Xocalı şəhər 1 saylı uşaq musiqi məktəbinə Bülbülün həyat və yaradıcılığına aid kitablar hədiyyə edilmişdir

Azərbaycan musiqisinin korifey sənətkarı Bülbülün həyat yoldaşı Adilə Məmmədova Xocalı şəhər 1 saylı uşaq musiqi məktəbində olmuşdur. O, görkəmli vokal ustası, tanınmış musiqi xadimi Bülbülün həyat və yaradıcılığı, eləcə də onun ev muzeyi ilə bağlı kitabları musiqi məktəbinə hədiyyə etmişdir.

Tədbirdə çıxış edənlər sənətkarın ömür-gün yoldaşının bu nəcib təşəbbüsünü alqışlayaraq məktəbin müəllim və şagird heyəti adından ona təşəkkürünü bildirmişlər. Mərasimdə, həmçinin Bülbülün həyat və yaradıcılığına nəzər salınmış, onun Azərbaycan musiqi sənətinə verdiyi misilsiz töhfələrdən söhbət açılmışdır. Qeyd olunmuşdur ki, kiçik yaşlarından məharətli zəngulələrinə görə xalq tərəfindən “Bülbül” adı verilmiş korifey sənətkar bənzərsiz səsi, özünəməxsus ifa tərzi ilə Azərbaycan musiqi xəzinəsinə mizilsiz töhfələr vermişdir. Onun teatr səhnəsindəki ilk addımı Məşədi Cəmil Əmirovun 1916-cı ildə Gəncədə tamaşaya qoyulmuş “Seyfəl-mülk” operası ilə bağlıdır. Bülbül 1920-ci ildən Birləşmiş Dövlət Teatrı opera truppasının (1924-cü ildən Azərbaycan Opera və Balet Teatrı) solisti olmuş, ilk illərdə Üzeyir Hacıbəyovun “Leyli və Məcnun”, “Əsli və Kərəm”, Zülfüqar Hacıbəyovun “Aşıq Qərib” operalarında İbn Səlam, Kərəm, Qərib rollarım oynamışdır. Geniş diapazonlu, gözəl, məlahətli, axıcı səsi olan müğənni böyük aktyorluq istedadına malik olmuşdur. O, yaratdığı obrazların xarakterini,daxili aləmini tamaşaçılara realist boyalarla çatdıra bilmişdir. Koroğlu, Əsgər (“Koroğlu”, “Arşın mal alan”, Ü.Hacıbəyov), Qərib (“Şahsənəm”, R.Qliyer), Əlyar (“Nərgiz”, M.Maqomayev), Nizami (“Nizami”, Ə.Bədəlbəyli), Fərhad (“Xosrov və Şirin” Niyazi), Aslan (“Vətən”, Q.Qarayev və C.Hacıyev) və.s. Koroğlu partiyası Bülbülün opera yaradıcılığının zirvəsidir.

Bülbül Azərbaycan xalq mahnılarmı, təsnifləri böyük sənətkarlıqla ifa etmişdir. Azərbaycan bəstəkarlarının kamera-vokal əsərlərinin populyarlaşmasında onun rolu əvəzsizdir. Bülbül Asəf Zeynallının “Ölkəm”, Üzeyir bəy Hacıbəyovun “Sənsiz”, “Sevgili canan” romanslarının ilk ifaçısı olmuş və zəngin boyalarla təkrarolunmaz musiqi obrazları yaratmışdır. Onun repertuarında Qərbi Avropa və rus klassiklərinin əsərləri də əhəmiyyətli yer tutmuşdur. O da bildirilmişdir ki, Bülbülün yaradıcılığı Azərbaycan vokal sənətinin inkişafında mühüm rol oynamışdır. Geniş səs imkanlarına malik olan müğənninin ifaçılığında milli vokal üslubu ilə italyan vokal ənənələri üzvi şəkildə birləşmişdir. O, Azərbaycan vokal musiqi ənənələrinin tədqiqi, rus və Avropa opera mədəniyyəti ilə bu ənənələrin sintezi və sair məsələlərə aid bir çox əsərin müəllifidir.

Xatırladaq ki, Xocalı şəhər 1 saylı uşaq musiqi məktəbi 1990-cı ildə fəaliyyətə başlamışdır. 1992-ci ildə məlum soyqırımı hadisəsindən sonra məktəb Xocalı sakinlərinin ən çox məskunlaşdıqları Naftalan şəhərində fəaliyyətini uyğunlaşdırılmış binada davam etdirmişdir. Hazırda burada səs, tar, pianino, kamança, nağara, qarmon ixtisasları üzrə musiqi dərsləri tədris olunur. Fəaliyyət göstərdiyi illərdə bu təhsil ocağını 166 nəfər bitirmişdir ki, onların da 23 nəfəri ali və orta ixtisas musiqi məktəblərinə daxil olmuşdur. Məktəbin şagirdləri Naftalan şəhərindəki sanatoriyalarda istirahət edən sakinlər və ətrafdakı hərbi hissələrdəki əsgərlər qarşısında bayram günlərində konsert proqramı ilə çıxış etmişlər. Buna görə də məktəb sanatoriyanın rəhbərliyi və hərbi hissələrin komandanlığı tərəfindən dəfələrlə “Fəxri fərman”la təltif olunmuşdur. Bundan əlavə, Xocalı şəhər 1 saylı musiqi məktəbi Azərbaycan Respublikası Qaçqın və Məcburi Köçkünlərin İşləri üzrə Dövlət Komitəsinin təşkilatçılığı ilə 2001-ci ildə keçirilən “Qarabağ pərvanələri” festivalındakı nümunəvi çıxışlarına görə “Fəxri fərman” və xüsusi diploma layiq görülmüşdür.

2007 və 2009-cu illərdə ölkəmizin musiqi məktəblərinin uşaq xor kollektivlərinin V və VI respublika müsabiqəsindəki nümunəvi və fəal çıxışına görə məktəbin kollektivi fəxri fərmanlarla təltif olunmuşdur. 2012-ci ildə isə adıçəkilən musiqi məktəbi Goranboy şəhərində salınmış yeni köçkün şəhərciyində inşa olunmuş müasir tipli binaya köçürülmüşdür. Musiqi məktəbinin açılışında məktəbin xor kollektivi Azərbaycan Respublikasının Prezidenti İlham Əliyevin qarşılanmasında yüksək səviyyədə çıxış etmiş və tərifə layiq görülmüşdür. Hazırda məktəbdə 130 şagird musiqi təhsili alır. Burada çalışan 37 müəllim onlara musiqinin sirlərini öyrədir.

Xalq qəzeti.- 2013.-5 mart.- S. 4.