Qələbə tənliyinin uğurlu həlli

Sumqayıtın ünlü inşaat şirkətinin xoş sorağı Avropa ölkələrindən gəlir. Azərbaycanda sahibkarlıq mühitinin daha da yaxşılaşması sayəsində uğur hədəflərinə qovuşan, nailiyyətlərini artıran özəl şirkətlər və iş adamları az deyil. Bu baxımdan Sumqayıtdakı “Az.Termoizol” Açıq Səhmdar Cəmiyyətinin fəaliyyət dairəsi və onun sədri Şakir Həsənovun dünyanın 10-dan çox şirkəti ilə işbirliyi quraraq möhtəşəm layihələrin icrasında etibarlı tərəfdaşa çevrilməsi haqlı qürur doğurur.

Şakir Həsənov Masallıda anadan olub. Musiqiyə, incəsənətə böyük marağı sayəsində rayonda tanınıb. 17 yaşında ikən klubda bədii rəhbər olub, orada miniatür teatrı yaradıb. 18 yaşında isə ona Masallı mədəniyyət evinin direktoru vəzifəsini etibar ediblər. Qısa vaxt ərzində bir neçə bədii kollektiv yaradıb. Ancaq 21 yaşında o, incəsənət sahəsi ilə vidalaşıb. Tarını da götürərək rayonu tərk edib. Sumqayıtda inşaat sahəsinə meyl salıb, fəhləlikdən başlayıb. Sonra Azərbaycan Politexnik İnstitutunun İnşaat mühəndisliyi fakültəsini, habelə Nijni Novqorod şəhərində Ali Rəhbər Kadrların Hazırlanması İnstitutunu bitirib. Az bir zamanda Sumqayıtın sayılıb-seçilən ziyalılarından biri olan Şakir Həsənov özünün idarəetmə qabiliyyəti, mühəndis intellekti ilə böyük hörmət-izzət qazanıb.

İndi artıq Avropada tanınan sumqayıtlı mühəndis 26 il öncə yeni yaradılan termo-izolyasiya müəssisəsinə rəhbərliyə başlayanda mövcud imkanlar dairəsi bəlkə də hər hansı uğur barədə düşünməyə belə əl yeri qoymurdu. Amma Şakir Həsənovun həyat amalı daim seçilmək, önə çıxmaq idi. Odur ki, atdığı məqsədyönlü addımlar onu və kollektivi qısa müddətdə böyük uğurlara çatdıra bildi. Peşəkarların cəmləşdiyi kollektiv ən çətin işlərdə, sənaye və mülki obyektlərin tikintisində, quraşdırma və təchizat sahəsində sözünü qətiyyətlə deməyi bacardı. Yeni, daha səmərəli metodların tətbiqi, zəruri texnikanın əldə edilməsi, onların işgüzar nüfuzunu sürətlə artırdı, sifarişçiləri isə ard-arda razı saldı. Artıq bu qurumu, necə deyərlər, görməzdən gəlmək mümkün deyil. Layihəsi üçün tender elan edən, sərfəli qiymətlərlə, vaxtında və keyfiyyətli iş gördürmək istəyən hər bir sifarişçi təşkilat seçim zamanı üstünlüyü məhz “Az.Termoizol”a verir.

Ötən əsrin doxsanıncı illərinin ortalarından bu müəssisə fəaliyyət coğrafiyasını genişləndirərək daha müsbət imicinə qovuşa bilmişdir. Nəhayət, 1998-ci ildə müəssisənin bazasında “Az.Termoizol” ASC yaradılmışdır. Müasir düşüncə tərzi ilə seçilən Şakir Həsənovun bacarıqla rəhbərlik etdiyi şirkət Qərbin qabaqcıl təcrübəsindən bəhrələnərək Azərbaycan xalqı və dövləti üçün çox önəmli layihələri uğurla reallaşdırmışdır. Məsələn, ötən illərdə Bakı-Tbilisi-Ceyhan ixrac boru kəmərinin Azərbaycan və Türkiyədən keçən nasos stansiyalarında izolyasiya və quraşdırma işləri sumqayıtlı peşəkarlar tərəfindən yüksək keyfiyyətlə, yerinə yetirilmişdir. Bundan başqa, “Az.Termoizol” ASC Səngəçal terminalının, Bakı Neft Emalı Zavodunun, “Etilen-polietilien” kimya müəssisəsinin, ölkəmizin nəhəng qida sənayesi istehsal sahələri olan İmişli Şəkər və “Qafqaz” Konserv, Gəncə Gil-Torpaq və Alüminium zavodlarının, digər müəssisələrin inşasını, həmçinin Göygöl rayonunda kanalizasiya xətlərinin çəkilişini, Qaradağ Sement Zavodunda təmizləyici qurğunun tikintisini, metal-konstruksiya, istilik-soba sistemlərinin quraşdırılmasını xarici şirkətlərlə birlikdə beynəlxalq standartlara tam uyğun tərzdə həyata keçirmişdir...

Şirkətin quraşdırıcıları ondan xüsusi məmnunluq duyur ki, Prezident İlham Əliyev Azərbaycanda bilavasitə onların da çalışdığı bir çox yeni zavodların, qurğuların, digər mühüm obyektlərin açılışında şəxsən iştirak etmiş və görülən işləri yüksək qiymətləndirmişdir.

...Görüşümüz zamanı mən Şakir Həsənovun verdiyi məlumatları dinləyə-dinləyə dəftərimə müəyyən qeydlər edirdim. Məsələn: “Əsas şüar - qiymətləndirmədə gözütoxluq, işdə sürət və keyfiyyət”. -Onların çox nüfuzlu təşkilatlarla tender rəqabətində qalib gəlmələrinin başlıca səbəbi də elə bu amillə bağlıdır. Yaxud: “İşçinin, mütəxəssisin qədrini bilmək, onun zəhmətini lazımınca dəyərləndirmək”. -Yüksək peşəkar insanlar belədə daha ürəklə çalışır və fədakarlıqlarını əsirgəmirlər.

“Az.Termoizol” ASC müasir standartlara cavab verən texnikaya, nəqliyyat vasitələrinə və avadanlığa malikdir. Özüyeriyən kranlar, kompressor qurğuları, borudüzən traktorlar, yarımavtomat qaynaq aparatları texniki bazanın zənginliyinə dəlalət edir. Burada mükəmməl təhlükəsizlik proqramı tətbiq olunur. Eyni zamanda insani dəyərlərə hörmət əminliyi var. Başlıca missiya günün tələblərinə uyğunlaşmaq və etibar qazanmaqdır.

...Gəncə şəhərinin Qərb küçəsindəki 12 saylı, son dərəcə qəzalı vəziyyətdə olan beşmərtəbəli binanın gücləndirmə işlərini öhdəsinə götürən “Az.Termoizol” ASC-nin təmsilçilərinə ağız büzənlər çox idi. Hətta bəzi icraçılar binanı söküb yerə qoymaqdan başqa çarə olmadığı qənaətini açıqladılar. Amma, Sumqayıt quraşdırıcıları , nə qədər riskli olsa da, həmin binanı yüksək təminatla ikinci həyatına qovuşdurmağa ürək elədilər. İç və bayır hissələrini dayaqlarla, armatur “tor”larla elə hördülər, bünövrəni elə betonlayıb gücləndirdilər ki, möhkəmliyinə heç bir şübhə qalmadı. Hazırda “yeni bahar”ını yaşayan həmin bina qədim Gəncənin, bəlkə də, ən etibarlı binasıdır. Beləcə, sumqayıtlılar bir daha məhz öz qüvvələrinə sarsılmaz inamları hesabına hər kəsi heyrətləndirib təqdir qazana bildilər.

Son illərdə “Az.Termoizol” ASC müvəffəqiyyətlə beynəlxalq arenaya çıxa bilmişdir. Kiçik zaman kəsiyində Əfqanıstan Neft, Qırğızıstan Neftayırma zavodlarında, bununla bərabər Almaniya, Rusiya, Qazaxıstan və Çexiyada mühüm əhəmiyyətli işlər görülüb. Texniki baxımdan çox mürəkkəb sayılan metal-konstruksiya və sobalar quraşdırılıb, odadavamlı izolyasiya tədbirləri həyata keçirilib. Hazırda “AZMEQO METANOL” və Azərbaycan Beynəlxalq Dağ-Mədən şirkətləri üçün də eyni yüklü sifarişlər yerinə yetirilir. Bu tədbirləri “Az.Termoizol” ASC “Çiyoda”, “AMOK” (Yaponiya), “Astan Rauver LTD” (İngiltərə), “Laki Qoi Star Encinierinq” (Cənubi Koreya), “ABB Rover” (İsveçrə) və “Petrofakt Korporeyşn” (ABŞ) kimi dünya şöhrətli nəhəng şirkətlərlə müştərək icra edir. Başqa sözlə, üzağardan konkret işləri ilə Azərbaycanın iqtisadi qüdrətini göstərir, bəzi partnyor şirkətlərin bir şəhər kimi adını belə ilk dəfə eşitdikləri Sumqayıtın şöhrətini əzmlə dünyaya yayır. Müqayisədə xeyli kiçik görünən şirkətin böyük hünərləri əcnəbiləri yaxşı mənada təəccübləndirir.

Hələ sovet dönəmində Şakir Həsənov “SSRİ-nin əlaçı mühəndisi”, qabaqcıl quraşdırıcı, qabaqcıl səmərələşdirici kimi adlara layiq görülüb. 2009-cu ildə isə Azərbaycan Prezidenti İlham Əliyevin sərəncamı ilə “Tərəqqi” medalı ilə təltif edilib. Bu gün “Termoizol”da tikinti-quraşdırma işlərini bütün incəliklərinə qədər bilən təcrübəli fəhlə və mühəndis-texniki heyət çalışır. Tələbat yarandıqda şirkət müvəqqəti olaraq minə yaxın işçi də cəlb edə bilir.

Şakir Həsənovun dedikləri:

-Həyata keçirdiyimiz layihələr sürət və keyfiyyət baxımından daim sifarişçiləri razı saldığı üçün həm ölkəmizdə, həm də xaricdə partnyorlarımızın sayı durmadan artır. İndi dünyanın ən qabaqcıl tikinti biznes klubları “Az.Termoizol” ASC-ni öz sıralarına eyni hüquqlu bir şirkət kimi qəbul edir. Üç il öncə ilk dəfə Brüsseldə beynəlxalq mükafat almışıq. Orada bizə Avropa Biznes və Sənaye Cəmiyyətinin sertifikatı təqdim olunub. Bundan başqa, mərkəzi qərargahı İspaniyanın paytaxtı Madriddə yerləşən “Ofis Nəşriyyatı və Ticarət Liderləri Klubu” hər il sahibkarlığı inkişaf etdirən, keyfiyyətli işi və firma markası ilə tanınan qurumlar arasında sorğular keçirir. 2011-ci ildə klubun 7 min üzvü tərəfindən dünyanın 95 ölkəsində aparılan sorğunun nəticələrinə görə bizim şirkət “İmic və Keyfiyyətdə Liderlik Uğrunda” beynəlxalq prizlə və “Sahibkarlığın inkişafına görə” Qızıl medalı ilə mükafatlandırılmışdır.

Ötən ilin yayında Fransanın paytaxtı Paris şəhərində daha bir mötəbər tədbirə dəvət olunan Şakir Həsənov orada “Qızıl Avropa Mükafatı - Keyfiyyət və Ticarət Nüfuzu üzrə” sammitdə içtirak etmiş və “OMAC Other Ways” İdarəetmə Birliyi tərəfindən iki mükafata layiq görülmüşdür. Bunlar “Mükəmməllik, İdeal Keyfiyyət Performansı” - Kloval Mükafatı və şirkət rəhbərinə verilən “Qızıl Avropa” medalıdır. Fransada dünyanın 160-dan çox ölkəsindən gəlmiş iş adamları ilə, MDB-yə üzv dövlətlərin təmsilçiləri ilə yaxından tanışlıq gələcək işbirlikləri üçün müqavilələrin imzalanması ilə sonuclanmış və gözəl nəticələr vermişdir.

Bu ilin aprel ayı da “Az.Termoizol”ASC üçün, onun Avropada tanınan idarə heyəti sədri üçün yaddaqalan olmuşdur. Belə ki, şirkət yenidən mötəbər bir mükafata - Beynəlxalq Sokrat Komitəsinin “Tikinti-quraşdırma sahəsindəki nailiyyətlərə görə ən uğurlu müəssisə” ödülünə layiq görülmüşdür. Bununla yanaşı, Şakir Həsənova “İlin meneceri” qızıl medalı da verilmişdir. Avropa Biznes Cəmiyyəti tərəfindən həyata keçirilən mükafatlandırma mərasimi Londonun möhtəşəm Pall Mall sarayında keçirilmişdir. Bu, artıq üçüncü xarici ölkədir ki, “Az.Termoizol” orada dünya miqyaslı qızıl mükafata layiq görülür. Ulu öndər Heydər Əliyevin 90 illiyi ərəfəsində qazanılan bu növbəti uğuru şirkətin təmsilçiləri özlərinin yubileyə ən gözəl töhfəsi sayırlar.

Yeri gəlmişkən, bir qayda olaraq, mükafatların verildiyi bütün mərasimlərdə Sumqayıt təmsilçisinin şərəfinə Azərbaycanın üçrəngli bayrağı qaldırılır, dövlət himni səsləndirilir. Şakir Həsənova çıxış üçün söz verilir və o, ölkəmizin Avropaya sürətli inteqrasiyası, sosial-iqtisadi inkişafı barədə məlumatları iştirakçıların diqqətinə çatdırır. Mötəbər beynəlxalq qurumların, onlarca ölkə təmsilçilərinin qarşısında bəyan edir ki, xalqımızın dəyərli övladlarının müvafiq sahə üzrə iti mühəndis zehni var. Bu potensial daha böyük uğurlar qazana biləcəyimizə təminat verir.

Elə Londonda təşkil olunan liderlər sammitinin nominantı kimi çıxışı zamanı Şakir Həsənov müstəqil Azərbaycan Respublikası rəhbərliyinin sosialyönümlü iqtisadi siyasətinin aspektlərindən, Sumqayıtın bir sənaye mərkəzi kimi dinamik inkişafından, özünün rəhbərlik etdiyi şirkətin iş imkanlarından bəhs etmiş və bu zaman salonun geniş monitoru vasitəsilə göstərilən uyğun videokadrlar maraqla izlənmişdir. Fərəhlidir ki, bu barədə geniş materiallar Londonda nəşr olunan “Liderlərin sammiti” jurnalında əksini tapmış, şirkətin rəhbəri Şakir Həsənovun nailiyyətlərindən ətraflı söhbət açılmışdır.

Şirkətdə həmsöhbət olduğum hər kəs ASC-nin Londonda Beynəlxalq Sokrat qızıl mükafatına layiq görülməsinin məsuliyyətindən, etimadı daha fədakar zəhmətlə doğrultmaq səyindən danışdı. Müsahiblərim birmənalı tərzdə dedilər ki, ən böyük hədəfləri doğma Azərbaycanımızın iqtisadi qüdrətinin daha da artmasına nəzərəçarpacaq töhfələr verməkdən ibarətdir. Bu baxımdan gələn ay icrası planlaşdırılan Gəncə Det-Alüminium zavodunun II mərhələsinin tikintisi üzrə tenderdə “Az.Termoizol”un qalib gəlməsi fərəh doğurur. Həmin layihədə iştirak şirkət üçün çox mühüm önəm daşıyacaq.

Şirkətin işləri ilə tanışlıq zamanı oraya daha iki xoş xəbərin gəldiyinin şahidi oldum. Ş.Həsənov yenicə ona təqdim edilən dəvətnamələri mənə göstərdi. Birincisi Hollandiyanın paytaxtı Amsterdamdan idi. Avqustun 4-10-da orada “Müasir texnologiya idarəçiliyi, biznesin qurulması və innovasiya” mövzusunda konfransla əlaqədar idi. İkinci dəvətnamə lider müəssisənin rəhbərinə Parisdən göndərilmişdi. “Other Ways” Beynəlxalq Assosiasiyası onu 10-17 noyabrda İsveçrənin paytaxtı Cenevrədə təşkil olunacaq, 40 ölkədən təmsilçilərin qatılacağı “Beş qitənin keyfiyyət və əlaçılıq üzrə” nominasiya mükafatlandırması mərasiminə dəvət edirdi. Ola bilər ki, yenə də “Az.Termoizol”un adı qaliblər sırasında çəkilsin. Zaman göstərəcək.

Mənsə “Az.Termoizol” ASC-nin uğur hekayələri barəsində yazımı Şakir Həsənovun dediyi bu sözlərlə yekunlaşdırmaq istəyirəm: “ Arzularımdan biri budur ki, partnyorluq əlaqələrimdən, şirkətimizin xaricdə qazandığı nüfuzdan istifadə edərək iri istehsal layihələrindən birinin cənub bölgəsinə, Masallı rayonuna salınmasına nail olam. Bununla da əyalət bölgəsində əhalinin məşğulluğunun daha əsaslı şəkildə təmin edilməsinə yardımçı olmaqdan hədsiz məmnunluq duyaram”.

...Riyaziyyatçılar çətin bir tənliyi həll edəndə sevincdən uçmağa qanad axtarırlar. Mənə elə gəlir ki, lider şirkətin təmsilçiləri indi məhz bu ovqatdadırlar. Onlar çalışdıqları sahədə qələbə tənliyinin uğurlu həllini tapıblar. Uçmağa qanadları da var: biri öz qüvvələrinə inamdır, digəri də zəhmətlərinin layiqincə qiymətləndirilməsi.

Əli NƏCƏFXANLI

Xalq qəzeti.- 2013.- 10 iyul.- S. 15.