəladə və səlahiyyətli səfiri Piter Beytmen Bakı Ali Neft Məktəbinə gəlişindən məmnunluq hissləri keçirdiyini qeyd etmiş, Azərbaycanda ingilis dilində tədris həyata keçirən belə müasir tipli texniki ali məktəbin həm bütün sahələrdə inkişaf edən Azərbaycan dövləti üçün, həm də ölkəmizə böyük investisiyalar yatırmış və gələcəkdə bu sahədə işləri genişləndirməyi düşünən Böyük Britaniya üçün də xüsusi əhəmiyyət kəsb etdiyini bildirmişdir.

O, Prezident İlham Əliyev tərəfindən ölkəmizdə həyata keçirilən uğurlu iqtisadi-siyasi inkişafdan danışaraq vurğulamışdır ki, dünyaya açılmış və regionun önəmli dövlətinə çevirilmiş Azərbaycan Böyük Britaniya və Avropa Birliyi dövlətləri üçün böyük əhəmiyyət daşıyır.

Təhsillə bağlı məsələlərə yüksək diqqət ayırdıqlarını bildirən səfir Bakı Ali Neft Məktəbi ilə hər zaman bu sahədə əməkdaşlıq etməyə və Böyük Britaniyanın müxtəlif təhsil mərkəzləri ilə əlaqələrin qurulmasına dəstək verməyə hazır olduqlarını bildirmişdir.

M. YAQUBZADƏ

Xalq qəzeti.- 2013.- 7 fevral.- S. 2.