“Azərbaycan həqiqətləri” filmlər toplusunun təqdimatı

1988-ci ildən başlanan və bu günə kimi öz həllini tapmayan Ermənistan- Azərbaycan, Dağlıq Qarabağ münaqişəsinə hələ də dünya ictimaiyyəti tərəfindən tam ədalətli mövqe ortaya qoyulmamışdır.

Bu münaqişə nəticəsində torpaqlarımızın 20 faizi işğal olunmuş, milyondan artıq soydaşımız qaçqın və məcburi köçkün vəziyyətinə düşmüş, on minlərlə günahsız insanımız vəhşicəsinə qətlə yetirilmiş, yaralanmış və əlil olmuş, şəhərlərimiz və kəndlərimiz, tarixi abidələrimiz erməni quldurları tərəfindən dağıdılmış, yerlə-yeksan edilmişdir. Azərbaycan torpaqlarının işğaldan azad olunması barədə BMT tərəfindən dörd qətnamənin qəbul edilməsi, eləcə də Avropa Şurası, İslam Konfransı Təşkilatı kimi mötəbər qurumların da oxşar qətnamə və bəyanatları Ermənistanı bu təcavüzkar siyasətindən çəkindirməmiş, əksinə ölkəmizə qarşı çirkin mövqeyini daha da gücləndirmişdir. Hazırda dövlət səviyyəsində Azərbaycan həqiqətlərinin dünyaya çatdırılması istiqamətində genişmiqyaslı işlər aparılır.

Ölkəmizin haqq səsinin dünyaya çatdırılması uğrunda aparılan bu vacib missiyaya daha birisi əlavə olunmuşdur. Fevralın 12-də Beynəlxalq Mətbuat Mərkəzində təqdimatı keçirilən, Azərbaycan və ingilis dillərində hazırlanmış “Azərbaycan həqiqətləri” adlı filmlərdən ibarət toplu da bu sahədə görülən uğurlu işlərdən biridir.

Tədbirdə Milli Məclisin deputatları Qənirə Paşayeva, Elxan Süleymanov, Flora Qasımlı, Xarici İşlər Nazirliyinin mətbuat katibi Elman Abdullayev, tədqiqatçı alimlər və media mənsubları iştirak etmişlər. Çıxış edənlər Ermənistanın Azərbaycana təcavüzündən bəhs edərək toplunun əhəmiyyətindən danışdılar. Onlar həqiqətlərimizin əks olunduğu belə layihələrin tək Azərbaycanda deyil, digər ölkələrdə yayılmasını vacib hesab etdilər.

Onu da qeyd edək ki, Milli Məclisin deputatları Qənirə Paşayeva və Elxan Süleymanovun rəhbərlik etdikləri Avrasiya Beynəlxalq Araşdırmalar İnstitutu və Azərbaycanda Vətəndaş Cəmiyyətinin İnkişafına Yardım Asosiasiyasının (AVCİYA) hazırladığı filmlərdən ibarət topluya 20-ci əsrin əvvəllərində erməni -daşnak terror təşkilatlarının, silahlı dəstələrinin dinc azərbaycanlılara qarşı həyata keçirdikləri qətliamlar — Bakı, Quba, Şamaxı soyqırımlarını əhatə edən 3 film şəklində diskdə öz əksini tapmışdır.

Topluda həmçinin 20-ci əsrin sonlarında ermənilərin həyata keçirdiyi görünməmiş cinayətlər — Xocalı soyqırımı, Qaradağlı soyqırımı, Ağdaban faciəsi, Şuşa və Ağdam şəhərlərində həyata keçirilən vandalizm aktlarını özündə əks etdirən “ Dağıdılmış mədəniyyət beşiyi-Şuşa” və “ Ağdam: Qafqazın Xirosiması” filmləri də öz əksini tapmışdır.

Azərbaycan və ingilis dillərində buraxılan “ Azərbaycan həqiqətləri” adlı filmlər toplusunun hər biri 1000 nüsxə hazırlanıb və xaricdəki diaspor təşkilatlarına, Gürcüstanda, Cənubi Azərbaycanda (İran), Dağıstanda ( Rusiya) yaşayan soydaşlarımızı birləşdirən təşkilatlara, universitetlərə, hərbi hissələrə, gənclər təşkilatlarına, beynəlxalq təşkilatlara, xarici universitetlərə, kitabxanalara, KİV qurumlarına, QHT-lərə, beynəlxalq qeyri-hökumət təşkilatlarına, xarici ölkələrin və beynəlxalq təşkilatların Azərbaycandakı səfirlik və nümayəndəliklərinə, ölkəmizin xarici ölkələrdəki səfirliklərinə, beynəlxalq təşkilatlarda təmsil olunan nümayəndə heyətlərimizə təqdim ediləcəkdir.

Anar TURAN

Xalq qəzeti.- 2013.- 14 fevral.- S. 6.