Ağsu: Dövlət Proqramında nəzərdə tutulan layihələr reallaşdırılır

Azərbaycan Respublikasının Prezidenti İlham Əliyevin sədrliyi ilə keçirilən Nazirlər Kabinetinin sonuncu iclasının materialları bölgələrdə əhatəli şəkildə müzakirə olunur, görülmüş işlərə yekun vurulur, yeni vəzifələr müəyyənləşdirilir. Belə toplantılardan biri də Ağsuda keçirildi. Rayon ictimaiyyəti qarşısında səsləndirilən hesabatdan və müvafiq qurum rəhbərlərinin çıxışlarından aydın şəkildə görünürdü ki, Ağsu ötən ilin müvafiq dövrünə nisbətən kifayət qədər irəliləyib. Rayon icra hakimiyyətinin başçısı Ənvər Seyidəliyevin hesabatından götürdüyümüz bəzi məqamlar da bunu təsdiq edirdi.

İcra başçısı qeyd etdi ki, ölkəmizin hər yerində olduğu kimi Ağsuda da Dövlət Proqramının ilk üç ili uğurlu nəticələrlə başa vurulub, sosial infrastrukturun, əhalinin həyat şəraitinin və sosial müdafiəsinin yaxşılaşdırılması, yoxsulluğun səviyyəsinin azaldılması, sahibkarlığın inkişaf etdirilməsi, abadlıq-quruculuq, tikinti-bərpa işlərinin aparılması, yeni iş yerlərinin açılması və nəticədə əhalinin rifah halının yüksəldilməsi sahəsində böyük nailiyyətlər əldə olunub.

Bu uğurların davamı olaraq 2013-cü ilin birinci yarısında da “Azərbaycan Respublikası regionlarının 2009-2013 cü illərdə sosial-iqtisadi inkişafı Dövlət Proqramı”nda nəzərdə tutulan tədbirlər müvəffəqiyyətlə icra olunub. Belə ki, kənd təsərrüfatı məhsullarının istehsalının və emalının inkişafının dəstəklənməsi davam etdirilib. 2013-cü ilin məhsulu üçün 33741 hektar sahədə payızlıq taxıl əkilmişdir ki, bunun da 14199 hektarı buğda, 19542 hektarı isə arpa əkinidir. Taxıl əkini sahələrinə yüksək səviyyədə aqrotexniki qulluq göstərilib.

Məhsuldarlığı artırmaqdan ötrü “Aqrolizinq” yolu ilə fermerlərə və ailə-kəndli təsərrüfatlarına 180 ton azot və 20 ton fosfor gübrəsi satılmışdı. Buğda istehsalçılarının maddi marağının artırılması və buğda istehsalının stimullaşdırılması məqsədilə dövlət büdcəsinin vəsaiti hesabına yardımın verilməsi təmin edilib, kənd təsərrüfatı məhsulları istehsalçılarına əkin sahələrinin becərilməsində istifadə olunan yanacaq və motor yağlarına görə dövlət maliyyə yardımının verilməsi üçün müvafiq sənədlər hazırlanıb.

Dünya Bankı və Azərbaycan Hökuməti ilə birgə maliyyələşdirilən “Milli Su Təchizatı və Kanalizasiya xidmətləri üzrə İkinci Layihə” çərçivəsində Ağsu şəhərinin su təchizatının yenidən qurulması və kanalizasiya sisteminin yaradılması istiqamətində işlərin icrası davam etdirilib.

“Aqrolizinq” ASC -nin Ağsu rayon “Aqroservis” filialı üçün istehsalat bazası, rayonun Padar kəndində saatlıq istehsal gücü 30 kubmetr olan Qum-çınqıl karxanası, Ağsu şəhəri ilə Rirhəsənli kəndinin sərhədində yeni park, Ağsu şəhərində, eləcə də kəndlərdə onlarla ticarət, iaşə, məişət və servis xidməti obyektləri, plastik qapı-pəncərə hazırlayan sexlər, həmçinin digər xidmət və istehsal obyektləri istifadəyə verilib, Ağsu şəhərində dövlət fonduna aid olan bir yaşayış binasının dam örtüyü əsaslı təmir edilib. Kənd investisiya layihəsi çərçivəsində Pirhəsənli və Qaraqaşlı kənd qəbiristanlığının ətrafına tor hasar çəkilib, İlxıçı və Qaraqoyunlu kəndlərində kəndarası yollar, Çaparlı kəndində feldşer mama məntəqəsi təmir olunub. Səhərin mərkəzi küçələrinin tamamilə yenidən qurulması istiqamətində işlər davam etdirilir.

Vətəndaşlara məxsus fərdi evlərin, yardımçı tikililərin, ticarət, iaşə, məişət və digər xidmət obyektlərinin, ictimai və inzibati binaların görkəmi yaxşılaşdırılır, piyada səkiləri salınır, həyətyanı sahələrin küçələrə yaxın hissəsində mişar daşı ilə hasar tikilir, mövcud hasarlar eyni vəziyyətə gətirilərək üzlük daşlarla üzlənir. Yaşıllıq zolaqlarının salınması, ağac, gül və bəzək kollarının əkiliməsi istiqamətində işlər davam etdirilir, rayonun Pirhəsənli kəndində 500 ton kənd təsərrüfatı məhsulları saxlanılması üçün soyuducu anbarın, Səfərbərlik və Hərbi Xidmətə Çağırış üzrə Dövlət Xidmətinin Ağsu rayon şöbəsi, Dövlət Miqrasiya Xidmətinin regional idarəsi üçün inzibati binanın, onlarla ticarət, iaşə, məişət və servis xidməti obyektlərinin tikintisi, eləcə də rayon mərkəzində və kəndlərdə abadlıq, quruculuq, tikinti, sosial obyektlərin təmiri və bərpası istiqamətdə əsaslı işlər davam etdirilir.

Ötən yazılarımızda qeyd etmişdik ki, Ağsuda insanların işlə təmin olunması daim diqqət mərkəzindədir. Adı çəkilən toplantıda da bu barədə söz açıldı. Qeyd olundu ki, işsizlik probleminin həllinə köməklik göstərilməsi istiqamətində rayon Məşğulluq Mərkəzi tərəfindən müəyyən işlər görülüb. Hesabat dövründə 1023 nəfər vətəndaş işaxtaran kimi mərkəzdə qeydiyyatda olub, 137 nəfər işaxtaran kimi qeydiyyata alınıb, 81 nəfər göndəriş alaraq işlə təmin olunub. Hesabat dövründə işsizlik statusu alanlar cəmi 14 nəfər olub. Bu müddətdə sosial müdafiəyə daha çox ehtityacı olan vətəndaşlar üçün 6 kvota müəyyən edilib, 6 nəfər vətəndaş kvota yerinə göndərilərək münasib işlə təmin edilib.

Ağsu şəhərinin yaşayış massivlərinin qaz təchizatının yaxşılaşdırılması və rayonun kənd yaşayış məntəqələrınin qaz təminatının bərpası və yenidən qurulması işləri cari ilin birinci yarısında da davam etdirilib. Yeni tikilmiş mənzillərin qazlaşdırılması məqsədilə yeni qaz kəmərlərinin çəkilişi, eləcə də qaz almayan kənd yaşayış məntəqələrinin qazlaşdırılması üçün tikinti-quraşdırma işləri davam etdirilib.

Rayonun elektrik təsərrüfatında da yenidənqurma işləri davam etdirilib. Şəbəkənin balansında olan 10 kilovoltluq elektrik verilişi xətlərində 65 kilometr əsaslı, 4,9 kilometr məsafədə cari, 4 kilovoltluq elektrik verilişi xətlərində 2,1 kilometr məsafədə əsaslı təmir işləri görülüb. Ümumi gücü 7741 kilovatt olan 31 ədəd transformator yarımstansiyası cari təmir olunub, 71 ədəd Smart-kart tipli, 73 ədəd elektron sayğac quraşdırılıb. Ölkənin sosial-iqtisadi həyatında mühüm rol oynayan rabitə son illər yüksək inkişaf səviyyəsinə çatıb, bu inkişaf həm mövcud rabitə vasitələrinin intensiv istismarı, habelə yeni texnologiyaların və xidmət növlərinin yaradılması ilə səciyyələnir. Bu sahədə rayon poçtamtı və Telekommunikasiya Qovşağı tərəfindən müəyyən işlər görülüb.

Ənvər müəllim dedi ki, ilin sonuna kimi rayon iqtisadiyyatının daha da yüksəldilməsi, əhalinin sosial problemlərinin həlli, özəl sektorun inkişafına köməklik göstərilməsi, ərzaq təhlükəsizliyinin təmin edilməsi, abadlıq-quruculuq işlərinin aparılması, sənaye, tikinti, nəqliyyat və rabitə müəssisələrinin fəaliyyətinin müasir tələblər səviyyəsində qurulması istiqamıətində müvafiq tədbirlər həyata keçiriləcək. Yaxın aylarda əhalinin enerji daşıyıcıları ilə dayanıqlı təminatı və içməli su təchizatının yaxşılaşdırılması istiqamətində tədbirlər davam etdiriləcək, istehsal, xidmət və sosial-mədəni obyeklərin inşasına diqqət artırılacaq. Büdcə gəlirlərinin artırılması üçün mövcud qanunvericiliyin tələbləri yerinə - yetiriləcək, büdcə xərclərinin icrası tam təmin ediləcək. Cari ildə görüləcək işlər əhalinin məşğulluq səviyyəsinin yüksəldilməsində və maddi rifah halının yaxşılaşdırılmasında müstəsna rol oynayacaqdır.

Rayon rəhbəri əminliklə qeyd etdi ki, ağsulular Azərbaycan Prezidenti İlham Əliyevin ətrafında bundan sonra da daha sıx birləşəcək, ölkəmizin sosial-iqtisadi tərəqqisi naminə dövlətimizin genişmiqyaslı iqtisadi strategiyayasının həyata keçirilməsinə öz layiqli töhfələrini verəcəklər.

İlqar HƏSƏNOV

Xalq qəzeti.- 2013.- 28 iyul.- S. 6.