GÖYGÖL: dinamik inkişaf davam edir

Göygöl son illər respublikamızın ən surətli inkişaf edən şəhərlərindən birinə çevrilmişdir. Fakt və rəqəmlərin müqayisəli təhlili, iqtisadi, sosial və mədəni sahədə əldə edilmiş böyük uğurlar, insan amili onların vacib sosial ehtiyaclarının vaxtında yerinə yetirilməsi sahəsində əldə edilmiş zəngin təcrübə belə deməyə əsas verir ki, rayon icra hakimiyyətinin, onun yerli strukturlarının iş uslub və metodları, təşkilat-idarəetmə məsələləri təkmilləşdirilmiş, daha çox elmi münasibət, həssas və qayğıkeş yanaşma ön plana çəkilmişdir.

Təsadüfü deyil ki, fevral ayının 20-də Göygöl Rayon İcra Hakimiyyətində 2012-ci ilin sosial-iqtisadi inkişafının yekunları və 2013-cü ildə qarşıda duran vəzifələrə həsr olunmuş yığıncaq belə bir yüksək əhval-ruhiyyə ilə keçdi. Rayon icra hakimiyyətinin başçısı Arif Seyidov bu barədə danışarkən iftixar hissi ilə bildirdi: – 2012-ci ildə Göygöl rayonunda istehsal və xidmət sahələrinin genişləndirilməsi, sosial obyektlərin tikilməsi, abadlıq-quruculuq işlərinin aparılması istiqamətində həyata keçirilən tədbirlər daha sürətlə davam etdirilmiş, iqtisadiyyatın dinamik inkişafı təmin olunmuşdur. Hazırda şəhərin 7 mərkəzi küçəsində kompleks abadlıq işləri aparılır, binaların fasadlarına üzlük plitələr çəkilir, evlərin dam örtükləri dəyişdirilir. Göygöl Şəhər Mədəniyyət və İstirahət Parkı genişləndirilərək yenidən qurulur, Dövlət Bayrağı Meydanı və muzeyi tikilir, ətrafında abadlıq işləri aparılır. 2012-ci ildə Göygöl şəhərinin Turan Qurbanov, Xəlil Rza, Əliağa Şıxlinski, Molla Pənah Vaqif, Hüseyn Cavid küçələrinə, Bayraq Meydanına gedən yola asfalt örtük salınmış, səki daşı düzülmüşdür. Qarabağ müharibəsi əlilləri və şəhid ailələri üçün 36 mənzilli yaşayış evi, Dövlət Sosial Müdafiə Fondunun və Milli Təhlükəsizlik Nazirliyinin Göygöl rayon şöbələri, Olimpiya İdman Kompleksi, Heydər Əliyev Mərkəzi, Gənclər Mərkəzi, Uşaq Əyləncə Mərkəzi üçün binalar, “Göygöl Şərab” üçün spirt zavodu tikilir.

Göygöl şəhərində xeyr və şər evi, Baytarlıq İdarəsinin inzibati binası, Qızılca poçt şöbəsi üçün bina tikilib istifadəyə verilmişdir. 2012-ci ildə 58 milyon 20,7 min manat əsas kapitala investisiya qoyulmuş, bundan 56 milyon 556,3 min manatı tikinti-quraşdırma işlərinə yönəldilmişdir. Əhali tərəfindən müasir standartlara cavab verən 17 sahibkarlıq obyekti, 103 fərdi yaşayış evi inşa edilmişdir.

Azərbaycan Respublikası Prezidenti İlham Əliyevin ayırdığı vəsait hesabına səkkiz min nəfər əhalinin yaşadığı 6 yaşayış məntəqəsini birləşdirən Xaqani-Cümşüdlü-Haçaqaya avtomobil yoluna asfalt örtük salınmış, yolun mühafizə zolağına düşən elektrik və rabitə dayaqlarının yeri dəyişdirilmiş, yol kənarında olan görkəmsiz ticarət obyektləri əsaslı təmir olunmuşdur. Bakı-Qazax avtomobil yolunun rayon ərazisindən keçən hissəsində yenidənqurma və bərpa işləri davam etdirilir.

Dövlət Proqramında nəzərdə tutulmuş tədbirlərin icrası nəticəsində 2012-ci ildə 5 xidmət və 9 istehsal obyekti istifadəyə verilmişdir. Ümumiyyətlə, son 9 il ərzində 7397 yeni iş yeri açılmış, bunun da 5068-i daimidir. 2012-ci ildə isə 430-u daimi olmaqla, 1672 iş yeri açılmışdır. 2012-ci ildə rayon üzrə orta aylıq əmək haqqı 2011-ci ilə nisbətən 20,7 manat artaraq 220,1 manata çatmış, adambaşına düşən pul gəliri 1478,5 manat təşkil etmişdir.

Azərbaycan Respublikasnın Prezidenti İlham Əliyevin müəyyən etdiyi iqtisadi siyasətin əsas istiqamətlərindən birini təşkil edən sahibkarlıq subyektlərinin yaradılmasına və fəaliyyətinə göstərilən diqqət və qayğı, kiçik və orta sahibkarlığın inkişafına əlverişli şərait yaradılması nəticəsində 2012-ci ilin yekunlarına görə rayonda sahibkarların sayı 414 subyekt artaraq 2467-yə çatmışdır. Kiçik və orta sahibkarlığın inkişafına dövlət dəstəyinin nəticəsi olaraq Sahibkarlığa Kömək Milli Fondunun xətti ilə 68 hüquqi və fiziki şəxsə 1065 min manat güzəştli kredit verilmişdir. Məruzəçi daha sonra bildirdi ki, 2012-ci ildə iqtisadiyyatın əsas sahələrində istehsal olunmuş məhsul və xidmətlərin ümumi həcmi faktiki qiymətlərlə 143 milyon 191,5 min manata çatmış, sənaye müəssisələri tərəfindən, bütövlükdə 12 milyon 284,5 min manat dəyərində məhsul istehsal edilmişdir. Əvvəlki illə müqayisədə ötən il 1756,1 min manat çox olmaqla, 41306,7 min manat dəyərində kənd təsərrüfatı məhsulları istehsal edilmişdir. Əlamətdar haldır ki, bunun da 99,3 faizi qeyri-dövlət bölməsinin payına düşür. 2012-ci ilin məhsulu üçün 10161 hektar sahədə taxıl, o cümlədən 7112 hektar sahədə buğda əkilmiş, 2011-ci ilin müvafiq dövrü ilə müqayisədə 6853 ton çox olmaqla 26 min 957 ton taxıl tədarük edilmişdir. Heyvandarlıq inkişaf etmiş, iri malın sayı 20 min 127 başa, xırda mal 156 min 76 başa çatmışdır. 2011-ci illə müqayisədə süd istehsalı 18 ton, ət istehsalı 325 ton, yun istehsalı 3,1 ton, yumurta istehsalı 29 min ədəd artmışdır.

İnsan amili, onların vacib sosial ehtiyaclarının daha dolğun ödənilməsi daim diqqət mərkəzində saxlanılmış, elektrik, qaz, içməli su təminatının daha da yaxşılaşdırılması ilə bağlı bir sıra mühüm tədbirlər həyata keçirilmişdir. Məsələn, Göygöl şəhərində 92 kilometr elektrik xətləri dəyişdirilmiş, 5068 ədəd “smart-kart” tipli sayğaclar quraşdırılmışdır. 6 mərkəzi küçədə yeraltı kabel xətti çəkilmiş, gecə işıqlandırma sistemi təzələnərək 240 ədəd dayaq quraşdırılmışdır.

Umimiyyətlə, elektrik təsərrüfatında 74,2 min manat dəyərində təmir-bərpa, quraşdırma işləri aparılmışdır. Hazırda rayonun 45 yaşayış məntəqəsindən 23-ü təbii qazla təmin edilmişdir. 2013-cü ildə 14 yaşayış məntəqəsinə təbii qazın verilməsi nəzərdə tutulmuşdur. Topalhəsənli kəndinə qaz xəttinin çəkilişinə başlanılmışdır. Məcburi köçkünlərin məskunlaşdığı Murovdağ qəsəbəsində, Göygöl şəhərinin yeni salınmış massivində qaz xətti çəkilmiş, 830 abonent təbii qazla təmin olunmuşdur.

Göygöl şəhərinin su təchizatı və kanalizasiya sisteminin yenidən qurulması layihəsinin icrası ilə bağlı Kürək çayından 25 kilometr uzunluğunda yeni magistral su kəmərinin, Göygöl şəhərində su və kanalizasiya xətlərinin çəkilişi, sutəmizləyici qurğuların və anbarların tikintisi davam etdirilir.

Yığıncaqda qeyd olundu ki, ümumtəhsil məktəblərinin tikintisinə və maddi-texniki bazasının müasir tələblərə uyğun möhkəmləndirilməsinə xüsusi diqqət yetirilmiş, müvafiq Dövlət Proqramına əsasən və Heydər Əliyev Fondunun təşəbbüsü ilə “Yeniləşən Azərbaycana-yeni məktəb” devizi altında son dövrlərdə 16 məktəb binası, 26 əlavə sinif otağı, 1 uşaq bağçası tikilmiş, 19 məktəb binası, 4 uşaq bağçası əsaslı təmir olunmuşdur. 2012-ci ildə Firuzabad qəsəbə, Zurnabad, Qızılca, Quşqara kənd tam orta məktəb binaları tikilərək istifadəyə verilmişdir. Ali məktəblərə sənəd verən 393 nəfər məzundan 156-sı qəbul olunmuş, bu da 2011-ci ilə nisbətən 26 nəfər çoxdur. Onlardan 23 nəfəri 500-dən, 6 nəfəri 600-dən çox bal toplamışdır.

Son illər 4 kənd tibb məntəqəsi üçün yeni binalar tikilmiş, 3 kənd tibb məntəqəsi , 2 kənd sahə xəstəxanası, Aşıqlı kənd tibb məntəqəsi əsaslı təmir olunmuş, əlavə otaq tikilmiş, Toğanalı kənd həkim məntəqəsi cari təmir edilmişdir.

2012-ci ildə Göygöl Rayon İcra Hakimiyyətində vətəndaşların qəbul edilməsinə, onların ərizə və şikayətlərinə baxılmasına xüsusi diqqət yetirilmiş, bütün müraciətlər hərtərəfli araşdırılmış, haqlı tələblər öz həllini tapmışdır. Rayon icra hakimiyyətinə 1347 müraciət daxil olmuşdur ki, bu da əvvəlki illə müqayisədə azdır. Təkcə icra hakimiyyəti başçısı tərəfindən ötən il 562 vətəndaş qəbul edilmişdir. 2012-ci ildə 55 səyyar qəbul keçirilmişdir.

Yığıncaqda Azərbaycan Prezidenti Administrasiyasının məsul işçisi Rüfət Əliyev, Milli Məclisin deputatı Rövşən Rzayev çıxış edərək əldə edilmiş uğurlardan, ölkə Prezidenti İlham Əliyevin son çıxış və nitqlərində irəli sürülən müddəalardan, göstəriş və tövsiyələrdən, qarşıda duran konkret vəzifələrdən danışmışlar.

Ziyəddin SULTANOV

Xalq qəzeti.- 2013.- 23 fevral.- S. 6.