AĞDAŞ: YENİLƏŞMƏ və YÜKSƏLİŞ davamlıdır

Regional inkişaf proqramlarının dəqiq və ardıcıl həyata keçirilməsi, yerli təşəbbüskarlığa geniş meydan verilməsi Ağdaş rayonunu sürətlə inkişaf edən bölgələr sırasına çıxarmışdır. Ötən ilin ən mühüm sosial-iqtisadi yekunları bunu bir daha təsdiqlədi.

Ümumrayon toplantısında hesabat məruzəsi ilə çıxış edən Ağdaş Rayon İcra Hakimiyyətinin başçısı Tofiq İbrahimov 2012-ci ilin başlıca sosial-iqtisadi yekunlarını şərh etdi, növbəti ilin məsul vəzifələrindən söz açdı. Natiq bildirdi ki, dövlət başçısı İlham Əliyevin daimi diqqət və qayğısı son illərdə Ağdaş rayonunda da sosial-iqtisadi inkişafın sürətləndirilməsinə təkan vermişdir.

Keçən il rayonda 264,5 milyon manatlıq - 2011-ci ildəkindən 17,1 milyon manat və ya 7,3 faiz çox ümumi daxili məhsul istehsal olunmuşdur. Bunun 7 milyon 24 min manatlığı sənaye, 126 milyon 119 min manatlığı kənd təsərrüfatı məhsuludur. Bu dövrdə rayonda aparılan tikinti işlərinin həcmi 10,1 faiz və ya 5,5 milyon manat artaraq 59,8 milyon manat təşkil etmişdir. 2012-ci ildə 831-i daimi olmaqla 2 min 106 yeni iş yeri açılmışdır. Ümumiyyətlə, 2003-2012-ci illər ərzində rayonda 6 min 576-sı daimi olmaqla, 17 min 744 yeni iş yeri yaradılmışdır.

Ötən il rayonda kənd təsərrüfatı məhsulları istehsalının artırılması sahəsində ardıcıl tədbirlər görülmüşdür. 15908 hektardan 42 min 259 ton taxıl istehsal olunmuşdur. 4369 hektardan 67 min 214 ton tərəvəz, 1320 hektardan 8562 ton qarğıdalı, 1186 hektardan 17 min 429 ton kartof, 1525 hektardan 23 min tondan artıq bostan məhsulları götürülmüşdür. 2013-cü ilin məhsulu üçün 18 min 371 hektara yaxın sahədə şum aparılmış və 17 min 260 hektar sahədə taxıl əkilmişdir. Bitkiçilik məhsulları istehsalının artırılması üçün 2012-ci ildə aqrar sektorda çalışanlara güzəştli qiymətlərlə 847 ton mineral gübrə satılmışdır.

Rayonda heyvandarlığın inkişaf etdirilməsi üçün yem bitkilərinin, xüsusi ilə yonca, qarğıdalı, arpa əkini sahələrinin genişləndirilməsi və naxırın cins tərkibinin yaxşılaşdırılması ön plana çəkilmişdir. İl ərzində rayonda iri malın sayı 985 baş artaraq 77 min 200-ə, xırda malın sayı isə 2075 baş artaraq 94 min 562-yə çatmışdır. Bakı şəhərində təşkil edilən satış-yarmarkalarına 111 tondan çox müxtəlif çeşidli kənd təsərrüfatı məhsulları göndərilmişdir. Rayonun Ərəbocağı kəndində 1200 başlıq müasir tipli heyvandarlıq kompleksinin və 80 başlıq atyetişdirmə məntəqəsinin tikintisi davam edir.

Rayonda elektrik enerjisi ilə təchizatı yaxşılaşdırmaq məqsədilə təmir işləri davam etdirilmişdir. 20,6 km uzunluğunda 10 və 0,4 kv-luq elektrik xətti əsaslı, 49,3 km uzunluğunda 10 və 0.4 kv-luq elektrik xətti isə cari təmir olunmuşdur. Rayonun Kükəl kəndi ərazisində tikintisinə 2010-cu ildə başlanılmış 220/110 kv-luq 2x180 MVA gücündə Ağdaş regional elektrik yarımstansiyasında inşaat işləri davam etdirilir.

Təbii qaz təchizatını yaxşılaşdırmaq məqsədilə təmir-bərpa işləri davam etdirilmişdir. Ağdaş şəhərinin və Ləki qəsəbəsinin müxtəlif küçələrində 39 min 838 metr uzunluğunda köhnə qaz xətləri yenisi ilə əvəz olunmuş, Güvəkənd, Əmirarx, Bəylik, Pirəyir və Tofiqi kəndlərində qaz xətlərinin çəkilişi aparılmışdır. “Şəmsabad” qazpaylayıcı stansiyasından Ağdaş şəhərinə gələn xəttin 4150 metr hissəsi yeraltı polietilen boru, 341 metr hissəsi isə polad boru vasitəsilə yenidən çəkilmişdir.

Rayonda sahibkarlığın inkişafı sahəsində ardıcıl tədbirlər görülmüşdür. 2012-ci ilin iyun ayında rayonda Sahibkarlığa Kömək Milli Fondu tərəfindən kredit yarmarkası keçirilmiş və 10 sahibkara 140 min manat güzəştli kredit verilmişdir. İl ərzində rayonda sahibkarlığın inkişaf etdirilməsi üçün 13 milyon 843 min manat, o cümlədən Sahibkarlığa Kömək Milli Fondunun vəsaiti hesabına 13 sahibkara 995 min manat həcmində kredit verilmişdir. Sahibkarların vəsaiti ilə 50-yə yaxın xidmət obyekti istifadəyə verilmişdir. 19 sentyabr 2012-ci il tarixdə rayonda keçirilmiş əmək yarmarkasında 121 nəfər işlə təmin edilmişdir.

Məruzəçi daha sonra bildirdi ki, 2012-ci ildə əhaliyə göstərilən təhsil, səhiyyə və mədəniyyət xidmətlərinin səviyyəsinin yüksəldilməsi istiqamətində bir sıra tədbirlər həyata keçirilmişdir. Son illər dövlət büdcəsi və Heydər Əliyev Fondunun vəsaiti hesabına rayonda 9 yeni məktəb tikilmişdir. 7 məktəbdə əlavə sinif otaqları inşa edilmiş, 7 ümumtəhsil məktəbi əsaslı təmir olunmaqla bu təhsil müəssisələrində 7 min nəfərə yaxın şagirdin təhsil şəraiti yaxşılaşdırılmışdır. Bu göstərici ümumi şagirdlərin (14034 nəfər) 42 faizini təşkil edir.

Ötən il rayonda tam orta məktəbləri bitirmiş məzunların 490 nəfəri ölkənin müxtəlif ali təhsil məktəblərinə qəbul olunmaq üçün sənəd təqdim etmiş, onlardan 227 nəfəri ali məktəblərin tələbələri sırasına daxil olmuşdur. Ali məktəbə qəbul olunan məzunların 32 nəfəri 500-700 bal intervalında nəticələr göstərmişdir. Ağdaş Dövlət Humanitar Kollecində 9 ixtisas üzrə kiçik mütəxəssis hazırlığı işi davam etdirilmiş, 374 nəfər məzun müxtəlif ixtisaslar üzrə diplom almışdır. Peşə məktəbində 7 peşə üzrə 149 nəfər şagird təhsilini başa vurmuşdur.

Ötən il tam gücü ilə fəaliyyətə başlayan 100 çarpayılıq yeni xəstəxana binasında əhaliyə müasir səviyyədə tibbi xidmətlərin göstərilməsinə başlanılmışdır. Burada ilk dəfə olaraq hemodializ şöbəsi açılmaqla 48 xəstəyə dializ seansı qəbul etmək üçün şərait yaradılmışdır.

Ağdaş şəhərində yeni inzibati mərkəzin yaradılması istiqamətində iş aparılır. Yeni inzibati mərkəzdə Bayraq meydanının, həmçinin Heydər Əliyev Mərkəzi, rayon icra hakimiyyəti, YAP rayon təşkilatı, eləcə də Dövlət Yanğından Mühafizə Hissəsi üçün inzibati binalarının tikintisinə başlanılmışdır. Rayonda beton zavodu, kərpic və dam örtüyü materialları istehsalı müəssisəsi inşa olunur. 4 istiqamətdən girişdə rayonun adını göstərən memarlıq nümunələrinin tikintisi başa çatdırılmışdır. Rayon ərazisindən keçən magistral avtomobil yollarının kənarlarında abadlıq-quruculuq işləri davam etdirilir. Ağdaş şəhərinin Heydər Əliyev parkı ərazisində yenidənqurma işlərinə başlanılmışdır. Parkın ümumi görkəmi dəyişdirilir, əhalinin hər bir təbəqəsinin istirahəti üçün münasib şəraitin yaradılması istiqamətində tədbirlər həyata keçirilir.

Azərbaycan Respublikası Prezidentinin “Ağdaş rayonunun sosial-iqtisadi inkişafının sürətləndirilməsinə dair əlavə tədbirlər haqqında” 2011-ci il 1 noyabr tarixli sərəncamı ilə Ağdaş rayon İcra Hakimiyyətinə ayrılmış 2 milyon manat vəsait hesabına Heydər Əliyev prospektində, “Heydər xiyabanı”nda və Azadlıq meydanında tikinti-quruculuq və abadlıq işləri həyata keçirilmişdir.

Rayon icra hakimiyyəti başçısı yanında Şuranın 28 iclası keçirilmiş, rayonun ictimai-siyasi, sosial-iqtisadi və mədəni həyatı, habelə tikinti-quruculuq işləri ilə bağlı 56 məsələ müzakirə olunmuşdur. Ötən il rayon icra hakimiyyəti başçısı aparatına 671 müraciət daxil olmuşdur ki, bu da 2011-ci ildəkindən 160 ədəd azdır. İcra hakimiyyəti başçısı 1768 vətəndaşı qəbul etmişdir. Onlardan 518-i səyyar görüşlər zamanı, 1250-si isə rayon icra hakimiyyəti başçısı aparatında qəbul olunmuşdur.

Məruzə və çıxışlarda bildirildi ki, ağdaşlılar qazanılmış uğurlarla kifayətlənmir, gələcəyə böyük nikbinliklə baxırlar. 2013-cü ildə də rayonun hərtərəfli inkişafı üçün zəruri tədbirlər həyata keçiriləcək, bütün qüvvə və səylər qarşıda duran mühüm və şərəfli vəzifələrin uğurla həyata keçirilməsinə səfərbər ediləcək.

Azərbaycan Prezidenti Administrasiyasının məsul işçisi Rüfət Əliyev qazanılmış uğurlara görə ağdaşlıları təbrik etdi, cari ildə onlara yeni nailiyyətlər arzuladı. Yığıncaqda Milli Məclisin üzvü Çingiz Əsədullayev iştirak edirdi.

Ziyəddin SULTANOV

Xalq qəzeti.- 2013.- 17 fevral.- S. 6.