Səbail rayonu hesabat verdi

Səbail Rayon İcra Hakimiyyətində keçirilən ümumrayon toplantısında Nazirlər Kabinetinin geniş iclasında Prezident İlham Əliyevin nitqindən irəli gələn məsələlər diqqət mərkəzində oldu. Rayon icra hakimiyyəti başçısının hesabatında və sahə rəhbərlərinin çıxışlarında 2012-ci ilin başlıca sosial-iqtisadi uğurları və cari ildə qarşıda duran vəzifələr geniş açıqlandı.

Rayon ictimaiyyəti nümayəndələrini və qonaqları salamlayan Səbail Rayon İcra Hakimiyyətinin başçısı Asif Əsgərov bildirdi ki, ötən il ölkəmizin həyatında olduğu kimi, səbaillilər üçün də bütün sahələrdə inkişaf, yüksəliş və artımla əlamətdar olmuşdur.

Rayon rəhbərinin məlumatına nümayiş etdirilən videofilmin epizodları əyanilik gətirdi. İştirakçılar Prezident İlham Əliyevin və Heydər Əliyev Fondunun prezidenti, millət vəkili Mehriban Əliyevanın dəstəyi və iştirakı ilə həyata keçirilən proqramların Səbail ərazisində gerçəkləşmiş mənzərəsini, rayon rəhbərliyinin başa çatdırdığı layihələrin görüntülərini böyük maraqla izlədilər. Ötən il rayonda görülmüş işləri əks etdirən “Səbail” bülleteninin xüsusi buraxılışı və mərkəzi qəzetlərdə çap olunmuş geniş məlumat da RİH-in illik hesabatını zənginləşdirdi.

Müzakirələrdə çıxış edən aparıcı qurumların rəhbərləri rayon həyatının ayrı-ayrı sahələrində qazanılmış uğurlardan söz açdılar, həllivacib məsələlərdən, qarşıda duran vəzifələrdən danışdılar. Məruzə və çıxışlardan məlum oldu ki, Bakının mərkəzi hissəsi olan Səbail ölkə rəhbərliyinin müstəsna diqqət və qayğısı, şəhər və rayon qurumlarının təşəbbüskar, dinamik fəaliyyəti nəticəsində paytaxtın ən gözəl, abad rayonuna çevrilmiş, burada yaşayan və çalışanların güzəranı ildən-ilə yüksəlmişdir.

Sonda ənənəyə uyğun olaraq, ötən il yüksək dövlət təltiflərinə layiq görülənlər, rayonun inkişafında xidmətləri olan yubilyarlar, təhsildə yüksək uğur qazanan şagirdlər təbrik edildi və mükafatlandırıldı.

Toplantı iştirakçıları adından Prezident İlham Əliyevə ünvanlanmış müraciətdə Səbail rayonunda aparılan genişmiqyaslı quruculuq-abadlıq işlərinə görə minnətdarlıq və 2013-cü ili də artan uğurlar ilinə çevirmək əzmi ifadə olundu.

R.TAHİR

Xalq qəzeti.- 2013.- 2 fevral.- S. 9.