Xocalı soyqırımının 21-ci ildönümü Qazax rayonunda da anılmışdır

Qazax Rayon İcra hakimiyyətində Xocalı faciəsinin 21-ci ildönümü ilə əlaqədar tədbir keçirildi.

Tədbiri giriş sözü ilə açan rayon icra hakimiyyətinin başçısı Ayaz Əsgərov erməni cəlladları tərəfindən başımıza gələn facilələrlə bağlı geniş məlumat verdi. Qeyd olundu ki, erməni qəsbkarlarının xalqımıza qarşı düşmənçiliyinin 200 illik tarixi vardır və onlar tarixin müxtəlif məqamlarında Bakıda,Şamaxıda, Qubada, Qarabağ torpağında və digər yerlərdə soyqırımı həyata keçirmişlər. Xocalı soyqırımı da həmin hadisələrin ən dəhşətlisi olmaqla təkcə Azərbaycanın deyil, bütün dünyanın tarixinə insanlıq əleyhinə törədilmiş ağır cinayət kimi daxil olmuşdur.

Xocalının soyqırımına məruz qalması tarixi həqiqətdir və danılmazdır.

Xocalı faciəsinin dünyada tanınması üçün ilk təşəbbüs ulu öndər Heydər Əliyev tərəfindən göstərilmişdir. Sonrakı illərdə isə Prezident İlham Əliyevin, ölkəmizin xaricdəki diplomatik korpuslarının, Azərbaycan diasporasının və digər təşkilatların fəaliyyəti nəticəsində bir çox dövlətlərin parlamentləri həmin qətliamı soyqırımı kimi tanıyaraq pisləmişdir.

Çıxış edənlər Xocalı soyqırımı ilə bağlı fikir və mülahizərələrini söylədilər və ölkə Prezidenti İlham Əliyev tərəfindən bu soyqırımın bütün dünya dövlətləri tərəfindən tanınması üçün görülmüş işlərdən danışdılar.

Tədbirin sonunda Xocalı şəhidlərinin xatirəsi bir dəqiqəlik sükutla yad edildi.

Hamlet QASIMOV

Xalq qəzeti.- 2013.- 2 mart.- S. 6.