Azərbaycan ordusu yüksək döyüş hazırlığına, müasir hərbi texnika və silah sistemlərinə malikdir

Azərbaycan Silahlı Qüvvələrinin yaranmasının 95 illiyi münasibətilə paytaxtımız Bakı şəhərində möhtəşəm və hamının heyranlıqla izlədiyi hərbi parad keçirildi. Milli Ordumuzun canlı qüvvə, texniki-hərbi təchizat kontingenti ən yüksək səviyyədə nümayiş etdirildi. Əminliklə deyə bilərik ki, həmin gün bütün dünyanın, o cümlədən bədxah qonşularımızın diqqəti Bakı şəhərinə yönəlmişdi. Azərbaycan Ordusu öz qüdrətini artıqlaması ilə göstərməyi bacardı.

Təntənəli hərbi paradı Azərbaycan Respublikasının Prezidenti, Ali Baş Komandan İlham Əliyev izləmişdir. Paradda Silahlı Qüvvələrin bütün qoşun növlərinin, hərbi birlik və birləşmələrinin, xüsusi təyinatlı təhsil müəssisələrinin, həmçinin qanunvericilikdə nəzərdə tutulan başqa silahlı birləşmələrin 5 min nəfərlik şəxsi heyəti, 300-dək hərbi texnika və silah sistemləri, 100-dən çox döyüş təyyarəsi və vertolyot, 40-dək gəmi iştirak etmişdir. Bir sözlə Azərbaycan bütün tarixi ərzində belə hərbi paradın şahidi olmamışdı. Bu, düşmənə, sözün həqiqi mənasında əzələ nümayişi və “göz dağı” vermək demək idi. Bu, Azərbaycan xalqının, dövlətinin dünyada sülhün və sabitliyin qorunmasında nə qədər maraqlı olduğundan savayı, eyni zamanda, pozulmuş hüquqlarının qaytarılması uğrunda, yeri gələrsə, sonacan mübarizə aparmaq iqtidarında olmasını da açıq-aşkar sübut etdi.

Yadımızdadır, Ermənistanın müstəqilliyinin 20-ci ildönümü münasibətilə İrəvanda keçirilən hərbi parad dünya mətbuatında geniş müzakirəyə səbəb olmuşdu. Əlbəttə ki, xoş sözlər bildirilmədi, əksinə, paradda əsasən Rusiya hərbçilərinin iştirakı və meydana çıxarılan texnikanın köhnə olması rişxəndlə vurğulandı. Hətta, elə erməni saytı olan “Tert.am”ın yazdığına görə, paradı açan Ermənistanın müdafiə naziri Seyran Ohanyanın rus əsgərlərini rus dilində salamlaması vəziyyəti daha da qəlizləşdirmişdi. Bu, Ermənistanın Rusiyanın forpostu olduğuna dair söylənilən fikirlərin boş yerə yaranmadığını bir daha üzə çıxarmışdı.

Bu barədə hətta məşhur “Regnum” agentliyi də öz qeydlərini vurğulamış və Azərbaycanın bütün sahələrdə Ermənistanla müqayisədə daha üstün hərbi parad keçirdiyini, eləcə də daha müasir və güclü silah-sursata malik olduğunu qeyd etmişdi. Bu gerçəklik Bakıda təşkil olunan paradda özünü növbəti dəfə sübut etdi.

Hərbi qüdrətimizin bugünkü səviyyəsi, heç şübhəsiz, vaxtilə ulu öndər Heydər Əliyevin əsasını qoyduğu milli ordu quruculuq siyasətinin məntiqi nəticəsidir. Məhz müasir Azərbaycanın qurucusu Heydər Əliyevin gərgin fəaliyyəti və prinsipial mövqeyi nəticəsində ordumuzda güclü təşkilatlanma aparıldı. Bu missiya İlham Əliyev prezident seçildikdən sonra da qətiyyətlə davam etdirildi və gördüyümüz kimi, hazırda ordumuz öz güc-qüdrətini ən yüksək səviyyəyə qaldıra bilmişdir.

Möhtəşəm paradda iştirak edən ölkəmizin Prezidenti, Ali Baş Komandan İlham Əliyev hərbçilər qarşısında çıxış edərək ordu quruculuğu barədə maraqlı fikirlər səsləndirdi. Dövlət başçısı dedi: “ Ordu quruculuğu bizim üçün ən başlıca, ən prioritet məsələdir. Bu, hər bir ölkə üçün belə olmalıdır. Çünki hər bir ölkə özünü müdafiə etməlidir. Xüsusilə müharibə şəraitində yaşayan ölkələr üçün bu, çox böyük əhəmiyyətə malik olan məsələdir”.

Ölkəmizin müharibə şəraitində yaşamasına diqqət çəkən Prezident bildirdi ki, müharibə hələ bitməyib. Müharibənin birinci mərhələsi başa çatmışdır. Bizim ordumuz hər an hazır olmalıdır ki, öz ərazi bütövlüyünü istənilən yolla bərpa etsin. Uzun illərdir ki, Ermənistan-Azərbaycan, Dağlıq Qarabağ münaqişəsi həllini tapmır. Uzun illərdir ki, bu ədalətsizlik davam edir. Ölkəmizin beynəlxalq birlik tərəfindən tanınmış torpaqları işğal altındadır. Azərbaycanlılara qarşı etnik təmizləmə siyasəti aparılmış, xalqımıza qarşı Xocalı soyqırımı törədilmişdir. Bütün beynəlxalq təşkilatlar Azərbaycanın mövqeyini müdafiə edir.

Əlbəttə, cənab Prezidentin fikirləri təsadüfi deyildir. O, bu mücadilənin Azərbaycanın haqlı mübarizəsi olduğuna eyham vurur və ordumuzun gündən-günə qüdrətlənməsinin səbəblərini açıqlayır. Yəni biz soyqırımına, torpaq itkisinə, qaçqın və məcburi köçkünlük həyatını yaşamağa məruz qalmış xalqıq. Hərbi qüdrətimizi artırmağa bizim dünyada bütün dövlətlərdən daha çox haqqımız çatır. Uzun illərdir Ermənistanın yürütdüyü işğalçılıq siyasəti nəticəsində biz hələ də hüququ pozulmuş, terrora, torpaqları işğala uğramış xalq olaraq qalırıq. Belə vəziyyət daimi ola bilməz.Əlbəttə ki, Azərbaycan bununla barışa bilməz. Gec-tez öz haqqını tələb edəcək. Bu günə qədər sülh prinsiplərinin bir bəndini belə pozmayan Azərbaycan səbr etməkdədir. Lakin bu səbrin də bir sonu var. Ermənistan öz çirkin mövqeyindən əl çəkməsə, şübhəsiz ki, dövlətimiz öz hərbi qüdrətini onların üzərində sınamalı olacaq. Bu baxımdan da hərbi paradda hər il nümayiş etdirilən yeni silahlar, yeni artilleriya Azərbaycanın bu işə prinsipial yanaşdığını sübut edir və düşmən bunu əvvəl-axır dərk etməlidir. Ali Baş Komandanın çıxışında bu məsələyə toxunması da gerçəkliyi əks etdirir. Ölkə rəhbəri hərbi paraddakı nitqində dedi: “ Dağlıq Qarabağ tarixi, əzəli Azərbaycan torpağıdır. Əsrlər boyu xalqımız bu torpaqlarda yaşamış, yaratmışdır. Bu gün də Dağlıq Qarabağ Azərbaycanın ayrılmaz tərkib hissəsidir, dünya birliyi ölkəmizin ərazi bütövlüyünü tanıyır və dəstəkləyir. Bugünkü Ermənistan da tarixi Azərbaycan torpaqlarında yaradılmışdır. İrəvan xanlığı, Göyçə, Zəngəzur mahalları bizim tarixi diyarlarımızdır. Azərbaycan dövləti və xalqı Azərbaycan ərazisində ikinci erməni dövlətinin yaradılmasına heç vaxt imkan verməyəcəkdir”.

Şübhəsiz ki, Prezidentin fikrini bu cür tamamlaması Azərbaycan dövlətinin bu məsələdə hansı dərəcədə prinsipial olduğunu bu dəfə də bəyan etdi. Tarix də dəfələrlə sübut etmişdir ki, getdikcə güclənən ordusu ilə prinsipiallığı və qətiyyətliliyi bir arada olan dövlət başçısı hər zaman qələbə çalmışdır. Xüsusilə həmin dövlət haqlı olanda qələbə onun üçün bir qədər də rahat qazanılmışdır. Çünki burada mənəvi güc amilini də nəzərə almaq lazımdır. Biz bir dəfə ermənilərə imkan verdik ki, ərazimizdə dövlət yaratsınlar. Lakin onlar təşəkkür etməkdənsə, əksinə, bizə xəyanət etdilər. Daha 20 faiz torpağımızı işğal etdilər. Artıq Azərbaycan xalqının səbri tükənməkdədir. Gənclərin əksəriyyəti müharibə əhval-ruhiyyəsindədir. Torpaqlarımızı azad etmək istəyirlər. Sözsüz ki, ölkə rəhbəri bunu görür və dəyərləndirir. Gənclərimizin, ordumuzun nəyə qadir olduğunu, düşmənin də hansı səviyyədə olduğunu bilir. Lakin Prezident regionda sülhün və sabitliyin davam etməsi üçün əlindən gələni edir, Ermənistana Azərbaycan torpaqlarını müharibəsiz qaytarması üçün şans verir. Bu barədə fikrini əsaslandıran dövlət başçısı xüsusi vurğuladı ki, güclü Azərbaycan gücsüz Ermənistan ilə istənilən dildə danışa bilər. Biz sadəcə olaraq bölgədə, regionda sabitliyi qorumaq üçün hələ ki, danışıqlar yoluna üstünlük veririk.

Hərbi paradda nümayiş etdirilən silahlar da cənab Prezidentin haqlı olduğunu, ölkəmizin müdafiəsinin yaxşı təşkil edildiyini, torpaqlarımızın azad edilməsi üçün Ali Baş Komandanın bir əmrinin kifayət edəcəyi həqiqətini ortaya qoydu.

Vətənin igid övladları-hələ 42 il bundan öncə ümummilli liderimiz Heydər Əliyev tərəfindən yaradılan və Azərbaycanın hərb tarixində xüsusi çəkiyə malik olan Cəmşid Naxçıvanski adına Hərbi Liseyin kursantları, quru qoşunlarının, hərbi hava və hərbi dəniz qüvvələrinin zabit bölükləri, Heydər Əliyev adına Azərbaycan Ali Hərbi Məktəbinin , Ali Təyyarəçilik Məktəbinin, Ali Hərbi Dənizçilik Məktəbinin kursantları tribunanın önündən keçdilər. Sonra qorxmaz cəngavərləri xatırladan Xüsusi Dövlət Mühafizə Xidmətinin Milli Qvardiyasının, Milli Təhlükəsizlik Nazirliyinin, Fövqəladə Hallar Nazirliyi Mülki Müdafiə Qoşunlarının xüsusi təyinatlıları, Hərbi Dəniz Qüvvələrinin dəniz piyadaları, beynəlxalq təhlükəsizliyin qorunmasında iştirak edən sülhməramlı bölmələrimiz nizami addımlarla keçid etdilər.

Ən maraqlı anlardan biri də hərbi -texnikanın keçidi oldu. Belə ki, əvvəlcə meydana düşmənin istənilən qüvvəsini məhv etmək üçün nəzərdə tutulmuş “Gürzə”, “Bəbir” və “ Əqrəb” xüsusi avtomobilləri daxil oldu. Onların ardınca müxtəlif çaplı pulemyotlarla zənginləşdirilmiş “ Land Rover” avtomobilləri, “Kobra” şəxsi heyətin daşınmasını təmin edən transportyorlar, ZPT, “ Storm-Sofa” markalı zirehli maşınlar keçid etdi.

Müdafə sənayemizin son nailiyyətlərindən olan “Şahin”, “Qaranquş” pilotsuz uçuş aparatlarının nümayişi böyük maraq doğurdu. Sonra meydandan müdafiə sənayemizi beynəlxalq sərgilərdə uğurla təmsil edən və böyük maraqla qarşılanan “Maral” və “Maral-1” zirehli döyüş maşınları keçdi.

“Gürzə” haubitsalarının ardınca ilk dəfə hərbi parada “SANİ” minaatan sistemləri, eləcə də “ Cardom” tipli özüyeriyən minatanlar, Müdafiə Sənayesi Nazirliyinin istehsalı olan 82 millimetrlik minaatanlar daxil oldu. Ən müasir “reaktiv yaylım atəş sistemləri, “Sakarya” , “Qrad”-“1M”, “Leysan”, “Ekstra”, “Smerç”lər, “ Toçka-U” raket kompleksləri meydana daxil oldu.

Daha sonra Hərbi Hava Qüvvələrinin Hava Hücumundan Müdafiə Qoşunlarının döyüş texnikası göründü. Maksimal vurma qabiliyyəti 35 kilometrə çatdırılan “Kaman-2T” zenit-raket kompleksi, yüksək hündürlükdə uçan sürətli təyyarələri, qanadlı raketləri vurmaq üçün təyin edilmiş “ Qartal” zenit-raket kompleksinin hədəfi məhvetmə zonasının uzaq məsafəsi 250 kilometrdir. “BUK-1MB-569” zenit-raket kompleksi də ilk dəfə olaraq Azadlıq meydanında təqdim edildi. Bu kompleks bütün növ döyüş fəaliyyətlərində, uçan pilotlu, pilotsuz hava hücumu vasitələri, qanadlı və ballistik raketləri məhv etmək üçündür.

“BMP-2” piyada döyüş maşınları, “T-72M-1” tankları, piyadaların ən müasir və güclü döyüş maşını “BMP-3”-lər də həmçinin, tribunanın önündən keçdi. Böyük maraqla qarşılanan hərbi-texnikalardan biri də ağır artilleriyaya məxsus “Qvozdika” və “Akasiya” özüyeriyən haubitsalarının və keçmiş SSRİ məkanında ən nəhəng uzaqvuran və strateji təyinatlı silah olaraq tanınan “Pion” toplarının keçidi oldu.

Hərbi Dəniz Qüvvələrinə məxsus 40-dək gəmi hərbi reyddə sıralanaraq paradın möhtəşəmliyinə daha bir rəng qatdı.

Sonda Azadlıq meydanı üzərində Hərbi Hava Qüvvələri döyüş təyyarələrinin və vertolyotlarının uçuşu paraddakı coşqunu bir az da artırdı. “SU-25", “MİQ-29” hücumçu-bombardmançı təyyarələr, “Mİ-17”, “Mİ-24”, “Mİ-35M” döyüş-hücum vertolyotları da Azadlıq meydanı üzərindən keçdi.

Ən yaddaqalan isə, şübhəsiz ki, milli şahinlərimizin idarə etdiyi “SU-25” təyyarələrinin səmada Azərbaycan bayrağının üzərindəki üç rəngin təsvirini yaratması oldu.

Milli Ordumuzun möhtəşəm paradı cəmiyyətdə böyük əks-səda doğurdu. Ölkəsini dərindən sevən bütün vətəndaşlar bu məsələdə birmənalı mövqe nümayiş etdirdilər. Azərbaycan cəmiyyəti, xalqımız bu paradla növbəti dəfə özünün gələcək qələbəsinə inamını təmin etdi. Hərbi paradla bağlı bir sıra tanınmış ziyalılarımız, millət vəkillərimiz fikirlərini bizimlə bölüşdülər.

Xalq şairi Zəlimxan Yaqub:

– Ordumuzun inkişafı xalqımızın tərəqqisidir. Milli Ordumuz hazırda dünyanın sayılıb-seçilən orduları arasında yer alıb. Mən bu parada baxanda gördüm ki, əvvəlki paradlarla indiki paradın arasında böyük fərq vardır. Bu fərq həm hərbi-texniki təchizatda, həm nizam intizamda hiss olunurdu. Mən inanıram ki, bu ordu torpağımızı düşməndə əsla qoymayacaqdır. Cənab Prezident, Ali Baş Komandan İlham Əliyev və Milli Ordu birləşib torpaqlarımızı düşməndən azad edəcəklər. Bütün bu uğurlar ulu öndər Heydər Əliyevin milli quruculuq siyasətinin nəticəsidir. Bu ordu Heydər Əliyevin arzularının nəticəsidir. Onun davamıdır.O, həmişə güclü ordumuzun olmasını istəyirdi buna çalışırdı. İndiki bu mobil güclü ordumuz Prezident İlham Əliyevin başçılıq etdiyi Azərbaycan Ordusu məhz həmin arzu və istəklərin, planların məntiqi nəticəsidir. Əminəm ki, Heydər Əliyevin arzularının davamı kimi bu ordu torpaqlarımızın azad edilməsi yolunda əlindən gələni əsirgəməyəcək. Qoy Milli Ordumuz var olsun. Xalqımıza, millətimizə Ulu Tanrı yar olsun.

Milli Məclisin deputatı Zahid Oruc:

– Şübhəsiz ki, Milli Ordumuz texnoloji cəhətdən modernləşibdir. Bu, millətin müstəqil dövlət yaratmaq istəklərinə, keyfiyyətli əskər və zabit yetişdirəcəyinə bir növ cavabdır. Milli Ordumuz özünün çox yüksək səviyyəsinə gəlib çatmışdır. Biz bu prosesi davam etdirməliyik. Həm ərazi bütövlüyümüzü təmin etmək, həm də düşmənə öz gücümüzü nümayiş etdirmək üçün vacibdir. Azərbaycanın əsas hədəfi həm də Ermənistanı hərbi meydanda tək qoymaq, bundan sonra münaqişəni sülh yolu ilə həllinə nail olmaqdır. Təbii ki, zərurət yarandıqda düşməni bu gücün köməyi ilə yerində oturdulacaqdır. Mən inanıram ki, biz bu uğurlara Ali Baş Komandan, Prezident İlham Əliyevin rəhbərliyi ilə nail olacağıq.

Milli Məclisin deputatı Qənirə Paşayeva:

“26 İyun – Silahlı Qüvvələr Günümüz Ordu Günümüzdür! Həmin gün həqiqətən möhtəşəm hərbi parad oldu. Dostlara da, düşmənlərə də ölkəmizin artan gücünü bir daha göstərdi, sözün həqiqi mənasında. Həyacansız və sevincsiz izləmək qeyri-mümkün idi bu mənzərəni. Ordumuzun bayramı millətimizin bayramıdır. Dünyanın hər yerində yaşayan insanımızı Ali Baş Komandan İlham Əliyev başda olmaqla təbrik edirəm! Silahlı Qüvvələrdə xidmət edən bütün qardaş-bacılarımızı təbrik edirəm! Əminən ki, bu ordu bizə gələn bayramlarımızı işğaldan azad edəcəyimiz gözəl Dağlıq Qarabağımızda, Xankəndində, Xocalıda, Şuşada bəxş edəcəkdir. Bu hərbi parad əsl bayrama çevrildi. Bu bayram münasibəti ilə xalqımızın hər bir üzvünü təbrik edirəm.

Azərbaycan Silahlı Qüvvələrinin 95 illiyinə həsr olunmuş təntənəli hərbi paradı izlədikdən sonra insanda belə bir qəti inam yaranır ki, bu cür güclü ordusu olan dövlətin işğal altında torpağı qalmamalıdır. Və inanırıq ki, qüdrətli Azərbaycan Ordusu öz sözünü deyəcək, son qarışına qədər bütün torpaqlarımızı düşməndən azad edəcəkdir.

Anar TURAN

Xalq qəzeti.- 2013.- 29 iyun.- S. 3.