QƏBƏLƏ: Hər il qələbə ilidir

...Bu gün Qəbələyə gələn hər kəs heyrətini gizlədə bilmir. Bilmirəm, görülən işləri böyük adlandırım, yoxsa çox böyük. Amma bu, bir həqiqətdir ki, Qəbələdə hara baxırsan, göz oxşayır. Dağlar qoynunda yerləşən başdan-başa yaşıllığa bürünmüş bu səfalı yerlərdən doymaq bilmirsən ki, bilmirsən.

Sizi inandırım ki, Qəbələdə görülən möhtəşəm işləri bir qəzet yazısına sığışdırmaq mümkün deyil. Özü də bu işlər bir yox, bütün sahələri əhatə edir.

Rayonda 2012-ci ilin sosial-iqtisadi inkişafının yekunlarına həsr olunmuş hesabat yığıncağında uğurlardan danışan icra hakimiyyətinin başçısı Səbuhi Abdullayev bildirdi ki, rayonumuzun ictimai həyatında baş verən əsas əlamətdar hadisə Azərbaycan Respublikasının Prezidenti cənab İlham Əliyevin 2012-ci il sentyabr ayının 10-da Qəbələyə gəlişidir. Səfər zamanı ölkə başçısı bir çox mühüm sosial və iqtisadi xarakterli obyektlərin açılışında iştirak etmiş, inşaat işləri davam edən tikintilərdə vəziyyətlə tanış olmuşdur. Görülmüş işlər barədə fikirlərini söyləməklə bərabər cənab Prezident qarşıya yeni vəzifələr də qoymuşdur.

Ötən müddət ərzində iqtisadiyyatın ayrı-ayrı sahələri üzrə 228,167 min manatlıq məhsul istehsal edilmişdir ki, bu da keçən ilin müvafiq dövrünə nisbətən 8,160 min manat çox olmuşdur.

Ümumi məhsul buraxılışı sənayedə 159 min, kənd təsərrüfatında 2,997 min, tikintidə 2,310 min, nəqliyyatda 463 min, rabitədə 60 min, ticarətdə 2,171 min manat artmışdır.

Bu dövrdə sənaye mallarının istehsalında və xidmətlərin göstərilməsində qeyri-dövlət bölməsinin xüsusi çəkisi 70,9 faiz təşkil etmişdir. 2012-ci ildə sənaye müəssisələrində çalışan işçilərin orta aylıq nominal əmək haqqı 312 manat təşkil etmişdir ki, bu da əvvəlki illə müqayisədə 3,3 faiz çox deməkdir.

Xüsusilə sevindiricidir ki, 2003-cü ilin oktyabr ayından 1 yanvar 2013-cü il tarixədək 10,943 yeni iş yerləri açılmışdır. Ondan 8,895-i daimi iş yeri. Hesabat ilində açılmış yeni iş yerlərinin sayı isə 901 olmuşdur ki, həmin iş yerlərinin hamısı daimidir.

Azərbaycan hökuməti və Dünya Bankının maliyyə dəstəyi əsasında Qəbələ şəhərinin su təchizatı və kanalizasiya sisteminin yenidən qurulması istiqamətində işlər davam etdirilmişdir. Bu günədək 6 ədəd subartezian quyusu qazılmış, 2 ədəd 1000, 4 ədəd 600, 4 ədəd 500 kubmetrlik su anbarlarının tikintisi başa çatdırılmışdır.

Qəbələ Telekommunikasiya Qovşağı 2012-ci il ərzində 920 min manat tarif gəliri proqnozuna qarşı 937 min manat gəlir əldə etmiş, proqnoz tapşırığına 101,8 faiz əməl etmişdir. Ötən ilin müvafiq dövrü ilə müqayisədə 8,6 faiz, yəni 74 min manat artıq gəlir əldə edilmişdir.

Rayonun yaşayış məntəqələrinin sel sularından qorunması, kənd təsərrüfatının suvarma suyu ilə təminatı üçün suvarma kanalları 564 min kubmetr lildən təmizlənmiş, Türyançay, Dəmiraparan, Bum, Həmzəli, Tikanlı, Vəndam çaylarında 1103 min kubmetr çay məcrası təmizlənmiş, 320 kubmetr qabion bənddə, 1,900 kubmetr daş beton bənddə tənzimləmə və sahilbərkitmə işləri görülmüş, 2,522 kubmetr daş beton bəndi cari təmir edilmişdir. İl ərzində 15,8 min manat su pulu yığılaraq proqnoz tapşırığa 100 faiz əməl olunmuşdur.

Məruzəçi daha sonra demişdir ki, bu gün Qəbələ nəhəng tikinti meydançasını xatırladır. Belə ki, həyata keçirilən quruculuq işləri bütün yaşayış məntəqələrini əhatə edir. Ötən il Topbağ kəndində 80 şagirdyerlik ümumi orta, Tövlə kəndində 180 şagird yerlik tam orta, Nic qəsəbəsində 360 şagird yerlik tam orta, Solquca kəndində 80 şagird yerlik ibtidai məktəb binaları, Bum qəsəbəsində 25 yerlik uşaq bağçası və Qəbələ şəhərində Azərbaycan Respublikası Milli Təhlükəsizlik Nazirliyinin rayon şöbəsi üçün inzibati bina, Çuxur Qəbələ kəndində arxeoloji qazıntıların sərgisi üçün bina tikilərək istifadəyə verilmişdir. Vətəndaşların mülkiyyətində olan 1266 evin çardax hissəsində cari təmir işləri aparılaraq 264573 kvadratmetr dam örtüyü dəyişdirilmişdir. Vəndam qəsəbə 1 saylı tam orta məktəbində əsaslı təmir işləri görülmüşdür. Kiçik Pirəlli kəndində 180 şagirdyerlik tam orta məktəbin binasında tikinti işləri, Qəbələ şəhərindəki mədəniyyət mərkəzində, Yengicə kəndindəki sağlamlıq mərkəzinin yeni korpusunda, “ASPİ-AQRO” MMC-nin Qaradeyin kəndindəki şərab zavodunda, Qəbələ-Küsnət-Laza avtomobil yolunda və həmin yolda Duruca və Dəmiraparan çayları üzərində körpülərdə, Qəbələ şəhər məscidində son tamamlama işləri aparılır.

Bundan başqa, Beynəlxalq Hava Limanı- Qəbələ magistral avtomobil yolunun, Qəbələ şəhərində futbol akademiyasının, stadionlar kompleksinin, “Karvansaray” otel kompleksinin, “Qəbələ Konqres Holl”un, atçılıq kompleksinin, Bum qəsəbəsində stend və ox atıcılığı kompleksinin, Duruca müvəqqəti yaşayış ərazisində “Kanat yol”un, “Tufan” dağ-xizək yay-qış istirahət kompleksinin və daxili qoşunların “N” saylı hərbi hissəsi üçün binanın tikintisi davam etdirilir.

Qəbələ şəhərinin Səməd Vurğun və Nizami küçələrində abadlıq və yenidənqurma işləri başa çatdırılmış, Zərifə Əliyeva küçəsində, Vəndam qəsəbəsindən keçən magistral avtomobil yolunda, Nic qəsəbəsinin mərkəzi küçəsində və qəsəbə parkında tikinti və abadlıq işləri yekunlaşdırılmışdır. Vəndam qəsəbəsində 600 başlıq, Böyük Əmili kəndində isə 650 başlıq heyvandarlıq kompleksləri inşa edilmişdir. Qəbələ şəhərində istehsal təyinatlı “Cipsi” fabriki və limonad zavodunun tikintisinə başlanılmışdır.

Sonra məruzəçi rayonun təhsil və səhiyyə müəssisələrinin maddi-texniki bazasının möhkəmləndirilməsindən danışmış, qazanılmış uğurlardan söhbət açmışdır.

Ölkə Prezidenti cənab İlham Əliyev Qəbələnin son illər ərzində beynəlxalq mərkəzə çevrildiyini bildirmiş, burada keçirilən ənənəvi musiqi festivallarının artıq dünyada məşhur olduğunu və dünyanın aparıcı sənət adamlarının bu tədbirlərə qatıldığını söyləmişdir.

Təkcə bir faktı qeyd edək ki, ötən il rayonda ənənəvi IV Qəbələ Beynəlxalq Musiqi Festivalı keçirilmiş və Azərbaycanın görkəmli musiqiçiləri ilə yanaşı, dünyanın 17 ölkəsindən 300-dək məşhur ifaçı tədbirdə çıxış etmişdir. Bütün bunlar barədə iftixar hissi ilə danışan natiq qeyd etmişdir ki, Heydər Əliyev Fondu tərəfindən Azərbaycanın milli mədəniyyət nümunələrinin və musiqi irsinin qorunub saxlanılması və dünyada təbliğ edilməsi sahəsində görülən işlər çox mühüm əhəmiyyət kəsb edir. Fondun prezidenti və mədəniyyətimizin hamisi Mehriban xanım Əliyevanın bu istiqamətdə həyata keçirdiyi tədbirlər, onun rəhbərliyi ilə Qəbələdə təşkil olunan beynəlxalq festivallar, ölkəmizin musiqi ənənələrinin, mədəniyyətinin və ümumilikdə Azərbaycan xalqının dünyada tanıdılmasına çox böyük töhvələr verir.

2012-ci ilin “İdman ili” elan edilməsi ilə əlaqədar rayonun idman həyatından danışan məruzəçi qürur hissi ilə bildirmişdir ki, Qəbələ 2012-ci il ərzində bir neçə beynəlxalq və respublika səviyyəli yarışa - “Offroard” avtomobil yarışı üzrə beynəlxalq turnirə, ümummilli lider Heydər Əliyevin xatirəsinə həsr edilmiş beynəlxalq velosiped turnirinə, I Qəbələ Kuboku futbol turnirinə, “Olimpiya yol yürüşü” adlı kütləvi-idman tədbirinə, velosiped üzrə Azərbaycan çempionatına, I Ümumrespublika “Gənc xilasedici və yanğınsöndürənlər” yarışının final mərhələsinə ev sahibliyi etmişdir.

Sonra məruzəçi keçən il aqrar sahədə qazanılmış uğurlardan danışaraq bildirmişdir ki, bütün sahələr üzrə yüksək göstəricilər əldə olunmuşdur. Bir sözlə, Qəbələ ili yüksək nəticələrlə başa vurub.

Məruzə ətrafında müzakirələrdə çıxış edənlər də bu nailiyyətləri sadaladılar, iftixarla bildirdilər ki, hər il Qəbələ üçün bax, belə uğurlu olur.

Yığıncağın işində Milli Məclisin deputatı Fəttah Heydərov və Prezident Administrasiyasının məsul işçisi Əflatun Rufiyev iştirak və çıxış etdilər.

İlqar HƏSƏNOV

Xalq qəzeti.- 2013.- 24 fevral.- S. 7.