Lerik: bugünü dünənindən gözəl...

Dağlar diyarı Lerik günbəgün cilalanıb pardaxlanan tac kimidir. Yaz-yay aylarında buralar daha da gözəlləşir. Əsrarəngiz təbiət ürək açır, göz güldürür. Adamların da işə-gücə həvəsi artır. Şəhərdə və kəndlərdə səliqə-sahman, abadlıq-quruculuq tədbirləri genişlənir. Başqa sözlə desək, hər mənada zirvələr hədəfə çevrilir.

Lerikdə hazırkı il marafonunun yarısı diqqətəlayiq göstəricilərlə əlamətdardır. İcra hakimiyyətinin başçısı Rövşən Bağırovun hesabat məruzəsində nailiyyətlər xüsusi qeyd edilməklə bərabər, qarşıdakı vəzifələr nəzərə çatdırılıb.

Məruzədən götürdüyümüz bəzi statistik rəqəmlər mövcud vəziyyəti lazımınca səciyyələndirir. İlin ikinci rübündə ümumi məhsul buraxılışı keçən ilin müvafiq dövrünə nisbətən 1,2 faiz artaraq 20 milyon 547 min manata, kənd təsərrüfatı məhsulları 4 faiz artaraq 9 milyon 074 min manata, sənaye məhsulu 4,3 faiz artaraq 305 min manata, nəqliyyat xidməti 3 faiz artaraq 1 milyon 270 min manata, pərakəndə əmtəə dövriyyəsi 1,4 faiz artaraq 34 milyon 583 min manata, pullu xidmətlər 3,2 faiz artaraq 5 milyon 979 min manata çatmışdır. Əsas kapitala yönəldilmiş investisiyalar 3,4 faiz artaraq 3 milyon 390 min manat, tikinti-quraşdırma işlərinin həcmi 2,1 dəfə artaraq 2 milyon 104 min manat olmuşdur. Heyvandarlıq rayonun əsas iqtisadi sahələrindəndir. Mal-qaranın cins tərkibinin dəyişdirilməsi uğurla gedir. Görülmüş kompleks tədbirlər nəticəsində iribuynuzlu mal-qaranın, davarın baş sayı keçən ilin müvafiq dövrünə nisbətən artmışdır. Süd, ət, yumurta, yun istehsalı da çoxalmışdır. Taxıl zəmilərində əvvəlki illərə nisbətən məhsuldarlıq yüksəlmişdir.

Rayonun Piran kəndi yaxınlığında iş adamı tərəfindən yumurta, ət, quş istehsalı ilə məşğul olacaq broyler fabrikinin tikintisinə 2011-ci ildə başlanmışdır. Hazırda tikinti tamamlama mərhələsindədir. Obyektdə 120 nəfər işləyir. Müəssisənin ümumi dəyəri ilkin hesablamalara görə 18 milyon manatdır. İşin başa çatdırılması üçün Sahibkarlığa Kömək Milli Fondundan 6 milyon manat kredit götürülmüşdür. Müəssisədə 6 ferma yaradılmışdır, daha 3 fermanın yaradılması üçün iş aparılır. Eyni zamanda müəssisədə saatda 150 ton yem istehsal edən zavod və 5 min ton tutuma malik yem anbarı inşa edilmişdir. Müəssisə tam istifadəyə verildikdən sonra daimi iş yerlərinin sayı 200-ə çatdırılacaq. Daster kəndində broyler sexinin açıldığını da qeyd etmək lazımdır. Rayonda il ərzində 150 tondan çox bal istehsal olunur. Lakin əziyyətlə əldə edilən məhsulun satışında ciddi çətinliklər hələ də davam edir. Balın sənaye üsulu ilə qablaşdırılması bu problemin aradan qaldırılmasına, istehsalın yüksəlməsinə şərait yarada bilər. Emal müəssisələrinin yaradılması üçün uyğun ünvanlara müraciət edilmişdir. Lerik şəhəri də daxil olmaqla artıq 25 yaşayış məntəqəsi tam qazlaşdırılmışdır. Hazırda 30-a yaxın kəndin qazlaşdırılması ilə bağlı iş davam etdirilir.

Lerik şəhərində istinad divarları bərpa olunaraq üzlənmişdir. İndi İ.Yaqubov, E.Qarayev küçələrində, Lənkəran-Lerik yolunun 54-56-cı km-də, Lerik-Kəlvəz yolunun avtovağzal hissəsindən keçən ərazisində yenidənqurma işləri aparılır. Nizami küçəsində yolun kənarlarına yan daşları düzülür, səkilər salınır. A.Əsədullayev küçəsində istinad divarları milli ornamentlərə uyğun yenidən qurulur. Şəhərin simvolunu bildirən abidənin tikintisində işlər sürətlə aparılır. Eyni vaxtda 300 nəfər qonağı qəbul edə biləcək xeyir-şər evi inşa edilmişdir.

Mərkəzi xəstəxananın uşaq xəstəlikləri şöbəsinin əsaslı təmiri ilə əlaqədar işlər sürətlə aparılır. Rayon icra hakimiyyətinin daxili imkanları hesabına Lerik şəhər uşaq bağçası əsaslı təmir edilmişdir. Rayon üzrə bütün ATS-lər elektron tiplilərlə əvəzlənmişdir. Bu, əhalinin sürətli internet xidmətindən istifadəsini asanlaşdırmışdır.

Nücü, Molalan, Livədirqə, Bibyani kəndlərində 180 və Durğan, Nüvədi, Zəriküməco, Kələxan kəndlərində 80 şagird yerlik məktəb binalarının tikintisində son tamamlama işləri aparılır. Rayonda daha 39 məktəbin, 10 uşaq bağçasının tikintisi, 11 məktəbdə əlavə sinif otaqlarının inşası, 17 məktəbin və 3 uşaq bağçasının isə əsaslı təmiri nəzərdə tutulmuşdur. Həmçinin icra hakimiyyəti tərəfindən yerli büdcə vəsaiti hesabına Arta, Ağçay və Ərdəbilə kəndlərində yeni ibtidai məktəblərin tikintisinə başlanılmışdır. Ötən ilin aprelində Azərbaycan Respublikası Prezidentinin sərəncamı ilə Lerik-Qosmalian-Kəlvəz avtomobil yolunun tikintisi üçün maliyyə vəsaiti ayrılmışdır. Hazırda yolun tikintisində işlər sürətlə aparılır, 24 kilometr yol artıq asfaltlaşdırılmışdır. Yolun 12-ci kilometrində uzunluğu 26, eni 8, hündürlüyü 14 metr olan körpünün tikintisi başa çatır. (Yeri gəlmişkən, rayonda olarkən biz də bu yeni, rahat yolla xeyli irəlilədik. Sərt qayalıqlar, sıldırımlar arasından çəkilmiş keyfiyyətli asfalt yol milli iqtisadiyyatımızın əsl uğur göstəricilərindən sayılmağa layiqdir).

Bundan başqa, əhalinin daha çox istifadə etdiyi və sıx yaşadığı 50-ci km-Şingədulan-Xanagah, Piran-Hamarat, Lerik-Nuravud, Piran-Veri, Blaband-Çayrud yolları barədə də ilkin məlumatlar toplanmış, sənədlər hazırlanmışdır.

Son illərdə daxili imkanlar hesabına rayonun kəndlərarası yollarında əsaslı təmir-bərpa işləri görülmüş, çaylar üzərində körpülər, su ötürücüləri inşa edilmişdir. Əhalinin müraciətlərini nəzərə alaraq Dövlət Neft Şirkəti Piran-Hamarat-Tülüconu avtomobil yolunda qayaların partladılaraq yolun genişləndirilməsi və əsaslı təmiri üçün maliyyə vəsaiti ayırmışdır. Hazırda orada geniş iş cəbhəsi açılmışdır. Bürsülüm ərazisindəki çayın üzərində iki istiqamətdə körpü, Orand, Livədirqə, Vənədi kəndlərindəki çayların üzərində isə piyada keçidləri inşa edilmişdir. Murya və Livədirqə kəndlərində Milli Məclisin deputatı Iqbal Məmmədovun köməyi ilə yeni körpülər tikilərək may ayında istifadəyə verilmişdir.

Çörək sexi tikilmişdir. Burada 4 adda keyfiyyətli çörək məhsulları satışa çıxarılmışdır. Ərazidə süfrə suyu və şirə sexi istehsal edən müəssisə də inşa olunur. Lerik şəhərində iş adamları tərəfindən hər cür şəraiti olan yeni bazar inşa edilmişdir. Köhnə çörək zavodu da bərpa olunur. Rayonda sayca üçüncü dəfə keçirilən kredit yarmarkasının xətti ilə 108 nəfər sahibkara 11 milyon manatdan yuxarı güzəştli kredit verilmişdir.

Lerik şəhərində inşası 2011-ci ildə başlanan 17 meqavatlıq elektrik stansiyasının tikintisində işlər sürətlə davam etdirilir. Lerik-Yardımlı yüksək gərginlikli elektrik hava xətti inşa edilmişdir.

Qosmalian-Lerik su xəttinin çəkilişində qızğın tikinti işləri aparılır, şəhərdaxili su xətləri çəkilir, kanalizasiya sistemi qurulur, su anbarları inşa edilir. Tələbat duyulan bütün ərazilərə su çəkilişi məsələsi də gündəmdədir.

2013-cü ilin ikinci rübündə rayonun 21 inzibati ərazi dairəsinin 68 yaşayış məntəqəsində 2202 nəfər sakinin iştirakı ilə rayon icra hakimiyyəti başçısı tərəfindən görüş-qəbullar keçirilmişdir. Vətəndaşlar tərəfindən 257 məsələ qaldırılmışdır. Müraciətlərin bir çoxu yerindəcə həll edilmiş və ya həllinə tapşırıq verilmiş, digər məsələlər barədə yuxarı dövlət orqanları qarşısında vəsatət qaldırılmışdır.

Sonra rayon icra hakimiyyəti başçısının müavini, sosial-iqtisadi inkişafın təhlili və proqnozlaşdırılması şöbəsinin müdiri Habil Məlikov, statistika idarəsinin müdiri Ədail Məmmədov, 43 saylı yol istismar idarəsinin müdiri Elxan Əliyev, baytarlıq idarəsinin müdiri Gülmirzə Tağıyev çıxış edərək görülmüş işlər və qarşıda duran vəzifələr barədə danışmışlar. Cənab Prezidentin rəhbərliyi ilə aqrar rayon olan Lerikdə görülən işlərin əhali tərəfindən müsbət qarşılandığı, sahibkarlığa geniş meydan verilməsi xüsusi vurğulanmışdır.

Tədbir iştirakçıları adından Azərbaycan Prezidenti İlham Əliyevə müraciət qəbul edilmişdir.

Əli NƏCƏFXANLI

Xalq qəzeti.- 2013.- 30 iyul.- S. 6.