Qaradağ rayonu: quruculuq və inkişaf ünvanı

Müstəqil Azərbaycan sosial-iqtisadi inkişaf tempinə görə dünyada lider mövqeyə malikdir. Hazırda regional və dünya əhəmiyyətli iri iqtisadi layihələri uğurla gerçəkləşdirən ölkəmiz hüquqi cəmiyyət quruculuğu yolunda inamla addımlayır. Azərbaycan bütün sahələrdə bir-birinin ardınca əldə etdiyi mühüm nailiyyətlərlə öz böyük gələcəyinin etibarlı təməlini qoyur.

Azərbaycanın bugünkü sürətli inkişafı məhz xalqımızın ümummilli lideri Heydər Əliyevin müdrik, üzaqgörən siyasəti və bu siyasətin Azərbaycan Prezidenti İlham Əliyev tərəfindən uğurla davam etdirilməsi sayəsində mümkün olmuşdur.

Ulu öndərimiz Azərbaycanı xaos və anarxiyadan, dövlətçiliyin itirilməsi təhlükəsindən xilas edib dinamik islahatlar yoluna çıxartmışdısa, dövlət başçısı İlham Əliyevin rəhbərliyi ilə respublikamız dünyanın ən sürətli inkişaf edən, yeniləşən, müasirləşən, demokratikləşən dövlətinə çevrilmişdir.

Bu il yanvarın 15-də Prezident İlham Əliyevin sədrliyi ilə Nazirlər Kabinetinin ötən ilin sosial-iqtisadi inkişafının yekunlarına və 2013-cü ildə qarşıda duran vəzifələrə həsr olunmuş iclasında dövlət başçısının giriş və yekun nitqlərində respublikamızdakı iqtisadi-siyasi vəziyyət dərindən təhlil edilmiş, uğurlar qiymətləndirilmiş, qarşıda duran vəzifələr və onların həlli yolları müəyyən olunmuşdur. Respublika Prezidentinin vurğuladığı kimi, ötən il qarşıya qoyulmuş bütün iqtisadi-sosial vəzifələr öz həllini tapmış, ölkəmiz bir sıra mühüm uğurlara imza atmışdır.

Qısa zaman kəsiyində Azərbaycan inkişafın özünəməxsus modelini yaratdı. Ölkəmizin intibah yolu artıq bir çox dünya ölkələri üçün ən uğurlu nümunələrdən birinə çevrilmişdir. Prezident İlham Əliyevin dövlət başçısı kimi fəaliyyət müddəti ərzində Azərbaycan əsas makroiqtisadi göstərici olan ümumi daxili məhsulun orta artım tempinə görə dünya dövlətlərinin reytinq cədvəlində lider ölkə olaraq qalır. Ötən ilin may ayında “Eurovizion” mahnı müsabiqəsinin, qadınlar arasında futbol üzrə dünya çempionatının, beynəlxalq humanitar forumun Azərbaycanda keçirilməsi böyük nailiyyətlərdəndir. Azərbaycan Prezidentinin rəhbərliyi altında həyata keçirilən iqtisadi strategiya sosialyönümlülük prinspinə əsaslanmaqla bu sahədə problemlərin kompleks həllinə hesablanmışdır. Dünya Bankının hesabatlarında biznesin aparılması üçün Azərbaycan yüksək yerlərdən birini tutur. Ümumdünya Davos İqtisadi Forumunun hesablamalarına görə, ölkə iqtisadiyyatı rəqabət qabiliyyətliliyinə görə 46-cı yerdə, MDB məkanında isə 1-ci yerdədir.

2012-ci ildə ümumi daxili məhsul 2,2 faiz, qeyri-neft sektoru 9,7 faiz artmış və valyuta ehtiyatlarımız 45 milyard dollardan çox olmuşdur. Ötən il investisiya xərcləri rekord səviyyədə-22 milyard dollardan çox qeydə alınmışdır. Bunun 13 milyarddan bir qədər çoxu daxili, 9 milyard dollara yaxını isə xarici investisiyalardır. Daxili investisiyalar artıq bir neçə ildir ki, ümumi investisiya portfelində üstünlük təşkil edir. Azərbaycan xarici investorlar üçün də çox etibarlı tərəfdaşdır.

Ölkəmizin maliyyə imkanları getdikcə artır. Bu ilin büdcəsi də rekord səviyyədədir, yəni 20 milyard manata yaxın vəsait xərclənəcəkdir. Hazırda respublikamızın valyuta ehtiyatları 46 milyard dollara çatmışdır. Valyuta ehtiyatları ümumi daxili məhsulun 70 faizini təşkil edir.

2012-ci il: sosial-iqtisadi inkişafın mənzərəsi

Ötən il “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın icrası uğurla davam etdirilmişdir. Bu proqram Bakı şəhərinin, o cümlədən Qaradağ rayonunun qəsəbələrində sosial infrastrukturun müasir tələblərə uyğun şəkildə qurulmasında mühüm rol oynamışdır.

Ötən il rayonun sosial-iqtisadi həyatının bir sıra sahələrində inkişaf dinamikası qorunub saxlanılmış və bir sıra yüksək göstəricilər əldə olunmuşdur. Faktlara diqqət yetirək. Sənayedə qeyri-dövlət müəssisələri tərəfindən 236 milyon 215,4 min manatlıq və ya ümumi istehsalın 41,6 faizi, dövlət müəssisələri tərəfindən isə 331 milyon 558,7 min manatlıq və ya ümumi istehsalın 58,4 faizi qədər sənaye məhsulu istehsal olunmuş və xidmətlər göstərilmişdir.

İqtisadiyyatın aparıcı sahəsini təşkil edən neft-qaz sənayesi müəssisələrində 411,6 min ton xam neft və 349,9 milyon kubmetr təbii qaz hasil olunmuşdur. Rayon üzrə 1 milyon 558,2 min ton sement istehsal edilmişdir.

Hesabat ilində rayonun sosial-iqtisadi sahələrinin inkişafına 369 milyon 093,1 min manat investisiya qoyulmuşdur. İstifadə edilmiş investisiyaların 246 milyon 876,5 min manatı tikinti-quraşdırma işlərinə sərf edilmişdir ki, bu da ötən ilin müvafiq dövrünə nisbətən 2,8 dəfə çoxdur.

Nəqliyyat sektorunda 22 milyon 740,6 min manatlıq xidmətlər göstərilmişdir ki, bu da 2011-ci ilin müvafiq dövrünə nisbətdə 39,4 faiz çoxdur. Rabitə müəssisələri tərəfindən ötən müddət ərzində 1 milyon 649 min manatlıq və ya 2011-ci ilin müvafiq dövrü ilə müqayisədə 19,4 faiz çox rabitə xidmətləri göstərilmişdir. Hazırda müvafiq Dövlət Proqramına uyğun olaraq rayonun bütün qəsəbələrində müasir texnologiyalar əsasında ATS-lərin nömrə tutumlarının, internet xidmətlərinin artırılması işləri aparılır. Qobustanda yeni ATS, Ələt qəsəbəsinin Şixlar yaşayış məntəqəsində, Korgöz qəsəbəsində yeni poçt şöbələri tikilib istifadəyə verilmişdir.

Hesabat dövründə əhaliyə 1 milyard 409 milyon 047,5 min manat məbləğində və ya ötən ilin eyni dövrünün səviyyəsindən 25,1 faiz çox istehlak malları satılmışdır. 2012-ci ildə xidmət müəssisələri tərəfindən əhaliyə 83 milyon 653,1 min manatlıq və yaxud 2011-ci ilin müvafiq dövrünün səviyyəsindən 6,1 faiz çox pullu xidmətlər göstərilmişdir. Təqdirəlayiq haldır ki, pullu xidmətlərin 87,4 faizi özəl bölmə tərəfindən həyata keçirilmişdir.

Hesabat ilində rayonda orta aylıq əmək haqqı 2011-ci ilin müvafiq dövrü ilə müqayisədə 18,7 faiz artaraq 731,6 manata, sənayedə çalışanların isə orta aylıq əmək haqqı 21,6 faiz artaraq 966,4 manata çatmışdır ki, bu da ümumrespublika göstəricilərindən yüksəkdir.

Ötən il ərzində 1087 ailəyə orta hesabla 127,67 manat məbləğində ünvanlı sosial yardım verilmiş, əhalinin aztəminatlı təbəqələrinə müxtəlif pensiyalar və müavinətlər ödənilmişdir.

Hesabat dövründə rayonda sahibkarlığın inkişafı, əlverişli biznes mühitinin yaradılması, yeni istehsal müəssisələrinin tikintisi və iş yerlərinin açılması istiqamətlərində də xeyli iş görülmüşdür. Belə ki, Putada “Xəzər-Boru” şirkətinin istehsalat bazasının və Metanol zavodunun, Səngəçalda “AAC” MMC-nin Qazobeton blokları və “As Kompani” MMC-nin Əhəng istehsalı müəssisələrinin tikintisi başa çatdırılmışdır.

Sahil qəsəbəsinin inzibati ərazisində Azərbaycan İnvestisiya Şirkətinin iştirakı ilə “Holcim-Azərbaycan” ASC-nin yeni sement zavodu, Qaradağ metal konstruksiyalar zavodu istifadəyə verilmişdir. Bu iki müəssisənin işə düşməsi 350-yə yaxın yeni iş yeri deməkdir. Bütövlükdə 2012-ci il ərzində 1310 yeni iş yeri açılmışdır ki, bununla da 2004-cü ildən bu günədək rayonda açılmış daimi iş yerlərinin sayı 9219-a çatmışdır.

Yaxın illərdə Ələtdə Beynəlxalq Dəniz Limanının, Sahildə Gəmiqayırma zavodunun inşası kimi nəhəng layihələrin icrası nəticəsində rayonda yüzlərlə yeni iş yeri açılacaqdır.

Kommunal xidmətin səviyyəsi yüksəlir

Hesabat ilində rayon əhalisinin, eləcə də sosial obyektlərin enerji daşıyıcıları və kommunal xidmətlərlə təminatının yaxşılaşdırılması istiqamətində xeyli iş görülmüşdür. Belə ki, istilik enerjisi ilə təchizat sahəsində Lökbatan qəsəbəsində S.Orucov, V.Əsgərov, Bünyadzadə küçələrindəki 530, 531 və 532 saylı qazanxanalar rayonun 10 saylı istilik sistemləri istismarı sahəsinin balansına verilmişdir.

Köhnə tipli 3 qazanxananın daxilində təmir-bərpa işləri görülmüş, həmin qazanxanaların xidmət göstərdiyi 14 binadan 11-də istilik sistemi bərpa edilmiş və 2 ədəd müasir tipli qazanxana tikilib istifadəyə verilmişdir. Hazırda Qaradağ rayonunda yerləşən istilikxanalardan 97 yaşayış binası, 9 orta məktəb, 3 uşaq bağçası və 3 səhiyyə obyekti istiliklə təmin olunur.

Hesabat dövründə rayonun elektrik enerjisi ilə təchizatının yaxşılaşdırılması üçün 149 ədəd “TM” və “KTM” avadanlıqları təmir edilmiş, 52 ədəd yüksək gərginlikli mufta quraşdırılmışdır. Rayon ərazisində 5 ədəd yeni kompleks transformator məntəqəsi və 8 ədəd yağ açarı yenisi ilə əvəzlənmiş, 2 min 301 metr müxtəlif kilovoltluq hava xətti, 33 min 494 metr kabel xətti təmir olunmuşdur. Bundan başqa, abonentlər üçün 1564 ədəd sayğac quraşdırılmışdır.

Qaz istismar sahəsi tərəfindən qaz təchizatını yaxşılaşdırmaq məqsədi ilə 25 ədəd köhnə qaz tənzimləyici şkaf yenisi ilə əvəzlənmişdir. Qəsəbələrdə korroziyaya uğramış müxtəlif diametrli 1567,6 metr qaz xətti təmir edilmişdir. “Azəriqaz” tərəfindən müxtəlif diametrli 99817 metr yeni qaz xətti çəkilmiş və 30 ədəd siyirtmə quraşdırılmışdır. Hazırda bu istiqamətdə işlər davam etdirilir.

2012-ci ildə əhali tərəfindən istehlak olunan elektrik enerjisinin dəyəri 103 faiz, təbii qazın dəyəri isə 103 faiz ödənilmişdir.

Rayonun enerji daşıyıcıları ilə təminatı sistemində elə bir ciddi problem müşahidə edilməsə də, bu gün müvafiq Dövlət Proqramı çərçivəsində qəsəbələrin, xüsusi ilə də yeni salınmış yaşayış massivlərinin elektrik enerjisi və təbii qazla təchizatının daha da yaxşılaşdırılması üçün zəruri tədbirlər həyata keçirilməkdədir.

Hesabat dövründə əhalinin içməli su ilə təchizatının və kanalizasiya xidməti ilə təminatının normallaşdırılması üçün bir sıra işlər görülmüşdür. Belə ki, 2012-ci il ərzində Qaradağ Su Kanal Departamenti tərəfindən 9644,5 metr müxtəlif diametrli su xətti dəyişdirilmiş və 20 ədəd siyirtmə quraşdırılmışdır. Bu istiqamətdə işlər davam etdirilir.

Abadlıq-quruculuq və yaşıllaşdırma işləri...

“2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq 2012-ci il ərzində rayon əhalisinin asudə vaxtının səmərəli təşkili, mədəni-məişət şəraitinin yaxşılaşdırılması üçün geniş abadlıq-quruculuq işləri aparılmışdır.

Bakı-Astara magistral avtomobil yolunun rayon ərazisindən keçən sol və sağ hissələrinin kənarlarında nəzərdə tutulmuş istinad divarlarının tikintisi aparılmışdır. Belə ki, hündürlüyü 6 metr olan 15760 metr uzunluğunda, 94560 kvadratmetr ölçüdə hörülmüş hasarın 36450 kvadratmetr hissəsi xüsusi ornamentli aqlay və qranit tavalarla üzlənmişdir. Hasarların qarşısında 37375 kvadratmetr tamet döşənmiş, 4972 metr bardür düzülmüş, divarlar müasir işıqlandırma sistemi ilə təchiz edilmişdir. Bundan əlavə yolun kənarından istinad divarlarına qədər olan məsafədə mövcud boşluqların doldurulması üçün 512715 kubmetr çınqıl əraziyə daşınaraq yayılmışdır. Həmin ərazidə 750 ədəd ağac və bəzək kolu əkilmişdir.

İl ərzində rayon ərazisində 31 obyektdə təmir-tikinti işləri görülmüşdür.

Rayon ərazisində olan yollara və məhəllədaxili həyətlərə 146180 kvadratmetr asfalt döşənmişdir. Eyni zamanda yararsız vəziyyətdə olan küçələrə 328 maşın çınqıl və daş qırıntıları tökülərək yayılmışdır. Asfaltlanmış küçələrdə, məhəllədaxili yollarda və yaşayış binalarının həyətlərində 10127 metr bardür qurulmuş, eni 1,5 metr, uzunluğu 7840 metr olan səki tikilmiş və 259 ədəd küçə işığı quraşdırılmışdır. Hazırda rayonun qəsəbələrində bu işlər davam etdirilir və müvafiq proqram üzrə yaxın iki il ərzində bütün məhəllədaxili yolları əhatə edən 2 milyon kvadratmetr sahə asfaltlaşdırılacaqdır.

Uzun illərdən bəri fasadları və dam örtükləri yararsız vəziyyətdə olan 25 çoxmərtəbəli yaşayış binası təmir edilmiş, binalarda 38 ədəd giriş qapısı, 152 ədəd pəncərə quraşdırılmış, giriş qəfəslərində olan pəncərələrə 360 kvadratmetr şüşə salınmışdır. Rayon üzrə 28657 kvadratmetr dam örtüyü təmir olunmuşdur. Rayon ərazisində 23 çoxmərtəbəli yaşayış binasının zirzəmisində olan 1340 metr, çölündə isə 428 metr kanalizasiya xətləri və 1580 metr daxili su xətləri təmir olunmuş, magistral küçələrdə 9650 metr yeni magistral kanalizasiya xətti çəkilmiş, 92 ədəd lyuk təmir edilmişdir. 45 binanın qarşısında olan kanalizasiya xətləri təmizlənmiş və yuyulmuşdur.

Ötən il ərzində rayon üzrə yaşıllıq zolaqlarının genişləndirilməsi məqsədi ilə 6470 ədəd müxtəlif növlü ağac, gül və bəzək kolları əkilmiş, 3500-ə yaxın müxtəlif ağac və bəzək kolları budanılaraq dibləri bellə boşaldılmışdır.

Qaçqın və məcburi köçkünlərə qayğı

Rayonda məskunlaşan 15663 nəfər və ya 3614 məcburi köçkün və qaçqın ailəsinin yaşayış şəraitinin yaxşılaşdırılması və onların sosial problemlərinin həlli sahəsində müəyyən işlər görülmüşdür.

Ümid qəsəbəsində kottec tipli fərdi yaşayış evlərinə qaz xətlərinin çəkilişi, xeyir-şər evinin əsaslı təmiri başa çatdırılmışdır. Qəsəbə ərazisində “Holcim” ASC tərəfindən Gənclərin İnkişaf Mərkəzinin inşasına başlanmışdır.

Ötən dövr ərzində 195 məcburi köçkün ailəsi ünvanlı sosial yardımla təmin olunmuşdur.

Qaradağ rayonunun Müşfiqabad qəsəbəsində 1440 məcburi köçkün ailəsi üçün yeni salınmış məhəllə istifadəyə verilmişdir. “Qaradağ rayonunun sosial-iqtisadi inkişafına yardım fondu” tərəfindən 3800 qaçqın və məcburi köçkün, şəhid, əlil və aztəminatlı ailələrə “Novruz” bayramı münasibəti ilə təxminən 15 ton müxtəlif növ ərzaq məhsullarından ibarət yardımlar paylanmışdır.

Təhsil, səhiyyə, mədəniyyət...

Hesabat dövründə humanitar sahələrdə dövlət siyasətinin layiqincə həyata keçirilməsi, rayonun təhsil, səhiyyə, mədəni-maarif müəssisələrinin tikintisi və təmiri ilə bağlı xeyli işlər görülmüşdür. Dövlət başçısının “Bakı şəhəri Qaradağ rayonunun Ələt və Qobustan qəsəbələrinin sosial-iqtisadi inkişafının sürətləndirilməsi ilə bağlı tədbirlər haqqında” 6 aprel 2011-ci il tarixli sərəncamına uyğun olaraq Qobustan qəsəbəsində 800 şagird yerlik yeni ümumtəhsil məktəb binasının tikintisi başa çatdırılmışdır.

Müşfiqabad qəsəbəsindəki 67 nömrəli körpələr evi-uşaq bağçası əsaslı təmir olunduqdan sonra körpələrin istifadəsinə verilmişdir. Ümumi sahəsi 2,389 kvadratmetr olan, 220 yerlik bağçada körpələrin təlim-tərbiyəsi üçün hər cür şərait nəzərə alınmışdır. Burada yeməkxana, həkim, musiqi və digər otaqlar vardır. Bağçanın ətrafında geniş abadlıq işləri görülmüş, uşaqların istirahəti üçün müxtəlif attraksionlar quraşdırılmışdır.

Bununla yanaşı, Dövlət Proqramına əsasən, 2013-cü ildə Qızıldaş qəsəbəsindəki 180 nömrəli orta məktəb üçün 15 əlavə sinif otağının, Sahil qəsəbəsindəki 253 və 273, Lökbatan qəsəbəsindəki 233 nömrəli orta məktəblərin inşası, Sahil qəsəbəsindəki 301 nömrəli körpələr evi-uşaq bağçasının əsaslı təmiri, Lökbatan qəsəbəsində şagird sıxlığına görə 960 şagird yerlik yeni məktəb binasının, Ümid, Qızıldaş, Müşfiqabad və Lökbatan qəsəbələrində hər biri 120 yerlik olmaqla yeni uşaq bağçalarının tikintisi nəzərdə tutulmuşdur. Ötən tədris ilində rayon üzrə orta məktəbi 1206 nəfər bitirmişdir. Onlardan ali təhsil ocaqlarına sənəd verən 868 nəfər məzundan 373 nəfəri ali məktəblərə qəbul olmuş və bu da sənəd verənlərin 42,9 faizini təşkil edir. Ötən il bu rəqəm 40,6 faiz olmuşdur. Məzunlardan 10 nəfəri 600-dən yuxarı bal toplamışdır.

2011-2012-ci tədris ilində rayonun bir müəllimi “Əməkdar müəllim”, iki müəllimi “Tərəqqi” medalına, 253 saylı tam orta məktəb isə “Ən yaxşı ümumi təhsil müəssisəsi” müsabiqəsində “İlin məktəbi” adına layiq görülmüşdür. Orta ümumtəhsil müəssisəsinin 3 şagirdi 600-dən yuxarı bal toplamış və onlardan biri Prezident təqaüdünə, məktəbin direktoru Rafiq Şahverdiyev Təhsil Nazirliyi tərəfindən “Qabaqcıl təhsil işçisi” döş nişanına layiq görülmüşdür.

Ötən tədris ilində Lökbatan qəsəbəsindəki 233 nömrəli tam orta məktəbin fizika müəllimi Cəlal Qurbanov Prezident İlham Əliyevin müvafiq sərəncamı ilə “Əməkdar müəllim” adına layiq görülmüşdür.

Hesabat dövründə rayonun prioritet istiqamətlərindən biri də rayonun səhiyyə infrastrukturunun inkişafı, əhalinin sağlamlığının mühafizəsi, sakinlərə tibbi xidmətin səviyyəsinin yüksəldilməsi, müalicə-profilaktika işlərinin təkmilləşdirilməsi, infeksion-yoluxucu xəstəliklərin yayılmasının qarşısının alınması, sanitar-epidemioloji sabitliyin təmin olunması təşkil etmişdir. Bununla əlaqədar bəzi faktlara diqqət yetirək. “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nda Qaradağ rayonunun səhiyyə sahəsini əhatə edən 7 konkret tədbir nəzərdə tutulmuş və bunların 3-ü uğurla həyata keçirilmişdir. Qalan səhiyyə müəssisələrində təmir-tikinti işləri davam etdirilir. Son illərdə bir çox tibb müəssisələrində, o cümlədən 4 nömrəli Doğum evində, 39 nömrəli Kardiorevmotoloji uşaq sanatoriyasında, 9 nömrəli Birləşmiş Şəhər Xəstəxanasının poliklinika şöbəsində, 15 və 20 nömrəli Təcili Tibbi Yardım stansiyalarında, 23 nömrəli Birləşmiş Şəhər Xəstəxanasının stasionar şöbəsində, həmçinin bu tibb müəssisəsinin Səngəçal qəsəbəsində yerləşən ambulator şöbəsində əsaslı təmir və yenidənqurma işləri aparılmaqla yeni, müasir tibbi avadanlıqlarla təchiz olunaraq istifadəyə verilmişdir.

Rayon sakinlərinin asudə vaxtının, əhalinin mədəni-kütləvi istirahətinin səmərəli təşkili məqsədilə rayonun 7 mədəniyyət evi, 1 klub, 10 kütləvi kitabxana, 2 musiqi və 1 incəsənət məktəbinin bütün imkanları səfərbər olunmuş, maraqlı və yaddaqalan mədəni-kütləvi tədbirlər həyata keçirilmişdir. “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq Sahil qəsəbəsindəki 5 nömrəli Uşaq incəsənət və 28 nömrəli musiqi məktəbləri əsaslı təmir olunaraq istifadəyə verilmişdir. Eyni zamanda, Qobustan və Müşfiqabad mədəniyyət saraylarının əsaslı təmiri, Lökbatan qəsəbəsindəki 9 nömrəli musiqi məktəbi üçün yeni binanın tikintisi davam etdirilir.

Rayon ərazisində 15 tarixi abidənin, xüsusilə də dünya əhəmiyyətli Qobustan Milli Tarixi-Bədii Qoruğunun mühafizəsinin gücləndirilməsi üçün zəruri tədbirlər görülmüşdür.

Gənclər siyasəti uğurla həyata keçirilir

Hesabat dövründə dövlət gənclər siyasətinin həyata keçirilməsi, yeniyetmə və gənclərlə işin təkmilləşdirilməsi və müasir tələblərə uyğun qurulması diqqət mərkəzində saxlanılmışdır. Yeniyetmə və gənclərin vətənpərvərlik işinin gücləndirilməsi məqsədilə rayon Gənclər və İdman İdarəsinin yerlərdə 28962 gənci təmsil edən 51 nümayəndəliyi yaradılmışdır. Hesabat dövrü ərzində gənclər sahəsi üzrə 61 tədbir keçirilmişdir.

Hesabat dövründə yeniyetmə və gənclərin hərbi-vətənpərvərlik tərbiyəsi işinin gücləndirilməsi üçün müntəzəm olaraq “Şahin” və “Cəsurlar” hərbi-idman oyunları, “Vətənin müdafiəsinə hazıram” çoxnövlük yarışları təşkil olunmuşdur.

Qaradağ rayonunun gənc idmançılarının 2012-ci il ərzində müxtəlif səviyyəli şəhər, respublika və beynəlxalq yarışlarda iştirakı təmin edilmiş və bir sıra idman nailiyyətləri qazanılmışdır. Sədi Namazov və Elxan Musazadə karate üzrə Avropa çempionatında I yerə layiq görülmüşdür.

Vaqif BAYRAMOV

Xalq qəzeti.- 2013.- 8 fevral.- S. 6.