Azərbaycan Həmkarlar İttifaqları Konfederasiyasında Milli Mətbuat Günü ilə bağlı tədbir keçirilmişdir

İyulun 19-da Azərbaycan Həmkarlar İttifaqları Konfederasiyasında Azərbaycan Mədəniyyət İşçiləri Həmkarlar İttifaqının Respublika Komitəsinin (AMİHİRK) təşkilatçılığı ilə Milli Mətbuat Günü ilə bağlı tədbir keçirilmişdir.

AzərTAc xəbər verir ki, tədbiri açan AMİHİRK-in sədri Cəmilə Səttarova iştirakçıları salamlamış və Milli Mətbuat Gününün tarixindən danışmışdır. Cəmiyyətin inkişafında və dövlətçiliyin formalaşmasında mətbuatın rolunu xüsusi vurğulayan AMİHİRK-in sədri rəhbərlik etdiyi təşkilatın hər il bu əlamətdar günü qeyd etdiyini bildirmişdir.

Hər bir ölkənin həyatında informasiyanın ötürülməsində jurnalistlərin rolunun böyük olduğunu bildirən C.Səttarova ölkəmizdə jurnalistika sahəsinin sürətlə inkişaf etdiyini qeyd etmişdir. Həmkarlar ittifaqlarının son illərdə bütün sahələrdə olduğu kimi mətbuat sahəsində də rolunun möhkəmləndiyi vurğulanmışdır.

Ədalətin formalaşmasında və onun qoruyub saxlanılmasında jurnalistlərin və həmkarlar ittifaqı işçilərinin mühüm rolundan danışan C.Səttarova bu iki peşənin tarixən ən təhlükəli sənət olduğunu qeyd etmişdir. O bildirmişdir ki, informasiya məkanında çalışanlar cəmiyyətin həyata və problemlərə baxışının formalaşmasında fəal iştirak edirlər.

Respublikamızda 600-dən artıq mətbuat orqanının mövcud olduğunu qeyd edən AMİHİRK-in sədri müstəqilliyini bərpa etdikdən sonrakı dövrdə Azərbaycan mətbuatının inkişafında ulu öndər Heydər Əliyevin gərgin əməyindən və qayğısından söz açmışdır. Mətbuata göstərilən bu qayğı və diqqətin Prezident İlham Əliyevin rəhbərliyi altında uğurla davam etdiyini bildirən sədr, həmkarlar ittifaqları işçilərinin oktyabrda keçiriləcək prezident seçkilərində düzgün seçim edəcəklərini və ümummilli liderin əsasını qoyduğu siyasəti davam etdirəcək dövlətimizin başçısı İlham Əliyevə səs verəcəklərinə inandığını bildirmişdir.

Tədbir çərçivəsində ümummilli lider Heydər Əliyevin 90 illik yubileyinə həsr edilmiş “Heydər Əliyev-90" kitabının təqdimatı olmuşdur.

Sonda tədbir iştirakçıları AMİHİRK tərəfindən mükafatlandırılmışlar.

Xalq qəzeti.- 2013.- 20 iyul.- S. 10.