Azərbaycan peyki orbital mövqeyinə çatmışdır

Rabitə və İnformasiya Texnologiyaları Nazirliyindən aldığımız xəbərdə bildirilir ki, Azərbaycanın telekommunikasiya peyki “Azerspace-1” fevralın 19-da orbital mövqeyinə çatmışdır.

Qeyd edək ki, artıq peykin günəş panelləri açılıb və reflektorları işə düşmüşdür.

Peyk orbitdə mövqeyinə çatdıqdan sonra 2-3 həftə ərzində peykin orbitdəki sınaqları davam edəcək və daha sonra peykin idarəetməsi tam olaraq “Azərkosmos” ASC-yə təhvil veriləcək.

Azərbaycanın ilk telekommunikasiya peyki ABŞ-ın Orbital Sciences Corporation şirkətinin “STAR-2” platforması əsasında hazırlanmışdır.

Faydalı yük üzrə 36 aktiv transponderlə təchiz olunmuş və təqribən 3,2 ton çəkisi olan “Azerspace-1” peyki 46 dərəcə Şərq uzunluq dairəsində, geostasionar orbitdə yerləşəcək və Avropa, Afrika, Mərkəzi Asiya, Qafqaz ölkələri və Yaxın Şərq regionunu əhatə edəcəkdir.

Peykin istismar müddəti 15 ildir və bu müddət ərzində Azərbaycan peykdən 650 milyon dollar məbləğində gəlir əldə edəcək. Halbuki “Azerspace-1”in tikintisi, onun sığortalanması, orbitə buraxılması və yerüstü infrastrukturun yaradılmasına 230 milyon dollar vəsait xərclənmişdir.

Yer səthinin müşahidəsi üçün Azərbaycan peykinin aşağı yer orbitinə çıxarılması 2015-ci ilə, ikinci telekommunikasiya peykinin orbitə çıxarılması isə 2016-cı ilə planlaşdırılıb.

Xatırladaq ki, peykin imkanlarının 20%-i Azərbaycanın tələbatını ödəmək üçün, qalan 80%-i isə kommersiya məqsədilə istifadə ediləcək. Artıq peykin resurslarının 44%-i 15 illik müddətə Malayziyanın “Measat” peyk operatoruna icarəyə verilmişdir.

Samirə ƏLİYEVA

Xalq qəzeti.- 2013.- 20 fevral.- S. 3.