Zərdab: növrağınla öyünməyə haqqın var

İlin erkən yazında yolun Arana düşdüsə çox şeyə heyrətlənərsən. O da ola “seyrəngahı” şairləri vəcdə gətirən ana Kürün sahilləri...

Açığını deyim ki, mən doğma yurd yerimə Arandan keçib getsəm də bu bölgədə çox yerlərin özəlliklərini, bu ellərin özünəməxsus gözəlliklərini elə də yaxşı tanımırdım. Bir jurnalist kimi bu “kəsir”imi aradan qaldırmaq üçün ilk fürsətdən yararlanıb, uzun illər bu bölgəni qarış-qarış gəzən, bu elləri doğma kəndi kimi tanıyan həmkarım Ziyəddin Sultanovun təklifini qəbul edib onunla səfər yoldaşı olmağa qərar verdim...

Bölgə ilə tanışlığımızın ilk dayanacağı Zərdab rayonu idi. Sübh tezdən məni mənzil başına aparan Bakı-Yevlax-Qazax yolu boyu darıxdırıcı məqamlar yaşayacağımı zənn etsəm də, gördüklərim gözümü yumub bir çimir yuxulamağıma belə macal vermədi. Avtomobil Ələt qəsəbəsini keçib sağ tərəfə dönər-dönməz magistralda aparılan tikinti, genişləndirmə işlərinin indicə bitəcəyini gözləsəm də bu işlər on kilometrlərlə uzanır və az qala bütün yol boyu davam edirdi. Aparılan işin miqyasını təsəvvürə gətirəndə heyrətlənməyə, sözün əsl mənasında, qürurlanmaya bilmədim. Axı regionları, bütövlükdə ölkəni tərəqqi ünvanına daşıyan bir əsas infrastruktur da abad və rahat yollardır. Bu gün dövlətimiz mövcud imkanlardan istifadə edib yol infrastrukturunu, kənd yollarına qədər belə büs-bütün yenidən, müasir standartlar səviyyəsində tikirsə, şübhəsiz, bu, daha böyük inkişaf hədəflərinin göstəricisi kimi alqışlanır, xalqın sonsuz rəğbətilə qarşılanır...

Ucar rayonuna çatar-çatmaz avtomobilimiz sola dönüb Zərdab rayonuna istiqamət götürdü. Açığını deyim ki, bu yol bir qədər fərqli və narahat olsa da, yol boyu işləyən texnikanın çınqıl yaydığından aydın görünürdü ki, bu narahatlığın da ömrünə yaxın vaxtlarda son veriləcək...

Maşın Zərdab royununun ərazisinə daxil olanda yolundan-izindən də hiss edirsən ki, fərqli bir məkandasan. Yol kənarındakı taxıl zəmiləri ana Kürün gətirdiyi sərin mehdən xəfifcə dalğalanıb sanki bu ellərin qonaqlarını salamlayırlar. Şəhərə çatar-çatmaz yeni salınmış abad bir qəsəbə diqqətimizi cəlb edir. Belə qəsəbələrin erməni təcavüzündən didərgin düşmüş qaçqınlarımız üçün tikildiyinə adət etdiyimiz üçün fərqinə çox varmasam da, yaddaşımdan da kənar qoymadım. Beləcə, qızmar günəşin bərq vuran şəfəqləri altında, səliqə-sahmanı ilə diqqət çəkən Zərdab şəhərinin sağı-solu qızıl gül kolları əkilmiş küçələrindən keçib rayon icra hakimiyyətinin binasına çatırıq. Həyətdəki saysız-hesabsız pardaxlanmış qızıl güllər ilk təəsüratlarımı öz xoş ətri ilə təravətləndirdiyindənmi, yoxsa ilk gördüyüm mənzərələrin təsirindənmi, bilmirəm, yüksək bir əhvalla həmkarımla birgə jurnalist vəzifəmizin icrasına başlayırıq.

...Şəhərlə tanışlığımızın ilk ünvanı icra hakimiyyətinin binası oldu. Girişdəki xolldan sağda ümummilli lider Heydər Əliyevin hakimiyyətinin ilk illərində Zərdaba gəlişini əks etdirən şəkillərə diqqətlə baxdığımızı görən qocaman kişi bizə yaxınlaşıb sualımızı gözləmədən ömrünün ən xoş xatirəsini söyləyirmiş kimi dilləndi:

-Rəhmətliyin Zərdaba gəlişi bugünkü kimi yadımdadır. Bütün rayon əhli səhəri təlaş içində açmışdı. Qəzəblənmiş Kür yenə daşıb ətrafı cənginə almışdı. Əgər vaxtında Heydər Əliyevin qətiyyətli tədbirləri olmasaydı, kim bilir hansı faciələr yaşanacaqdı. Elə həmin gün – 1978-ci il may ayının 29-u başda özü olmaqla respublikanın bütün müvafiq strukturlarının rəhbərləri Zərdaba gəlmişdilər. Yalnız onun gəlişindən sonra əhali təskinlik tapdı və əmin oldu ki, Heydər Əliyev burdadırsa, demək hər şey qaydasında olacaq.

Ağsaqqalın məlumatlı adam olduğu hadisələri, o vaxtkı rayon rəhbərliyinin nam-nişanını dəqiq deməsindən də aydın görünürdü. Sonra öyrəndik ki, hazırda dövlət qulluğu təqaüdçüsü və rayon veteranlar şurasının sədri olan Hüseyn Həsənov həmin illərdə Zərdab rayon partiya komitəsinin ikinci katibi vəzifəsində çalışıb, həm də fövqəladə hallar komissiyasının sədri olub.

Ulu öndərin bu tarixi səfəri barədə təəsüratlar bununla bitmədi. Zərdab Rayon İcra Hakimiyyətinin başçısı Lütvəli Babayevlə görüşümüzdə də bu böyük insanın əvəzsiz xidmətləri xatırlandı və dövlət rəhbəri kimi Azərbaycanın bütün regionlarında baş verən hadisələrə şəxsi nəzarəti və diqqəti xüsusi qeyd olundu. Lütvəli müəllim ulu öndərin bu xarakterində xalqı üçün bir canıyananlıq, dərin sevgi olduğunu qeyd edərək, bu sevginin qarşılıqlı olduğunu diqqətə çatdırdı:

-Baxın, illər keçib, ancaq indi də Zərdabda yaşlı nəslin nümayəndələrindən kimi dindirsəniz, o tarixi ən kövrək duyğularla sizə danışacaq. Və çox maraqlıdır ki, 2010-cu ilin eynən həmin dövründə yenə Kürün səviyyəsi qalxdı, Türyançay və Göyçay çaylarında daşqın oldu. Prezident cənab İlham Əliyev bu barədə məlumat alan kimi dərhal müvafiq orqanlara tapşırıqlar verib az bir vaxtda rayona 120-dən çox texnika və 150-ə qədər canlı qüvvə göndərdi. Fövqəladə Hallar Nazirliyinin 30 yaxın şəxsi heyəti və çoxlu texnika səfərbər olundu. Rayondan 3 min nəfər canlı qüvvə təbii fəlakətdən ziyansız ötüşmək üçün bəndbərkitmə işlərinə səfərbər olundu. Dövlət başçısının hadisələri nəzarətdə saxlaması və çox operativ şəkildə lazımi tapşırıqlar verməsi Zərdabın ikinci dəfə də bu fəlakətdən faciəsiz və insan itkisi olmadan qurtarmasına imkan verdi.

Doğrudur, sahil boyu yaşayan bir çox ailələrin evlərinə maddi ziyan dəymişdi. Amma bu faciə deyildi. Çünki dövlət üçün vətəndaşın həyatının qorunmasını daha mühüm vəzifə hesab edən ölkə Prezidentinin tapşırığı ilə artıq dəyən ziyan aradan qaldırılıb. Şəhərin girişində rastlaşdığım, yazımın əvvəlində qeyd etdiyim müasir və yaraşıqlı təzə qəsəbə də məhz ziyan çəkmiş sakinlərə dövlətin töhfəsi imiş. Lütvəli müəllim məlumat verdi ki, rayonun “32 hektar”adlanan bu ərazidə təbii fəlakətdən ziyan çəkmiş 71 ailəyə yeni layihələr əsasında çox yaraşıqlı evlər tikilib istifadəyə verilmişdir. Dövlət bu ailələrin məktəb yaşlı uşaqlarını da yaddan çıxarmamış və qəsəbədə 132 şagird yerlik yeni məktəb binası da tikilib başa çatdırılmışdır. Məktəbin açılışı bu ilin sentyabrına nəzərdə tutulub. Hələ üstəlik, bizim səfərimiz ərəfəsində qəsəbəyə çəkilmiş yeni qaz xəttinin açılışı da həyata keçirilib.

Qazdan, bölgələr üçün xüsusi əhəmiyyət daşıyan mavi yanacaqdan söz düşəndə bizi təəccübləndirən dah bir faktla tanış olduq. İcra hakimiyyətinin başçısı bildirdi ki, nə qədər qəribə olsa da, son vaxtlara qədər rayon mərkəzindən başqa, bölgənin 42 məntəqəsinin heç birində qazlaşma aparılmamışdır. İndi isə rayonun Təzəkənd, Qaraoba, Qaravəlli və Dəli Quşçu kəndlərində qazlaşdırma tam başa çatdırılıb. 10-a yaxın kənddə-Salahlı, Gəlmə, Xanməmmədli, Dəkkəoba, Pərvanlı, Hüseynxanlı və digərlərində qaz xəttinin çəkilişi davam etdirilir.Bu gün evində “mavi yanacaq” işlədən və qışda, payızda yanacaq problemi yaşamayan Zərdabın adıçəkilən kəndlərinin sakinləri deyəndə ki, “bu ümummilli lider Heydər Əliyevin qurduğu müstəqil dövlətçiliyin və Prezident İlham Əliyevin tərəqqi və inkişaf strategiyasının təsdiqə ehtiyacı olmayan parlaq göstəricilərindəndir,” buna hansı əks arqument gətirəsən. Amma bu kəndlərlə qazlaşdırma bitməyib və regionun sosial -iqtisadi inkişaf proqramında nəzərdə tutulan bütün kəndlərin qazlaşdırılması layihəsi uğurla davam etdirilir.

Tanış olduğumuz nailiyyətlər, gördüyümüz mənzərələr nə qədər sevindirsə də Kürün nə vaxtsa yenə qəzəblənə biləcəyi fikri məni rahat buraxmadı. Zarafat deyil, 84 kilometrlik bir ərazidə nəhəng bir əjdaha kimi Zərdabın belinə dolanan Kür sirrli bir sükutla axsa da, babalarımızın ona “Dəli” ayamasını nahaqdan vermədiyini tarix dönə-dönə təsdiqləyib. Bəs indi Aran və Muğan torpağına can verən, bu torpaqda min cür nemətin yetişməsində əvəzsiz rol oynayan bu əjdaha yenidən qəzəblənsə necə olacaq? Onu ram edəcək qabaqlayıcı tədbirlər görülübmü?

-Görülüb,- dedi Lütvəli müəllim. - Elə 2010-cu ildən başlayaraq Kürün dolandığı rayonun bütün ərazilərində sahilbərkitmə və bəndqaldırma işləri görülüb. Göyçay və Türyançay çaylarının rayon ərazisindən keçən 83 kilometrə qədər olan hissəsində çayların məcrasının təmizlənməsi və bəndlərin təmiri işi həyata keçirilmişdir. Mütəxəssislərimiz də cayda suyun səviyyəsini daim nəzarətdə saxlayırlar. Bu məsələlərlə bağlı dövlət başçısının da xüsusi tapşırıqları və tövsiyələri var.

İçimizdəki bu narahatlıqlar bəlkə bir də ona görə idi ki, son 5 ildən artıq bir müddətdə Zərdabın çox böyük inkişaf yolu keçdiyini görmüşdük. Sürətlə həyata keçirilən tikinti-abadlıq və yenidənqurma işləri həm şəhərin, həm də qəsəbə və kəndlərin simasını kökündən dəyişib. İnsanlar dövlətin regiona olan diqqətinin günü-gündən artdığını gördükcə bu torpağa daha çox bağlanır, doğma ocağında rahat güzaran qurmaq üçün yaradılan imkanlardan maksimum istifadə etməyə çalışır.

Rayonun sosial-iqtisadi göstəricilərinə nəzər salanda çox da böyük olmayan Zərdabda qürur gətirən bir mənzərənin şahidi olursan. Yəni rayon sadəcə xarici görkəmi, tikililəri ilə deyil, həm də iqtisadiyyatda, təhsildə və sosial sahələrdə əldə etdiyi nailiyyətlərlə də bir vətəndaş məmnunluğu doğurur. Məsələn, 2012-ci ilin sosial -iqtisadi göstəricilərinə görə Zərdab bir ildə iqtisadiyyatın əsas sahələrindən 98 milyon 246 min manatlıq məhsul və xidmətlər istehsal etmişdir. Bunun 43, 4 faizi kənd təsərrüfatının, 16, 3 faizi ticarət və xidmətin , 37,3 faizi tikintinin, 1,7 faizi isə sənayenin payına düşür. İllərin müqayisəsinə diqqət yetirsək görərik ki, 2011-ci illə müqayisədə məhsul istehsalı sənaye sahəsində 16,8 faiz, kənd təsərrüfatında 4,2 faiz, tikintidə 15,2 faiz, ticarət üzrə isə 4,8 faiz artmışdır. Adambaşına düşən məhsul istehsalı da 15, 5 faiz artaraq 1776,6 manat təşkil etmişdir. Belə bir dinamika ilk növbədə kənd zəhmətkeşlərinin pul gəlirlərinin artmasına öz təsirini göstərmiş və orta aylıq əmək haqqı 211, 8 manata çatmışdır ki, bu da 2011-ci ildəkindən 22, 8 faiz çoxdur.

İqtisadi rəqəmlərdən də aydın görünür ki, Mərkəzi Aran zonasında, Şirvan düzündə yerləşən bu rayonda iqtisadiyyatın əsası kənd təsərrüfatından ibarətdir. Tarixən də kənd təsərrüfatı məhsullarının istehsalı Zərdab rayonunun iqtisadiyyatında prioritet təşkil edib. Sovet dönəmində pambıqçılığın, taxılçılığın, baramaçılığın və heyvandarlığın xüsusilə üstünlük təşkil etməsinə baxmayaraq, indi taxılçılıq və heyvandarlıq iqtisadiyyatın bu bölməsinin əsasını təşkil edir. Taxılçılıq sahəsində son illər əldə edilmiş uğurları, sözün əsl mənasında rayon icra hakimiyyətinin sahibkarlığın inkişafına verdiyi böyük diqqət və qayğı ilə əlaqələndirmək daha doğru olardı. Əlbəttə, bu işdə əsas pay sahibi yenə Azərbaycan hökumətidir. 2007- 2012-ci illər ərzində kənd təsərrüfatı məhsulları istehsalçılarına 7,6 milyon manat subsidiya ayrılmış, İqtisadi İnkişaf Nazirliyinin Sahibkarlığa kömək milli fondu tərəfindən son bir neçə ildə 17 sahibkara 87 min manat güzəştli kredit ayrılmışdır. Görülən tədbirlər 2009-cu ildə rayonun tarixində ilk dəfə rekord həcmdə-52 min ton taxıl istehsal etməyə imkan vermişdir. Bu isə rayonda adambaşına 1 ton məhsul deməkdir.

Fermerlərlə söhbətdən məlum oldu ki, bu il də Zərdabda bol taxıl məhsulu gözlənilir. Mövsüm ərzində 17min 431 hektar sahədə taxıl əkmiş fermerlər artıq zəmilərdə arpa biçininə başlamışlar. Ümumilikdə taxıl biçininə rayon üzrə nə az-nə çox 100-ə yaxın texnika səfərbər olunmuşdur. Fermerlər, yarızarafat “düşər-düşməzi olar” deyə bildirirlər ki, “təbiət şıltaqlıq etməsə 2009-cu ilin rekordunu təzələyəcəyik. Buna zəmilərdəki bol taxılın olması da zəmanət verir...

Fermerlərdən ayrılıb şəhərin mərkəzinə üz tuturuq. Şəhərin küçə və yollarında bir müddət əvvəl çəkilmiş asfaltın qazılıb yenidən çınqıl döşəndiyinə qəribə baxdığımızı görəndə Lütvəli müəllim təccübümüzü başa düşdüyünü bildirib dedi:

- Yeni asfalt döşənmiş, abad yolların bərbad vəziyyətə düşməsi təbii ki, bizi də müəyyən mənada xoş təsir bağışlamazdı. Əlbəttə, əgər bütün bunlar şəhər və qəsəbələrimizin su və kanalizasiya sisteminin ən müasir standartlarla çəkilişi naminə olmasaydı.

Doğrudur, əvvəlki illərdə respublika Ekologiya və Təbii Sərvətlər Nazirliyi rayonun müxtəlif ərazilərində 17 modul tipli sutəmizləyici qurğu quraşdırmış və 194 bulaq tikib istifadəyə vermişdi. Hazırda isə Zərdabın içməli su problemini kökündən həll etmək istiqamətində çox böyük layihə həyata keçirilir.

Bu layihə uzunluğu 72 kilometr olan Küllülü-Zərdab içməli su kəməridir ki, 450 millimetrlik boru xətti ilə çəkilmişdir. Küllülüdə 5 min kubmetrlik bir, Zərdabda isə hər biri 2 min kubmetrlik iki su anbarı tikilir. Bütün bu işlər başa çatdıqdan sonra 36 min Zərdab sakini təmiz bulaq suyu ilə təmin olunacaqdır. Bunlarla paralel olaraq şəhər daxilində müxtəlif diametrli borularla su və kanalizasiya xətləri çəkilməkdədir. Hazırda 23 min sakin standartlara cavab verən təmiz içməli su ilə təmin olunur.

Əkin sahələrinin suvarma suyu ilə təminatının yaxşılaşdırılması istiqamətində də diqqət çəkəsi işlər görülüb. 1000 kilometrə qədər suvarma kanalı lildən təmizlənmiş, ilk dəfə Zərdab rayonunun Gəlmə kəndi ərazisində şüşə lifdən hazırlanmış 800 metrdən çox asma latok kanallar tikilmişdir.

Rayonda son illər tikinti-yenidənqurma işləri daha çox diqqətçəkən sahələrdəndir. Əhalinin Sosial Müdafiə Mərkəzi üçün inzibati bina, 200 yerlik Uşaq İncəsənət Məktəbi, Dövlət Bayrağı Meydanı, Qoruqbağı kəndində uşaq bağçası, Şəftəhal kəndində tibb məntəqəsi, Çallı kəndində doğum məntəqəsi, üç kənddə 256 nömrəlik elektron ATS, beş kənddə yeni poçt binası, Telemetrik Seysmik Stansiya, Zərdab Rayon Yanğından Mühafizə Hissəsi üçün yeni inzibati bina, Şəhid ailələri və Qarabağ əlilləri üçün 16 mənzilli yaşayış binası və onlarla belə tikililər, sözün əsl mənasında, Zərdabın simasında Azərbaycan regionlarının yeni bir yüksəliş dövrü yaşadığına parlaq misaldır. Bu tikintilər sırasına Prezident İlham Əliyevin 2012-ci il 7 oktyabr tarixli səfəri zamanı açılışında şəxsən iştirak etdiyi Heydər Əliyev parkındakı Heydər Əliyev Mərkəzini, Gənclər Mərkəzini, YAP Zərdab rayon təşkilatının binasını, Veteranlar evini və Yaradıcılıq evini də əlavə etsək, güman ki, mənzərə daha möhtəşəm görünəcək.

Tikinti və yenidənqurma işləri isə davam etməkdədir. Hazırda təkcə Suvarma Sistemləri İdarəsində regional mərkəzin ofis binası, “Aqrolizinq” ASC-nin rayon filialı üçün ofis binası və regional gübrə anbarı, rayon polis şöbəsi üçün yeni inzibati binanın tikintisi də tamamlanmaq üzrədir.

Bu tikintilər sırasında məktəb tikintisi xüsusilə seçilir. Rayon icra hakimiyyətinin başçısı Lütvəli Babayev qeyd etdi ki, 30 ilə yaxın bir müddətdə cəmi 3 məktəb binası tikilmişdisə, son 3 ildə Zərdabda 13 məktəb tikilib istifadəyə verilmiş, 3 məktəbin tikintisində isə tamamlama işləri başa çatmaq üzrədir. Məlikumudlu kəndində 360 yerlik, Alıcanlı kəndində 364 yerlik, Şıxbağı kəndində 180 yerlik, Xanməmmədli, Cilovxanlı və Ağabağı kəndlərinin hər birində 80 yerlik məktəb binaları bu gün ən müasir standartlara cavab verən təhsil müəssisələridir.

Bu gün ölkədə yaşlı nəslin əksər nümayəndələri dövlət başçısının bölgələrə mütəmadi səfərlərini, regionlarda işlərin gedişi ilə şəxsən tanış olmasını, müvafiq tapşırıqlar və göstərişlər verməsini ulu öndər Heydər Əliyevin iş prinsipi ilə eyniləşdirirlər. Təbii ki, bunda böyük həqiqət var. Elə Zərdabda həmsöhbət olduğumuz insanlar da, rayon rəhbərliyi də etiraf etdi ki, belə bölgənin bir inkişaf tempi ilə irəliləməsində Azərbaycan Respublikasının Prezidenti cənab İlham Əliyevin bu rayona 2006 və 2012-ci illərdə tarixi səfərlərinin çox böyük əhəmiyyəti olmuşdur. Hazırda tikilməkdə olan bir çox obyektlərin inşası məhz dövlət başçısının tövsiyyələri ilə həyata keçirilir. Digər tərəfdən, ölkə Prezidenti Zərdabda həyata keçirilən tikinti və yenidənqurma işlərinin sürətlənməsinə təkan verən bir neçə sərəncam imzalamışdır ki, bu sərəncamlar sakinlərin böyük rəğbəti ilə qarşılanmışdır. Məsələn, Azərbaycan Respublikası Prezidentinin 11 may 2011-ci il tarixli sərəncamı ilə Prezidentin Ehtiyat Fondundan ayrılmış 2 milyon manat vəsait rayonda biləvasitə təmir-tikinti və abadlıq işlərinə yönəldilmişdir.

Azərbaycan Respublikasının Prezidenti cənab İlham Əliyevin 19 iyun 2012-ci il tarixli sərəncamı isə, yazımızın əvvəlində qeyd etdiyimiz kimi, son illər respublikada böyük vüsət almış şəhər və kəndlərarası avtomobil yollarının tikintisinin Zərdab rayonunda da davam etdirilməsinə imkan yaratmışdır. Sərəncama əsasən, Azərbaycan Respublikasının 2012-ci il dövlət büdcəsinin əsaslı vəsait qoyuluşu xərclərinin bölgüsündə doqquz min sakinin yaşadığı 8 yaşayış məntəqəsini birləşdirən Zərdab-Yuxarı Seyidlər-Siləyli avtomobil yollarının tikintisi və yenidən qurulması üçün Zərdab Rayon İcra Hakimiyyətinə nəzərdə tutulmuş vəsaitdən ilkin olaraq 5,4 milyon manat ayrılmışdır. Bu gün artıq yolun əsas hissəsi 10,5 kilometri istifadəyə hazırdır. Bu il yol tikintisini davam etdirmək üçün yenidən 6,45 milyon manat dövlət vəsaiti ayrılmışdır və işlər tam sürətlə davam etdirilir. Zərdab - Mollakənd yolunun Zərdab rayonu ərazisindəki 26 kilometrlik hissəsinin 17 kilometrinə ikinci qat asfalt döşənmişdir.

Rayonun iqtisadi potensialı artdıqca əhalinin işlə təminatı da yaxşılaşır. Statistika göstərir ki, rayonda inkişaf tempinin başladığı son 7-8 ildə 8 mindən artıq yeni iş yeri yaradılmışdır. İş yeri isə sosial rifahı təmin edən əsas mənbədir.

...İşimizi yekunlaşdırıb, Zərdabın tərəqqisinə çalışan el oğulları ilə bir qismət çörək kəsmək üçün Kürün sahilindəki yeməkxanalardan birinə gəldik. Amma yemək bir bəhanə oldu. Burada da söhbətimiz son illər ölkədə gedən tərəqqi və inkişafın sürətlə regionlara keçdiyindən və bölgələrin simasını necə dəyişdiyindən getdi. Biz Zərdabda gördüklərimizə haqqına tərif dedikcə, zərdablı dostlarımız öz doğma yurd yerlərinin indiki növrağından qürur anları yaşayırdılar. Biz də heyranlıqla baxır və bir anlıq düşünürdük ki, öz əlləri ilə bu növrağı yaradanların buna tam haqları var. Elə bu sakit-sakit öz yolunda olan Kür çayı kimi. Nə qədər şıltaqlıq göstərsə də, sahillərini aşıb təhlükə yaratsa da, bu yerlərin növrağında onun da payı az deyil. Ən azından lil, bulanıq axan suyunun hikməti ilə bu ellərə ruzi- bərəkət gətirdiyinə görə. Deyəsən sahilindəki Zərdab seyrəngahının növrağı onu da razı salırdı. Yoxsa...

İlqar RÜSTƏMOV,

Ziyəddin SULTANOV

Xalq qəzeti.- 2013.- 2 iyun.- S. 6.