Sən belə deyildin əzəl, ay Quba

Quba haqqında çox danışılıb, çox yazılıb, bundan sonra da çox yazılacaq. Çünki Quba illə, ayla, günlə deyil, hər saatda bir donda görünə-görünə daha da gözəlləşir. Ötən əsrin 70-ci illərinin ikinci yarısında görkəmli Azərbaycan şairi M.Rahimin tez-tez xatırlanan çox məşhur bir şeiri var idi, belə bitirdi:

Qubanı, Göygölü görməmisənsə,

Demə ki, görmüşəm Azərbaycanı.

Bu şeiri televiziya, radio və ya məclislərdə eşidəndə həmişə daxilən qürur hissi keçirmişəm, misralar ürəyimə yağ kimi yayılıb. Bəli, allı-güllü Qızbənövşə Səttar Bəhlulzadə kimi korifeyi özündən çıxardıb, Qəçrəşin diş göynədən buz bulaqları, usta sənətkarların zəhməti ilə park şəklinə düşmüş meşələri, saf və təmiz havası insanlara sağlamlıq bəxş edib. Bu gözəlliklər Qubanın adını göylərə qaldırıb. Təəssüf ki, keçmiş sovet dövründə insanı məftun edən bu yerlər öz layiqli qiymətini almayıb, təbliğ olunaraq insanlara tanıdılmayıb.

Keçən əsrin 80-ci illərinin Qubasını, indiki Quba ilə müqayisə etmək istəmirəm. İstəsəm də, bu mümkün deyil. Əvvələr şəhər içindəki söküntü və dağıntılardan təngə gələn qubalılar 2 ilə yaxındır ki, rahat nəfəs alırlar. Bütün işlər planlı və nəzarət altında aparıldığından vaxtında sona çatır. Quba bir tərəfdən sökülür, digər tərəfdən memarlıq ənənələrimiz saxlanılmaqla yenidən bərpa olunur: müasir zövqdə, zamanın tələbinə uyğun. Dəfələrlə Qubada olmuş ulu öndərimiz Heydər Əliyev deyib: “Qubada Azərbaycanın bütün əhalisini təmsil edən, eyni zamanda, müxtəlif milli köklərə mənsub olan insanlar bir ailədə dostluq, mehribanlıq şəraitində yaşayırlar!” Qədim Qubanın yeni siması ulu öndərin həmişə diqqət mərkəzində olub. O müdrik insanın bir Vətəni var idi. - Azərbaycan! O, azərbaycanlı olmağı ilə fəxr edirdi. Bakını, Gəncəni, Naxçıvanı, Şəkini sevdiyi qədər də Qubanı sevirdi.

Ölkəmizin hər yerində olduğu kimi, rayonumuzda da bütün sahələr üzrə bir sıra mühüm tədbirlər həyata keçirilir. İl yarım bundan qabaq bədniyyətli qüvvələrin fitvası ilə baş verən hadisələr artıq unudulur. Rayona yeni başçı təyin olunmuş M.Ağayev də ilk görüşdən, ilıq təmasdan insanları inandıra bilib, böyük hörmət qazanıb. O, insanlara anlada bilib ki, bu dövrdə çox iş görmək olar, təki insan həvəs olsun. Qubalılar da uzaqgörən, yaxşını tanıyıb qiymətləndirməyi bacaran insanlardır. Düşündülər ki, beləsi ilə dağı-dağ üstə qoymaq olar. İndi il yarımda görülən işlər göz qabağındadır. Rayonda bu ilin sonuna qədər 30-dan artıq obyekt — dövlət idarələri üçün yeni binalar, rayon icra hakimiyyətinin, poçtamtın, su-kanal idarəsinin, Yeni Azərbaycan Partiyası rayon təşkilatının inzibati binalarının, A.Bakıxanov adına tarix-diyarşünaslıq muzeyinin, fəvvarələr kompleksinin, Gənclər Mərkəzinin, Bayraq meydanının tikintiləri başa çatmaq üzrədir. Quba sürətlə dəyişir, gəncləşir, böyüyüb inkişaf edir. Son il yarım ərzində 300 kilometrə yaxın su və kanalizasiya xətləri çəkilərək şəhər əhalisinin istifadəsinə verilib. Qudiyalçayda hər biri bir neçə min tonluq 4 su anbarı tikilib. Rayonda işlər çoxşaxəli şəkildə davam etdirilir. Tikinti-təmir, yenidənqurma işləri eyni sürətlə kəndlərdə də aparılır. Hacıqayıb, Dağlı, Qaraçay, Küpçal Xucbala kəndlərində yeni məktəb binaları inşa olunur. Bu ilin sonuna qədər bir sıra kəndlərə yol çəkilişləri, su və qaz təchizatının sürətləndirilməsi nəzərdə tutulub. Artıq 7 yaşayış məntəqəsini birləşdirən Quba-Küpçal-Küsnət avtomobil yolunun çəkilişi sürət götürüb. Torpaq qrunt işləri, hamarlama texnoloji kartaya uyğun gedir. Quba-Qonaqkənd, Quba-Xanəgah yolunun mürəkkəbliyi inşaatçıları ruhdan salmır.

Qubanı Qırmızı Qəsəbə ilə birləşdirən tağlı körpünün 150 ildən artıq tarixi var. Bu körpü öz tarixi görünüşünü və memarlıq cizgilərini itirmədən bərpa olunub. Bəzi kəndlərə yeni su xətləri çəkilir. Digah kəndinə 1800, Qəçrəş kəndinə 4500, Gədikqışlaq kəndinə 7000 metr məsafədən su gətirilib. Qırmızı Qəsəbədə Mirzəqışlaq, Qımılqışlaq, Küpçalqışlaq kəndlərində subartezyan quyularının nasosları yenidən bərpa olunub. Son bir neçə ildə rayonun 50-yə yaxın kəndi qazlaşdırılıb. Bu il daha 19 kəndə qaz veriləcək. İnsanlar illər ötdükcə yaşlaşıb qocalırlar. Şəhərlər, kəndlər isə tikildikcə cavanlaşıb, gözəlləşirlər.

Statistiklər kiçik, ancaq maraqlı bir araşdırma aparıblar: sovet dövründə - 70 ildə Qubada cəmi 17 məktəb inşa olunub, Müstəqillik qazandığımız son 20 ildə isə Quba rayonunda 80 məktəb binası inşa olunub, daha 10 məktəbdə son tamamlama işləri gedir. Başqa dəlilə, sübuta ehtiyac yoxdur. Quba gözəlliklər məskənidir. İnsanlar isə daim gözəlliyə doğru can atır görmək, duymaq istəyirlər. Elə keçmiş sovet dövründə də Azərbaycana gələn hörmətli qonaqları, turistləri çox vaxt Qubaya gətirirdilər. Təəssüf ki, Azərbaycan neftinin pulunu gen-bol aşağı-yuxarı xərcləyən “böyük qardaş”larımız qısqanclıq göstərib Azərbaycanın gəzməli — görməli yerlərində istirahət üçün şərait yaratmırdılar. Möhtərəm Prezidentimiz İlham Əliyevin qayğısı ilə Quba respublikamızın möhtəşəm istirahət zonalarından birinə çevrilmişdir. İndi Xınalıq, Qəçrəş, Təngəaltı zonası yüzlərlə insanın dincəldikləri yerlərdir. Hal-hazırda Əski-İqrıq kəndində dünya standartlarına cavab verən, nəhəng beşulduzlu “Riksos-otel” istirahət obyekti tikilir ki, möhtəşəm turizm bazası bir dəfəyə 500 turisti qəbul edə biləcəkdir. Rayonun İkinci Nügədi kəndində İqtisad Universiteti üçün istirahət mərkəzi, BDU-nun biologiya fakültəsi üçün təlim-tədris korpusu inşa edilir.

Qubalılar işgüzar, çalışqandır, təki önə keçən, istiqamət verən olsun. Bu mənada rayon sakinlərinin bəxti gətirib. İcra hakimiyyətinin başçısı Mübariz Ağayev hər bir kollektivlə tez dil tapır, insanlara qaynayıb-qarışır. Buna görə də insanlar gələcəyə ümidlə baxırlar. Onun rayonda görüşləri də maraqlı keçir. Ayrı-ayrılıqda veteranlar, müəllimlər, həkimlər, gənclərlə rayon mərkəzində və böyük kəndlərdə sadə insanlarla keçirdiyi görüşlər səmərəli olmuşdur. İstər kəndlərdə, istər rayon mərkəzində illərlə süründürülən məsələlər öz qanuni həllini tapmışdır. Əhalinin işdən sonrakı istirahəti üçün gözəl şərait yaradılmışdır. Şəhərin 28 may parkında Gənclər Mərkəzi, Heydər Əliyev parkında Gənclər evi tikilir. Qubada Müəllimlər İnstitutunun filialı, sənaye-pedaqoji texnikumu, sosial iqtisad kolleci fəaliyyət göstərir. Rayonda tez-tez dövlət əhəmiyyətli tədbirlər keçirilir. Ulu öndərin 90 illiyi ilə əlaqədar Gül bayramına paytaxtdan və qonşu rayonlardan da qonaqlar təşrif buyurmuşdular.

Keçən ilin oktyabrında Qubanın tarixində ilk dəfə olaraq böyük təntənə ilə “Alma bayramı” keçirildi. Bu geniş əhatəli tədbir olduqca maraqlı alındı və “İctimai” televiziya ilə efirə getdi. Çoxlu qonaqlarımız oldu. O cümlədən, 3 ölkənin səfiri, 30 xarici ölkə səfirliyinin nümayəndəsi və 80 deputat iştirak edirdi.

Qubanın üzünü ağardan, ona dünya şöhrəti gətirən al yanaqlı almasıdır. Alma Qubanın xəzinəsidir. Hər il yüzlərlə ton Quba alması Rusiya, Ukrayna bazarlarında ən dadlı meyvə kimi satılır. 2-3 il qabaq Quba almasının saxlanılması üçün heç bir şərait yox idi. Buna görə də insanlar öz meyvəsini tez-bazar ucuz qiymətə satmalı olurdular. Qubada 100 min tondan çox meyvə istehsal olunur. Bu qədər meyvəni birdən satmaq sərfəli deyil. Soyuducuları olmadığından meyvə çürüyüb zay olurdu. Son illərdə rayon ərazisində 10 soyuducu-anbar inşa edilib. İndi bacbanlar heç bir narahatçılıq keçirmirlər. Meyvələrini soyuducuya vurub bəzən aprelə, maya qədər saxlayırlar. Müstəqil respublikamızda insan amili daim önə çəkilib, varlığımızın əşrəfi sayılıb. Bu insanların uzunömürlülüyünü qoruyan, gecə-gündüz onların sağlamlığının keşiyini çəkən həkimlərimizin zəhməti ən yüksək tərifə layiqdir. Yeni xəstəxanaların tikintisi də Quba rayonunda sürətlə gedir. Bir neçə il əvvəl Diaqnostika Mərkəzi, bu yaxınlarda isə Qonaqkənddə yeni xəstəxana tikilib istifadəyə verilib. Rustov kəndində də müasir avadanlıqlarla təchiz olunacaq yeni xəstəxana inşa olunur. Mərkəzi Xəstəxananın poliklinikası, doğum evinin, ağ ciyər xəstəlikləri şöbəsinin korpusları əsaslı təmir olunub. Quba bu gün gözəldir. Çox yox, bir ildən sonra Qubaya gələnlər onu daha gözəl və füsünkar görəcəklər. Görülən işlər bunu deməyə əsas verir.

Qəhrəman QASIMOV

Xalq qzəeti.- 2013.- 14 iyul.- S. 7.