Dövlət qayğısı sayəsində gözəlləşən Sumqayıt

Azərbaycan ikinci dəfə dövlət müstəqilliyinə qovuşduqdan sonra ulu öndər Heydər Əliyevin uzaqgörən siyasəti nəticəsində ölkəmiz dirçələrək inkişaf etməyə, mövqelərini möhkənmləndirməyə başladı. İqtisadi islahatlar, həyatın bütün sahələrinin yenidən qurulması real bəhrələrini verdi. İndi artıq Azərbaycan Cənubi Qafqazın lider dövlətinə çevrilmişdir. Regiona aid heç bir beynəlxalq layihə bizim iştirakımız olmadan gerçəkləşdirilə bilməz.

Ümummilli liderin siyasət məktəbində püxtələşmiş İlham Əliyev hakimiyyətə gəldiyi ilk gündən hər bir azərbaycanlının Prezidenti olacağını bəyan edərək sosial yönümlü tədbirlərin reallaşdırılmasına start verdi. İqtisadi sahə ilə paralel surətdə sosial sferanın da inkişafı vətəndaşlarımızın həyat şəraitinin daha da yaxşılaşmasını təmin etdi. Regionların sosial-iqtisadi inkişafına dair mühüm dövlət proqramları tərəqqimizin üfüqlərini genişləndirdi. Bakı və digər iri şəhərlərimizlə bərabər, əyalətlərimiz, ən ucqar bölgələrimiz belə fəal surətdə abadlıq-quruculuq yürüşünə qoşuldular. Rayonlarda, kənd və qəsəbələrdə yüzlərlə müasir məktəb, sosial-mədəni obyekt tikildi. Olimpiya idman komplekslərinin, müalicə-diaqnostika mərkəzlərinin sayı ilbəil artmaqdadır. Əhalinin elektrik enerjisi, qaz və su təchizatı problemləri ardıcıl həllini tapdı. Biz MDB məkanında yeganə olan elə bir dövlətin vətəndaşlarıyıq ki, yalnız orada şəhid və əlil ailələri üçün saysız-hesabsız yaşayış binaları tikilərək istifadəyə verilir. Əgər 1997-2007-ci illərdə ölkədə əlillər üçün 2200 mənzil tikilmişdisə, son beş ildə bu rəqəm 5 minə çatmışdır. Artıq adi bir hal kimi baxdığımız və fərqinə belə varmadığımız daha bir fakt sonsuz fərəh hissi yaradır: indi Azərbaycanın elə bir guşəsi yoxdur ki, orada günün 24 saatı ərzində işıq təchizatı olmasın. Bütün bunlar dövlət müstəqilliyimizin aşkar nailiyyətləri, adamlara qayğının bariz nümunələridir.

“Əsl siyasət real, konkret iş görməkdən ibarətdir” - deyən möhtərəm Prezidentimiz tez bir zamanda ona bəslənən böyük ümidləri doğrultmuş, cəmiyyətin arzularını gerçəkləşdirməyə çalışmaqla, hər kəsin mənafeyinə uyğun qətiyyətli qərarlar qəbul etmiş, sonsuz iftixar doğuran önəmli addımlar atmışdır. Son illərdə təkcə Sumqayıtda büdcə vəsaitləri hesabına şəhid ailələri və Qarabağ müharibəsi əlilləri üçün hər cür şəraiti olan beş çoxmərtəbəli ev tikilərək onların ixtiyarına verilmişdir. Yeni il ərəfəsində şəhərimizdə olan dövlət başçısı bu qəbildən olan insanlar üçün tikilib istifadəyə verilən 12 mərtəbəli, 96 mənzilli binada olmuş, sakinlərlə görüşərək söhbət etmiş, onların yeni mənzillərinə xeyir-dua vermişdir. Eyni zamanda, 211 “Naz-Lifan” markalı avtomobil müharibə veteranlarına təqdim olunmuşdur. Bundan başqa, həmin gün Gəncə və Şəki şəhərlərində, Şəmkir rayonunda, Bakının Hövsan və Zabrat qəsəbələrində əlillərə mənzillərin və avtomobillərin açarları verilmişdir.

Biz sumqayıtlılar hələ də həmin unudulmaz görüşün təəssüratı altındayıq. Yaxşı xatırlayırıq ki, əziz bir günə - möhtərəm Prezidentimizin doğum gününə təsadüf edən həmin mərasimdə dövlət başçısı yeni mənzil və avtomobil sevinci yaşayan sakinləri təbrik edərək ölkədə yürüdülən sosial siyasətin uğurlarından, həmçinin Sumqayıt şəhərinin inkişafından da razılıqla bəhs etmişdir: “Bu gün Sumqayıt şəhərindəyəm. Sumqayıtın da uğurlu inkişafı məni çox sevindirir. Sumqayıt artıq böyük sənaye mərkəzinə çevrilibdir. Qəbul edilmiş qərarların icrası nəticəsində yaxın illərdə Sumqayıt dünya miqyasında böyük sənaye mərkəzinə çevriləcəkdir. Burada yeni müəssisələr, texnologiya parkları, yeni binalar tikilir, abadlıq işləri gedir...”

Ümumiyyətlə, Azərbaycan Prezidenti İlham Əliyevin Sumqayıt şəhərinin inkişafına qayğısı ölçüyəgəlməzdir. Dövlət başçısı tərəfindən Sumqayıtla bağlı əsas konseptual xətt çox dəqiq müəyyən edilmişdir: Sumqayıt mühüm sənaye şəhəri olmalıdır. Cənab Prezidentin təşəbbüsü ilə burada yaradılan Sumqayıt Texnologiyalar Parkının bəlkə də bu gün bütün postsovet məkanında analoqu yoxdur. Kimya texnologiyalar və yüksək texnologiyalar parkları yaradılır, yeni müəssisələr tikilir. Bakı müəssisələrinin bir hissəsi Sumqayıta köçürülür. Bu müəssisələr yüksək texnologiyalara əsaslanan istehsalatlardır. Burada artıq uyğun ixtisaslara malik insanlar işləyə biləcəklər. Buna görə də dövlət başçısının tapşırığına əsasən burada müvafiq texniki peşə məktəbləri açılır. Bu gün Sumqayıtda müvafiq infrastruktur obyektləri yaradılır, yeni iş yerləri açılır. Sənaye limanının tikintisi planlaşdırılır. Bütün bunlar göstərir ki, şəhərin əhalisi sürətlə artacaqdır.

Sumqayıtda modern texnologiyaların tətbiqi, dənizkənarı zonanın və parkın yenidən qurulması, Olimpiya və paralimpiya komplekslərinin, müasir uşaq-gənclər idman məktəbinin tikilməsi, şəhərin tərəqqisi üçün böyük məbləğdə vəsaitlərin ayrılması barədə sərəncamların verilməsi, Bayraq Meydanının yaradılması və sair bu kimi yeniliklər son dərəcə ürəkaçandır.

Dövlətimizin başçısı Sumqayıtın inkişafını bir an belə olsa da unutmur, necə deyərlər, arxa plana keçirmir. Məhz bunun nəticəsidir ki, bu gün Sumqayıt göz önündəcə daha da gəncləşir, gözəlləşir. Sənaye potensialı artır, sosial infrastruktur yenilənir. Qocaman Xəzərin aynasında bəzənən bu müasir şəhərdə sürətli inkişaf proqramları həyata keçirilir, həyat daha da firavanlaşır.

Hər tərəfdə canlanma var - yeni nəfəs, yeni ruh duyulur. Artıq Sumqayıtın “Sülh”, Heydər Əliyev, Azərbaycan küçələrinin siması tamamilə dəyişmişdir. İnzibati binalar, ticarət obyektlərinin fasadları, meydanlar, xiyabanlar, səkilər öz yaraşığı ilə göz-könül oxşayır. Koroğlu, N.Nərimanov adına və digər küçələrdə mövcud tikililər, yaşayış binaları yenidən qurulub. Ağ mərmərdən qoyulan səki daşları, binaların dam örtüklərinin və fasad hissələrinin yenilənməsi şəhərin yaraşığını daha da artırır. Estetik baxımdan şəhərin görkəminə xələl gətirən bütün iaşə obyektləri, sıxlıq yaradan köşklər yığışdırılıb. Hazırda həmin obyektlərin yerində xüsusi zövqlə hazırlanmış və şəhərə gözəllik verən dükanlar, ofislər boy göstərir.

Təmir-tikinti işlərinin xüsusi planla aparılması vacibdir. Təxmini hesablamalara görə, yaxın bir neçə ildə Sumqayıt əhalisinin sayı 700 mini keçəcək. Bu səbəbdən şəhərdə infrastruktur obyektlərinin inşası prosesində həmin məqam öncədən nəzərə alınır. İndi Sumqayıtın infrastrukturu elə formada qurulur ki, əhalinin sayının artması fonunda yaxın on il ərzində heç bir problem yaranmasın. Şəhərin bir neçə məhəlləsində yaşayış binaları artıq müasir standartlara cavab vermədiyi üçün tezliklə həmin ərazidə yeni şəhərciyin salınması nəzərdə tutulur. “Yeni Sumqayıt” adlandırılacaq şəhərcik gələcəkdə əhalinin mənzil probleminin həllində müstəsna rol oynayacaqdır.

Sumqayıtlıların ziyarət ünvanı, and yeri olan Heydər Əliyevin abidəsinin ətrafı xüsusi zövqlə abadlaşdırılmış, gül-çiçəyə qərq olmuşdur. Həmin ətrafdakı binaların fasad və dam hissələrinin təmiri, işıq effektləri ilə bəzədilməsi ecazkar mənzərələr yaradır. Şəhər icra hakimiyyəti aparatının qarşısında yaradılan, 18 min kvadratmetrlik ərazini əhatə edən möhtəşəm meydana xüsusi daşlar döşənmişdir. Burada polad dirəklər üzərində, 70 metrlik ucalıqda dalğalanan üçrəngli dövlət bayrağımız - yeni əzəmətli abidəmiz şəhərimizin yeni portret cizgilərini təşkil edir. Şəhərin əksər yerindən görünən bayrağımız kənardan baxan hər kəsin qəlbində qürur hissi doğurur. Həmin meydanın icra hakimiyyəti aparatının qarşısında yerləşməsi onun mövqe və nüfuzunu artıran amillərdir.

Sahilboyu küçədə isə İmadəddin Nəsiminin abidəsi daha uyğun yerdə ucaldılmış, bu abidənin yerləşdiyi dairənin ətrafındakı binalar klassik üslubda təmir edilmişdir. Əsas ticarət mərkəzinin yaxınlığındakı, Nizami Gəncəvinin abidəsinin qoyulduğu meydan da artıq sakinlərin gur olduğu sevimli istirahət yerinə çevrilmişdir.

Heydər Əliyev Parkında əsaslı yenidənqurma işləri geniş vüsət almışdır. Ötən il yay istirahət mövsümü ərəfəsində bu parkın böyük bir hissəsi istifadəyə verilmişdir. Müasir işıqlandırma sistemi, piramida tipli estakadalardan ibarət modern giriş hissə, mərmər üzlüklü divarın oyuq-çərçivələrində ulu öndərin həyat və fəaliyyətinə dair nadir tarixi fotoların yerləşdirilməsi, parkın qarşı tərəfində, 8 metr hündürlükdə ucaldılmış böyük saat qülləsi, fəvvarələr ilk baxışdan diqqət çəkir. Parkın landşaftı qaydaya salınmış, uşaqlar üçün maraqlı əyləncə guşələri, attraksionlar yaradılmış, ətraflarda yeni dizaynda çoxlu sayda yaraşıqlı və rahat oturacaqlar qoyulmuşdur. Park boyunca yerə döşənmiş ornamentli tamet plitələr xüsusilə cəlbedicidir. Hazırda bu parkın digər hissəsində işlər sürət və keyfiyyətlə davam etməkdədir. Heydər Əliyev Mərkəzi, digər mühüm sahələr yaradılır.

Yüz hektarlıq sahəsi olan Nəsimi adına mədəniyyət və istirahət parkında isə əsaslı yenidənqurma işləri “Göyərçin” abidə kompleksinə qədər olan ərazidə artıq yekunlaşmışdır. Parkda işlərin növbəti mərhələsi bu yerlərin daha da gözəl olacağından soraq verir. Möhtərəm Prezidentimiz İlham Əliyev Sumqayıta hər gəlişində buraya baş çəkir və görülən işlərlə maraqlanıb tövsiyələrini verir. Şəhər ictimaiyyətinin nümayəndələri ilə buradakı görüşü zamanı ölkə rəhbəri Sumqayıtı gözəlləşdirmək üçün konkret planların olduğunu vurğulamışdır: “Mən hesab edirəm ki, Sumqayıt şəhərində mütləq bulvar olmalıdır. Bulvar Bakı bulvarının standartlarına uyğun olmalıdır. Çünki Bakı bulvarı dünyanın ən gözəl bulvarlarından biridir, bəlkə də birincisidir”.

İndi Sumqayıtda daha bir böyük meydan tikilir. Bu meydan “Kimyaçı” sarayının qarşısında olacaq. Elə sarayın özündə də əsaslı şəkildə yenidənqurma aparılır. 1 saylı şəhər xəstəxanası da başdan-başa yenidən qurulur.

Dünya miqyasında tolerantlığı, dini dözümlülüyü ilə seçilən ölkələrdən biri də Azərbaycandır. Azərbaycan rəhbərinin Sumqayıta səfəri zamanı şəhər dindarları Cümə məscidinin yenidən qurulması ilə bağlı Prezidentə müraciət etdilər. Cavabı çox gözləmək lazım gəlmədi. Prezidentin tapşırığı ilə Sumqayıt Cümə məscidində başlanan əsaslı təmir işləri artıq sona yaxınlaşır. Ümumiyyətlə, məsciddə aparılan işlər ölkə rəhbərinin birbaşa təklif və tövsiyələri əsasında reallaşdırılıb. Məscidin yanında 34 metrlik minarənin ucaldılması artıq sona yetib. Burada son tamamlama işləri gedir. Giriş qapısı Şərq memarlığı üslubunda xüsusi daşlarla bəzədilib, içəridə islam qaydalarına uyğun bəzək işləri görülüb. Ətrafın abadlaşdırılması, yaşıllaşdırılması da diqqət mərkəzindədir. Ziyarətgaha gedən yollar da asfaltlaşdırılaraq standart qaydalara uyğunlaşdırılıb.

Sumqayıtda reallaşdırılan mühüm layihələrdən biri də nümunəvi məhəllələrin yaradılmasıdır. Bu barədə iki il öncə qərar qəbul ediləndən sonra təşəbbüs diqqətsiz qalmadı və nümunəvi məhəllələrin yaradılmasına başlandı. Əvvəlcə şəhərin 13 və 18-ci mikrorayonlarında, Corat qəsəbəsində belə məhəllələr yaradıldı və mərasimlər “açıq mikrofon” formasının tətbiqi ilə keçirildi. Əhalinin arzu, təklif və şikayətləri dinlənildi, fəaliyyət planlarında nəzərə alınmaqla icrası həyata keçirildi. Artıq şəhərdə əhalinin sıxlıq təşkil etdiyi ərazilərdə müvafiq infrastruktura malik 7 nümunəvi məhəllə yaradılaraq sakinlərin istifadəsinə verilmişdir. Həmin məhəllələrdə uşaqlar üçün əyləncə və idman qurğularının olması böyüyən nəslin zərərli vərdişlərdən qorunması, dərsdənkənar vaxtının səmərəli keçməsi, sağlamlığının möhkəmləndirilməsi, onların sabahımızın əsl sahiblərinə çevrilmələri baxımından çox önəmlidir. Nümunəvi məhəllələr tam asfaltlaşdırılmış, ətrafında yeni ağaclar əkilmiş, xeyir-şər evləri tikilmiş, kölgəlik-çardaqlar quraşdırılmış, çoxsaylı oturacaqlar qoyulmuşdur.

Humanitar sahəni əhatə edən bütün istiqamətlər üzrə dövlət qayğısının daha da gücləndirilməsi öz məntiqi nəticələrini verir. Son dövrlərdə Sumqayıtın səhiyyə obyektlərinin modernləşdirilməsi, onların ən müasir tibbi texniki avadanlıqla təmin edilməsi sahəsində işlər uğurla həyata keçirilir. Möhtərəm Prezidentimizin 1 saylı xəstəxananın ən müasir səviyyədə yenidən qurulması haqqında sərəncamı sumqayıtlılar tərəfindən böyük məmnunluq və minnətdarlıqla qarşılanmışdır.

Təhsil, mədəniyyət və digər mühüm sahələr üzrə də infrastrukturun qurulması prosesi qabaqcıl təcrübəyə uyğun aparılır. Şəhərə yeni rəhbərliyin gəlişindən sonra bizim təhsil şöbəsi də əsaslı təmir edilmiş, binanın ətrafı günün tələbləri səviyyəsində abadlaşdırılmışdır. Neçə-neçə məktəb əsaslı təmir edilmiş, maddi-texniki baza genişləndirilmişdir. Bütün bunların fərəhli nəticələri özünü çox gözlətməmişdir. Ötən dərs ilini Sumqayıt şagirdlərinin 16 faizi “əla”, 35 faizi “yaxşı” və “əla” qiymətlərlə başa vurmuşdur. Tam orta təhsil kursu üzrə müvəffəqiyyət göstəricimiz 94,9 faiz, ümumi orta təhsil üzrə 86,5 faiz olmuşdur ki, bu da respublika üzrə ən yüksək göstəricilərdən hesab olunur.

Məzunlarımızın 51 faizi ali məktəblərə qəbul olunmuşdur. Qəbul faizinə görə şəhərimizin yeni tipli təhsil müəssisələri, eləcə də 1, 11, 22, 24, 32, 41 nömrəli məktəblər ilk onluqda yer tutmuşlar. Təbiət elmləri təmayüllü gimnaziyanın məzunları 100 faiz nəticə göstərmişlər. Bu gimnaziyanın məzunlarının 42 faizi, texniki təbiət elmləri liseyi məzunlarının isə 38 faizi 600-dən yuxarı bal toplamışlar...

Sumqayıtın inkişafında İlham Əliyevin dəsti-xətti son illərdə özünü daha parlaq şəkildə biruzə verir, şəhərdə yeni ruh, yeni nəfəs duyulur, şəhər öz yüksəliş və tərəqqi dövrünü yaşayır. Sumqayıt indi addım-addım Bakıya yaxınlaşır. Paytaxt standartları yaradıcı şəkildə Sumqayıtda da tətbiq olunur. Səliqə-sahmanlı guşələrin coğrafiyası şəhərimizdə getdikcə artır. Çox keçməz ki, şəhər bütünlüklə təmiz, səliqəli, nümunəvi bir ünvana çevrilər. Burada yaşanan tərəqqinin ən müasir tələblərə cavab verən mövcud temp və səviyyəsi qarşıdakı dövr ərzində Sumqayıtda daha böyük xarüqələr yaradılacağına, buranın təkcə Azərbaycanın deyil, bütün Qafqazın, hətta MDB məkanının ən gözəl şəhərlərindən birinə çevriləcəyinə heç bir şübhə yeri qoymur.

Mahal ƏLİYEV,

Sumqayıt Şəhər Təhsil Şöbəsinin müdiri

Xalq qəzeti.- 2013.- 13 fevral.- S. 9.