Xətai rayonu yeni uğurlara səfərbər olur

Bu gün müstəqil Azərbaycan təkcə regionun deyil, həm də dünyanın sabit inkişaf tempinə malik, möhkəm və qüdrətli dövlətinə çevrilməkdədir. Tarixə qovuşan hər il ölkəmizin həm iqtisadi, həm siyasi, həm də mədəni həyatına öz töhfələrini verməklə onun qüdrətini daha da artırır, xalqımızın sosial rifah halı durmadan yaxşılaşır, ölkə başdan-başa libasını dəyişir, müasirləşir və əsl mənada gözəlləşir.

Şübhə yoxdur ki, gələcək nəsillər tarixə qovuşan müstəqillik illəri sırasında 2012-ci ili də mühüm əhəmiyyət daşıyan bir çox uğurları ilə xatırlayacaqlar. Azərbaycanın dünya birliyinin tam hüquqlu dövlətlərindən biri kimi BMT Təhlükəsizlik Şurasının qeyri-daimi üzvü seçilməsi, Bakıda çox böyük siyasi əhəmiyyət daşıyan “Avroviziyon-2012” mahnı müsabiqəsinin uğurla keçirilməsi, idmançılarımızın “İdman ili” çərçivəsində London Yay Olimpiya oyunlarında yüksək nəticə göstərərək ikisi qızıl olmaqla 10 medal qazanmaları, dünyada ilk dəfə keçiriləcək Avropa Yay Olimpiya oyunlarının Bakıya salınması, tarixdə ilk dəfə ölkəyə ən böyük-22 milyard dollar investisiya yatırılması, strateji valyuta ehtiyatlarının 46 milyard dolları keçməsi, sahibkarlığın inkişafı üçün 218 milyon manat güzəştli kreditin verilməsi, xarici ticarət dövriyyəsinin 39,5 milyard dollara çatması, Dünya İqtisadi Forumunun hesabatında ölkəmizin dünyanın 50 ən rəqabətqabiliyyətli iqtisadiyyat qrupuna daxil edilməsi və son üç ildə olduğu kimi, yenə də MDB ölkələri arasında birinci olması, Azərbaycanın yüksək insan inkişafına malik dövlətlər sırasına, kosmik olkələr cərgəsinə qoşulması, qeyri-neft sektorunda artımın 9,7 faiz təşkil etməklə ümumi daxili məhsulda payının 52,7 faizə çatması, 100-dək sənaye müəssisəsinin istifadəyə verilməsi, yeni Regional İnkişaf Proqramına start verilməsi, enerji potensialının sürətlə artması və sair uğurlar məhz tarixə qovuşan 2012-ci ilin payına düşür.

Respublikamızın nəqliyyat, energetika, kənd təsərrüfatı infrastrukturunun yenidən və ən müasir tələblər səviyyəsində qurulması, Milli Ordunun möhkəmləndirilməsi, müdafiə sənayesinin yaradılması və sürətlə inkişafı, təhsildə, səhiyyədə köklü islahatların aparılması və bir çox digər işlər, şübhəsiz bir mərama, bir məqsədə - müstəqil Azərbaycanın dünyanın qabaqcıl dövlətinə çevrilməsinə xidmət edir.

Ölkə üzrə müsbət göstəricilərin əldə edilməsində Bakının ən böyük sənaye rayonlarından sayılan Xətai rayonunun da iqtisadi potensialı, sənaye və energetika infrastrukturu müəyyən pay sahibidir. Belə ki, 2012-ci ilin yekunlarının təhlili rayonda sənayenin dinamik inkişaf etdiyini göstərir. Bu müddətdə 1 milyard 87 milyon 590 min manatlıq məhsul istehsal olunmuş və xidmətlər göstərilmişdir ki, bu da 2011-ci illə müqayisədə 15,9 faiz çoxdur. Satılmış istehlak mallarının və göstərilmiş pullu xidmətlərin həcmi 0,5 faiz, pərakəndə əmtəə dövriyyəsi 0,4 faiz artmışdır. İl ərzində bütün mənbələr hesabına əsas kapitala əvvəlki ildəkindən 8,8 faiz çox, yəni 542 milyon 118,5 min manat investisiya qoyulmuşdur.

Ötən il rayonun tikinti təşkilatlarının vəsaitləri hesabına yerinə yetirilən podrat işlərinin həcmi əvvəlki ilə nisbətən 21 faiz, nəqliyyat xidməti 24,8 faiz, rabitə xidməti isə 2,9 faiz artmışdır. Etiraf etmək lazımdır ki, milyonlarla vəsaitin yönəldildiyi sahələrdə işlərin inkişaf tempi sürətlə getdiyindən rayonun ümumi mənzərəsi də günbəgün dəyişir, sakinlərin gündəlik məişət problemləri bu dəyişən şəraitə uyğun olaraq daha tez və operativ həll olunur.

Əhalinin sosial rifah halının durmadan yaxşılaşmasını göstərən reallıqlardan biri də onların pul gəlirlərinin ildən-ilə artmasıdır. Hesabat dövründə rayonun iqtisadi və sosial sahələrində muzdla işləyənlərin orta aylıq əmək haqqı ötən ildəkindən 7,7 faiz artaraq 545,4 manata çatmışdır. Sahələr üzrə göstəriciyə nəzər salsaq görərik ki, bu, sənayedə 17,8 faiz artaraq 510,8 manat, tikinti kompleksində 9,7 faiz artaraq 567,5 manat, rabitədə 10,7 faiz artaraq 1007,1 manat, nəqliyatda isə 21,5 faiz artaraq 784,1 manat olmuşdur.

Əlbəttə, bu işdə dövlət başçısının ölkədə işsizliyin aradan qaldırılması ilə bağlı qarşıya qoyduğu vəzifələrin uğurla yerinə yetirilməsi də öz müstəsna təsirini göstərməkdədir. Xüsusi qeyd edilməlidir ki, sahibkarlığın inkişaf etdirilməsi və göstərilən dövlət dəstəyi nəticəsində 2012-ci ildə rayonda daimi olmaqla 5436 yeni iş yeri açılmışdır. 2003-cü ildən ötən ilin sonuna qədər isə 28692 yeni iş yeri yaradılmışdır ki, bunun da 28486 -sı daimi iş yerləridir.

Ölkə rəhbərliyinin əhalinin rifah halının yaxşılaşdırılması və sosial müdafiəsinin gücləndirilməsi naminə ardıcıl surətdə həyata keçirdiyi dövlət proqramları və tədbirlər vətəndaşların gündəlik sosial həyat tərzini kökündən dəyişmiş, onların dövlətə olan inamını daha da möhkəmləndirmişdir. Ona görə də Xətai rayonunda pensiyaların, sosial müavinətlərin və ünvanlı sosial yardımların ödənilməsində gecikmə hallarının qarşısının alınması, məcburi dövlət sosial sığorta haqqı üzrə sığorta olunanlar barədə məlumatların emalı üçün tədbirlər görülmüş və bu vacib məsələlər diqqətdə saxlanılmışdır.

Son bir neçə ildə Xətai rayonunda sürətlə genişlənən tikinti-abadlıq işləri də diqqəti cəlb edir. Prezident İlham Əliyevin təşəbbüsü və tapşırıqları ilə hazırlanan və uğurla icra olunan layihələr Bakı şəhərinin, eləcə də Xətai rayonunun simasını kökündən dəyişmişdir. Son illər təkcə respublika əhalisi yox, xarici ölkələrdən gələn qonaqlar da Bakı şəhərinin və ətraf qəsəbələrin, eləcə də respublikamızın regionlarının sürətlə inkişaf edərək öz simalarını dəyişmələrini nəzərdən qaçırmır və bunu Bakı haqqında təəssüratlarında xüsusi qeyd edirlər.

Rayonun küçə və prospektlərinin, park və meydanlarının yenidən tikilməsi, əhalinin mədəni istirahətinin təşkili məqsədilə 2006-cı ildən başlayaraq həyata keçirilən geniş miqyaslı yenidənqurma və abadlaşdırma işləri hesabat dövründə də davam etdirilmişdir. 2011-ci il dekabrın 24-də Prezident İlham Əliyev və Heydər Əliyev Fondunun prezidenti Mehriban xanım Əliyevanın iştirakı ilə təməl daşı qoyulan “Bakı Ağ şəhər” layihəsinin inşası da hesabat dövründə sürətlə aparılmış, bu ərazinin yaxınlığındakı Boks Federasiyasının, Xocalı prospektində və İzzət Orucov küçəsində iş mərkəzlərinin, Nəcəfqulu Rəfiyev küçəsində Belarus səfirliyinin binasının tikintisi davam etdirilmiş, Nobel prospektində “Yeni həyat ” yaşayış kompleksində işlər başa çatdırılmışdır. Dövlət başçısının xüsusi önəm verdiyi “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” ilə yanaşı, son illərdə reallaşdırılan digər proqram və layihələr də rayonun sosial-iqtisadi inkişafının daha da sürətlənməsi və 2012-ci ildə bir sıra sahələrdə yüksək göstəricilərin əldə olunması ilə nəticələnmişdir. Ötən müddətdə Dövlət Proqramı və ona edilmiş əlavəyə uyğun olaraq Xətai rayonunda həyata keçirilməsi nəzərdə tutulan 88 tədbirdən 30-nun icrası təmin olunmuş, 18 tədbir üzrə işlər davam etdirilmiş və 40 tədbir isə cari ildə həyata keçiriləcək.

Dövlət Proqramı çərçivəsində əsaslı təmir olunmuş 251 saylı körpələr evi-uşaq bağçasının açılış mərasimində Prezident İlham Əliyev şəxsən özü iştirak iştirak etmişdir. Hazırda 6 uşaq bağçasında təmir işləri davam etdirilir.

Dövlət Proqramına uyğun olaraq 4 səhiyyə müəssisəsində əsaslı təmir işləri başa çatdırılmış, rayon icra hakimiyyəti tərəfindən Əhmədli qəsəbəsindəki 14 saylı poliklinikanın binası sökülərək qısa vaxtda yerində müasir tələblərə cavab verən xəstəxana-poliklinika tikilib istifadəyə verilmişdir. Azərbaycan Prezidenti İlham Əliyev Əhmədli qəsəbəsindəki bu səhiyyə müəssisəsinin, həmçinin əsaslı təmirdən sonra Respublika Neyrocərrahiyyə xəstəxanasının açılışlarında iştirak etmiş və görülən işləri yüksək qiymətləndirmişdir.

Ötən il rayonun Heydər Əliyev prospekti ilə Babək prospektini birləşdirən yol qovşağı genişləndirilmiş, yaxınlıqdakı Ələddin Quliyev küçəsində yenidənqurma və abadlıq işləri aparılaraq burada yeni park salınmış, yeni il ərəfəsində Prezident İlham Əliyev bura baxış keçirmişdir.

Abadlaşdırma layihələri çərçivəsində Nobel prospekti, Fəzail Bayramov və A.Cəlilov küçələri boyunca yaşayış binalarının fasadlarının üzlənməsinə başlanmış, üç binada işlər başa çatmış, digər ünvanlarda isə davam etdirilir. Həmçinin Y.Səfərov küçəsində binanın yanındakı boş sahədə ərazinin memarlığına cavab verən şəbəkəli arkanın tikintisi başa çatdırılaraq yeni işıqlandırma sistemi quraşdırılmış, Nobel prospektində isə yaşayış binalarının arasındakı boş ərazidə başlamış yeni arka tikintisində isə son tamamlanma işləri aparılır.

Bununla yanaşı, Nobel prospektində F.Bayramov, A.Cəlilov və Y.Səfərov küçələrində 8 yaşayış binasının yararsız vəziyyətdə olan dam örtüklərinin yeni, mansard tipli dam örtükləri ilə əvəz olunmasına başlanmışdır. Səfərbərlik və Hərbi Xidmətə Çağırış Xidmətinin rayon idarəsinin inzibati binasında, Qafqaz küçəsi, 45 ünvanda yanğın nəticəsində yararsız vəziyyətə düşmüş iki mərtəbəli yaşayış evində təmir işləri aparılmış, binaların fasadları təmir olunmuş, dam örtükləri yenidən qurulmuşdur.

Rayonun Şıxlinski küçəsi ilə Gəncə prospekti arasındakı yamacın sürüşməyə meyilliliyinin müşahidə edilməsi bu ərazidən keçən mərkəzi istilik xəttinin fəaliyyətinin dayandırılmasına səbəb olmuşdur. Buna baxmayaraq, bu ərazidəki 9 istilik məntəqəsinin qazanxanaya çevrilməsi ilə əlaqədar görülən işlər istilik təminatı dayandırılmış uşaq bağçalarının, səhiyyə müəssisəsinin və 91 yaşayış binasının istilik sisteminin bərpa olunmasına imkan vermişdir.

Bakı şəhərində mövcud olan liftlərin 40 faizə qədəri Xətai rayonundadır. Artıq ötən ildən başlayaraq rayonda istismar müddəti başa çatmış liftlərin yeniləri ilə əvəz olunması istiqamətində işlərə start verilib.

Rayonun sanitar təmizliyi və yaşıllaşdırılması ilə bağlı görülən işlər də qənaətbəxş olmuşdur. Belə ki, mərkəzi küçə və prospektlərdən küçə ticarətinin ləğv edilməsi, rayon ərazisində keçirilən kənd təsərrüfatı məhsullarının satış yarmarkalarının təşkili daim nəzarətdə saxlanılmış, burada sanitar təmizliyə, qiymət intizamına nəzarət gücləndirilmişdir. 2012-ci ildə Nobel prospekti, Zığ yolu, Ramiz Quliyev, Yusif Səfərov küçəsi, Xocalı və Babək prospekti boyunca salınan yaşıllıqlar, həmin küçə və prospektlərdəki piyada yollarının böyük bir hissəsinə döşənmiş müasir plitələr, binaların kommunikasiya xətlərinin əsaslı və ya cari təmir olunması da həm sakinləri razı salmış, həm də rayonu da gözəlləşdirmişdir.

2012-ci ildə rayonun mədəni həyatında görülən işlər də qənaətbəxş olmuşdur. Belə ki, hesabat dövründə rayondakı 3 saylı uşaq evinin Buzovna qəsəbəsində 120 yerlik yay istirahət düşərgəsi Heydər Əliyev Fondu tərəfindən müasir tələblər səviyyəsində tikilib istifadəyə verilmişdir. Yeni ilqabağı bu uşaq evinin sakinləri ilə görüşən Heydər Əliyev Fondunun vitse-prezidenti Leyla xanım Əliyeva uşaq evinin əsas binasının da fond tərəfindən əsaslı təmir olunacağını bildirmişdi.

Hazırda fond tərəfindən Neapol küçəsi, 11 ünvanında akademik Zərifə xanım Əliyeva adına uşaq bağçası inşa olunur.

Ötən il rayondakı Neft Kimya Prossesləri İnstitutu da əsaslı təmir olunmuş, 2012-2013-cü dərs ilində həmin binanın bir hissəsində yeni yaradılmış Ali Neft Məktəbi fəaliyyətə başlamışdır.

Azərbaycan Respublikasının Prezidenti cənab İlham Əliyevin təhsilin inkişafı ilə əlaqədar təsdiqlədiyi proqramlar çərçivəsində həyata keçirilən islahatlar, ölkənin birinci xanımı, millət vəkili İSESKO və YUNESKO-nun xoşməramlı səfiri Mehriban xanım Əliyevanın təhsil, səhiyyə və mədəniyyət obyektlərinin yeniləşməsi sahəsində gördüyü işlər və milli-mənəvi dəyərlərimizin qorunub saxlanılmasına dövlətimizin qayğısı yerli strukturların rəhbərlərindən də bu sahələrin inkişafına daha diqqətlə yanaşmağı və qayğı göstərməyi tələb edir.

Buna yüksək səviyyədə əməl edən Xətai rayon icra strukturları təhsilin keyfiyyətinin yüksəldilməsi istiqamətində bir sıra ardıcıl tədbirlər həyata keçirmiş və nəticədə, rayon son illərdə olduğu kimi, 2012-ci ildə də ali məktəblərə qəbul üzrə yüksək nəticələr göstərərək birincilər sırasında olmuşdur. Belə ki, 2011-2012-ci tədris ilində rayonun orta təhsil məktəblərinin məzunlarının 60,9 faizi ali məktəblərə qəbul olunmuş, onlardan 297 nəfəri 500-700 arası bal toplamışlar. Rayonda ali məktəblərə qəbul Bakı şəhəri üzrə göstəricidən 9,7 faiz çox olmuşdur. Bu dövrdə rayonun 5 məzunu orta məktəbi qızıl medalla bitirmiş, Prezident təqaüdünə layiq görülən 102 nəfər tələbədən isə 9 nəfəri Xətai rayonunun yetirmələri olmuşdur.

Hesabat ilində rəsmi dövlət bayramlarının, ictimai-siyasi diqqət kəsb edən digər tarixi hadisələrin qeyd olunmasına xüsusi əhəmiyyət yetirilmişdir. 20 Yanvar faciəsinin, Xocalı soyqırımının ildönümü ilə əlaqədar xüsusi sərəncamlarla tədbirlər keçirilmiş, hər iki hadisənin qurbanları, şəhid olanların ailələri ilə rayon icra hakimiyyətində görüşlər təşkil olunmuş, onlara müxtəlif maddi yardımlar göstərilmişdir.

2012-ci ildə ölkə Prezidentinin sərəncamı ilə Yerli İcra Hakimiyyətləri haqqında yeni Əsasnamə təsdiq edilmişdir. Həmin əsasnamə ilə yerli orqanların səlahiyyət və vəzifələri artırılmışdır. Bu sərəncama əsasən Xətai Rayon İcra Hakimiyyəti başçısının yanında fəaliyyət göstərən Şuranın 10 sentyabr 2012-ci il tarixli qərarı ilə rayonun inzibati ərazi dairəsi ilə əhatə olunmayan yerlərində 4 sahə inzibati ərazi dairəsi üzrə nümayəndəlik yaradılmışdır. Hazırda həmin nümayəndəliklər fəaliyyətə başlamış, ərazilərindəki mənzil təsərrüfatlarının qeydiyyatı kitablarının işlənilməsinə başlamışlar. Rayonda mövcud olan sosial problemlərin aradan qaldırılmasında və intensiv quruculuq işlərinin aparılmasında bu nümayəndəliklərin fəaliyyətinə böyük ümidlər bəslənilir.

Son illər beynəlxalq ictimaiyyətin diqqətini çəkmək üçün ənənəvi qardaşlaşmış şəhərlər və rayonlar layihələri də yeni vüsət almağa başlamışdır. Ötən ilin iyul ayında rayon icra akimiyyətinin 10 nəfərlik nümayəndə heyəti Belarus Respublikasının paytaxtında rəsmi səfərdə olmuş, Minsk şəhərinin Leninsk rayonu ilə Xətai rayonu arasında qardaşlıq müqaviləsi imzalanmışdır. Belə bir müqavilə Türkiyənin Tarsus şəhəri ilə də imzalanmış və keçən il həmin şəhərin rəhbərliyi səviyyəsində nümayəndə heyəti Xətai Rayon İcra Hakimiyyətində olmuşdur. Hazırda hər iki şəhərlə qardaşlıq münasibətlərinin daha da genişləndirilməsi məqsədilə hazırlanan xüsusi proqramlar əsasında işlər davam etdirilir. Bu münasibətlə rayonun Rahib Məmmədov küçəsində sakinlər tərəfindən zəbt edilmiş yaşıllıq sahələri təmizlənmiş, bu ərazidə yeni qardaşlaşmış şəhərlər parkının tikilməsinə başlanılmışdır. 15 min kvadratmetr sahəni əhatə edən bu ərazidə tikilən park şəhərimizin ən müasir parklarından biri olacaqdır.

Hesabat dövründə rayon ərazisində yaşayan qaçqın və məcburi köçkünlərin həyat şəraitinin yaxşılaşdırılmasına diqqət artırılmış, rayon icra hakimiyyətinin nəzdində fəaliyyət göstərən digər komissiyaların işi xeyli yaxşılaşdırılmış, hüquq-mühafizə orqanlarının məqsədyönlü fəaliyyəti sayəsində rayonda ictimai asayişin qorunması, qanunçuluğun möhkəmləndirilməsi təmin olunmuş və cinayətkarlığa qarşı mübarizə gücləndirilmişdir.

Ölkə rəhbərinin tapşırıq və göstərişlərinə əsasən əhalinin şikayətlərinə baxılması və zəruri tədbirlər görülməsi istiqamətində də mühüm tədbirlər həyata keçirilmişdir. Vətəndaşların yazılı və şifahi şəkildə təkliflər vermək, ərizə ilə müraciət etmək hüquqlarının həyata keçirilməsi üçün zəruri şərait yaradılmış, qanunvericiliklə müəyyən edilmiş qaydada və müddətlərdə onlara cavab verilməsi təmin olunmuş, vətəndaşların mütəmadi qəbulu təşkil edilmiş, səyyar görüş-qəbullara daha çox üstünlük verilmişdir. Rayonda sağlam mühit yaradılması,vətəndaşların müraciətləri zamanı süründürməçilik və digər xoşagəlməz hallara yol verilməməsi, dövlət qulluqçusunun etik davranış qaydalarına ciddi riayət etmələri üçün tədbirlər görülmüş, korrupsiya ilə mübarizə sahəsində səmərəli mübarizə tədbirləri həyata keçirilmiş, bütün rəhbər işçilərə kollektivlərində hər hansı neqativ halın baş verməməsi üçün əlavə tədbirlər görmələri tapşırılmışdır.

Bu il fevralın 12-də Azərbaycan Prezidenti cənab İlham Əliyevin sədrliyi ilə keçən “2009-2013-cü illərdə regionların sosial-iqtisadi inkişafı Dövlət Proqramı” nın icrasının dördüncü ilinin yekunlarına həsr olunmuş konfransda qısa müddətdə ölkəmizin qazandığı nailiyyətlər, Dövlət Proqramının icrası ilə əlaqədar ötən dörd ildə əldə olunan uğurlarla yanaşı, dövlət başçısı tərəfindən haqlı olaraq bir sıra tənqidi fikirlər də səsləndi və tapşırıqlar verildi. Prezidentin tənqidi fikirləri və tövsiyələri icra strukturlarının üzərinə mühüm vəzifələr qoyur. Bütün dövlət orqanları, vəzifəli şəxslər, sahibkarlarla münasibətlərin sağlam zəmində qurulmasına səy göstərməli, fəaliyyətlərində hər zaman insan amilini ön plana çəkməli, vətəndaşlarla normal ünsiyyət yaratmalı və nümunəvi davranış nümayiş etdirməlidirlər.

Xətai rayonunda neqativ hallara qarşı mübarizədə ictimaiyyətin böyük rolu nəzərə alınaraq yerlərdə vətəndaşlarla keçirilmiş görüş və qəbullarda sakinlərə bildirilmişdir ki, bürokratik əngəllər, süni maneələr, ədalətsizliklər və digər problemlərlə rastlaşdıqda dərhal rayon icra hakimiyyətinə müraciət etsinlər.

Vətəndaşların qarşılıqlı əlaqələrin təkmilləşdirilməsində elektron müraciətlərin əhəmiyyətini nəzərə alaraq Xətai Rayon İcra Hakimiyyətinin internet saytı hesabat dövründə fəaliyyətini yeni tələblərə uyğun qurmağa çalışmışdır. Bu gün istənilən vətəndaş birbaşa elektron vasitələrlə rayon rəhbərliyinə müraciət edərək öz problemindən söz aça və onu narahat edən məsələləri bizə çatdıra bilir.

Ötən il Xətai rayonunun sosial-iqtisadi inkişafı sahəsində qazanılmış uğurlar, həqiqətən, alqışa layiqdir. Ölkə Prezidenti cənab İlham Əliyevin Azərbaycanı yüksək rifah ölkəsinə çevirmək naminə bəyan etdiyi və son 9 ildə uğurla həyata keçirdiyi inkişaf və tərəqqi strategiyasının gerçək hədəflərini dəf etmək üçün qarşıda daha böyük vəzifələr durur. Azərbaycan Respublikasının Prezidenti cənab İlham Əliyev Nazirlər Kabinetinin son müşavirəsində məhz qarşımızda duran bu əsas vəzifələri göstərərək demişdir: “Bizim düşünülmüş siyasətimiz, eyni zamanda, planlı addımlarımız məhz ona hesablanıb ki, bütün infrastruktur layihələr bu ilin, yəni 2013-cü ilin sonuna qədər başa çatsın”.

Bunlar heç də adi layihələr və sadə vəzifələr deyil. Ərzaq təhlükəsizliyinin təmin olunması, özəl sektorun inkişafı, şəhər, qəsəbə və kəndlərin tam qazlaşdırılması, elektrik enerjisi təminatı, içməli su və kanalizasiya sistemlərinin tam qurulub istifadəyə verilməsi, şəhərlərarası magistralların, kəndarası yolların müasir standartlara uyğun tikilməsi, sosial infrastrukturun-uşaq bağçalarının, məktəblərin, xəstəxanaların, idman komplekslərinin inşası və sair məsələlər gördüklərimiz işin davamı olmaqla bərabər, həm də qarşımızda duran prioritet vəzifələrdir. Məhz buna görə də rayonun bütün idarə və müəssisələri bu vəzifələrin həyata keçirilməsi üçün səfərbər olunmuşdur.

Bütövlükdə isə ötən il rayonun tərəqqisi naminə həyata keçirilmiş tədbirlər barədə Xətai Rayon İcra Hakimiyyətində keçirilmiş hesabat yığıncağında ətraflı məlumat verildi. Xətai Rayon İcra Hakimiyyətinin başçısı Razim Məmmədov 2012-cı ilin sosial-iqtisadi inkişafının yekunları və 2013-cü ildə qarşıda duran vəzifələrlə bağlı geniş hesabat məruzəsi ilə çıxış etdi.

Hesabat yığıncağında çıxış edən Milli Məclisin deputatları Hüseynbala Mirələmov və Səməd Seyidov, Azərbaycan Prezidenti Administrasiyasının məsul işçisi Tağı Tağıyev, eləcə də rayonun bir neçə idarə və müəssisə rəhbəri icra hakimiyyəti başçısının 2012-ci il üçün hesabatını qənaətbəxş hesab edərək qarşıda duran vəzifələrin həllində ona uğurlar arzuladılar.

Sonda Azərbaycan Respublikasının Prezidenti cənab İlham Əliyevə yığıncaq iştirakçılarının ünvanladığı müraciətin mətni oxundu.

İlqar RÜSTƏMOV

Xalq qəzeti.- 2013.- 1 mart.- S. 8.