XALQININ QƏNİMİ — ERMƏNİ NÖKƏRİ

Əkrəmin “letargiyası”, “hipnotik yuxuları”, yaxud “retroqrad amneziyası”nın anatomiyası

Bu günlərdə mətbuatda (“Xalq qəzeti”, 5 fevral 2013, səh.4) Naxçıvan Muxtar Respublikası Ordubad rayonu Əylis kəndi əhalisinin Azərbaycan xalqının heysiyyətinə toxunan, mənəviyyatını ləkələyən, böhtançı Əkrəmin “Daş yuxular” cızmaqarasına qarşı “Bizim Əkrəm kimi həmyerlimiz yoxdur” adlı etiraz məktubu ilə tanışlıq bizdə belə bir əminlik yaratdı ki, ona dövlət tərəfindən verilən bütün titullarla yanaşı, adının yanından “Əylisli” təxəllüsü də götürülməlidir və həmkəndlilərinin qərara gəldiyi kimi ya ona “Əkrəm Naibyan”, ya da “Əkrəm Nökəryan” deyilməsi daha yaxşı olardı.

Türk sözü olan “nökər” terminindən və digər çoxsaylı türk sözlərindən erməniyəbənzər əkrəmlər və əkrəməbənzər ermənilər kimi erməni şairi Sayat Nova da öz şeirlərində yararlanıb. Lakin o, Əkrəmdən fərqli olaraq “Xalxı nökər, siro takavor Sayat Nova” (“Xalqının nökəri, məhəbbətinin padşahı”) - deyəndə öz xalqına olan “nökərçiliyini” nəzərdə tutub, özünü xalqının gözündə ucaldırdı. Əkrəm isə öz xalqının qənimi, erməninin nökəri olmağa üstünlük verməklə özünü xalqının gözündə alçaltdı, rəzilləşdirdi, səfilləşdirdi. Biz inanmırıq ki, Əkrəmin ailəsi, övladları onu bu nankorluğuna görə sidq ürəklə dəstəkləyir. Sadəcə, onlar hazırda çıxılmaz vəziyyətdə qalıblar və onun yanında olmaq məcburiyyətindədirlər. İnanırıq ki, Əkrəmin nəslində, kökündə kimsə peyda olacaq və onun Azərbaycan xalqının kürəyinə arxadan endirdiyi satqınçılıq, erməniyə nökərçilik xəncərini öz əllərilə çıxaracaq, “Daş yuxular” kabusunun Əkrəm rüsvayçılığının erməni rüşvəti və erməni vədləri eyforiyasının təsiri altında kənardan idarə olunan əmrlər, göstərişlər əsasında yazılan roman yox, tarixi reallıqları kobud şəkildə təhrif edib eybəcərləşdirən xülya olduğunu sübuta yetirib təsdiqləyəcək. “Daş yuxular”ın bəlkə də “hipnotik yuxu” altında yazıldığını söyləyəcək. Yəqin ki, gələcəkdə bu, baş verəcək.

Vaxtilə şahnazarovların, aqanbekyanların, mikoyanların külli miqdarda bəxşişlərindən Əkrəm kimi gözləri qamaşan starovoytovalar, qorbaçovlar, raisalar da Azərbaycan xalqının qətlinə, soyqırımına fitva vermişdilər.

Hər bir insan yuxu görmə qabiliyyətinə malikdir, bu da normal fizioloji haldır. Lakin bəzi patoloji hallarda insan letargiya yuxularına qərq olur və cüzi həyat əlamətləri olsa da, uzun müddət ətraf mühitə reaksiyası yox dərəcəsinə enir. Hipnotik yuxu isə kənar şəxslərin təsiri altında hipnoz vasitəsilə yaradılır və belə halda olan insanları kənardan asanlıqla idarə etmək, öz fikirlərini ona təlqin etmək, hipnozçunun arxasınca getməsini, onun dediklərini, fikirlərilə əməllərini təkrarlamasını, heç bir vicdan əzabı çəkmədən öz millətini, xalqını təhqir etməsini təmin etmək mümkün olur. Bunu müəyyən psixotrop dərmanların köməyi ilə də etmək olur. Belə şəxslər artıq özünün şüurlu idarəçiliyindən çıxıb, zombiləşir. İlk baxışda hərəkətlərindən, danışığından, baxışlarından elə təəssürat yaranır ki, Əkrəm də kənardan verilən əmrlərlə idarə olunan zombidir. Zombinin isə nə mənəviyyatı, nə də milli qürur hissi olur. Görünür, erməni eksperimentatorları Əkrəmin üzərində uzun illərdən bəri belə bir hazırlıq əməliyyatını aparıb, ona milli mənsubiyyətini unutdurub, erməni olduğunu kodlaşdırıb, başqa sözlə, manqurtlaşdırıblar.

Adi bir misal: Eksperiment üçün həkimlər belə bir sınaq aparıblar: Əvvəlcə bir nəfərə hipnozdan qabaq deyirlər ki, 10-a qədər say. Ardıcıl olaraq sayır. Sonra onu hipnoz edirlər və deyirlər ki, “sən altı rəqəmini tanımırsan”. Bu rəqəm hipnoz olunanın beynindən, yaddaş mərkəzindən silinir. Hipnozdan ayılandan sonra həmin şəxsdən 10-a qədər saymasını təklif edəndə o, “6” rəqəmindən başqa bütün rəqəmləri ardıcıl sayır. “6” rəqəmi hipnoz zamanı onun yaddaş mərkəzindən silindiyinə görə, o, daha bu rəqəmi tanımır. Təzədən o şəxsi ikinci dəfə hipnoza salıb yenidən onun beynindəki mərkəzə “6” rəqəmini salmaq olur və xəstə ayılandan sonra yenə də “6” rəqəmini tanıyır. Görünür, Əkrəm də Moskvada müəyyən qrup ermənilər tərəfindən ya birbaşa, ya da dolayısı yolla belə bir sınağa çəkilib, onun üzərində uzun müddət möhkəm hazırlıq işləri aparılıb, hipnoz dərsi keçilib və beynindən erməni işğalçılarının azərbaycanlılara qarşı törətdikləri cinayətlər pozularaq, yaddaş mərkəzinə “ermənilərin azərbaycanlıları yox, azərbaycanlıların erməniləri öldürdükləri” fikri yeridilib. Onun fabusuna baxanda görürsən və hiss edirsən ki, danışan sanki onun özü deyil, o, robot kimi daxilində yerləşdirilmiş erməni pult qurğusu ilə idarə olunur. Artıq onun özünün müstəqil fikri, düşüncəsi yoxdur. O, tamamilə erməni hipnozunun təsiri altındadır. Əkrəm deyir ki, “onun əsərinə qiyməti zaman verəcək!”. Ancaq o, dərk edə bilmir ki, zaman artıq onun qiymətini verdi. Əlli milyonluq Azərbaycan xalqının nifrəti, qınağı onun qiyməti oldu. Əkrəm, yəqin ki, bu qiyməti ermənilərin, onu hipnoz təsiri altına salanların dilindən eşitmək istəyir və onun üçün ermənilərin tərifi kifayət edir.

“Zombiyə” çevrilən Əkrəmin öz əməllərindən peşmançılıq çəkməməsi göstərir ki, onun ciddi müalicəyə də ehtiyacı var. O, nə Xocalı, Quqark, Baqanis-Ayrım soyqırımlarını, nə İrəvan, Göyçə, Dərələyəz, Vedibasar, Zəngəzur, Dağlıq Qarabağ - Şuşa, Xankəndi, Xocalı, Malıbəyli, Quşçular, Kosalar, Zarıslı, Meşəli, Cəmilli, Ağdərə, Xocavənd, Əsgəran, nə də Laçın, Kəlbəcər, Ağdam, Füzuli, Qubadlı, Zəngilan, Cəbrayıl işğallarını görə bilmir.

Əkrəm “Daş yuxular”ında Bakıda bir erməninin öldürüldüyünü əlində bayraq edərək dünyaya car çəkir, Xocalıda blokadada olan dinc əhalinin yuxuda olduğu bir vaxtda, gecə yarısı erməni işğalçılarının vəhşiliklə şəhəri yerlə-yeksan etmələrini, qadınları, uşaqları qəddarlıqla, işgəncə verə-verə qətlə yetirdiklərini, cavan oğlanların başlarını kəsdiklərini, körpələrin diri-diri dərisini soyduqlarını, meyitlərdən və can verən yaralılardan körpü düzəltdiklərini, çoxlarını ömürlük şikəst etdiklərini görmək istəmir. Bunu artıq dünya ictimaiyyəti görür, Əkrəm isə görmək istəmir.

Əkrəmə demək istəyirik ki, internet saytını açıb Xocalının, Ağdamın işğaldan sonra yerlə-yeksan edildiyi fotoşəkillərə baxsın. Rusiyadan olan bir jurnalistin Ağdamda olarkən çəkdiyi fotoşəkillər Azərbaycanın milli-mədəni dəyərlərinin, tarixi abidələrinin tamamilə məhv edildiyini aydın əks etdirir. Əkrəm bəlkə bu əyani faktları görəndən sonra “daş yuxular”dan oyanar, özünə gələr?!

Əkrəm bəlkə bunları unudub? Bəlkə Əkrəmdə retroqrad amneziya baş verib? Əlbəttə ki, yox! Əkrəmin keçmişə aid yaddaşı tam yerindədir. O, Əylisdə gördüyü gəlmə erməni qadınlarını yaxşı xatırlayır. Sadəcə olaraq Əkrəm Azərbaycana xəyanət etmək, Azərbaycan xalqını alçaltmaq məqsədilə ermənilərlə uzun müddətli məşqlər keçib və özünün ermənilərdən əxz etdiyi dramatik hoqqabazlığı ilə cilddən-cildə girməyi, buqələmunluq etməyi bacarır.

O, “Daş yuxular” yazısındakı sayıqlamalarında əzəli və əbədi Azərbaycan torpaqlarının ermənilərə məxsus olduğunu iddia edir və bu iddiasını bizə də sırımaq istəyir. Əkrəmin nəzərinə çatdırırıq ki, 1827-ci ildə Rusiya canişini, general feldmarşal İvan Fyodoroviç Paskeviç İrəvan xanlığının ağsaqqalı Aslan Sultana xitabən deyir: “Bəli, bu torpaqlar sizin tarixi torpaqlarınızdır. Bəli, biz bura işğalçı kimi gəlmişik. Tamamilə həqiqətdir. Lakin o da həqiqətdir ki, biz rusların sizlərlə heç bir milli ədavətimiz yoxdur. Əgər Böyük Rusiya imperiyasının dövlət maraqları onun Qafqazda, o cümlədən İrəvan və Naxçıvan xanlıqları ərazisində möhkəmlənməsini tələb edirsə, burada nə siz – Aslan Sultan günahkarsınız, nə də mən – Paskeviç. Siz öz xalqınızın övladısınız, mən də öz dövlətimin əsgəriyəm”.

İndi məntiqi sual yaranır: sovet dövründə ermənilər qədim Azərbaycan torpağı olan İrəvanda beynəlxalq simpozium keçirib ermənilərin bu torpaqlarda məskunlaşmasının 2500-2750 illiyini qeyd edəndə bəs rus tarixçiləri nə üçün susurdular?! Susmalı idilər, çünki ermənilərin bütün bu saxta tədbirləri rusların işğalçılıq siyasətinin nəticəsi idi.

Dağlıq Qarabağa 1828-ci ildən sonra rusların təşəbbüsü və maddi köməyi ilə köçürülən ermənilər, hətta 1978-ci ildə Azərbaycanın dilbər güşələrinə köçmələrinin 150 illiyi münasibətilə Ağdərədə (sonra Mardakert adlandırılmışdı) böyük tarixi abidə də ucaltdılar. SSRİ süquta yetən kimi həmin abidəni dağıtdılar. Çünki qədim Azərbaycan torpağı olan Dağlıq Qarabağı “özəlləşdirmək” kimi işğalçılıq siyasətində həmin abidə ermənilərə çox mane olurdu.

İrəvan xanlığına, Naxçıvan xanlığına, Qarabağ, Gəncə, Şəki, Quba, Bakı xanlıqlarına aid olan torpaqların əzəli Azərbaycan torpaqları olması barədə həm Paskeviçin rus çarına yazdığı raportundakı məktubda, həm Qriboyedovun yazılarında, həm də çoxlu sayda rus tarixçilərinin, hətta erməni tarixçilərinin yazılarında hazırkı Ermənistanın yerləşdiyi torpaqların, o cümlədən hazırda son işğal zamanı erməni quldur dəstələri tərəfindən zəbt olunan torpaqlarımızın Azərbaycana məxsus olduğu dəfələrlə etiraf olunub. Bu tarixi həqiqətləri Avropada, Qərb dünyasında görmək, eşitmək istəməyənlər var, bəs bütün bu hadisələrin mərkəzində olub manqurtlaşanlar, o cümlədən Əkrəm niyə görmək istəmir? Nədir bunun səbəbi? Bununla o, nəyə nail olmaq istəyir? Doğrudanmı o, Vətəninin bir hissəsi olan ailəsini, övladlarını, mənəviyyatını pula, ona vəd edilən şirnikləndirici mükafatlara, hətta səsləndirilən Nobel mükafatına satıb? Bu, müvafiq orqan işçiləri tərəfindən araşdırılmalıdır və Əkrəm Vətən xaini, qatı cinayətkar kimi öz Vətənində mühakimə olunub, layiqli cəzasını almalıdır. Əkrəm tezliklə məhkəmə qarşısında dayanıb layiqli cəzasına çatmalıdır. Bunu qanı su yerinə axıdılan xocalılılar tələb edir. Bunu Əkrəm tərəfindən təhqirə məruz qalmış şəhidlərimizin müqəddəs ruhu tələb edir. Bunu işğal altında olan torpaqlarımızın acı naləsi tələb edir. Bunu bir milyondan artıq qaçqın, köçkün və didərginlərimiz tələb edir.

Mübariz ALLAHVERDİYEV,

Xocalı sakini, Azərbaycan Tibb Universiteti

insan anatomiyası kafedrasının professoru,

tibb elmləri doktoru

Xalq qəzeti.- 2013.- 17 fevral.- S. 4.