Azərbaycan Uruqvay üçün əhəmiyyətli ölkədir

Uruqvay Şərq Respublikasının Prezidenti Xose Muxika 11 iyun tarixində ölkənin M-24 radiosuna Uruqvayın beynəlxalq əməkdaşlığı ilə bağlı fikirlərini bölüşərkən Azərbaycanı Uruqvay üçün əhəmiyyətli ölkə kimi qiymətləndirib və Azərbaycanla əməkdaşlığın perspektivlərinə toxunub. Bu barədə Trend Uruqvay mətbuatına istinadən məlumat verir.

Prezident X.Muxika bildirib: “Qısa müddət ərzində bizim üçün əhəmiyyətli ölkə olan Azərbaycanla iqtisadi münasibətlərin inkişafına başlayacağıq”.

Xatırladaq ki, bu, X.Muxikanın son aylarda Azərbaycanla münasibətlərə dair verdiyi artıq ikinci açıqlamasıdır. Belə ki, bir müddət öncə ölkəsinin yeni bazarlar axtarışında olduğu barədə danışan X.Muxika nümunə olaraq Uruqvay üçün indiyə qədər tanış olmayan Azərbaycan ilə münasibətlərin inkişafına başlandığını deyib.

O, Uruqvay məhsullarının Azərbaycana ixrac olunacağına əminliyini bildirib və bu istiqamətdə tədbirlərin həyata keçirildiyini qeyd edib.

Xalq qəzeti.- 2013.- 14 iyun.- S. 6.