Binəqədi dinamik inkişaf yolunda

Ötən ilin təxminən elə bu vaxtları idi. Binəqədi Rayon İcra Hakimiyyətinin başçısı Xaləddin İsgəndərovun Milli Mətbuat və Jurnalistika Günü ərəfəsində bir qrup qəzet redaktoru və jurnalistlə görüşündə vurğuladığı bir fikri indi də yaxşı xatırlayıram. X. İsgəndərov söylədi Prezident İlham Əliyev onu bu vəzifəyə təyin edərkən “insanlarla sıx ünsiyyətdə işləmək, əhalinin qeydinə qalmaq, bir də sosial-iqtisadi problemlərin həllinə tezliklə nail olmaq ən başlıca vəzifən olmalıdır” bildirmişdir.

Söz və əməl

Rayon icra hakimiyyətinin başçısı sözügedən görüşdə onu da dedi ki, rayona başçı təyin edildiyim ilk gündən əsas narahatlığım bir sualla bağlı idi-daha çox hansı sahəyə diqqət yetirməli, hansı problemin həllini önə çəkmək lazımdır? Qərara gəldim ki, fəaliyyətimə əvvəlcə kənd, qəsəbə və mikrorayonlarda sakinlərlə görüşlər keçirməklə başlayım. Şübhəsiz ki, belə tədbirlərin reallaşdırılması adamları daha çox qayğılandıran məsələləri aşkarlamağın, üzə çıxarmağın ən səmərəli yoludur. Beləliklə, bələdiyyə sədrləri, icra nümayəndələri və müvafiq strukturların rəhbərlərinin qatıldığı görüşlərə start verildi. Etiraf edim ki, problemlər həddən çox idi-sakinləri sosial-məişət çətinliklərindən tutmuş ta yaşayış binalarının əksəriyyətində liftlərin, kommunikasiya xətlərinin yararsız vəziyyətə düşməsi, əksər zirzəmilərin suyun içində qalması, istilik sistemlərinin işləməməsi, küçələrin işıqlandırılmasının yaxşı təşkil edilməməsi, məişət tullantılarının haraya gəldi atılması, qaz, elektrik təchizatında fasilələrin yaranması və s. məsələlər ciddi narahat edirdi.

Başçı daha sonra dedi ki, adamlar bu görüşlərə həvəslə gəlirdilər. Amma onu da hiss etmək çətin deyildi ki, sakinlər qaldırılan məsələlərin həll ediləcəyinə şübhə ilə yanaşırdılar. Çoxu hətta açıqca deyirdi ki, bu rayonda belə görüşlər çox keçirilib, söylənilənlər isə elə söz olaraq qalıb.

Bu məqamda diqqəti yazını hazırladığım ərəfədə həmsöhbət olduğum insanların fikirlərinə yönəltməyi məqsədəuyğun sayıram.

Nazim Qasımov, Rəsulzadə qəsəbə sakini, müəllim:

– Binəqədiyə təzə təyin olunmuş icra hakimiyyəti başçısı Xaləddin İsgəndərov sakinlərlə keçirdiyi ilk görüşlərinin birində rayonun gələcək inkişaf perspektivlərindən, görüləcək işlərdən, qarşıda duran planlardan danışdı. ...Etiraf edirəm, uzun illərdən bəri sakini olduğum rayonda o qədər problemlər üst-üstə yığılmışdı ki, həmin çətinliklərin qısa bir müddətdə aradan qaldırılmasına inanmırdım.

Bəli, görüşə toplaşdığımız vaxtdan heç bir il ötməmiş düşüncəmdə yanıldığımı anladım. Rayonda böyük dəyişikliklər baş verdiyinin şahidi olduq. Dörd böyük mikrorayonu və beş qəsəbəni birləşdirən Binəqədi intensiv işlərin getdiyi bir məkana çevrildi. Rayon ərazisinin az qala başdan-başa yenidən qurulmasından, sürətlə abadlaşdırılmasından, insanların qayğılarına, problemlərinə həssaslıqla yanaşılmasından sakinlər fəxrlə danışmağa başladılar.

Yaxşı xatırlayıram, rayon icra hakimiyyətinin yeni başçısı sakinlərlə görüşündə-"Məni bu vəzifəyə ölkə Prezidenti cənab İlham Əliyev göndərib, etimad göstərib” – dedi, – sonra isə əlavə etdi: – “Mən də bu etimadı doğrultmaq, hər bir Binəqədi sakininin qayğılarına həssaslıqla yanaşmaq, qarşıda duran problemləri aradan qaldırmaq üçün əlimdən gələni əsirgəməyəcəyəm. Düşünürəm ki, bu, mənim həm vəzifə, həm vətəndaşlıq, həm də insanlıq borcumdur. Arzularımızın, layihələrimizin həyata keçirilməsi üçün siz ağsaqqalların, ziyalıların məsləhətlərinə, səmərələşdirici təkliflərinə böyük ehtiyac var. Gəlin, hamımız doğma Binəqədi rayonunu gözəlliklər məskəninə çevirək. İnanın ki, qarşılıqlı anlaşma şəraitində təkliflərinizə, məsləhətlərinizə əməl etməklə biz buna tez bir zamanda nail olacağıq”.

Məsim Nəbiyev, Binəqədi qəsəbə sakini, təqaüdçü:

– Bu qəsəbə bir il bundan əvvəl yaman gündə idi. Yollar dağılmışdı, səkilər məişət tullantılarından keçilməz olmuşdu. Xaləddin müəllimin rayon icra hakimiyyəti başçısı vəzifəsinə başladığı ilk günlər bura təmir-tikinti meydançasını xatırladırdı. Hər kəsin imkanı daxilində tikib quraşdırdığı səliqəsiz hasarlar sökülür, hörümçək torunu xatırladan elektrik dirəkləri və köhnə naqillər yeniləri ilə əvəzlənirdi. Özü də bunlar vahid bir layihə əsasında həyata keçirilirdi....İndi qəsəbəyə yolu düşənlər gözlərinə inanmırlar- qısa müddətdə ətraf yeni bir görkəm almışdır. Yollar abadlaşdırılmış, səkilər təzələnmiş, darvazalar, həyət qapıları yenilənmiş, müasir üslubda hasarlar çəkilmişdir.

Mahir Qarayev, Biləcəri qəsəbə sakini, dəmiryolçu:

– İcra hakimiyyətinin başçısının rayona rəhbərliyə başladığı ilk günləri yaxşı xatırlayıram. Mikrorayonlarda, kəndlərdə aylarla yığılıb qalmış məişət tullantılarına hər addımbaşı rast gəlinirdi. Yeni başçı ilk növbədə diqqəti bu problemin həllinə yönəltdi. Rayona məişət tullantılarını daşıyan maşınlar, tullantılar üçün yeni konteynerlər gətirildi. Konteynerlərə xüsusi yerlər hazırlandı. Qısa bir zamanda ərazilər zibildən təmizləndi, səliqə-sahman yaradıldı. Qəsəbəarası yolların kənarlarındakı qurumuş kol-kos, ot-alaf yığışdırıldı. İndi arada Sulutəpə, Xocasən, 28 May və Binəqədi qəsəbələrinə də yolum düşür. Yaşadığım Biləcəri qəsəbəsi kimi, o yaşayış məntəqələri də qısa bir vaxtda abadlaşdırılmışdır. Səliqə-sahman adamda, sözun həqiqi mənasında, xoş ovqat yaradır. O zaman adlarını çəkdiyim qəsəbələrdə magistral yoldan kənarda bir dənə də olsun asfaltlanmış küçəyə rast gəlmək mümkün deyildi. Son zamanlar isə qəsəbələrin məhəllədaxili yollarının çox hissəsi asfaltlanmış, səki kənarları abadlaşdırılmışdır.

Bir qədər əvvəl yuxarıda mətbuat nümayəndələri ilə xatırladılan görüşdə başçı maraqlı bir məqama da toxundu: “Rayonda fəaliyyətə başladığım ilk aylarda ərizə və şikayətlərin yoxlanılmasına da mühüm önəm verildi. Rayon icra hakimiyyəti aidiyyəti strukturların qarşısında şərt qoydu ki, şikayət məktublarına adi kağız parçası kimi baxmaq olmaz. Hər bir məktubun arxasında insan problemi, insan qayğısı dayanır.

Amma bu zaman qəribə bir nəticə ilə rastlaşdım. Məktubların sayı azalmaq əvəzinə artırdı. Bunun səbəbi isə aydındı:illərlə üst-üstə yığılan problemlər həllini tapdıqca, insanların inam hissi güclənirdi, ona görə də adamlar rayon icra hakimiyyətinə daha çox üz tuturdular, eyni zamanda belə vəziyyət bizim də məsuliyyət hissimizi artırırdı.

Bu gün rayon icra hakimiyyətinə daxil olan məktublara dərkənar qoyulduqdan sonra müvafiq şöbələrin, strukturların ünvanına göndərilir. Vətəndaşlara verilən cavabların, görülən tədbirlərin nə dərəcədə obyektiv və real olmasını başçı öz nəzarətində saxlayır.

Binəqədi Rayon İcra Hakimiyyətinin fəaliyyətində insan amilinə üstünlük verilməsi ilə bağlı bir neçə fakta da diqqət yetirək. İcra hakimiyyəti aparatında sakinlərin müraciəti üçün “1646” xidməti yaradılmışdır. Adamlar icra hakimiyyətinə gəlmədən müraciətlərini daha çevik və operativ şəkildə telefonla çatdıra və məlumat ala bilirlər. ”1646" xidməti bütün mobil operatorlardan və stasionar telefonlardan eyni vaxtda 30 zəngi qəbul edir. Xidmətə daxil olan icra hakimiyyətinin vəzifə və səlahiyyətlərinə aid müraciətlər qanunvericilik bazası üzrə “Sual-cavab” blokuna əsasən cavablandırılır.

Rayon icra hakimiyyətinin yenidənqurmadan sonra istifadəyə verilən inzibati binasında videokonfrans zalı, elektron xəritə və operativ idarəetmə mərkəzinin olması, habelə digər texniki vasitələrin quraşdırılması da burada sakinlərlə ünsiyyətə nə dərəcədə diqqət yetirilməsinin bariz nümunəsidir. Ümumiyyətlə, sadalananlar sakinlərin rayon icra hakimiyyəti ilə operativ əlaqəsinə, onların qarşılaşdıqları problemlərin həllinə müsbət təsir göstərir.

Digər bir yenilik barədə. “Binəqədi” qəzeti 12 illik fasilədən sonra nəşrini bərpa etmişdir. Xatırladaq ki, hazırda bu qəzet rayonda baş verən bütün dəyişiklikləri, yenilikləri oxuculara çatdırmaqla yanaşı, dövlət və cəmiyyət arasında qarşılıqlı əlaqələrin, vətəndaş münasibətlərinin formalaşması kimi mühüm missiyanı da uğurla yerinə yetirir.

Abadlıq-quruculuq və yüksəliş

Bəli, bu gün respublikamızın bütün şəhər və kəndlərində müşahidə edilən abadlıq-quruculuq və yüksəliş Binəqədi rayonunda da özünü qabarıq büruzə verir. Mövcud potensialın səmərəli reallaşdırılması, əmək ehtiyatlarının və digər resursların konkret məqsədlərə yönəldilməsi, ən başlıcası, Azərbaycan Prezidenti İlham Əliyevin imzaladığı dövlət proqramlarından, fərman və sərəncamlarından irəli gələn vəzifələrin böyük əzm və bacarıqla həyata keçirilməsi rayonun son bir ildəki uğurlarını şərtləndirən əsas məqamlar sırasındadır.

Rayon icra hakimiyyətinin başçısı X.İsgəndərovun Binəqədiyə rəhbərliyə gəlişindən sonra bir sıra sistemli, kompleks xarakterli layihələr işlənib hazırlanmış və uğurla reallaşdırılmışdır. Yaşayış məntəqələrinin təbii qaza, suya, elektrik enerjisinə olan tələbatının ödənilməsi, küçə və məhəllədaxili işıqlandırma sistemlərinin qurulması, ictimai nəqliyyatın fasiləsiz işləməsi, sosial təyinatlı obyektlərin-məktəblərin, uşaq bağçalarının, xəstəxanaların, mədəniyyət evlərinin tikintisi və bərpası, müasir avadanlıqlarla təchiz edilməsi ilə bağlı xeyli iş görülmüşdür.

Bunların bir qisminə diqqət yetirək. Son bir il ərzində rayon ərazisində altı yeni park salınmış, ikisi əsaslı təmir edilmiş, iyirmi dörd yeni mədəni-kütləvi tədbirlər evi sakinlərin istifadəsinə verilmişdir. Rayonda 166 kilometr yol asfaltlanmış, 127 min kvadratmetrlik fasad işləri görülmüşdür. Ekoloji tarazlığın təmin edilməsi məqsədilə 10 minə yaxın ağac, 120 minə yaxın çiçək və bəzək kolu əkilmiş, 76 min kvadratmetrlik çəmənlik salınmışdır. Azadlıq prospekti boyunca yerləşən binaların fasadları müasir üslubda üzlənmiş, işıqlandırılmışdır. Bakı-Sumqayıt avtomagistralının rayon ərazisindən keçən hissəsinin hər iki tərəfi milli ornamentli landşaft memarlığı elementlərindən istifadə olunmaqla yenidən qurulmuşdur. Binəqədi və Biləcəri qəsəbələrində daxili və qəsəbələrarası yollar genişləndirilmişdir.

Yeri gəlmişkən, burada bir məqama diqqət yetirmək istərdik. Prezident İlham Əliyevin tapşırığı ilə Bakı şəhərində parkların və xiyabanların əsaslı şəkildə yenidən qurulması, yeni parkların salınması, insanların rahatlığı üçün dünya standartlarına uyğun istirahət guşələrinin yaradılması istiqamətində ardıcıl tədbirlər davam etdirilir. Salınan yeni parklar və yaşıllıq zolaqları, bağlarda və xiyabanlarda ən yüksək standartlar səviyyəsində infrastrukturun yaradılması paytaxtımızı dünyanın ən gözəl şəhərlərindən birinə çevirmişdir. Bu baxımdan rayonda yenidən qurulmuş və ulu öndərimizin adını daşıyan istirahət parkı daha çox diqqət çəkir. Xatırladaq ki, Prezident İlham Əliyev iyulun 3-də Binəqədi rayonunda sözügedən istirahət parkı ilə tanış olarkən burada yaradılmış şəraiti yüksək qiymətləndirmişdir.

Yuxarıda qeyd etdiyimiz kimi, küçələrin abadlaşdırılması, Bakıya şimal istiqamətindən giriş yolunun müasirləşdirilməsi, baxımsız vəziyyətdə olan binaların fasadlarına təzə üzlük çəkilməsi, dam örtüklərinin dəyişdirilməsi, səkilərin, yolların əsaslı təmiri görülən işlərin yalnız bir qismidir. Xüsusən də gecə saatlarında Binəqədidə olanlar rayonun necə dəyişdiyini, burada müasir tələblərə cavab verən işıqlandırma sisteminin yaradıldığını aydın görürlər.

Dövlət Proqramı uğurla icra edilir

“2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın uğurlu icrası nəticısində rayonda infrastruktur təminatı daha da yaxşılaşmış, təhsil, səhiyyə, mədəniyyət və idmanın inkişafını təmin edən tədbirlər həyata keçirilmişdir. Yeni məktəblər, əlavə sinif otaqları, xəstəxana, poliklinika, ambulatoriya binaları tikilmiş, mövcud binalar əsaslı təmir edilmiş, müasir tipli idman kompleksləri istifadəyə verilmişdir.

Dövlət proqramına əsasən, rayon üzrə 103 bənd nəzərdə tutulmuşdur. Bu bəndlərin əksəriyyəti yerinə yetirilmişdir. Belə ki, bu ilin yanvar-iyun aylarında bir sıra mühüm sosial obyektlərin tikintisi və təmiri başa çatdırılmışdır. 59 və 274 saylı körpələr evi-uşaq bağçasının , 297 saylı orta məktəbin əsaslı təmiri, 7-ci mikrorayonda mini-futbol meydançasının tikintisi, 298 saylı bağçada yeni istilik mənbəyinin yaradılması, qazlaşdırılması, məhəllədaxili və binadaxili istiik sistemlərinin yenidən qurulması, Biləcəri qəsəbəsindəki mədəniyyət və istirahət parkının abadlaşdırılması, Binəqədi və Biləcəri qəsəbələrinin su təchizatı və kanalizasiya sistemlərinin yaxşılaşdırılması məqsədi ilə köhnəlmiş su və kanalizasiya xətlərinin xeyli dərəcədə təzələnməsi işləri başa çatdırılmışdır.

Hazırda Sulutəpə qəsəbəsində həkim məntəqəsinin, “Bakı şəhərinin Ziya Bünyadov prospektində yol infrastrukturunun yenidən qurulması” layihəsi çərçivəsində Z. Bünyadov və Ə. Rəcəbli küçəsinin kəsişməsində, Xutor dairəsində, Ə. Salamzadə, A. Mustafayev və H. Əliyev küçələrinin kəsişməsində müxtəlif səviyyəli yol qovşaqlarının tikintisi, Biləcəri qəsəbəsində A. Zeynallı, M. Hüseynzadə, X. Natəvan, M. S. Ordubadi və S. S. Axundov küçələrinin əsaslı təmiri, 135 və 248 saylı orta məktəblərin, 151, 153, 158, 177,və 193 saylı körpələr evi-uşaq bağçalarının təmiri və ya əsaslı təmiri işləri davam etdirilir. Rayon ərazisində 100, 143, 244 və 246 saylı orta məktəblərdə əlavə sinif otaqlarının, 86, 211, 294 saylı körpələr evi-uşaq bağçaları üçün yeni binaların tikintisi də başa çatmaq üzrədir.

Qeyd olunan proqramım icrası nəticəsində Binəqədi rayonu sürətlə inkişaf etmiş, yol təsərrüfatının və şəhər nəqliyyatının işinin yaxşılaşdırılması, elektrik enerjisi, qaz, istilik su təchizatı və kanalizasiya xidməti və s.üzrə layihələr həyata keçirilmişdir.

Rayon ərazisində xeyli sayda “Abad məhəllə” yaradılmışdır. Həmin məhəllərdəki yaşayış binalarının fasadları yenilənmiş, giriş qapıları kodlaşdırılmışdır. Həyətlərdə isə istirahət köşkləri, oturacaqlar, habelə əyləncə qurğuları quraşdırılmışdır. “Abad məhəllə” layihəsi çərçivəsində inşa olunan, lazımi avadanlıqla təchiz edilən müasir tipli “xeyir-şər” evləri də sakinlərin istifadəsinə verilmişdir.

Qayğı, diqqət önə çəkilir

Rayon icra hakimiyyəti hər zaman milli qəhrəman və şəhid ailələrinin, qaçqın və məcburi köçkünlərin, aztəminatlı ailələrin, əlillərin və digər imtiyazlı şəxslərin sosial-məişət şəraitinin yaxşılaşdırılmasını daim diqqət mərkəzində saxlayır, onların problemlərinin operativ həll olunması üçün tədbirlər görür. Bununla yanaşı, milli-mənəvi dəyərlərimizin, adət-ənənələrimizin qorunub saxlanılması, inkişaf və təbliğ etdirilməsi, tarixi hadisələrin, əlamətdar günlərin qeyd olunması, ictimai təşkilatlar, siyasi partiyalar və dini qurumlar, habelə təhsil, səhiyyə, mədəniyyət müəssisələri ilə qarşılıqlı münasibətlərin qurulması, onların fəaliyyətinin koordinasiyası məsələlərinə mühüm önəm verir.

Rayonda gənclərin vətənpərvərlik, dövlətçilik prinsipləri əsasında Azərbaycan xalqının tarixi-mədəni irsinə, milli-mənəvi və ümumbəşəri dəyərlərə hörmət ruhunda tərbiyə olunmasını, cəmiyyətin ictimai-siyasi, sosial-iqtisadi və mədəni həyatında fəal iştirakının təmin edilməsinı rayon icra hakimiyyəti daim diqqət mərkəzində saxlayır. Bunu belə bir fakt da təsdiqləyir: Gənclərin intellektual və yaradıcılıq potensialının ümummilli məsələlərin həllinə yönəldilməsi və asudə vaxtlarının səmərəli keçirilməsi istiqamətdə ötən il ərzində 68 tədbir keçirilmişdir. Bu tədbirlərdə 6361 uşaq, yeniyetmə və gənclərin iştirakı təmin olunmuşdur.

Rayonda ümumtəhsil məktəblərinin, uşaq bağçalarının təmiri, tikintisi geniş vüsət almışdır. Təlim-tərbiyə ocaqlarında təhsilin keyfiyyətinin, tədrisin səviyyəsinin yaxşılaşdırılması qarşıya mühüm vəzifə kimi qoyulmuşdur. Artıq Binəqədi Rayon İcra Hakimiyyətində ən yaxşı məktəb direktorlarının, fənn müəllimlərinin, şagirdlərin, fənn olimpiadaları qaliblərinin mükafatlandırılması, onların əməyinin qiymətləndirilməsi ənənə şəklini almışdır. Yeri gəlmişkən, onu da xatırladaq ki, keçən il rayon üzrə orta məktəbi bitirən 2529 nəfərdən 2247 nəfəri ali məktəbə sənəd vermiş və bunlardan 1184 nəfəri (53 faizi) ali məktəblərə qəbul olmuşdur.

Son olaraq...

Görüləsi işlər, həyata keçiriləsi layihələr hələ çoxdur. Azadlıq prospektinin rayon ərazisinə daxil olan hissəsində geniş yenidənqurma işlərinə başlanılmışdır. Artıq həmin prospektdəki 5, 9 və 16 mərtəbəli binalar müasir texnologiyaya uyğun olaraq üzlənilmişdir. Yəqin ki, yaxın vaxtlarda prospektə paralel avtobusların hərəkəti üçün ayrıca yolun, velosiped cığırlarının açılması və yolötürücülərin tikilməsinə də start veriləcəkdir. Tezliklə su, kanalizasiya problemləri ilə əlqədar ciddi tədbirlərin reallaşdırılması da nəzərdə tutulur.

* * *

Bir neçə gün bundan əvvəl rayonda keçirilən tədbirdə icra hakimiyyəti başçısının çıxışındakı bir fikirlə bu yazını tamamlamaq istərdim. “Dərin minnətdarlıq hissi ilə qeyd edirəm ki, qısa müddətdə nail olduğumuz uğurlar möhtərəm Prezident İlham Əliyevin böyük qayğı və diqqətindən, fəaliyyətimizi yüksək qiymətləndirməsindən qaynaqlanır. Dövlətimizin başçısının iyulun 3-də Binəqədi Rayon İcra Hakimiyyəti və Yeni Azərbaycan Partiyası Binəqədi rayon təşkilatının inzibati binaları ilə, habelə yenidən qurulmuş Heydər Əliyev parkında yaradılmış şəraitlə tanış olması, rayonda aparılan quruculuq işlərini yüksək qiymətləndirməsi, proqram əhəmiyyətli tövsiyə və tapşırıqları insanların qurub-yaratmaq əzmini, dövlətə, dövlətçiliyə, ən əsası isə ölkə rəhbərinə inamını daha da möhkəmləndirmişdir. Bütün bunlar isə cənab İlham Əliyevin qarşıdan gələn prezident seçkilərində namizədliyinin irəli sürülməsinin xalqımızın, o cümlədən binəqədililərin mütləq əksəriyyəti tərəfindən dəstəklənməsi deməkdir”.

Vaqif BAYRAMOV

Xalq qəzeti.- 2013.- 14 iyul.- S. 5.