Gənclər “Daş yuxular”ı kəskin tənqid etdilər

YAP Gənclər Birliyinin təşkilatçılığı ilə baş tutan tədbirdə Əkrəm Əylislinin “Daş yuxular” romanı və yazıçının hadisələrə qərəzli yanaşması kəskin tənqid edildi.

Tədbiri giriş sözü ilə açan Yeni Azərbaycan Partiyasının (YAP) Gənclər Birliyinin sədri Seymur Orucov qeyd etdi ki, sözügedən roman təkcə ziyalı təbəqədə deyil, gənclər arasında da narazılığa səbəb oldu. Onun sözlərinə görə Azərbaycan üçün həssas hesab edilən məsələdə müəllifin qərəzli yanaşması qəbuledilməzdir. “Azərbaycan xalqına qarşı törədilən cinayətlərin daim yaddaşlarda qalması, xüsusən də son onilliklərdə yaşanan faciələrdən zərər çəkənlər, şəhid ailələri, məcburi köçkün və qaçqın ailələrinə qayğı göstərilməsi dövlətimizin diqqət mərkəzindədir. Təəssüflər olsun ki, özünü “ziyalı” adlandıran bəzi insanların səhvləri ucbatından dünyada həyata keçirdiyimiz təbliğat kampaniyasına ciddi ziyan vurulur və “yaradıcılıq azadlığı” bəhanəsiylə heç bir tarixi əsası olmayan məlumatlar dünya ictimaiyyətinin müzakirəsinə verilir. Əkrəm Əylislinin “Daş yuxular” romanı da bu baxımdan düşmən dəyirmanına su tökə bilən mənbədir”.

Milli Məclisin deputatlarının da qatıldığı “dəyirmi masa”da bildirildi ki, roman Azərbaycan ictimaiyyətində ciddi narazılığa, sadə vətəndaşların hiddətinə səbəb olmuşdur. Deputat Nizami Cəfərov romanda Azərbaycan xalqının milli və dini hisslərinin təhqir edildiyini diqqətə çatdırdı. Onun sözlərinə görə, hələ keçən əsrin 80-ci illərinin sonlarında milli-azadlıq hərəkatının geniş vüsət aldığı dövrdə Əkrəm Əylisli “Drujba narodov” jurnalında xalq hərəkatına mənfi münasibət bildirmiş, bu fikirlər xalqda qəzəb oyatmışdı.

Milli Məclisin deputatı Musa Urud “Daş yuxular” romanına milli düşüncəli və dövlətçiliyi dəstəkləyən insanların münasibətinin vacibliyini vurğuladı. Qeyd etdi ki, bu tip əsərin yazılması içimizdə bəzi insanların antimilli kimliyini ortaya qoyur. “Bu romanın Dağlıq Qarabağ münaqişəsinin həlli istiqamətində Azərbaycanın 20 ildən çox davam edən danışıqlarına, ermənipərəst qüvvələrə qarşı haqq uğrunda mübarizəsinə arxadan bir zərbə oldu. Nəzərə almaq lazımdır ki, onun mövqeyi Azərbaycan xalqının və dövlətinin mövqeyi deyil. Odur ki, cənab Prezident İlham Əliyevin sərəncamı ilə Əkrəm Əylisli “ xalq yazıçısı” adından və Prezident təqaüdündən məhrum edildi. Hesab edirəm ki, xalqımızın əleyhinə gedən, ona böhtanlar atan hər bir insanın taleyinin belə olması təəccüb doğurmamalıdır. Bu, həm də Əkrəm kimi düşünən, antimilli qüvvələrin təsiri altında olan bəzi qələm sahiblərinə bir dərsdir”.

“Ulduz” jurnalının baş redaktoru Elçin Hüseynbəyli çıxış edən ziyalıların fikri ilə razı olduğunu deyərək qeyd etdi ki, müəllifin əsas məqsədi bədii əsər yaratmaq yox, ermənilərin, guya, azərbaycanlılar tərəfindən qətlə yetirilmələrini qələmə almaq idi. Onun sözlərinə görə, qərəz və təhrif dolu əsər bədii romandan çox neqativ, böhtan xarakterli siyasi nüanslarla zəngindir.

Ülviyyə VAHİDQIZI

Xalq qəzeti.- 2013.-9 fevral.- S. 8.