Lənkəranda sosial-iqtisadi inkişaf yüksək sürətlə davam edir

“Cənub mirvarisi” Lənkəranda ötən il qazanılan uğurlar şəhərin sosial-iqtisadi tərəqqisinə müsbət təsir göstərib. Əksər sahələrin fəaliyyəti canlandırılıb. Abadlıq işləri, yaşayış məntəqələrinin qazlaşdırılması, məktəb tikintisi və yol çəkilişi üzrə tədbirlər əhalinin razılığına səbəb olub. Lənkəranlılar ötən il iyulun 31-də Azərbaycan Prezidenti cənab İlham Əliyevin rayona növbəti səfərini ən əlamətdar hadisə sayırlar. Ölkə başçısı səfər çərçivəsində rayonda aparılan quruculuq işləri ilə tanış olmuş, şəhərdə Heydər Əliyev Mərkəzinin, Bayraq Meydanının, Lənkəran sərhəd dəstəsinin inzibati binasının yenidənqurmadan sonra açılışında, Gənclər Mərkəzinin və beş ulduzlu müasir turizm otel kompleksinin təməlqoyma mərasimində iştirak etmiş və rayonun ziyalıları ilə görüşmüşdür.

Ulu ondər Heydər Əliyev zamanında Lənkəranın inkişafına xüsusi önəm verirdi. Bu gün də varislik ənənələri layiqincə yaşadılır. Prezidentliyi dövründə cənab İlham Əliyev səkkiz dəfə Lənkərana səfər edib və tərəqqi layihələrinin sürətlənməsinə əməli dəstək göstərib. Təkcə ötən il 8 iyun, 1 və 17 avqust tarixli Prezident sərəncamları ilə Lənkəranın sosial-iqtisadi inkişafına, həmçinin on minlərlə əhalinin yaşadığı əraziləri birləşdirən avtomobil yollarının çəkilişi və əsaslı təmirinə 12 milyon manatdan çox vəsait ayrılmışdır. Bu, Lənkəranın tarixində misli olmayan qayğının təzahürüdür. Mərkəzi Rayon Xəstəxanasının əsaslı təmirinə dair Prezident sərəncamına əsasən ayrılan vəsaitlə artıq baş tibb ocağının yenidən qurulmasını da əlavə etsək, burada necə böyük işlərin görüldüyünü daha aydın təsəvvür etmək olar.

İlin yekunlarına və qarşıda duran vəzifələrə həsr olunan toplantı bir növ uğurların əyani nümayişi idi. Heydər Əliyev Mərkəzində ulu öndərin büstü önünə gül dəstələri qoyuldu, xatirəsi ehtiramla yad edildi. Sonra iştirakçılar mərkəzin foyesində sərgilənən yerli qida-ərzaq, emal-istehsal və inşaat sektorlarına aid məhsullarla yaxından tanış oldular. Elə sərgidə təqdim edilən, əsl keyfiyyət etalonu ola biləcək nümunələr Lənkəranda tərəqqinin üfüqlərinin necə geniş olduğundan soraq verirdi. İlin yekunlarının icmalı verilən sənədli filmin nümayişi bu qənaəti daha da gücləndirdi.

Lənkəran Şəhər İcra Hakimiyyətinin başçısı Taleh Qaraşov hesabat məruzəsində bildirdi ki, ötən il rayonda ümumi məhsul buraxılışının həcmi 323,3 milyon manat olmuş və əvvəlki illə müqayisədə 15,4 faiz artmışdır. İl ərzində fəaliyyətdə olan 32 sənaye müəssisəsi tərəfindən 19,2 milyon manatlıq məhsul istehsal olunmuşdur.

Sənaye müəssisələrində 860 ton meyvə-tərəvəz konservi, 238,3 ton qablaşdırılmış çay, 38,8 ton kərə yağı, 632,7 ton pendir və kəsmik, 341,6 ton üzlü süd məhsulu istehsal edilmiş, 6640 kubmetr kərpic buraxılmışdır. Ötən il “Lənkəran konserv” müəssisəsi yenidənqurmadan sonra müasir texnologiya ilə fəaliyyətə başlamışdır. Sənayenin qeyri-dövlət sektorunda istehsalın həcmi 14 milyon manat olmuş və ümumi həcmdə onun xüsusi çəkisi 72,8 faiz təşkil etmişdir. İl ərzində sənayedə 1388 nəfər çalışmış və işləyənlərin orta aylıq əmək haqqı 5,1 faiz artaraq 227 manata çatmışdır.

Məruzəçi sonra dedi: -Sənayedə işi daha da canlandırmaq olar. Bunun üçün xammal istehsalı və emal sahələrinin əlaqəli işləməsinə, rəqabət qabiliyyətli məhsul istehsalına, yeni müəssisələrin yaradılmasına diqqət artırılmalıdır.

Əhaliyə nəqliyyat, rabitə və poçt xidmətinin yaxşılaşdırılması sahəsində müəyyən işlər görülmüşdür. Ötən il rayonun Gərmətük qəsəbəsində, Sütəmurdov və Şağlaser kəndlərində yeni poçt binaları tikilib istifadəyə verilmişdir. Hazırda şəhər 4 saylı poçt şöbəsi üçün yeni binanın tikintisi davam etdirilir.

Ötən il Sahibkarlığa Kömək Milli Fondunun xətti ilə müvəkkil banklar tərəfindən yerli sahibkarların və iş adamlarının təqdim etdiyi 37 layihəyə 650 min manat güzəştli kredit verilmişdir. Rayonda 1938 yeni iş yeri açılmışdır ki, bunun da 1340-ı daimi xarakterlidir.

Şəhər İcra hakimiyyəti tərəfindən Yeni il və Novruz Bayramı ərəfəsində rayonda yeyinti məhsullarının satış yarmarkaları keçirilmişdir. Yarmarkalarda şəxsi təsərrüfatlar və yerli müəssisələrlə yanaşı, Bakıdan və digər rayonlardan 32 şirkət də iştirak etmişdir. Əhalinin böyük razılığına səbəb olan yarmarkalarda ümumilikdə 360 tona yaxın məhsul satılmış və qiymətlər bazarla müqayisədə 25-30 faiz aşağı olmuşdur.

Ötən il rayonda aztəminatlı ailələrə 4,1 milyon manat ünvanlı dövlət sosial yardımı verilmişdir. İl ərzində sosial müavinətlərin ödənilməsinə, Milli Qəhrəman və şəhid ailələrinə, fəxri adları olan şəxslərə və digər imtiyazlı təbəqələrə, ümumilikdə 6485 nəfərə 3,2 milyon manat vəsait ödənilmişdir.

Rayonda yaşayan 129 nəfər tənha, ahıl və əlil vətəndaşa 14 sosial işçi xidmət göstərmişdir. Pulsuz avtomobil almaqdan ötrü növbədə olan imtiyazlı şəxslərdən 3 nəfərinə “Lifan” markalı avtomobil təqdim edilmişdir.

Ahıl və əlil vətəndaşlara maddi yardımlar və ərzaq payları verilmiş, 35 nəfər şikəst vətəndaş əlil arabası ilə təmin edilmişdir. Keçən il şəhər icra hakimiyyəti tərəfindən məcburi köckünlərə 7 min manatdan çox ərzaq yardımı verilmişdir. Ümumilikdə il ərzində imtiyazlı və aztəminatlı ailələrə 245 min manatdan çox tikinti materialı, ərzaq və maddi yardımlar verilmişdir.

Aqrar sahədə işlər davam etdirilmiş, əkin, şumlama, məhsul yığımı və qışa hazırlıqla bağlı işlər həyata keçirilmişdir. Rayon ərazisində ümumilikdə 8056 hektar sahədə payızlıq və yazlıq əkinləri keçirilmişdir. Ötən təsərrüfat ilində 125363 ton tərəvəz, 2754 ton taxıl, 6684 ton kartof, 2415 ton bostan bitkisi, 16212 ton meyvə, 137 ton yaşıl çay yarpağı istehsal edilmişdir. Rayonun təsərrüfatlarında 2013-cü ilin əvvəlinə 52190 baş iri buynuzlu, 20936 baş xırda buynuzlu mal-qara mövcud olmuş, əvvəlki illə müqayisədə 2,5 faiz artmışdır.

Kənd təsərrüfatı məhsullarının həcmi ümumilikdə 1,2 faiz, heyvandarlıq məhsullarının istehsalı isə 4,1 faiz artmışdır.

Kənd təsərrüfatı məhsulları istehsalçılarına əkin sahəsinin becərilməsində istifadə etdiyi yanacaq və motor yağlarına görə dövlət büdcəsinin vəsaiti hesabına yardımın verilməsi ilə əlaqədar rayon ərazisində 2543,6 hektar sahədə əkinlər keçirilmişdir. 580 nəfər istehsalçıya 101744 manat vəsait ödənilmişdir. Buğda əkini keçirmiş 186 nəfərə vəsaitin ödənilməsinə hazırlıq görülür.

Çayçılığın inkişafına diqqət artmışdır. Lənkəran çay filialında, Hirkan, İstisu qəsəbələrində və Girdəni kəndi ərazisində yeni plantasiyalar salınmışdır. Əkin və bərpa işlərinə yerli sakinlər cəlb olunduğundan həmin ərazilərdə əhalinin məşğulluğu artmışdır.

Rayonun Ürgə kəndində “Cənub Aqro” MMC tərəfindən 40 hektar ərazidə yeni meyvə bağı salınmışdır. 2013-cü ildə daha 150 hektar yeni çay plantasiyasının, 50 hektar meyvə bağının salınması və tərəvəz sahələrinin genişləndirilməsi nəzərdə tutulmuşdur.

2012-ci ildə şəhər icra hakimiyyətinin təşəbbüsü ilə yaşıllıq ayı və ağac əkini kampaniyaları keçirilmişdir. Bu tədbirlər zamanı şəhərdə və rayon ərazisində, ümumilikdə 12800 ədəd ağac əkilmiş, qorunması üçün lazımi işlər görülmüşdür. Əhalinin elektrik enerjisi ilə fasiləsiz təchizatı məqsədilə Lənkəran Paylayıcı Elektrik Şəbəkəsi tərəfindən hava xətlərində və yarımstansiyalarda təmir-bərpa işləri aparılmış, müxtəlif gücdə elektrik dirəkləri, izolyatorlar və sair avadanlıqlar dəyişdirilmiş, istismara yararsız naqillər yenisi ilə əvəzlənmişdir. Ümumilikdə rayon ərazisində 14392 ədəd “Smart” kart tipli sayğac quraşdırılmışdır.

Lənkəran Qaz İstismar Sahəsi tərəfindən il ərzində əhalinin və müəssisələrin təbii qazla təminatı üçün bir sıra işlər görülmüşdür. Dövlət Proqramına əsasən rayonun qaz təsərrüfatının yenidən qurulması ilə əlaqədar tikinti təşkilatları tərəfindən ümumilikdə 464,6 kilometr qaz xətti çəkilmiş, şəhərin cənub hissəsi və 14 kənd yaşayış məntəqəsində 7309 abonentin hər biri üçün qaz sayğacı və tənzimləyici quraşdırılaraq şəbəkəyə qoşulmuşdur. Hazırda rayonun 45 yaşayış məntəqəsində tikinti- quraşdırma işləri aparılır və yaxın aylarda daha 18 yaşayış məntəqəsində təbii qaz təchizatının istismara verilməsi nəzərdə tutulmuşdur.

Lənkəran Su-kanal İdarəsi tərəfindən hesabat dövründə şəhərin içməli su xəttində və kanalizasiya sistemində müəyyən təmir işləri görülmüşdür. Bununla belə məruzəçi qeyd etdi ki, Lənkəran şəhərinin su-kanalizasiya sistemi 1962-ci ildə 20 min əhalinin ehtiyacı üçün quraşdırılıb. İndi isə şəhərdə 60 mindən çox əhali yaşayır. Deməli, sistem tələbatı ödəmir. Məhz bu səbəbdən su-kanalizasiya sisteminin əsaslı şəkildə yenidən qurulması cənab Prezidentin göstərişi ilə Dövlət Proqramına salınmış və artıq bu sahədə işlərə başlanmışdır. “Hidrolotus” tikinti şirkəti tərəfindən yenidənqurma işləri ilə əlaqədar rayonun Bürcəli kəndində su, Göyşaban kəndində çirkab su təmizləyici qurğusunun tikintisi, həmçinin Şilavar, Digah, Velədi və Sütəmurdov kəndlərində su-kanalizasiya xətlərinin, şəhərin 11 küçəsində isə içməli su xəttinin çəkilişinə başlanmışdır.

Qeyd edək ki, ötən il Yaponiya səfirliyi Xarxatan kəndində içməli su probleminin həlli ilə bağlı layihə həyata keçirmişdir. Artezian quyusu qazılmış, məhəllələrə və evlərə içməli su xətti çəkilmişdir. Hazırda Azərbaycan Qızıl Xaç və Qızıl Aypara Cəmiyyətləri Federasiyası Günəhir kəndində 500 metr məsafədən su xətti çəkilişi layihəsinin icrasına hazırlaşır.

Tükəvilə-Diryan-Gəgiran və Hirkan-Daşdatük-Biləsər yollarında körpülər tikilmiş, Vilvan-Osaküçə-Türkəncil yolunda daha 2 ədəd dəmir-beton konstruksiyalı körpü inşa edilmişdir. Hazırda daha bir körpünün tikintisi başa çatmaq üzrədir. Bu, son 3 il ərzində həmin yolda tikilən 7-ci körpüdür. Cari ildə Hirkan-Daşdatük-Biləsər yolunda daha bir körpünün inşası nəzərdə tutulur. Dövlət vəsaiti hesabına Lənkəran və Liman şəhərlərində daxili və rayon ərazisində kəndlərarası yollar əsaslı təmir olunaraq ümumilikdə 8,9 kilometr uzunluqda yol asfaltlaşdırılmışdır.

Prezident sərəncamı ilə 20 yaşayış məntəqəsini birləşdirən, 40 min əhalinin istifadə etdiyi Lənkəran-Vilvan-Osakücə-Türkəncil avtomobil yolunun əsaslı təmiri üçün ilkin olaraq ayrılmış 4 milyon manat vəsait hesabına yolun 16,5 kilometrlik hissəsinin yol yatağı yenidən işlənərək hamarlanmış, bərkidilmiş, çınqıl döşəndikdən sonra yüksək keyfiyyətli asfalt döşənmiş və yol nişanları qurulmuşdur.

T.Qaraşov əlavə etdi ki, Nazirlər Kabinetinin 30 dekabr 2012-ci il tarixli qərarı ilə yolun qalan hissəsinin əsaslı təmiri üçün daha 4 milyon manat vəsait ayrılmış, bununla əlaqədar layihə-smeta sənədləri hazırlanmışdır. Prezidentinin digər sərəncamı ilə 16 yaşayış məntəqəsini birləşdirən, 28 min nəfər əhalinin yaşadığı Şürük-Vel-Qamışlı avtomobil yolunun əsaslı təmiri üçün ayrılmış 3 milyon 200 min manat vəsaitə uyğun olaraq həmin 12 kilometr yolda müvafiq işlər görülmüş, asfalt döşənərək istifadəyə verilmişdir.

Bundan başqa, cənab Prezident Lənkərana olan xüsusi diqqətini bir daha göstərərək 2013-cü ildə rayonumuza daha bir yol layihəsi - 18 kilometrlik,15 yaşayış məntəqəsini birləşdirən 47261 nəfər sakinin istifadə etdiyi Vilvan-Zövlə-Boladı-Liman yolunun əsaslı təmiri ilə bağlı 5,2 milyon manat vəsaitin ayrılmasına göstəriş vermişdir. Amma bu da son deyil. İl ərzində daha 2 yol layihəsinin həyata keçirilməsi üçün səylər göstərilir.

Ölkə başçısının 1 avqust 2012-ci il tarixli Sərəncamına əsasən Lənkəran Şəhər İcra Hakimiyyətinə ayrılmış 5 milyon manat vəsait hesabına isə şəhərin əsas giriş yollarından biri olan Şəhidlər xiyabanı küçəsi yenidən qurulmuşdur. Bu kimi işlər Göyşaban dairəsindən Ləvəngi dairəsinə və Heydər Əliyev prospektinədək olan yolda, Heydər Əliyev prospektində, Olimpiya İdman Kompleksinə gedən yolda və digər sahələrdə həyata keçirilmişdir. Eyni zamanda, bir sıra küçədə çoxmərtəbəli yaşayış binalarının dam örtükləri və fasadları əsaslı təmir edilmişdir. Ötən ilin ən uğurlu layihələrindən biri Dövlət Bayrağı meydanının tikintisi olmuşdur. Bayraq meydanında 65 metr hündürlüyündə bayraq dirəyi ucaldılmış, qarşısında dövlət rəmzlərini əks etdirən guşə inşa olunmuş, ərazi qiymətli mərmər üzlüklərlə örtülmüş, orada müasir işıqlandırıcılar quraşdırılmış, oturacaqlar qoyulmuş, yaşıllıq zolağı yaradılmışdır. Diqqət çəkən tədbirlərdən biri də Heydər Əliyev xatirə parkında da genişmiqyaslı yenidənqurma işləridir. Parkda köhnə metlax üzlüklər yeni tamet plitələrlə dəyişdirilmiş, suötürücü drenaj tikilmiş, suvarma üçün artezian quyuları qazılmışdır. Yaxın günlərdə sıradan çıxmış gül kolları və dekorativ ağaclar yeniləri ilə əvəzlənəcək, fəvvarələr əsaslı təmir olunacaq, müasir işıqlandırıcılar quraşdırılacaq və yeni oturacaqlar düzüləcəkdir. Hazırda xatirə parkında ulu öndərin abidə-kompleksi də onun uca adına layiq şəkildə yenidən qurulur. Park və abidə-kompleksi ümummilli liderimizin 90 illik yubileyinə ən gözəl töhfə olacaq.

Lənkəranın görməli yerlərindən biri də iki dəfə Sovet İttifaqı Qəhrəmanı general-mayor Həzi Aslanovun adını daşıyan parkdır. Parkda və abidə-kompleksin ətrafında yenidənqurma işlərinə başlanılıb.

Layihənin davamı olaraq yaxın günlərdə akademik Zərifə Əliyeva küçəsinin yenidən qurulmasına başlanacaq. Mikrorayon ərazisindəki binaların həyətində 3 yerdə uşaq əyləncə mərkəzləri qurulacaq.

Ötən il cənab Prezidentin xeyir-duası ilə Heydər Əliyev Xatirə parkında orijinal görünüşlü, üçmərtəbəli Gənclər Mərkəzinin tikintisinə başlanıldı. Sürətlə tikilən obyektdə artıq son tamamlama işləri görülür.

Ümumiyyətlə, il ərzində rayonda iqtisadi və sosial sferanın inkişafına 107,2 milyon manat investisiya yönəldilmişdir ki, bunun da 105 milyon manatı tikinti-quraşdırma işlərində istifadə edilmişdir. Keçən ilə nisbətən investisiyanın həcmi 44,5 faiz, tikinti-quraşdırma işlərinin həcmi isə 53,9 faiz artmışdır. Əhalinin şəxsi vəsaiti hesabına ümumi sahəsi 54,4 min kvadratmetr olan yaşayış evləri istifadəyə verilmişdir. Yeri gəlmişkən, bir müddət bundan əvvəl qəzalı vəziyyətə düşmüş binanın sakinləri evsiz qaldıqlarına görə ağır vəziyyətdə yaşayırdılar. Bunu nəzərə alan cənab Prezident onlar üçün smeta dəyəri 1 milyon 652 min manat olan 24 mənzilli yaşayış binasının tikilməsi barədə göstəriş verdi. Hazırda həmin tikintidə tamamlama işləri gedir. Bununla yanaşı, Nazirlər Kabinetinin 30 dekabr tarixli qərarı ilə Lənkəran şəhərində möhkəmliyində qüsurlar aşkarlanmış 15 çoxmərtəbəli yaşayış binasında bərkitmə-gücləndirmə işləri aparmaqdan ötrü ilkin mərhələdə 1 milyon 500 min manat vəsait ayrılmışdır. Yaxın vaxtlarda bu işlərə də başlanacaq. Dövlət vəsaiti hesabına daha 8 çoxmərtəbəli binada dam örtüyünün və fasadın təmiri işlərinin görülməsinə başlanılmışdır.

Rayonun Şilavar kəndində 220, Xarxatan kəndində 360, Hirkan qəsəbəsində 480 şagird yerlik yeni məktəb binaları tikilib istifadəyə verilmişdir. Hazırda 640 yerlik Vilvan kənd tam orta məktəbinin və şəhər 5 saylı uşaq bağçasının yeni binasının tikintisi davam etdirilir. Eyni zamanda, 220 yerlik Bəliton tam orta məktəbinin yeni binasının layihə-smeta sənədləri hazırlanmış, bundan başqa Nazirlər Kabinetinin qərarı ilə qəzalı vəziyyətdə olan daha 10 məktəbin tikintisi, şəhər 2 saylı orta məktəbin əsaslı təmiri və bərpa-gücləndirmə işlərinin görülməsi planlaşdırılmışdır. Bu il rayonda ümumilikdə 12 məktəbin və 1 uşaq bağçasının tikintisi, 1 məktəbin isə əsaslı təmiri dövlət investisiya proqramına salınmışdır. Qeyd edək ki, hələ indiyə qədər Lənkəranda bir ildə 12 məktəb tikilib istifadəyə verilməyib. Amma rayon rəhbərliyi bunu da son hədd saymır.

Ötən il dövlət başçısının sərəncamı ilə ayrılmış vəsait hesabına Lənkəran rayon Mərkəzi Xəstəxanasının əsaslı təmirinə başlanılmışdır. Bununla belə, cənab Prezidentin sərəncamı ilə xəstəxananın tam şəkildə, ən müasir tələblər səviyyəsində yenidən tikilməsindən örtü yenidən əlavə vəsait ayrılmışdır. İstifadəyə veriləndən sonra mərkəzi xəstəxana zonada analoqu olmayan tibb müəssisəsinə çevriləcək. Hesabat ilində şəhərdə Narkoloji Xəstəxana üçün də yeni binanın tikintisi davam etdirilmiş, rayonlararası nevroloji xəstəxanada cari təmir işləri aparılmışdır.

Mədəni-maarif müəssisələrində ilboyu müxtəlif səpkili mədəni-kütləvi tədbirlər keçirilmişdir. Lənkəranda tarix-diyarşünaslıq muzeyinin yerləşdiyi Xan evi uzun illər əsaslı təmir olunmamışdı. Ölkə rəhbərinin tapşırığı ilə bu məsələ də həllini tapıb. Xan evinin əsaslı təmiri bu ilin Dövlət İnvestisiya Proqramına salınıb. Lənkəran artıq beynəlxalq turizm şəhərinə çevrilir. Rayonda xüsusi razılıq lisenziyası almış 11 mehmanxana və mehmanxana tipli obyekt fəaliyyət göstərir. Ötən il rayona gələn turistlərin sayı 15 min nəfərdən çox olmuşdur.

Taleh Qaraşov dedi ki, 2012-ci ildə rayonun mədəni həyatında ən önəmli hadisə Heydər Əliyev Muzeyinin əsaslı şəkildə yenidən qurularaq mərkəzə çevirilməsi olmuşdur. Mərkəzin rəsmi açılış mərasimində Prezident İlham Əliyev iştirak etmişdir. Bura ümumi görünüşü və təchizatı baxımından digər rayonlardakı mərkəzlərdən fərqlənir. Mərkəzdə keçirən tarix dərsləri, seminarlar, dəyirmi masalar, yaşlı nəslin nümayəndələri ilə görüşlər Heydər Əliyev irsinin təbliğində əhəmiyyətli işlər kimi qeyd olunmalıdır.

Ötən il N.B.Vəzirov adına Lənkəran Dövlət Dram Teatrının yaradıcı kollektivi respublikanın 24 rayonunda qastrol səfərində olmuş, Ankara şəhərində beynəlxalq teatr festivalında ölkəmizi təmsil etmişdir.

Rayonda “İdman ili” ilə bağlı keçirilmiş tədbirlərə 5 minə qədər idmançı, istedadlı gənc və yeniyetmə cəlb edilmişdir. Ötən il rayon idmançıları həm ölkə birinciliklərində, həm də beynəlxalq yarışlarda yüksək nəticələr əldə ediblər. “Xəzər-Lənkəran” futbol komandasının ölkə çempionatındakı uğurlu çıxışı azarkeşləri sevindirir. Əlbəttə, idman sahəsində ötən ilin ən böyük hadisəsi ölkə rəhbərliyinin tapşırığı ilə 17 yaşlı qızlar arasında futbol üzrə dünya çempionatının bir neçə oyununa və veteran ağırlıqqaldıranların Avropa çempionatına Lənkəranın ev sahibliyi etməsi olmuşdur.

Rayonda əsas idman qurğusu Olimpiya İdman Kompleksidir. 2003-cü ildə istifadəyə verilmiş kompleksin hazırki vəziyyəti burada beynəlxalq əhəmiyyəti idman yarışlarının keçirilməsində müəyyən çətinliklər yaradırdı. Cənab Prezidentin tapşırığı ilə artıq obyektin yenidən qurulması Dövlət İnvestisiya Proqramına salınmışdır.

Keçən il şəhər icra hakimiyyətinə 4489 yazılı müraciət daxil olmuşdur. Müraciətlərin 4249-u ərizə, 210-u şikayət, 30-u təklif, onlardan 31-i minnətdarlıq məktublarıdır. Qeyd etmək lazımdır ki, 2011-ci illə müqayisədə vətəndaşların yazılı müraciətlərinin, o cümlədən Bakıya göndərdikləri müraciətlərin sayı azalmışdır. Baxılan müraciətlərin 1600-ü müsbət həllini tapmış, 292-si qismən həll olunmuş, 2487-nə müvafiq izahat verilmiş, 98-i əsassız sayılmış, 12-nin icrası nəzarətdə saxlanılmışdır.

İl ərzində şəhər icra hakimiyyəti başçısının yerlərdə əhali ilə 49 səyyar qəbul-görüşü keçirilmiş, görüşlərdə 10084 vətəndaş iştirak etmiş və 662 məsələ qaldırılmışdır. Qaldırılan məsələlərlə bağlı ayrı-ayrı qəsəbə və kəndlərdə ara yolları təmir olunmuş, suötürücü kanallar, kollektorlar təmizlənmiş, sürət məhdudlaşdırıcı yol nişanları qoyulmuş, köhnə elektrik transformatorları, dirəklər yenisi ilə əvəzlənmiş, qaz və su xəttləri quraşdırılmış, poçt filialları, elektron ATS-lər tikilib istifadəyə verilmişdir. ŞİH-də 6578 vətəndaş qəbul edilmişdir.

Məruzə və çıxışlarda, yerdən səslənən təkliflərdə belə bir inam ifadə edildi ki, ictimai-siyasi cəhətdən hamı üçün çox məsuliyyətli il olacaq cari ildə növbəti prezident seçkiləri keçiriləcək. Lənkəranlılar siyasi fəallıqlarını daha da artıracaq, hər zaman olduğu kimi, Azərbaycan dövlətçiliyinin möhkəmləndirilməsinə töhfələr verəcək və bütün xalqımız kimi bir daha Heydər Əliyev siyasi kursunun davam etməsinə, cənab İlham Əliyevin yenidən ölkə prezidenti seçilməsinə səs verəcəklər.

Hesabat yığıncağında Milli Məclis sədrinin müavini Ziyafət Əsgərov, parlamentin komitə sədri Hadi Rəcəbli, deputatlar Cavanşir Paşazadə və Rüfət Quliyev, habelə Prezident Administrasiyasının məsul əməkdaşı Vəfadar Bağırov iştirak etmişlər.

Əli NƏCƏFXANLI

Xalq qəzeti.- 2013.- 17 fevral.- S. 5.