İldən-ilə abadlaşan, gözəlləşən Masallı

Hər dəfə cənub bölgəsinə səfərə çıxanda öncə könlüm Masallı adlanan bir ünvana qanadlanır. Cəlilabaddan bir qədər sonra, Lənkərandan bir qədər əvvəl Masallı gəlir. Ora çatdımmı, elə bilirəm ki, artıq mənzil başındayam. Çünki yerinə görə bura bölgənin tam mərkəzi sayılır. Yollar məhz buradan Yardımlıya, Lənkərana, oradan da Lerik və Astaraya şaxələnir. İllərdən bəri düşərgə yerim kimi Masallını seçməyim bir az da elə bu amillə bağlıdır.

Bu yaxınlarda jurnalist yolları yenə də məni cənuba aparıb çıxarmışdı. Gündüzlər qonşu rayonlarda işləyir, axşamlar doğma evim kimi Masallıya qayıdırdım. Səfərimin işgüzar yönümünün təkcə son gününü Masallıya həsr eləyəsi oldum. Amma bu mehriban diyarda dostlarla keçirdiyim axşam saatları, adına “Əhmədin oteli” deyilən mehmanxanada gördüyüm həmişəki qonaqpərvər yanaşmalar mənə unudulmaz təsir bağışlayırdı.

Masallının abadlıq-quruculuq işləri ilə bağlı ilk söhbətim də elə Əhməd Rəhimovla oldu. O özü gözəllik yaradanlardandır. Sahibi olduğu mehmanxananı bacardığı qədər müasirləşdirib, ətrafında isə əsl canlı təbiət guşələri yaradıb. Əhməd müəllim maraqlı, istiqanlı və yetərincə yurdsevər adamdır. Söhbət zamanı dedi ki, rayonun yeni rəhbərliyi Masallı şəhərini yaradıcılıq şövqü ilə, sürətli inkişaf proqramları əsasında gözəlləşdirməyə çalışır. “İcra hakimiyyəti aparatının binası, onun qarşısındakı meydan əsaslı şəkildə yenidən qurulur. “Qəhrəmanlar” parkı yeni arxitektur quruluşda qarşı tərəfə keçirilib. Digər tərəfdə YAP rayon təşkilatı üçün tikilən yeni inzibati binada işlər sona çatmaqdadır. Dövlət Bayrağı da məhz burada göylərə meydan oxuyur. Ərazinin landşaft quruluşu - yaşıllığı, abadlığı mühüm önəm daşıyır. Ona görə də rəhbərlik bununla bağlı mütəxəssis rəylərini də öyrənir ki, ümumi mənzərə daha da cəlbedici olsun. Şəhərimizə gələn qonaqlar da buradakı abadlıq yürüşündən heyranlıqla danışırlar. Elə ötən ilin dekabrında folklor ilinin yekunu ilə bağlı Mədəniyyət və Turizm Nazirliyinin xəttilə təşkil olunuş KİV təmsilçilərinin infoturuna qatılan 20-dən çox jurnalist burada qonaq idi. Onlar səfər zamanı Masallıda aparılan quruculuq işləri, rayonun inkişaf perspektivləri ilə də maraqlandılar. Aldıqları geniş bilgiləri həvəslə ölkə mətbuatı səhifələrinə çıxardılar. Bütün bunlar hər bir Masallı sakini kimi məni də hədsiz dərəcədə sevindirir”.

Bəli, son illərdə özünün intibah dövrünü yaşayan Masallı ölkəmizin ən gözəl guşələrindən birinə çevrilir. Burada görülən işlər doğrudan-doğruya göz-könül sevindirir. İndi Masallı böyük bir inşaat meydanını xatırladır.

Heydər Əliyev Mərkəzi əsaslı şəkildə yenidən qurulmaqdadır. Mərkəzin binası xeyli böyüdülüb. Əsas yolunun sağ və sol hissələrində fontanlar quraşdırılır. Yaşıllıqlar artırılır. Ulu öndər Heydər Əliyevin abidəsinin ətrafı müasir tələblər səviyyəsində abadlaşdırılacaq. Parkın ictimai əsaslarla müdiri Sərraf Eyvazovla elə orada görüşdük. Layihələrin uğurla reallaşdırıldığını məmnunluqla qeyd etdi. Su-kanalizasiya sisteminin yaradılmasından, küçələrin, yolların təmir olunmasından, sosial obyektlərin yenilənməsindən, parkdakı işlərdən razılıqla danışdı. “Parkda Ahıllar evinin tikintisi artıq tamamlanır. Ağsaqqallar, veteranlar, ümumiyyətlə, dincəlməyə gələn hər kəs burada çay süfrəsi arxasında mənalı istirahət etmək imkanı qazanacaq. Hazırda parkda yay konsert salonunun da təməli qoyulur. Quraşdırılacaq müasir çardaq-kölgəliklər, əlvan çəmənliklər, fəvvarələr parka xüsusi gözəllik gətirəcək”.

Çox keçməyəcək ki, icra hakimiyyəti aparatının binası yeni, gözəl görkəmdə göz oxşayacaq. İndi burada sürət və keyfiyyətlə əsaslı yenidənqurma aparılır. Fasad hissə yeni memarlıq üslubunda, aqlay üzlüklərlə işlənir. Qarşıdakı yol götürülüb və meydan böyüdülüb. “Qəhrəmanlar” parkında abidələr qurulub, ön hisssədəki meydançaya daş plitələr döşənib.

Ötən il təməli qoyulmuş yeni inzibati bina YAP rayon təşkilatı üçün nəzərdə tutulub. Bu yaraşıqlı tikili ikimərtəbəlidir. Qarşı tərəfində yığcam bir fəvvarə də düzəldilir. Bina mərkəzi meydanın ümümi ansamblını gözəl tamamlayacaq.

Şəhərin Akademik Zərifə Əliyeva, Dadva, Füzuli, Talışxanov, Qarabağ və digər küçələrində də xeyli abadlıq işləri görülmüşdür. Primitiv üsulla hörülmüş köhnə hasarlar maraqlı ornamentli daş üzlük materiallarla işlənir, piyada səkiləri qurulur, işıq dirəkləri qoyulur. Hazırda Azərbaycan prospektində də geniş həcmdə abadlıq işləri davam etdirilir.

Azərbaycan Prezidenti İlham Əliyev tərəfindən ötən il “İdman ili” elan edildikdən sonra Masallıda bu sahəyə diqqət daha da artırıldı. Gözəl Olimpiya İdman Kompleksi ilə öyünən bu şəhərin Talışxanov küçəsində daha iki yaraşıqlı idman obyektinin inşasına başlandı. Bunlar boks və taekvondo mərkəzləridir. Hər iki obyektdə işlər tamamlama mərhələsindədir. Boradigah qəsəbəsində də idman kompleksi inşa olunur. Bu obyekt rayonda ilk dəfə olaraq alternativ enerji ( günəş) ilə qızdırılacaq.

Məlum olduğu kimi, Dünya Bankı ilə imzalanmış sazişə əsasən respublikanın 16 rayonunda, o cümlədən Masallıda “Milli su təchizatı və kanalizasiya xidməti” üzrə ikinci layihə çərçivəsində işlər görülür. Təməlqoyma mərasimində ötən ilin mart ayında Prezident İlham Əliyevin şəxsən iştirak etdiyi bu sistem sayəsində rayon yetərli qədər içməli su ilə təchiz olunacaq və kanalizasiya şəbəkəsi kollektoru qurulacaq. Yeni layihə üzrə şəhəri su ilə tam təmin etmək üçün Viləşçay anbarı yenidən qurulmaqla Dadva, Digah, Seybətin, İskəndərli yaşayış məntəqələrinə tələbata uyğun içməli su veriləcək. Şəhər ərazisində 5 əsas nasos stansiyası tikmək nəzərdə tutulur.

Masallı şəhərinin Qarabağ küçəsində yerləşən 3 nömrəli uşaq bağçası tam əsaslı təmir edildikdən sonra ötən ilin sonunda istifadəyə verilib. Ötən il Gəyəçöl kənd uşaq bağçası da əsaslı təmir olunub. Tezliklə 2 nömrəli bağçada da əsaslı təmir işlərinə başlanacaq.

Ötən ilin sentyabr ayında Masallıda beş yeni məktəb binası istifadəyə verilmişdir. Bunlar hər biri 360 yerlik Köçəkli, Sığıncaq və Qodman, 220 yerlik Dəmirçi və 80 yerlik Ərəb kənd məktəbləridir. Hazırda da rayonda beş məktəbin tikintisi davam edir. Xıl kəndində 640, Öncəqalada 360, Kəlbihüseynlidə 220, Kosaküldə180 və Kubin kəndində 120 yerlik məktəblər bu il şagird və müəllimlərə hədiyyə ediləcək. Yaxın vaxtlarda Masallıda daha dörd məktəbin inşasına start veriləcək. İki məktəbin isə əsaslı təmirinə başlanacaq.

Dekabrda Masallıya gəlmiş jurnalistlər qarşısında çıxışında icra hakimiyyətinin başçısı Rafil Hüseynov görülən bütün işlərin rayonun sürətli inkişafına və turizm məkanı kimi tanınmasına xidmət etdiyini bildirmişdi: “Gözəl təbiəti, mineral suları, mədəniyyət və incəsənət ənənələri bölgənin geniş turizm imkanlarından xəbər verir. Masallıda çoxlu turizm obyektləri var. Onlarda xidmətin keyfiyyətini artırmaq istiqamətində işlər gedir. Bunun üçün yaxın vaxtlarda Masallıda Turizm Peşə Məktəbi fəaliyyətə başlayacaq. Rayonda yüksək standartlara cavab verən yeni hotellər istifadəyə verilib. Termal su mənbələrinin yaxınlığında turizm obyektləri fəaliyyət göstərir. Bu yerlər qonaqları çox cəlb edir”.

Qarşıdakı planlardan danışan rayon rəhbəri bildirmişdi ki, rayon ərazisində vaxtilə mövcud olmuş Qala bazarının ilkin modelinin layihələndirilməsi üzərində iş gedir: “Burada dulusçular, həsirçilər əl işlərini təqdim edəcək, rayonun özünəməxsus mətbəxi nümayiş olunacaq, qədim ənənələr yaşadılacaq. Masallı Mədəniyyət evinin əsaslı təmiri başa çatır. Kənd mədəniyyət evlərinin də təmiri nəzərdə tutulur”.

Hazırda genişmiqyaslı abadlıq və quruculuq işlərinin görüldüyü Masallının bir çox yerlərində “Müvəqqəti narahatlığa görə üzr istəyirik” sözləri yazılmış lövhələrə rast gəlmək olar. Sakinlərin əksəriyyəti bunu doğru başa düşür və inanır ki, çox keçmədən doğma diyar daha da gözəl, abad və cəlbedici şəkildə mənzərələrini gözlər önündə sərgiləyəcək. Bütün səylər də məhz buna yönəldilmişdir.

Əli NƏCƏFXANLI

Xalq qəzeti.- 2013.- 10 fevral.- S. 6.