Gədəbəy: tərəqqi və rifah əsas hədəfdir

Bu ucqar dağ rayonunda elə bir sahə yoxdur ki, diqqətdən kənarda qalsın

May ayı başa çatsa da dağların başında hələ də qar var. Adama elə gəlir ki, hətta əl uzatsan çatar. Ani bir üşütmə də keçir bədənindən. Gədəbəyin özündə isə əməlli-başlı istidir. Bu hərarət adamların üz-gözünə də hopub. Xüsusən də çöldə işləyən, hörgü hörən, yaşıllıq salan, səki daşları düzən, fasad quran ustalar, fəhlələr üçün artıq əsl yaydır. Onlar həvəslə işləyirlər və günəşin nə vaxt boylanıb, nə vaxt dağların o tayına adlamasından xəbərləri belə olmur. Bəli, Gədəbəydə sözün əsl mənasında iş gedir. Rayon icra hakimiyyəti aparatı işçilərinin də rəngi-ruhu dəyişib. Artıq indidən sifətlərində günəşin saldığı izlər hiss olunur. Çünki bütün günü tikinti obyektlərindədirlər, yollarda, park və xiyabandadırlar.

Obyektlərin isə sayı-hesabı yoxdur. Şəhərin girəcəyindəki körpünün o biri başında orijinal üslubda böyük bir bazar kompleksi tikilir. Köhnə bazar mərkəzdə əsl tıxac yaradır, heç bir şəraiti yoxdur, antisanitariya mənbəyidir. Buna görə də əhali təzə bazarın tezliklə açılacağı günü səbirsizliklə gözləyir. Bir neçə ay qabaq köhnə bazarda baş verən yanğından bəzi qüvvələrin necə şou düzəltmələrindən, böhtan, şər dolu yazılarından, yəqin ki, xəbəri olanlar var. Amma bütün bunlar Gədəbəydə aparılan böyük işlərə qətiyyən kölgə sala bilməz. Əvvəla, ucqar dağ rayonuna ölkə Prezidenti İlham Əliyev xüsusi diqqət və qayğı göstərir. Bir neçə ilə kimi bu rayonun nə düz-əməlli bir yolu, körpüsü, məktəb binası, səhiyyə ocağı, nə də işığı, qazı, suyu vardı. Amma indi tamam başqa mənzərədir. İşlədiyi bir il ərzində rayon ictimaiyyətinin hörmətini qazanan Ramiz Yediyarov əmindir ki Gədəbəy tezliklə Azərbaycanın ən diqqətçəkən guşələrindən birinə çevriləcək və özünün təkcə təbiəti ilə deyil, həm də infrastrukturu ilə dünyanın hər yerindən turist axınına imkan yaradacaqdır.

Keçən ilin sentyabrında ölkə başçısının Gədəbəy-Novosaratovka-Qaravəlilər avtomobil yolunun tikintisi ilə bağlı sərəncamı oldu. Heç bilirsiniz, adamlar necə sevinirdilər?! Zarafat deyil, 56 kilometr uzunluğu olan bu yoldan Gədəbəy əhalisinin az qala 70 faizi istifadə edir. İlkin olaraq ayrılmış 3 milyon vəsait hesabına 2012-ci ildə yolun 10 kilometri asfaltlaşdırıldı. Ötən ilin sonlarında yolun tikintisini davam etdirmək üçün respublika Nazirlər Kabinetinin müvafiq sərəncamı ilə qalan vəsait ayrılmış və bunun hesabına yolun 7,4 kilometri də asfaltlaşdırılmışdır.

Şəhərin su, kanalizasiya sistemini yaxşılaşdırmaq üçün xüsusi layihə hazırlanıb və yaxın vaxtlarda həyata keçiriləcəkdir. Gədəbəyin elə bir kəndi qalmayacaq ki, təbii qaz almasın. Körpülər, yollar tamamilə yenidən qurulacaq və hazırda qurulur. Arıxdam kəndində Çolpan çayı üzərində aşırımı 84 metr olan yeni körpünün tikintisi davam etdirilir. Rayonun girişində, Xarxar kəndi ərazisində yolun hər iki tərəfində istinad divarlarının tikilməsi və öz əzəmətinə, nəhəngliyinə görə Azərbaycanda ikinci olacaq bir körpünün tikintisi Gədəbəyin həyatında mühüm hadisə kimi dəyərləndirilir. Biz inşaatçıların çox böyük həvəslə və gərgin işlədikləri həmin obyektə baş çəkdik və düzü, belə bir qənaətə gəldik ki, bu gün Gədəbəydə iş görən hər bir kəs sevinir və ondan hədsiz qürur hissi keçirir. Bax, elə bunun özü göstərir ki, Gədəbəy hər kəsin ürəyindədir, qəlbindədir.

Şəhərdəki Heydər Əliyev parkının girişi yenidən inşa olunur, ətrafda geniş abadlıq, quruculuq işləri aparılır, yaşıllıqların, gül və çiçək kollarının sayı artırılır, səkilər düzəldilir. Ötən həftə park və onun ətrafında keçirilən ümumşəhər iməciliyində xeyli iş görülüb, ərazi daha cəlbedici olub. Bir qədər aralıda ölkə Prezidenti İlham Əliyevin təşəbbüsü və köməyi ilə inşa olunan aşıq musiqi məktəbinin binası, onun qarşısında ucaldılan Aşıq Ələsgərin orijinal abidəsi diqqəti cəlb edir. Əks istiqamətdə, yolun o biri tərəfində rayon məhkəməsinin yenicə istifadəyə verilmiş binası görünür. Qeyd edək ki, indiyədək Gədəbəydə inzibati, ictimai çoxmərtəbəli binalar, demək olar ki, yox dərəcəsində olub. Amma indi onların sayı ilbəil, hətta aybaay artır. Özü də bu binalar öz orijinallığı, klassik memarlıq üslubu ilə seçilir.

“Ana” xatirə kompleksində aparılan əsaslı yenidənqurma işləri diqqətimizi cəlb etdi. Parkın lap yaxınlığında yerləşən kompleks öz görkəmini dəyişir.

Gədəbəyin əsas girişi hesab edilən Heydər Əliyev prospekti tamamilə yenidən qurulur. Əvvəla, buradakı primitiv tikililər ləğv olunmuş, onların yerində, bir qədər aralıda müasir üslubda obyektlər inşa olunmuşdur. Prospektdəki binaların, o cümlədən Mədəniyyət evinin, dördmərtəbəli inzibati binanın və digər tikililərin fasadları yeni müasir tərtibatda təmir olunub, şəhərin giriş hissəsi abadlaşdırılıb. Prospektdəki istinad divarları yeni tərtibatda üzlük daşlarla işlənir, ticarət obyektlərinin dam örtükləri və istinad divarları yenidən qurulur və bunlar şəhərə xüsusi gözəllik gətirir. İndiyədək 15-dək belə tikili qaydaya salınıb.

Yuxarıda qeyd etdiyimiz kimi, yeni binaların inşasına xüsusi diqqətlə yanaşılır və bu iş tamamilə rayon icra hakimiyyətinin nəzarətindədir. Rayon mərkəzində Heydər Əliyev Mərkəzinin və Bayraq Meydanının, qaz istismarı sahəsi və Fövqəladə Hallar Nazirliyi rayon şöbəsinin inzibati binalarının da tezliklə inşa olunması bu sahədə ümumi mənzərəni xeyli dəyişdirəcəkdir.

Ölkə Prezidentinin 2009-cu il mayın 26-da Gədəbəyə ikinci səfəri zamanı bir sıra obyektlərin təməli məhz onun xeyir-duası və iştirakı ilə qoyulmuşdur. Onlardan biri də adını çəkdiyimiz aşıq musiqi məktəbidir. Bu möhtəşəm obyekt, o cümlədən Gədəbəy mineral sular istehsalı MMC, eləcə də “Halal qida” MMC-nin kartofsaxlama anbarı istismara tam hazırdır. Dövlət Proqramına uyğun olaraq hazırda rayonun 180 şagird yerlik 1 saylı Qoşabulaq, 180 şagird yerlik Samanlıq və 480 şagird yerlik Arıxdam kənd tam orta məktəblərində tikinti işləri davam etdirilir. Bu il həm də Moruxlu və İsalı kənd tam orta məktəblərinin tikintisi nəzərdə tutulur.

...Gədəbəydə elə bir sahə yoxdur ki, unudulsun, qayğıdan, diqqətdən kənarda qalsın. Ən maraqlı və təqdirəlayiq haldır ki, bu işlər bilavasitə rayon icra hakimiyyətinin nəzarəti və köməyi ilə həyata keçirilir. Rayon icra hakimiyyətinin başçısı Ramiz Yediyarov söhbət zamanı dedi ki, biz hamımız icraçıyıq. Bu böyük işlərin arxasında ölkə rəhbərimiz cənab İlham Əliyev dayanır. Bizi ruhlandıran, həvəsləndirən də cənab Prezidentimizin Gədəbəyə və gədəbəylilərə diqqəti və qayğısıdır.

Hamlet QASIMOV

Xalq qəzeti.- 2013.- 5 iyun.- S. 6.