Soyqırımı abidəsinin dastanı

Binəqədi rayonundakı 284 saylı tam orta məktəbdə rayon icra hakimiyyəti rəhbərliyi və ictimaiyyət nümayəndələrinin iştirakı ilə Xocalı faciəsinin 21-ci ildönümünə həsr olunmuş tədbir keçirilmişdir.

Tədbirdən əvvəl məktəblilər arasında təşkil edilən “Müharibə uşaqların gözü ilə” adlı rəsm müsabiqəsi qaliblərinin sərgisinə baxış olmuşdur.

Sonda iştirakçılar C.Cabbarlı adına İrəvan Dövlət Azərbaycan Dram Teatrı aktyorlarının ifasında Xocalı faciəsinə həsr olunmuş “Soyqırım abidəsinin dastanı” adlı tamaşaya baxmışlar.

Xatırladaq ki, soyqırımı qurbanlarının anım günü ərəfəsində eyni zamanda rayon icra hakimiyyəti tərəfindən Goradil qəsəbəsində məskunlaşan 45 Xocalı sakininə ərzaq bağlaması və maddi yardım edilmişdir.

Xocalılar çıxışlarında soyqırımdan sonra onlara göstərilən diqqət və qayğıdan ətraflı bəhs etmişlər. Bildirmişlər ki, müstəqil Azərbaycan dövləti ulu öndər Heydər Əliyev yenidən siyasi hakimiyyətə qayıtdıqdan sonra Xocalı faciəsinə siyasi-hüquqi qiymət vermişdir. Milli Məclisin müvafiq qərarına əsasən 26 fevral Xocalı soyqırımı günü elan edilmiş və bu barədə beynəlxalq təşkilatlara məlumat verilmişdir. Bununla yanaşı, XX əsrdə erməni millətçilərinin vəhşiliyinin qurbanı olmuş günahsız insanların xatirəsinə ehtiram əlaməti olaraq Prezidentin fərmanı ilə 31 mart azərbaycanlıların soyqırımı günü elan edilmişdir.

Tədbirdə dövlətimizin ərazi bütövlüyünün təmin ediləcəyi, Xocalı soyqırımının da, digər cinayətlərin də bütün iştirakçılarının layiqli cəzalarını alacaqları əminliklə vurğulanmışdır. Bildirilmişdir ki, Azərbaycan Prezidenti İlham Əliyevin rəhbərliyi ilə dövlətimiz dinamik inkişaf edir və onun hərbi qüdrəti gündən-günə artır. Bu gün Azərbaycan bölgənin lider dövlətidir. Ermənistan heç bir sahədə özünü Azərbaycanla müqayisə edə bilməz. Eyni zamanda, işğalçı dövlətə göstərilən təzyiq də güclənməkdədir. Beynəlxalq təşkilatlar, dünya dövlətləri Azərbaycanın ərazi bütövlüyünü tanıyır. Bütün bunlar sülh danışıqlarında Azərbaycanın mövqelərini daha da möhkəmləndirir.

Azərbaycanın müasir tarixinin ən kədərli və faciəli səhifələrindən biri kimi 26 fevral gününü hər il xalqımız dərin hüznlə qeyd edir. Faciənin üstündən 21 il keçsə də onun vurduğu yaralar bu gün də sızlayır və heç zaman unudulmayacaqdır.

Dinc əhalinin vəhşicəsinə kütləvi qırğını insanlığa qarşı ən ağır cinayətlərdən biri olmaqla, XX əsrin Xatın, Liditse, Babi Yar kimi dəhşətli faciələri ilə bir sırada dayanır. Xocalı soyqırımı Azərbaycan Respublikasının Dağlıq Qarabağ bölgəsini zəbt etmək məqsədilə Ermənistanın apardığı işğalçılıq müharibəsinin gedişində dinc azərbaycanlı əhaliyə qarşı törədilmiş soyqırımı cinayətlərinin ən dəhşətlisidir.

Vaqif BÜNYADOĞLU

Xalq qəzeti.- 2013.- 27 fevral.- S. 6.