Mən ədliyyəmizlə fəxr edirəm

Xalqımızın müstəqillik tarixində mühüm yer tutan ədliyyə işçilərinə dünyəvi və hüquqi dövlətçilik, ədalət prinsiplərinin qorunması, yeni cəmiyyət quruculuğu, insan hüquq və azadlıqlarının tam bərqərar edilməsi kimi şərəfli və məsul vəzifələr etibar olunmuşdur.

Həyatımın otuz ilini ədliyyə sistemində keçirdiyim üçün bu sahədə çalışmağın məsuliyyətini dərindən dərk edirəm. Ədliyyə işçilərinin qarşısında qoyulan bu vəzifələrin yerinə yetirilməsi hər bir işçinin vicdanla çalışması, obyektivlik, ciddilik göstərməsi, dövlətçilik və ədalət prinsiplərinə düzgün əməl etməsindən asılıdır. Bizim ədliyyəçilər dövlətçilik prinsiplərinə sadiqlik göstərərək vəzifə borclarını ləyaqətlə yerinə yetirmiş və hazırda eyni ciddiliklə çalışırlar.

1990-cı ilin əvvəllərində iqtidarda olanların səriştəsizliyi üzündən heçə endirilmiş ədliyyənin səlahiyyətləri ümummilli liderimiz Heydər Əliyevin diqqəti sayəsində daha da artırıldı. Ədliyyə orqanlarının işinin müasir tələblər səviyyəsinə qaldırılması üçün əsaslı tədbirlər həyata keçirildi. Ədliyyə orqanlarının cəmiyyətdə rolu və əhəmiyyəti artdı, səlahiyyət dairəsi genişləndi. Möhtərəm Prezidentimiz cənab İlham Əliyevin uğurlu daxili və xarici siyasəti sayəsində ölkəmizdə hər sahədə sürətli inkişaf yarandı. Bu inkişaf, irəliləyiş bütün sahələrdə olduğu kimi, ədliyyə sistemində də özünü göstərdi, islahatların aparılması bu sahədə çalışanlara inam və etimadı artırdı. Artıq ədliyyəmiz mütəşəkkil bir sistemə çevrilmişdir.

Əmək fəaliyyətimə bu sistemdə başladığım üçün həmişə qürur duymuşam. Fəxr etmişəm ki, dövlətçilyin, insanların hüquq və azadlıqlarının qorunması ilə bağlı qərar və qanunların yerinə yetirilməsində mənm də əməyim olub. Zərdab Rayon Qeydiyyat Şöbəsinin rəisi vəzifəsində çalışdığım illərdə ədliyyə sistemi, bu mənəvi ailəmdən, əvəzsiz rəhbərliyi olan kollektivdən çox şey öyrəndim. Qeydiyyat və Notariat Baş İdarəsindən, rəhbərliyimiz tərəfindən müntəzəm aldığım göştərişlər, qərarlar, təlimatlarla hüquqi biliyimi zənginləşdirdim. Ədliyyəmizin hər sabahı bir yeniliklə, yenidənqurma ilə, sadələşdirilmiş, yeniləşdirimiş, avtomatlaşdırılmış bir xüsusi sistemlə açılır. Bu kollektivdə çalışmaq insanın həm mənəviyyatını, həm də dünyaya baxışını dəyişir, saflaşdırır.

Ədliyyə qulluğunda yaş həddimin çatdığı üçün bu səmimi kollektivdən, dövlətçiliyimizə sədaqətlə xidmət edən xeyirxah, tələbkar rəhbərlikdən ayrılaraq təqaüdə çıxmışam. Bu münasibətlə Nazirliyimizdə təşkil olunan mərasimdə Qeydyyat və Notariat Baş İdarəsinin rəisi, general İlqar Məmmədov, rəis müavini Mehman Soltanov, reyestr xidmətinin rəisi Reyhanə Kərimova, Ağakərim müəllim, Seymur müəllimin və başqalarının təbriklərini, arzularını , dövlətimizə, dövlətçiliyimizə, ölkə rəhbərliyinə məhəbbət dolu kəlamlarını, dövlət mövqeyindən etdikləri tövsiyələri ömrüm boyu unutmayacağam. Mənə göstərilən səmimiyyət üçün bir daha doğma kollektivimə dərin minnətdarlığımı bildirirəm.

Səadət SEYİDOVA,

birinci dərəcəli hüquqşünas,

ədliyyə qulluqçusu

Xalq qəzeti.- 2013.- 17 fevral.- S. 7.