Qələmlə xalqa xidmət nümunəsi

Elçin Əfəndiyev - 70

Azərbaycan Respublikası Baş nazirinin müavini, xalq yazıçısı, professor Elçin Əfəndiyevin anadan olmasının 70 illiyi münasibətilə AMEA Ədəbiyyat İnstitutunda keçirilən elmi məclisdə görkəmli ədib, alim və dövlət xadiminin mənalı həyat yoluna, bədii-elmi yaradıcılığına, ictimai-siyasi fəaliyyətinə geniş nəzər salınıdı, məruzə və çıxışlarda yubilyarın çoxcəhətli xidmətləri açıqlandı.

Ədəbiyyat İnstitutunun direktoru vəzifəsini icra edən, AMEA-nın müxbir üzvü Teymur Kərimli Elçin Əfəndiyevi ədəbiyyatımızın son yarım əsrini dərin realizmi, xəlqiliyi ilə seçilən nəsr və dramaturgiya nümunələri ilə zənginləşdirmiş məhsuldar yazıçı, dövrün ədəbi-estetik problemlərini, yaradıcılıq meyillərini daim diqqətdə saxlayan nüfuzlu ədəbiyyatşünas, ədəbi-elmi aləmin mötəbər təşkilatçılarından biri, hökumətdə humanitar sahəyə məsul bacarıqlı rəhbər kadr kimi səciyyələndirdi.

AMEA-nın vitse-prezidenti, akademik İsa Həbibbəyli xalq yazıçısı Elçinin bədii yaradıcılığının başlıca məziyyətlərindən söz açaraq bildirdi ki, çağdaş Azərbaycanın görkəmli yazıçı-dramaturqu ədəbiyyata elmdən, bədii təcrübədən deyil, bənzərsiz istedadı ilə gəlmişdir. Elçin hekayə və povestlərində, roman və pyeslərində həmişə həyatın ağrılı tərəflərini qələmə almış, “kiçik adamlar”ı böyük ədəbiyyata gətirməklə yeni bir istiqamət açmışdır. Onun əsərləri çağdaş bədii zövqün kamilləşməsinə, yeni nəsil yazıçıların yetişməsinə də ciddi təsir göstərmişdir.

Ədəbiyyat İnstitutunun şöbə müdiri, professor Şirindil Alışanov Elçinin ədəbi-elmi yaradıcılığı barədə məruzəsində onun təbiətlə cəmiyyətin harmoniyasını yaradan, sənətkar və xalq tandeminə qovuşan ədib, yeni ədəbiyyatı yaradan aparıcı nasirlərdən biri kimi dəyərləndirdi. Natiq “Elçin teatrı”, “Elçin ədəbi tənqidi” barədə mülahizələrini söyləməklə yanaşı, ədəbiyyatşünaslıqda “elçinşünaslığın yarandığını da söylədi.

Professor Bədirxan Əhmədov Elçinin dramaturgiyası, filologiya üzrə fəlsəfə doktoru Tehran Əlişanoğlu nəsr yaradıcılığı, filologiya üzrə fəlsəfə doktoru Sara Osmanova ədəbiyyatşünaslıq fəaliyyəti barədə məruzələrlə çıxış etdilər, hər 3 sahədə ədibin bədii-estetik məziyyətlərinə geniş nəzər saldılar.

BDU-nun professoru, AMEA-nın müxbir üzvü Tofiq Hacıyev Elçinin geniş dünyagörüşlü ziyalı, bənzərsiz yazıçı olduğunu vurğuladı, onun böyük bədii-elmi potensialından söz açdı. Alim bildirdi ki, Elçin yaradıcılığının əlvan, bitkin poetikası, özünəməxsus üslubu ilə ana dilimizi zənginləşdirən nadir bir yazıçıdır. Professor Qəzənfər Paşayev isə Elçinin xalq həyatına, folklora, etnomühitə dərin bağlılığını qeyd etdi.

Elmi məclisdə mötəbər ədəbiyyatşünas Elçinin adının akademiklər sırasında olması arzusu da səsləndi. Ədəbiyyat İnstitutu həmkarlar təşkilatının sədri, filologiya elmləri doktoru, professor Asif Rüstəmli Elçinə “Fədakar alim” diplomunu təqdim etdi.

Sonda Elçin Əfəndiyev söylənən dəyərli mülahizələrə, yaradıcılığına verilən yüksək qiymətə görə məclis iştirakçılarına təşəkkürünü bildirdi, qələmi ilə bundan sonra da xalqa sədaqətlə xidmət edəcəyini söylədi.

Tahir AYDINOĞLU

Xalq qəzeti.- 2013.- 13 iyun.- S. 7.