Gənc təbiblər təltif edildilər

Sumqayıtda 17 iyun – Tibb İşçiləri Günü münasibətilə gənc həkimlərdən bir qrupu ilə görüş keçirilmişdir. Səhiyyə şöbəsinin müdiri, tibb üzrə fəlsəfə doktoru Ələkbər Tağıyev tədbiri açaraq Milli Qurtuluş Gününün və tibb işçilərinin peşə bayramının tarixi əhəmiyyətindən danışmışdır.

Sonra Səhiyyə İşçiləri Həmkarlar İttifaqı Sumqayıt Şəhər Şurasının sədri Elmira Quliyevanın şəhər səhiyyəsi haqqında məruzəsi dinlənilmişdir.

Gənclər və İdman Baş İdarəsinin rəisi Musa Həsənov səhiyyə müəssisələrində çalışan gənclərin şəhərin ictimai-həyatında fəal iştirakından, səhiyyə şöbəsinin nəzdində üç il öncə yaradılan Gənc Təbiblər Şurasının fəaliyyətindən bəhs etmişdir. O, şəhərin ictimai həyatında fəallığı ilə seçilən bir qrup gənc tibb işçisinə Baş idarənin fəxri fərmanlarını, hədiyyələrini və gül dəstələrini təqdim etmişdir.

Sonra qabaqcıl tibb işçilərinə Səhiyyə İşçiləri Həmkarlar İttifaqı şəhər şurasının hədiyyələri və gül buketləri təqdim edilmişdir.

Əli NƏCƏFXANLI

Xalq qəzeti.- 2013.- 19 iyun.- S. 8.