Qubadlı məcburi köçkünlərinin problemlərinə diqqət artırılır

Rayon ictimaiyyəti nümayəndələrinin təmsil olunduğu geniş yığıncaqda 2012-ci ildə görülən işlərin yekunu və 2013-cü ildə qarşıda duran vəzifələrlə bağlı geniş iclas keçirilmişdir. İclasda məruzə ilə çıxış edən Qubadlı Rayon İcra Hakimiyyətinin başçısı Malik İsaqov ilkin olaraq Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin ötən ilin sosial-iqtisadi inkişafının yekunlarına və qarşıda duran vəzifələrə həsr olunmuş 15 yanvar 2013-cü il tarixli iclasında ölkə başçısının nitqində irəli sürülən müddəalar barədə ətraflı məlumat vermişdir.

Natiq 2012-ci ildə respublikada sosial-iqtisadi inkişaf sahəsində əldə edilən uğurları konkret faktlar və rəqəmlərin dili ilə əks etdirmiş, daxili və xarici siyasət, ölkənin müdafiə potensialının artırılması və perspektiv imkanlarını nəzərdə tutan irimiqyaslı layihələrin icrası istiqamətində ardıcıl və məqsədyönlü iş aparıldığını diqqətə çatdırmışdır. Qeyd olunmuşdur ki, dünyanın böhran içərisində çalxandığı bir dövrdə ölkənin iqtisadi və sosial inkişafı sahəsində əldə edilən davamlı uğurlar ulu öndər Heydər Əliyevin müəyyən etdiyi strateji xəttin Prezident İlham Əliyev tərəfindən qətiyyət və ardıcıllıqla həyata keçirilməsinin nəticəsidir. Məcburi köçkünlərin həyat şəraitinin yaxşılaşdırılması Cənab Prezidentin siyasətində həmişə prioritet istiqamət olmuşdur.

Məruzədə bildirilmişdir ki, Qubadlı məcburi köçkünlərinin sosial vəziyyətlərinin yaxşılaşdırılması, təhsil, səhiyyə, mədəniyyət sisteminin inkişaf etdirilməsi, əhaliyə xidmət göstərən idarə, müəssisə və təşkilatların, yerli icra strukturlarının fəaliyyətinin səmərəli qurulması istiqamətində iş 2012-ci ildə də uğurla davam etdirilmişdir.

Qeyd edilmişdir ki, əhalinin böyük əksəriyyəti Abşeron yarımadası ərazisindədir. Bakı şəhərində 10 min 413 nəfər, Sumqayıt şəhərində 22 min 120 nəfər, Abşeron rayonu ərazisində 1314 nəfər yerləşmişdir. Rayonlarda pərakəndə məskunlaşan köçkünlərin sayı 1150 nəfərdir.

Qubadlı məcburi köçkünlərinin problemləri içərisində kommunal-mənzil məsələləri əsas yer tutduğunu bildirən natiq demişdir ki, bu istiqamətdə davamlı iş aparılır. Ötən il həyata keçirilən kompleks tədbirlərdən biri Sumqayıt şəhərindəki “Şəfa” sanatoriyası ilə bağlıdır. Kanalizasiya, su, elektrik sisteminin dəyişdirilməsi, ətrafın abadlaşdırılması üçün çox iş görülməli idi. Neft Şirkətinin balansında olan bu kompleksdə əsaslı iş aparılması üçün əldə etdiyimiz razılıq burada həyata keçirilən tədbirlərə zəmin yaratdı. Şəfa sanatoriyasının əsas korpusunun 2 mərtəbəsi bütünlüklə təmir edilərək burada məskunlaşan köçkünlərin istifadəsinə verildi. Təmirdən sonra köçkünlərə verilən mənzillər bütövlükdə 55 ailənin yaşayış şəraitinin yaxşılaşmasına imkan verdi. Sanatoriyanın 2 mərtəbəli müalicə korpusunda aparılan yenidənqurma və əsaslı təmir işləri əlavə 10 ailənin mənzil şəraitinin yaxşılaşdırılmasını təmin edəcəkdir.

Başçı bildirdi ki, yardımçı korpusda inşa edilən və yenidən qurulan mərasim evinin hazırkı səviyyəsi artıq bu yığıncaqda iştirak edənlərin çoxuna tanışdır. Kompleksdə aparılan yenidənqurma və inşaat işləri burada Rayon Mədəniyyət və Turizm şöbəsinin iki kitabxanasının, Mərkəzi Rayon Xəstəxanasının isə bir tibb məntəqəsinin də yerləşdirilməsinə imkan vermişdir. Hazırda idman kompleksinin inşası başa çatmaq üzrədir və yaxın vaxtlarda istifadəyə veriləcək idman zalı ayrıca bazası olmayan idmançılarımıza hədiyyə olacaqdır.

Qeyd edilmişdir ki, yola salınan ildə köçkünlərimizin məskunlaşdığı digər ərazilərdə də kommunal problemlərin həlli istiqamətində xeyli iş görülmüşdür.

Sumqayıt şəhəri, “Bərpa” xəstəxanasının 2-ci korpusunun həyətində və Beton-zavod yaşayış massivində yanğın nəticəsində sıradan çıxmış 2 həyət evinin bərpası başa çatdırılmışdır. 10 ailəyə mənzillərinin təmiri üçün müxtəlif tikinti materialları ilə köməklik göstərilmişdir. Onu da qeyd edim ki, dövlət proqramları çərçivəsində ötən il rayonumuzdan olan 20 ailə yeni mənzillərə köçürülmüşdür.

Hazırda rayonda 7 min 641 nəfər pensiyaçı qeydiyyatdadır. Bunlardan 2 min 912 nəfəri yaşa görə, 3 min 682 nəfəri əlilliyə görə, 314 nəfəri ailə başçısını itirməyə görə, 733 nəfər isə sosial pensiya alır.

2012-ci il ərzində rayonun Əhalinin Sosial Müdafiəsi Mərkəzi tərəfindən 300-dən artıq ailəyə 472 min 75 manat ünvanlı sosial yardım ödənilmişdir. Ötən il aztəminatlı ailələrə 45 min manat dəyərində müxtəlif sənaye malları, şəhid ailələrinə il ərzində dörd dəfə olmaqla 30 min manat dəyərində müxtəlif ərzaq yardımı verilmişdir.

Bildirilmişdir ki, rayonda fəaliyyət göstərən 32 məktəbin 10-u yeni inşa etdirdiyimiz binalarda yerləşdirilmiş, qalanları yenidən qurularaq əsaslı təmir edilmişdir. İndi rayonun 31 tam orta və 1 ümumi orta məktəbində 6787 şagird təhsil alır. Əgər 2010-2011-ci tədris ilində təhsil müəssisələrimizdə 6 min 628 şagird oxuyurdusa bu rəqəm 2011-2012-ci tədris ilində 6 min 655 nəfər, 2012-2013-cü tədris ilində isə 6 min 787 nəfər olmuşdur. Rayon Mərkəzi Xəstəxanası 2012-ci ildə həm poliklinikada, həm də 2 tibb məntəqəsində köçkünlərimizə xidmət göstərmişdir. Müasir avadanlıqlarla təchiz edilimiş poliklinikanın xidmət imkanları xeyli genişlənmişdir.

Ötən il rayon Mədəniyyət və Turizm Şöbəsi də müəyyən işlər görmüşdür. Maddi bazanın möhkəmləndirilməsi şöbənin işinin yaxşılaşdırılmasına və burada rəngarəng tədbirlərin keçirilməsinə imkan yaratmışdır.

Heydər Əliyev Fondunun dəstəyi ilə Mərkəzi Kitabxananın kitab fondu 25 minə çatdırılmış, latın qrafikası ilə çap olunmuş klassiklərin əsərləri ilə zənginləşdirilmişdir. Mərkəzi Kitabxananın elektron saytı oxuculara respublikamızın və dünyanın digər kitabxanalarına çıxış imkanı yaratmışdır. Bu il ulu öndər Heydər Əliyevin 90 illik yubileyi ölkənin hər yerində təntənə ilə keçiriləcəkdir. Rayon miqyasında nəzərdə tutulan tədbirlərin hazırlanmasında şöbənin üzərinə də böyük məsuliyyət düşür.

M.İsaqov dövlət siyasətində gənclərlə işə xüsusi yer ayrıldığını da diqqətə çatdırdı. Dedi ki, rayonda da bu istiqamətdə ardıcıl iş aparılır. Rayon gənclərinin ayrı-ayrı qrupları ilə keçirdiyimiz görüşlər tam əsasla deməyə imkan verir ki, gənclərimiz doğru yoldadır. Ümummilli lider Heydər Əliyevin xatirəsinə həsr edilmiş şahmat, voleybol, güləş turnirləri təşkil edilmişdir. İdmançılarımızın 26 müxtəlif yarışda iştirakı təmin edilmişdir.

Müxtəlif idman növləri üzrə 48 idmançı respublika turnirlərinin qalibi olmuşdur. 9 idmançımız beynəlxalq yarışlarda yüksək nəticələr əldə etmişlər. Onlardan 5 idmançımız dünya çempionatlarının mükafatçısı, 4 idmançımız Avropa çempionatının qalibi olmuşlar.

M.İsaqov son olaraq dedi ki, dövlət başçımız tərəfindən 2013-cü ilin “İnformasiya kommunikasiya texnologiyaları ili” elan edilməsi yeni inkişaf istiqamətinin başlanğıcının qoyulması deməkdir. Bu həm də “Azərbaycan 2020: Gələcəyə baxış” inkişaf konsepsiyasında qarşıya qoyulan məqsədlərə, Azərbaycanın müasir inkişafın ən yeni texnologiyalarına yiyələnmək yolu ilə getmək əzmini və qətiyyətini ifadə edir.

Sonra rayon Təhsil şöbəsinin müdiri Afət Allahverdiyeva, YAP Gənclər təşkilatının sədri Aqil Quliyev, rayon mərkəzi xəstəxananın baş həkimi Nüsrət Əhmədov, Tatar kənd inzibati ərazi dairəsi üzrə nümayəndəsi Tamilə Nəcəfova, Əhalinin Sosial Müdafiə Mərkəzinin direktoru Fazil Nərimanov, Mahmudlu kənd inzibati ərazi dairəsi üzrə nümayəndəsi Azər Eminov, Prezident Administrasiyasının məsul işçisi Rövşən Ağayev, Milli Məclisin deputatı İmamverdi İsmayılov çıxış edərək görülmüş işlər və qarşıda duran vəzifələrdən danışdılar.

Axırda yığıncaq iştirakçıları adından Azərbaycan Respublikası Prezidentinə müraciət qəbul olundu.

Mehdi MÜKƏRRƏMOĞLU

Xalq qəzeti.- 2013.- 26 fevral.- S. 9.