Səbaillilər Xocalı qurbanlarını yad etdilər

Səbail Rayon İcra Hakimiyyətinin tədbirlər planına uyğun olaraq rayonun idarə və təşkilatlarında, orta və ali məktəblərində Xocalı faciəsi mövzusunda sərgilər və müxtəlif tədbirlər keçirilir. Mədəniyyət müəssisələrində soyqırımın ildönümü ilə bağlı xatirə gecələri, foto və rəsm sərgiləri, şahidlərlə görüşlər təşkil olunmuşdur.

Fevralın 25-də rayonun orta və ali məktəblərində ilk dərslər Xocalı faciəsinə həsr olunmuş, ali məktəblərdə anım tədbirləri keçirilmişdir. Dövlət Gənc Tamaşaçılar Teatrında “Əcəl atı” tamaşasına, Badamdar Mədəniyyət evində isə Aygün Həsənoğlunun “Adsız qadın” romanı əsasında kompozisiyaya ictimai baxış təşkil olunmuşdur.

Azərbaycan Vətən Müharibəsi Veteranları Birliyi Səbail rayon şöbəsinin “Şəhidlər Xiyabanı”ndakı qərargahında Xocalı şəhərindən köçkün düşərək Səbail rayonunda məskunlaşmış 22 ailənin nümayəndələri ilə görüş keçirilmişdir. Səbail Rayon İcra Hakimiyyətinin başçısı Asif Əsgərov ermənilərin zaman-zaman xalqımıza qarşı törətdikləri vəhşiliklər və Xocalı soyqırımı ilə bağlı həqiqətlərin dünya ictimaiyyətinə çatdırılması üçün aparılan və görülməsi vacib olan işlər barədə ətraflı məlumat vermişdir.

Bildirilmişdir ki, ümummilli lider Heydər Əliyevin təşəbbüsü ilə Milli Məclisdə ilk dəfə bu məsələyə siyasi qiymət verilmiş, faciənin dünya xalqlarına çatdırılması məqsədi ilə genişmiqyaslı işlərə başlanmışdır. Mərasimdə Prezident İlham Əliyevin apardığı məqsədyönlü siyasət nəticəsində Xocalının, həmçinin işğal altında olan bütün Azərbaycan torpaqlarının düşməndən azad ediləcəyinə, ölkəmizin ərazi bütövlüyünün bərpa ediləcəyinə əminlik ifadə olunmuş, lazım gələrsə olkə başçısı, Ali Baş Komandanın əmri ilə torpaqlarımızın azad olunması üçün bütün qüvvələrin səfərbər ediləcəyi bildirilmişdir.

Xocalı Rayon İcra Hakimiyyətinin əməkdaşı Nadir Rəşadov və başqaları ölkə rəhbərliyinin Xocalı köçkünlərinə göstərdiyi diqqət və qayğıya, soyqırımın dünyada tanıdılması üçün gördüyü işlərə görə razılıqlarını ifadə etmişlər.

Sonda Səbail ərazisində məskunlaşmış Xocalı köçkünlərinə maddi və ərzaq yardımları təqdim olunmuşdur.

R.TAHİR

Xalq qəzeti.- 2013.- 26 fevral.- S. 7.